الموضوع: تعالوا نعرف انواع الفتيس و الفرق بينهم و ازاي نسوق بكل واحد منهم

بسم الله الرحمن الرحيم
السلام عليكم و رحمة الله وبركاته

نظرا لأني لقيت ناس كتيير عايزين يعرفوا الفرق بين انواع الفتيس
مانيوال و اوتوماتيك و تيبترونك و ايزي ترونك و مالتي ترونك و جي ترونك
الفرق في السواقة
قررت اني اغيظ ضميري و اكبسه و اعمل موضوع شامل عن انواع الفتيس و ازاي نسوق بكل واحد منهم

و هبتدي ان شاء الله اشرح الانواع و سوقتها تحتها

طب ما تشرح ازاي نسوق و بعدين ابقي قول الانواع ع مهلك

اسكت يبني مش ناقصاك جتكم القرف مليتو البلد

معلش يا جماعة سيبكم من ضميري اللي قارفني طول عمري ده

و يلا نبتدي ع بركة الله

1-الفتيس المانيوال Manual
2 الفتيس الاوتوماتيك Automatic
3 الفتيس التيبترونك (ستيبترونك) Tiptronic
4 الفتيس الايزيترونك Easytronic
5 الفتيس المالتيترونك Multitronic

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

1 الفتيس المانيوال manual
ـــــــــــــــــــــــــ ـــــــــــــــــــــــــ ــــــــ

طبعا الفتيس المانيوال غني عن التعريف
لكن هنشرحه برده ( انت غاوي تقرف نفسك و تشرح ع الفاضي و المليان ....يا عم خليك في حالك خلي اللي ميعرفش يعرف زهقتني في عيشتي)
الفتيس الاوتوماتيك يووه قصدي المانيوال عجبك كده غلطتني
الفتيس المانيوال زي ما احنا عارفين بيتكون من عدة نقلات 1 , 2 ,3 , 4 ,5 , R
و في عربيات الفتيس فيها 1 , 2 ,3 , 4 , R

و وظيفة كل واحدة كالآتي :
1 : للطلعة بس يعني يا دوب نطلع بالعربية و ننقل ع النقلة اللي بعدها اللي هي 2 و الاولاني بينفع لو كل شوية بتطلع و تقف في الاشارة ( خاصة اشارة روكسي اللي بعيط فيها من الوقفة)

2 : و ديه النقلة اللي بننقل ليها بعد الطلعة الأولانية و بتستمر معاك لحد سرعة 40 تقريبا و بتابع طبعا ع الاري بي ام و الـ2 ده لو هتفضل ماشي ع سرعة هادية لا تزيد علي الــ40

3 : و ديه تالت نقلة في الفتيس و و هنا لما تكون عايز تزيد عن سرعة الــ40 و توصل لحد 60-70 و تعتبر سرعة قليلة بالنسبالي

( طبعا ما انت مش فالح غير في انك كل عربية تركبها تطير بيها و كأنك راكب اف-16 ..... يبني اخرس بقي قرفتني )

4 : و النقلة ديه احيانا بتكون اخر نقلة في الفتيس تفكرك بقي بالــ 128 موديل 75 يلا زمن بقي
و احيانا تكون النقلة قبل الاخيرة و ديه بتنقل ليها لما سرعتك هتزيد عن سرعة 70 و تبتدي تدخل بقي في 100 فيما فوق
5: اما الخامس فديه زي مقولنا في عربيات عربيات بس عامة الأغلب فيه خامس حتي الالتو 800 سي سي دخلها خامس عقبال ما يدخلها غاز و كهربة
و النقلة ديه لما تحب تزود بعد الــ130 و بتريح الموتور كمان هتلاقي صوت الموتور كده بقي هادي و مستريح و تحس انه نام كمان

الغريبة يا جماعة ان عندي في الالتو لما بجيب الخامس الموتور مش بيريح بالعكس الموتور بيشخر

R : والنقلة ديه لما نحب نرجع بالعربية لورا

طريقة سواقة المانيوال :

طبعا المانيوال مفيش اسهل منه لدرجة انك في الصيف في مصر بتلعن اليوم اللي تم اختراع المانيوال فيه

ملحوظة قبل الشرح عشان ضميري ميتلككليش ( مين بينده .... اخرس ياض...حاضر )
اي حاجة هننقلها في الفتيس لازم بندوس دبرياج اللي هو جنب الفرامل ع الشمال ( طب مين اللي جنبه ع اليمين ..البنزين يا فطن و اسكت بقي )

1- قبل ما ندور العربية لازم نمور الفتيس يعني العصاية تكون في الوسط مش رايحة في لأي نقلة
ندوس ع الدبرياج و نمور الفتيس و بعدين نشيل رجلنا من ع الفتيس
و نتأكد ان الهاند بريك ( فرامل يد ) مرفوعة عشان العربية متمشيش و حد يفتكر ان العربية مسكونة و بتمشي لوحدها

2- بعدا ما مورنا العربية ندور الموتور نستني كام ثانية لو العربية محتاجة تتسخن نسخنها العربية سخنة من غير حاجة نستني الكام ثانية و بعدين نبتدي بقي ننقل

3- ندوس دبرياج و نجيب عصاية الفتيس ع الأول و ننزلت الهاند بريك و بعدين نشيل رجلنا من ع الدبرياج سنة سنة و ندوس بنزين سنة سنة زي معادلة كده نشيل من هنا و نحط هنا عشان العربية متنطش مننا و توقف ( انت بقيت مدرس رياضة و لا ايه ...اسمها رياضيات يا جاهل )

4 - العربية اتحركت طب تمام التمام ننقل ع النقلة اللي بعدها عالطول اللي هي التاني هنا ندوس ع الدبرياج تاني و نجيب عصاية الفتيس ع التاني و بعدين نشيل رجلنا برده واحدة واحدة من علي الدبرياج و نحطها ع البنزين واحدة واحدة بدل ما العربية تنط او نلاقيها جريت مننا

5 - انت وصلت للنقلة التانية كده انت تمام التمام بقيت النقلات سهلة بقي تجيب الـتالت او الرابع او الخامس بنفس الطريقة اللي جبت بيها التاني لكن المهم ان العربية تكون في السرعة المطلوبة شعان تغير زي ما قولت و انا بشرح النقلات

6 - عايز ترجع لورا بقي اول حاجة تتأكد ان العربية واقفة تماما عشان الفتيس ميروحش بلاش ( هو ممكن يروح بفلوس .... اخرس ياض...حاضر )

هتوقف و تدوس دبرياج و تجيب ع الـ R و تشيل سنة سنة من ع الدبرياج و تحط رجلك ع البنزين سنة سنة ( مينفعش شهر شهر او يوم يوم ... يا رب خلصني من ضميري ده )
و اهم حاجة تبص وراك و تاخد بالك من بقيت الاتجاهات خاصة لو المكان اللي انت فيه في ميكروباصات و تاكسيات و نقل بانواعه او لما تكون في المطرية و عين شمس ( طب مفيش عين جمل أصل نفسي فيه .... بس يلا بدل ما اصحابي يجوا يقطعوك)

ملحوظة اخيرة بقي ( ملحوظة قلبوظة ..... مش هرد )

لو جيت توقف و عايز تقف ع نقلة او انت عمال تطلع و توقف ع الاول لازم و انت بتدوس فرامل تكون رجلك ع الدبرياج و الا العربية الموتور هيبطل

لو واقفين في اشارة هطول و عشان منحملش ع الفتيس و الفرامل و الدبرياج كتيير و نرجع نصوت في قطع الغيار و نكوع اد كده ..نمور العربية و نرفع الهاند بريك

لما نيجي نركن العربية نصيحة اننا نعشقها ع الأول و نرفع الهاند بريك عشان متتزقش

و احلي حاجة في المانيوال بيدي عزم اكتر و لو البطارية باظت او الفتيس حصله حاجة او اي عطل يمنع العربية من الحركة تقدر تزقها ع عكس الاوتوماتيك اللي لازم تجيب عربية تشيله و ادفع يا ريس في النقلة ديه
كده نكون خلصنا من المانيوال

( يلا اهو غار في داهية .... متقلقش و انت وراه قريب)

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

2- الفتيس الاوتوماتيك Automatic
ـــــــــــــــــــــــــ ـــــــــــــــــــــــــ ـــــــــــــــــــــــ

و ده اللي هو العصاية فيها زرار امان لازم تدوس عليه عشان تنقل بين الحارات مهياش كفتة يعني

بالنسبة للفتيس الأوتوماتك فيه أربع حارات أساسية وهي P , R , N , D

ووظيفة كل واحدة كالاتي:

P : و ده بنستخدمه في تثبيت العربية في مكانها و ده لما تسيب العربية مركونة في اي مكان وهي نفس الغرض لما نيجي نعشق العربية المانيوال عند أي غيار لما نركنها عشان متتحركش ولكن الوضع P مش بيعشق الفتيس بالموتور و بالتالي نقدر ندور الموتور ع الوضع ده.

R : والوضع ده عشان نرجع بالعربية لورا (مارشدير )

N : وده وضع محايد يعني زي لما نمور العربية في المانيوال و نقدر برده ندور الموتور في الوضع .

D : و الوضع ده عشان نطلع بالعربية وعند الوضع ده الفتيس بينقل مع نفسه اومال اسمه اوتوماتيك ليه و انت كل اللي عليك تزود بنزين او تدوس فرامل

طريقة سواقة الاوتوماتيك

1- لما ندور الموتور لازم يكون الفتيس عند الوضع P أو N لأن الوضعين دول بس نقدر ندور الموتور
أما R و D أو أي أوضاع أخرى مينفعش ندوير الموتور لأن العربية بتفصل الكهربة عن المرش و متمش عملية التدوير.

2- لما يكون الفتيس على وضع P و عايز تحرك العربية العربية لورا تحويل الفتيس مباشرة إلى الوضع R
3- لما يكون الفتيس على وضع N وتريد تحريك السيارة للخلف يتم تحويل الفتيس مباشرة إلى الوضع R و لازم العربية تكون واقفة بدل ما الفتيس يصوت و يلطم و يبوظ.

4- علما يكون الفتيس على وضع P وتعايز تتحرك للعربية لقدام يتحويل الفتيس مباشرة إلى الوضع D مرورا على الوضع R و N .

5- لما يكون الفتيس على وضع N و عايز تحرك العربية لقدام يتم تحويل الفتيس مباشرة إلى الوضع D

6- لما تكون عايز تحرك العربية لورا وهي على وضع D لازم تكون العربية واقفة عشان قولنا الفتيس ميصوتش و يلطم و يبوظ و بعدين نحول من D ثم N و R

8- بالنسبة للوقوف في الإشارات يفضل وضع السيارة على وضع N خصوصاً مع المدة الطويلة عشان ميكون فس تحميل كتيير ع الفتيس و الموتور و الفرامل و الا المرة ديه العربية كلها هتلطم .

9- لما نيجي نركن بقي يفضل وضع الفتيس على P عشان العربية تزرع في الارض و متتحركش خاصة اننا شعب زي الفل لو حس ان المكان ضيق كام سنتيمتر يدخل يزق العربية اللي قدامه و يركن مش بنغلب

( طبعا ده احنا جامدين اوي هع هع هع .... اه مهو عشان جامدين اوي شكلنا هنضربكو نفرمك زي البلطجية اللي كانوا عندنا )

10- لما تبدأ تتحرك بالعربية و هي مركونة لازم تدوس ع الفرامل و انت بتغير بين أوضاع الفتيس عشان العربية متتحركش فجأة و تخبط عربية و تلاقي واحد عامل زي باب العمارة نازل يمسكك يقولك انت بتخبط عربيتي ياض (او يقولك انت عارف انا ابن مين .... هبقي اقوله ابن مين في اللي اضربوا اتلم بقي متودنيش في داهية )
و ده لأن العربيات الأوتوماتك بتتحرك تلقائياً بعد وضع الفتيس على R أو D لأن هتلاقي العربية بتدوس ع البنزين بنسبة بسيطة تلقائا عشان الموتور ميطفييش.

أما بالنسبة للتدوير السيارة لما تكون البطارية تكون فاضية يمكن تدويرها فقط عن طريق التوصيل ببطارية عربية تانية أو بطارية جديدة

( طب ما اروح اجيب بطارية انيرجايزر تمشي الليلة ...حسبي الله و نعم الوكيل...بتدعي ع ضميرك يا أكسل ... معلش أصل انا قليل الادب اخرس بقي عشان اعرف اكمل الموضوع )

و ده لأن لما نزق العربية مش هتدور زي المانيوال

عيوب الفتيس الأوتوماتيك
- التسارع أقل من المانيوال يعني لو اتنين بيتسابقوا اوتوماتيك و مانيوال , المانيول يكسب في الشد
- لو حصل اي عطل في العربية متقدرش تزق العربية لازم ونش يجي ينقل العربية
- و التكلفة مقارنة بالمانيوال غالية

خلصنا من الاوتوماتيك 1

في بقي الفتيس الاوتوماتيك 2

ايه يا عم انت الفتيس الجزء التاني ده و شغل الأفلام الاجنبي ده ؟
هقولك و بطل لماضة خنقتني و انت شبه بوحة كده

الفتيس الاوتوماتيك ده هو هو اللي اتكلمنا عليه من شوية لكن الفرق في ده انك بتنقل للحارات بدون ما تدوس ع زرار الامان اللي في الاولاني يعني هي لمسة و يجري ع حارته عالطول
شكل الندرجية ادوله الاشارة ان في كبسة
اجري ياض بسرعة كـــــــبـــــســـــة
ام رز و لحمة بموت فيها مين هيعزمني ؟؟؟؟

زي مقولت مفيش فرق نهائي بين الاتنين غير في موضوع زرار الامان ده لكن نفس النقلات و كل حاجة

خلصنا من الاوتوماتيك 2 ( طب بقولك ايه ؟؟ ..... عايز ايه ؟ ...ولا حاجة ....غور ياض )

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

2- تيب ترونيك Tiptronic
ـــــــــــــــــــــــــ ـــــــــــــــــــــــــ ــــــ

او زي ما بيقولوا ( استيب ترونك ) مش فاهم هيبطلوا يقولوا امتي

الفتيس التيب ترونيك هو فتيس اتوماتيك و فيه الامكانيه ان انت تقدر تحوله لمانيوال ؟؟
يا راجل انت هتشتغلني ياض ايه فتيسين في بعض يعني 2 في 1 و عليه تخفيض ؟
اقولك انا من غير ما تقل ادبك

الفتيس ده زيه زي الاوتوماتيك هتلاقي فيه P,R,N,D و و فيه كل حاجة زي اللي اتكلمنا عليه

بس و حط تحت بس شرطة

جنب الـ D هتلاقي فيه علامتين هم ( + ) و( - ) و هو ده المانيوال اللي فيه يا فالح
لما تجيبه علي الجزء بتاع + و - تقدر تستخدمه بأن انت تتحكم امتي تعلي الغيار عن طريق لمس الفتيس في الاتجاه ( + ) أو امتي تقلل الغيار عن طريق لمسه في الاتجاه ( - )
وعشان كده بيسموه Manual touch لأن انت بتنقل عن طريق لمسه في اي اتجاه من الاتجاهين.

و طريقة سواقة التيبترونك

هي هي الفرق الزيادة هو الــ + و - عشان تتحكم مانيوال في السرعة تعلي او تقل

في برده فتيس تيبترونك 2

بس برده زي الاوتوماتيك الفرق برده زرار الامان اللي بتدوس عليه عشان تنقل مش اكتر
يعني واحد لازم تدوس زرار الامان عشان تنقل
و واحد يا دوب بتحركه للحارات بدون ما تدوس ع زرار امان

عيوب الفتيس التيبترونك
- زيادة استهلاك البنزين
- التكلفة غالية جدا

خلصنا من التيب ترونك ( اسمه ستيب ترونك يا جاهل...تصدق مفيش حد جاهل غيرك )

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

3- ايزى ترونك Easytronic
ـــــــــــــــــــــــــ ـــــــــــــــــــــــــ ــــــــ

الايزي ترونك بقي ده رافع شعار قصاد الاوتوماتيك بيقول نحن نخلتف عن الاخرين خالص ( ع رأي الشاعر كريم عبد العزيز ... اسكت يا جاهل كريم عبد العزيز مغني مش شاعر )

الايزي ترونك بيحتوي ع 3 حارات هم

N , R , ( + ) , ( - )

N : و ده لما تجي تدور العربية زي ما تقول كده ممورها

R : و ده عشان ترجع ورا كالمعتاد

( + ) : تعلي الغيار

( - ) : تقلل الغيار

بس كده عرفتوا ليه متنك فيها و فاكر ان ع راسه ريشة

بس بلاش نكلم كتيير عشان منفضحوش

و كده خلصنا من كابتن ايزي ترونك

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

4- مالتى ترونك Multitronic
ـــــــــــــــــــــــــ ـــــــــــــــــــــــــ ــــــــــ

بالنسبة للمالتيترونك فانا اعتذر يا جماعة لأني معلوماتي عنه زي معلومات سواق التوك توك عن سواقة الطيارة
لكن اللي اعرفه
انها تقنية في الفتيس موجودة في العربيات الاودي و موجود في الانواع الدفع الامامي بس

و محدش يسالني اكتر من كده ههههه
و يا ريت لو حد يعرف يقول ( انا عارف انا عارف ... اجري جتك خيبة انا لو مشيت وراك مكنتش عملت الموضوع من اساسه )

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

تم بحمد الله الموضوع

و ارجو انه يحوذ ع اعجابكم

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

و اعذروا ضميري بقي
بس أصله محتاج يتعلم الادب ( مين ده ياض ) عن أذنكم عشان هروح اربيه سلام عليكم

طاااااخ طااااااااااخ ديب
( آي آي )
( اي في عينك قارفني من الصبح هتروحي مني فين وراك وراك لحد ما تقول انا ارنب )
( بلاش ارنب مش بحب اكله ينفع حمام )
( و كمان بتهزر طب تعالي بقي )
طراااااخ بوم بوم طاخ ديب
( آآآآآآآآآآآآ ي )

بالتوفيق للجميع ان شاء الله

الموضوع غير منقول
و هو اجتهاد شخصي