في رايي حاجتين مهمين
اولاً التخلص من السيارات اللي سنة صنعها قديمة
وأقصد بـ قديمة مش موديلات التمانينات والتسعينات لكن يبقى لها حد معين زي مثلاً ما نقول كل السيارات اللي تاريخ صنعها قبل 1975
ثانياً منع الميكروباسات وسيارات النقل الثقيل من السير أعلى الكباري
وثالثاُ تفعيل قوانين المرور بحيث تطبق على الكل دون تمييز ولا وساطة

وطبعاً لو اعتبرنا اول نقطة وتانية نقطة ممكن تنفيذهم انا شايف في التالتة شبه استحالة

المشكلة المرورية في مصر هيا مشكلة نفسية
فسائق العيون ينظر للتاكسي على انه حشرة ولازم يوسع له السكة
وسائق التاكسي ينظر لسائقي الميكروباص على انهم بيقطعو عليه و بيحربوه في عيشه
وسائق الميكروباص ناقم على الاتنين ويلعن الايام التي جعلت كل من هب و دب عنده عربية !
فكله frustrated وكله عاوز يزنق التاني و يوصل قبله
فبينشاء عنه ظاهرة التلعبك المروري

مبدأيا الأمل من عند ربنا لأن بجد كل يوم عمالة من أسوأ لأسوأ و محدش عايز يحلها رغم إن الحلول متاحة بس لأسباب أمنية و لأسباب فسادية محدش عايز يحل

شوف هاقولك:

1- تعديل قانون المرور و جعله قانون صارم عقوباته قاسية رادعه

2- قبل تعديله لازم نحط قانون مكافحة فساد وحدات المرور و أمناء الشرطة و نعمل جهاز كامل مهمته هى الرقابة على المرور

3- ممكن أوى نجيب شركة محترمة تمسك موضوع التخطيط و النقل و يكون عليها رقابة محترمة برده

4- عمل تفتيش مفاجئ و دورى فى الشوارع على أى سيارة مخالفة لشروط الأمن و المتانة تتسحب ويتم عمل تقدير لتكلفة إصلاحها و إذا كان عايز صاحبها يستلمها يروح يستلمها بدون نمر ولا رخص و يدفع غرامة

5- أى سيارة راكنة صف تانى تتشال و لو كانت بتاعت وزير الداخلية

6- سحب كل الأوتوبيسات و كل وسائل المواصلات القديمة و فتح قسم جديد فى شركة النصر تحت إدارة أجنبية من شركة عالمية لتجديد و ترميم السيارات المتهالكة أو تحويلها لخردة أيهما أوفر

7- منع وسائل النقل الثقيل من صعود كوبرى أكتوبر

8- عدم إعطاء تراخيص بناء بأى شكل من الأشكال داخل القاهرة منذ الآن و حتى عام 2030 و فى المقابل أى أرض فضاء تؤجر من أصحابها و يتم تحويلها لجراج متعدد الطوابق على أن يكون تكلفة البناء على شركة مسؤلة عن إدارة و إقامة الجراجات و فقط و فى المقابل صاحب الأرض تعطى له الدولة أرض بديلة فى أحد المناطق الجديدة التى يختارها و يكون له نسبة من أرباح هذا الجراج

9- يتم تكهين أى سيارة فات على عمرها أكثر من 25 عام مع إعطاء صاحبها إعفاء جمركى كامل على سيارة أخرى يتم إستيردها و عمرها لا يزيد على 8 أعوام و سعة الموتور لا تزيد على 1600 سىسى

10- يتم وضع ضوابط صارمة على الورش و مراكز الخدمة للسيارات و معايير جودة صارمة

11- إنشاء مدينتين كاملتين للصيانة و لقطع الغيار

12- إلغاء مدارس المرور الحالية و إنشاء مدارس جديدة صارمة مشابهة لمدارس التعليم فى أمريكا ذات قواعد صارمة

13- تدريس سلوكيات القيادة السليمة فى المدارس الإبتدائى و الإعدادى

14- إنشاء جهاز رقابى كامل على مرور و شوارع القاهرة بكاميرات المراقبة و من خلاله يتم محاسبة أى سائق أرعن أو أمين شرطة متسيب و أيضا توجييه الطرق نحو الطرق الأقل إزدحاما

15- عمل محطات للميكروباس و الباص و التاكسى و منعهم من الوقوف فى أى مكان بمخالفات رادعه و كله متصور


- بجد مش فاكر حاجة تانى دلوقت بس دوول إللى جم على بالى بس إحنا نطبق نصهم

أستاذ memo_hefnawy إنت جبت من الاخر

memo_hefnawy : مش ممك!!!!! ، انت اكنك قرأت أفكاري .....

المهم بقا اللي ينفذ ....

يجماعة الحل بسيط جدا نمسك سواقين الميكروباص والتاكسي نرقعهم علقة سخنة لحد أما يعرفوا إن الله حق ويسوقوا زي الناس بعد كده
كل شوية تلاقي التاكسي يقف ومشي 100 مرة كل مية متر ويركب زبون من بين 100 زبون تانيين تم رفضهم وعامل قلق
وسواق الميكروباص مشغل العنب وقاعد بيعمل غرز على سرعة 2 كيلو !!! وأما زبون يقولو (على جنمب ياسطى) تلاقي طار من أقصى الشمال إلى اليمين بدون مايعبر حد من إلى وراه

أما الحريم فالحل إنه يتم سحب رخصهم ومنعهم من السواقة

وبكده البلد حتتحسن والزحمة حتخف وعربيتك حتقعد 10 سنين من غير ماتتخدش حتى

المشكله اخوانى مش فى الحلول لان الحلول كثيره وموجوده لكن المشكله مين اللى عنده استعداد ينفذ الحلول ؟

الشعب ؟

لااعتقد

الحكومه ؟

برده لااعتقد

يبقى من الاخر مافيش حل ومافيش فايده

حضرتك بتتكلم زي ما يكون باقي السواقين ملائكة !!!!!!!!!!!!!!!!!
يا أستاذ شاهين بنز
كل سواقين مصر ( 99.9 % ) ......... بيسوقوا برعونة رهيبة و لا أخلاق و لا قواعد و لا أي شئ
و مش في السواقة بس ........... في شتى مجالات الحياة
و أنا أتفق مع رأي الدكتور أبراهيم سعد ............ و رأي الأستاذ حفناوي أيضا
يعني الأراء بتاعة الأستاذ حفناوي ممتازة و تقريبا ده هو اللي بيتعمل خارج البلاد
و رأي الدكتور ابراهيم سعد ....... بيقول أنه مفيش فايدة و أنا أتفق معه تماما
لأن الشعب همجي و مش عايز يتغير .......... و الحكومة ودن من طين وودن من عجين
فأحسن حل هو أنه لا يوجد حل ......... لأن نظام مصر أنه لا يوجد نظام و هذا هو النظام المعمول به في مصر ( انعدام النظام هو نظام مصر )
المشكلة في الناس أكتر من الحكومة ............ و لنا الله
و لا حول و لا قوة إلا بالله العلي العظيم

مانا عارف والله وبدوق المر منهم كل يوم وتلاقي لو خبط واحد منهم سواء كان الحق ليه ولا عليه كبير ولا صغير بيشتم برضه ولسانه طوله مترين
بس أنا قصدي أن سواقين الميكروباص والتكاسي والسيدات عاملين النسبة الأكبر في الزحمة ومشاكل السواقة في مصر

بسم الله ماشاء الله الكل قال الحل بدون معرفة السبب عشان نحل حاجة لازم تشوف السبب زيادة الناس بصورة مخيفة على مساحة ارض معينة قد لا تزيد او تزيد زيادة غير قابل للزيادة السكانية يبقى اول سبب هو زيادة الناس السبب الثانى الناس الى بتدخل القاهرة كل يوم دول اد اية 2مليون بالصلاة النبى
دول هما السبب عشان نعالج دة يبقى ازاى اولا تحديد عدد سكان القاهرة من 15مليون اخر تقرير الى 7 او 8 مليون دول اللى يقيموا فيها طب وبالباقى يتم نقلهم بصورة كريمة مع توفير كافة احتياجات المعيشة فى المدن الجديدة التى تكون بعضعها مهجورة بذلك تخف من زحام القاهرة من ناحية وهتبنى مجتمع جديد منتج وينافس وهو انا تطلع من القاهرة من شوية دة الجزء الاول من الخطة التانى انة لازم يعيد تختيط الاماكن العشوائية ثالثا منع ترخيص السيارات الى اقل من موديل 95 مع تخفيض الضريبة الجمروكية واستبدال السيارات القديمة باخرى جديدة بتسيهلات مخفضة جدا لاصحاب السيارات القديمة رابعا الغاء المركزية فى الحكم ودة اللى هو ان معظم اللى 2 مليون اللى معظمهم بيدخلوا القاهرة يوميا عشان يخلصوا حاجاتهم لا يبقى مفيش مركزية والعمل باللامركزية اللى هتيح للناس دول انهم يخلصوا حاجاتهم من بلادهم وبذلك هيقل عدد الناس كتير والشوارع ترجع تانى مافيهاش حد والمرور يبقى زى المياة مافيش فية اى مشكلة و ماءماءماءماء كل سنة وانتوا طيبين العيد الكبير قرب خالص

اخوانى الموضوع ده طرح اكثر من مره والكل ابدى رأيه وان كان هناك اختلاف فيها لكن مش مشكله

الحلول كثيره جدا لكن زى ماذكرت قبل كده مين اللى هينفذ ؟

لاالشعب يقدر ينفذ ولاالحكومه عايزه تنفذ ؟

يبقى ايه الحل ؟

اختلف معك استاذ مصرواى فى نقطتين
1- تكهيين العربيات القديمه لانك بكده بتحكم على اكثر من 75 % من فئات الشعب اللى مهضوم حقها وكانك بتحكم عليهم بالموت
فقبل ماتقول كده لازم توفر ليهم البديل وتعوضهم عن هذه السيارات باخرى جديده مثلا او اى حل اخر

2- زياده البنزين بشكل كبير وده مصيبه سوداء لانك بكده بتولع فى البلد كلها لان سيادتك عارف ان نتيجه كده زياده جنونيه فى كافه اسعار كل شئ فى مصر يعنى كانك بتولع شراره النهايه لاحتراق القاهره


اخى سيكا اختلف معك فى نقطه صغيره فقط وهى السكان فعمر زياده السكان ابدا ماكانت مشكله بالعكس ده فيها حل المشكله

وانا هااقترح بعض الحلول مع انى عارف ومتأكد ان مافيش شئ هايتنفذ وكل كلامنا ده تنفيس مش اكثر والشعب فى وادى والحكومه فى وادى وربنا يعوض علينا بشعب جديد وحكومه جديده فى الاجيال القادمه ان شاء الله وهو ده الحل فعلشان كده ياريت كل واحد يفهم الكلام ده لابنائه علشان لما يكبروا ينفذوه


اقتراحى هو :

1- وضع قوانين صارمه لاى مخالفه مروريه وبشرط ان تنطبق على الكبير قبل الصغير وانا عارف ان ده مش هيحصل لكن انا باحزن لما عبدالله جور مسك حكم تركيا وصمم انه يقف بموكبه فى احد اشارات المرور وكانت هذه اول لفته منه عند توليه الحكم وانا بصراحه قد ماانا سعدت بيه حزنت على حالنا

2-ياريت بقى كل واحد من الكبار اللى كل شويه يقرفنا بكلمه انت مش عرف انا مين يتنيل على عينه ويكون زيه زى الفقير ان كنا فعلا عايزين نحل المشكله وماينساش ان هيجى اليوم اللى يقابل ربه ويقف زى الصرصار يتمنى ان حد يموته بشبشب من شده هول يوم القيامه فهل سيقول لربنا انت مش عارف انا مين

3-العداله الاجتماعيه للجميع بمعنى ان لو كل مواطن خد حقه والفقير قبل الغنى مش هنلاقى عسكرى المرور اللى فارد ايده لكل قائد سياره ياخد منه جنيه والا 0000000 ؟

4-لما يتم اصلاح مدارس القياده وتنفيذ التعاليم جيدا مش هنلاقى واحد متهور بسيارته بيضرب واحد غلبان وهتقل حوادث السرعه

5-لما نيجى نطلع الرخص ياريت نراعى ضميرنا مش واحد يستحق انه ياخدها ويسقط وواحد مايستحق ويطلعها علشان هو دافع فلوس او ابن مسؤل كبير

6-بخصوص زحام المدن الكبرى والسيارات القديمه لدى بعض الاقتراحات بخصوصها اما ان تعدم وتقوم الحكومه ان كانت عايزه فعلا تحل بتعويض اصحابها ليشتروا سيارات جديده او ان يتم فحصها واعدام مايستحق فقط وتعويض صاحبها باخرى او مبلغ من المال اما مايصلح منها فله خيارين
اما ان يبقى مع صاحب السياره او ان يبيعها لاى شخص بالاقاليم حيث يتم عمل سوق صغير بالقاهره خاص فقط بالاقاليم ومن اراد احد من الاقاليم شراء سياره مستعمله ياتى هذا السوق ليشترى حاجته وبكده نكون ضربنا عصفورين بحجر تخلصنا من القديم فى اماكن لايوجد بها مشكله زحاميه وفى نفس الوقت لم نعدم السياره

7-بخصوص الزياده السكانيه دى نعمه من عند ربنا لكن ازاى نستغلها اقول لكم
اولا ياريت بقى ارجوكم كفايه بقى شويه الحراميه اللى نازلين على الفاضى والمليان يغتصبوا اراضى الخريجين الغلابه بعد ماصلحوها وتعبوا فيها ياخدوها هم على الجاهز وينطرد الشباب الغلبان بكفى حنين وانتم اكيد عارفين مين دول

ثانيا اصحاب النفوذ اللى بيشتروا اراضى الدوله بملاليم فى حين انها تستحق اكثر من ذلك الا يستحق هذه الارض بهذا السعر هذه الملايين من شباب مصر العاطل اللى مش لاقى فرصه عمل

فى كثير من المحافظات يقوم المحافظ وكبار السلطه فور اول توليه لمنصبه بوضع يده على اكبر قطعه ارض عنوه وكل سنه وانت طيب فى املاك الدوله وفى ستين داهيه الشباب مش مهم المهم ان الكبار يعيشوا

طيب ليه فى كل محافظه نقوم بتوزيع مساحات من الارض للشباب اللى عايز يستصلحها او عايز يعمل مشروع

وتصدقوا بالله انا قبل مااتعين حفيت وطلعت كل اوراق الدنيا وصرفت مش هااقول لكم كام وفى النهايه بعد كل ده ماخدتش حاجه الى ان مرت 10 سنوات من تعيينى واخيرا اتعيين بمجهود شخصى فى اعلان خارج القوى العامله يبقى الشباب اللى عايز حته ارض او مشروع يروح فين ؟

8-طيب اهم مشكله فى مصر وهى زحام القاهره ازاى نحلها اقول لكم

يجب ان يكون بكل محافظه مؤسسه حكوميه مثل التى توجد بمصر او بمعنى اصح فرع لها بالمحافظه واعتقد دلوقت شئ سهل جدا بعد انتشار الحاسب والاتصال عبر الشبكات والانترنت يعنى فى امكانى ان احصل على اى معلومه وانا فى مكانى دون سفر
يبقى مثلا لو حد عايز يسافر القاهره ويعطل نفسه يوم كامل علشان يطلع مثلا ورقه صغيره هيطلعها من بلده وهو مرتاح وشوفوا بقى انتم كام مليون يوميا فى مصر بيعمل كده ولو تم تنفيذ ذلك ستصبح القاهره فى الزحام تقريبا اكثر من النصف

ايضا التوسع فى انشاء مدن جديده مع ارفاق بعض فروع المصالح بها وهذا سيخلق مجتمع جديد وفرص عمل جديده للشباب وفى نفس الوقت سيختفى زحام القاهره

التوسع فى الثروه الاولى لمصر وهى الزراعه اللى المفروض انها الحاجه الاساسيه لينا بما اننا فشلنا ان نكون دوله صناعيه ولكن للاسف ماحدث العكس قتلنا اهم محصول (الذهب الابيض) بعد ان تخلصنا من اهم صنف القطن طويل التيله وصدرناه لاسرائيل وامريكا وخدنا منها صنف من اسوأ مايمكن واديكم شايفين خيبتنا التقيله دلوقت تحولنا من المركز الاول على مستوى العالم الى المركز الرابع والسادس وفقدنا اسمنا على مستوى العالم
يبقى لازم نسترد مكانتنا لكن ازاى والدوله دلوقت بتظلم الفلاح بان بتجعله يتجه الى محاصيل تافهه ثانويه مش رئيسيه علشان هو عايز يكسب ويعيش لانه لو زرع القمح والقطن والارز هيخسر لان تكاليف انتاجه عاليه جدا والدوله مش موفره له اى مساعده زى زمان

يبقى النهوض بالثروه الزراعيه واستعاده المحاصيل الاساسيه كالقطن طويل التيله والقمح اللى بنستورده دلوقت من السعوديه تصوروا اللى ماعندهمش نيل وكمان امريكا بترمى لنا كميه من القمح المزروع على اراضى تجارب نوويه بهدف التخلص من محتويات التربه من الاشعاعات النوويه وتنظيفها وبدلا من ان ترمى المحصول بالبحر وتعدمه سيادتها بتتبجح علينا وبتمن عليها بيه كمنحه فى حين هو محنه مش منحه لانه بيدمر الشعب وبيسرطنه لكن تقول ايه الشعب بياكله ومضطر وكما مش عراف يحصل عليه
يبقى ليه مايحصلش كفايه ذاتيه واحنا عندنا الارض بمساحات شاسعه جدا وعندنا نيل وعندنا الايدى العامله الشباب اللى مش لاقى شغل ليه مانزرعش كفايتنا ونقى انفسنا شر الامراض وسؤال اللئيم

فيه بقى مشروع زراعى كويس جدا للناس اللى عايزه تنتج وتوفر تكاليف استصلاح الاراضى وتنتج بسرعه وهو مشروع انتاج المحاصيل على قش الارز

والصور دى توضح كلامى






حيث انه للعلم فقط الصين تنتج 52 مليون طن قش ارز سنويا و بتصنعهم بالكامل و اليابان بتستورد قش الارز لتصنيعه من الدول المجاورة و مصر بتنتج 30 مليون طن قش ارز و بتحرقهم والاخر تقول لك مشكله السحابه السوداء بالذمه ده كلام ؟ دا حتى ماصدورهمش لليابان شوفوا الخيبه

ليه مانقومش بكبس هذه الكميه من القش وتوزيعها على الخريجين للزراعه عليها ومعلش مش هاقدر اتكلم بتفاصيل اكثر عن هذا الموضوع لان المكان والوقت لايسمح به فى موضوعنا هذا لكن عايز اقول ان الحلول موجوده وممتازه جدا جدا وموفره ومش عايزه فلوس كثير وانتاجها ممتاز

يبقى احنا دلوقت عملنا تقليل لعدد السكان من القاهره ونقلهم الى مدن جديده واراضى جديده ومشاريع جديده
وبنفس الوقت استريحنا من ناس كانت بتيجى يوميا بالملايين علشان تقضى مصالحها ووفرنا لهم المصالح فى بلدهم وخففنا الزحام

طبعا هذه بعض الافكار وليس كلها وانا تكلمت فقط عن بعض الحلول لمشكله المرور والزحام فقط

وهذا لايعنى ان هناك حلول اخرى بالعكس يوجد المزيد والمزيد وهناك اشياء اخرى خاصه بالتعليم والتوظيف والعمل وقواعده والسياحه والاقتصاد وقناه السويس والبترول والغاز ووووووو

لكن ليس مجاله الان

لكن انا فقط عايز اسأل سؤال واحد

مين يقدر ينفذ ومين عنده استعداد يحل معانا ؟

والسؤال موجه الى كل افراد الشعب
واكل افراد الحكومه

ومنتظر الرد فى اقرب فرصه ان كنا عاوزين فعلا نحل

استاذ حفناوي و استاذ ابراهيم سعد حضراتكم حليتو المشكلة باقتراحاتكم المنطقية و العلمية و العملية
المشكلة مش معضلة ولا حاجة احنا بس اللي بنحب دايما نصعب المور علي نفسنا
الحكومة كان في امكانها ان تبدا في حل المشكلة من بداية الثمانينيات بإنشاء مدن جديدة و تجمعات عمرانية جديدة سواء كانت صناعية زي اكتوبر و العاشر و السادات
او ان تكون تجمعات زراعية و طبعا احنا عندنا اراضي كتير مش لاقية حد يزرعها
الحكومة خلت كل حاجة في القاهرة فطبيعي جدا ان تصبح القاهرة بالشكل الحالي
لما يبقي عندك 25 محافظة اهليها بسافروا القاهرة يوميا عشان تخليص مصالح شوف حضرتم الوقت والمجهود و الفلوس اللي بضيع في العملية المقرفة دي
ثانيا كل حاجة بتتعمل في القاهرة و بس و تعالي شوف باقي المحافظات بنية تحتية زي الزفت و مستوي معيشة منخفض و خدمات قليلة جدا
يا جماعة احنا عندنا في الصعيد اللي بيتعب و بيمرض بيسافروا القاهرة او اسيوط عشان يعالجوه دا اسمه كلام والنبي
لازم الحكومة تطلع بره القاهرة و تشوف غيرها عشان تجزب الناس لها يعني عندك الصعيد و سيناء و البحر الحمر و توشكي و الوادي الجديد كل دي اماكن محتاجة كتير ممكن تستوعب اي زيادات في السكان بشرط انك توفر كل الخدمات للناس دي عشان ييجوا و يسكنوا فيها
انا مش حقول اكتر من اللي قالوه الأستاذ حفناوي و الأستاذ ابراهيم سعد لأني شايف ان كلامهم منطقي و سهل التنفيذ لو اردنا نحل المشكلة بجد

و ربنا موجود