عيادة أسنان المنتدى (للاستشارة)

[dolly13]

بص يا دكتور
الدكتور موت الاعصاب عتدى وبعدين عمل فجوة كبيرة قوى فى الضرس وسمكه بقى قليل جدا
بعد كدة عملى حشو مؤقت وقال هانعمل كراون مش حشو وطبعا انا مش عارفة الفرق
المهم الكراون ده لونه زى الاسنان بالظبط ولزقه بمادة بيضاء ولها طعم وريحة مميزة جدا
الجزء الخلفى من الضرس فوق الكراون ده اتكسر ويقة فيه فراغ من الخلف فوق الحشو ده
هى دى الحالة بالظبط ودلوقتى بدا الطعام يدخل فى الجزء ده وانا مش عارفة ايه الحل
والموضوع اتكلف تقريبا 750 جنيه تبع نقابة المهندسين لو ده هايساعد حضرتك فى معرفة الفرق

[MOSTAFABASAL]

برضوا ازاي الجزء الخلفى من الضرس فوق الكراون ده اتكسر
الضرس ده مش متغطي بكراون ايه اللي هيكسروا ولو اللي اتكسر الكفر اللي على الكراون من فوق فده يا اما بورسلين تعبان او حاجه اسمها كاست ودي نوع اقل من البورسلين في الكفاءه ولازم يا اما تتكسر او لونها يغير مع الوقت و يارب اكون قدرت اوصل

[hossam_elwani]

عايز اعمل تقويم لاسنانى وانا عمرى 30 سنه هل العمر مرتبط بالتقويم ؟ ومين افضل دكتور للتقويم فى الاسكندريه؟؟

[MOSTAFABASAL]

يمكن عمل تقويم اسنان ولكن النتيجه لن تكون مرضيه كما لو كان اتعمل و انت صغير كما ان نسبه الارتجاع عاليه جدا و ستحتاج لفتره تثبيت كبيره
في دكاتره كتير في اسكندريه
ممكن تروح للدكتور حسين جرانه اعتقد عيادته في كليوباترا على ما اتذكر و فيه كذا دكتور تاني من ضمنهم الدكتور سمير ابو العزم وده اللي عمل التقويم لانغام المطربه بس مش غارف لسه شغال ولا لا لاني سمعت انوا جالوا شلل
ممكن تروح الكليه و تعمله تبع العلاج الاقتصادي بس بيطولوا شويه

[hossam_elwani]

طيب وايه رايك فى الدكتور وليد الكنانى

[MOSTAFABASAL]

كويس اوي بس حراق شويه وواتيكيتي حبتين تلاته 4 لدرجه انك ممكن تتخنق
شفتلوا حاله كانت مكلكعه اوي ظبتها و خلاها زي الفل

[night_phoenix]

مع احترامي التام يا د احمد انا مش عاجبني موضوع العياده في المنتدي بالمنظر ده او منظر اخر
انا اول مرة اشوفها هنا و شفتها في اكتر من منتدي و برضه قلت رايي
انا شايف انه مش لطيف الموضوع ده. مش عارف بس لو المريض يشرف العياده و يتكشف عليه مش افضل؟؟؟ حتي الطبيب يقدر يحكم و الاطباء فاهمين كويس ان الكشف الاكلينيكي هوة الاهم في التشخيص وحتي لو كانت الهدف هوة الاستشارة فحسب معلوماتي المتواضعه ان حتي الاستشارة محتاجه كشف و تحليل للحاله
ولا راي الساده الافاضل ايه؟؟
يعني انا قريت كام تعليق يعني يميلوا للفكاهه اكتر وشويه شايف ان الطب بفروعه جد اكتر شويه
كامل احترامي للدكتور احمد و احترامي لكل الاعضاء
وطبعا ده رايي الخاص جدا
وغير ملزم لاي حد

[dramir1]

ربنا يجازيك كل خير .

[night_phoenix]

ربنا يجازيك كل خير .

هل راي حضرتك معايا؟

[MOSTAFABASAL]

انا دكتور مصطفى علقت على كام حاله باعته استشارات هنا
طبعا لازم المريض اولا و اخيرا يروح لعياده دكتور عشان الكشف الشفوي ده زي قلته
بس في مجال الاسنان بيبقى فيه شويه حاجات تعتبر ثوابت تقريبيه زي مثلا موضوع النزف اللي من اللثه فده سبب رئيسي ليه الجير المتراكم على الاسنان ودي حاجه بديهيه لاي طبيب اسنان ممكن يكون المريض معندوش جير و فيه اسباب تانيه بس نقدر نقول ان نسبه 90 في الميه من السبب ده
فأنا شايف ان من خلال المنتدي ممكن تشخص حاله صاحبها غافل عنها و احنا كده بدأنا معاه اول سلمه في العلاج ودي حاجه برضوا بنعملها لوجه الله تعالي و ياريت ربنا يحطها في ميزان حسناتنا
ولو انا شايف ان شرح المريض غير وافي بقوله لازم تروح لعياده طبيب عشان يقدر يشخص حالتك كويس
لان زي ما فيه ثوابت تقريبيه في حاجات فيها لبس كتير و خطير زي مثلا تقرح في الفم و المريض ساكت عنه ممكن يكون سرطان و المريض ميعرفش ومن خلال الكشف بيبان طبعا
ارجع و اقولك تاني ان لازم طبعا المريض يروح لعياده دكتور زانا محترم وجهة نظرك دي جدا بس ادينا بنحاول نصلح عادات .مفاهيم .فكر خاطئ عند بعض الناس وممكن نكون سبب في علاجهم

[kdosoki]

زوجتى كانت تشتكى الما فى الجانب الايسر من الفك
ذهبنا الى الدكتور
وقال تحتاج الى علاج لثة + خلع جراحى لضرس العقل
المهم عملنا اشعة بانوراما ووجد انه فى درس محشو قبل ذلك ويوجد سوس وصل الى العصب من تحت الحشو
ومع ذلك أصر الدكتور انه يخلع الضرس ( ضرس العقل )
المهم بعد ماخلع الضرس قال انه ده مش ضرس العقل ده ضرس قبله وكان عامل مشاكل
بصراحة انا شايف انه مكنش ينفع يخلع الضرس ده وبالاخص لما زوجتى استمر عندها نفس الالم حتى بعد الخلع الجراحى
وكنت بقول انه ممكن الالم ناتج من الخياطة ( 3 غرز)
بس بعد ما بدأنا علاج العصب للضرس اللى كان محشى الالم بدأ يقل
يبقى كده الدكتور خلع ضرس غلط ولا ايه
وانا ممكن اتأكد ازاى
وممكن اعمل ايه مع الدكتور
على فكرة هو أستاذ فى جامعة القاهرة
وحاطط تقريبا فى العيادة اكثر من 30 شهادة على الحيطة ودى مش مبالغة
وممكن اقول اسمه

[MOSTAFABASAL]

انا مش بدافع عن الدكتور ولا حاجه
انا بتكلم من جهه حياديه
الدكتور عمل الصح وبدأ بدايه صح (انوا طلب اشعه بانوراما) حتى لو المدام ما خفتش على طول بس هوه اتصرف اكيد وفقا للحاله الصحيه لزوجتك
ساعات كتير الضرس لما بيكون معووج بيحشر اكل بينه وبين اللي جنبه و بالتالي الاتنين بيسوسوا و بيعملوا مشاكل في اللثه ده غير الالم المترتب على التسويس
فواضح من كلامك ان الضرس كان مايل اوي لدرجه انوا عامل مشكله في الضرس السابق ليه وفي حاله زي دي لازم سبب المشكله الرئيسي يتشال عشان تعرف تعالج التاني و كان فيه حل تاني بس طبعا مش واقعي انوا يسيب الضرس المعووج و يخلع المحشي اللي عامل الم بس المحصله الاخيره ان فضل ضرس معووج و مع مرور الايام بيميل اكتر لدرجه ان ممكن تلاقي الجذر بتاعه خرج من ناحيه و لسه متعلق من ناحيه تانيه
وبعدين مش المدام خفت ولا ايه؟
يبقى اكيد يشكر

[kdosoki]

هو الحمد لله هى احسن بكتيير بس لسه اخر جلسة
بتاعت الحشو الدائم
والدكتور كان مصر يعمل طربوش
بس بصراحة غالى جدا
فقولتله مش ضرورى الطربوش ونعمل حشو بلون السنه

[MOSTAFABASAL]

نصيحه لوجه الله اعمل الطربوش حتى لو غالي لانك كده بتحمى الضرس من الكسر
قانون عام
اي ضرس يعالج حشو عصب يتعمله طربوش ولو مش قادر على تمن البورسلين اعمله معدن بس من غير بورسلين وده ارخص بكتيييير وكده كده مش هيبان لانو ورا ولو بان الناس هتفتكروا حشو بلاتين

[kdosoki]

ربنا يكرمك يا دكتور جزاك الله خيرا