الموضوع: أفكار ذكية تخلى صيانة اللوجان إقتصادية

المشاركة الأصلية كتبت بواسطة hragheb007

انا مش عارف أقولك أيه بصراحة

جزاك الله كل خير و جعله في ميزان حسناتك و رحم الله أمواتك و أموات المسلمين أجمعين

كلمات حضرتك الرقيقه خلتنى أنا إللى مش عارف أشكرك إزاى ، ربنا يكافىء دعواتك لينا بأفضل الجزاء مما لا عين رأت ولا أذن سمعت ولا خطر على قلب بشر ، وتقبل منى كل الشكر على مرورك و مشاركتك الكريمه .

لك كل الشكر والاحترام والمذيد من المعلومات الهامة عن رينو لوجان لكن لي سؤال عند عمل اي شيء خارج الضمان ليغلى الضمان ارجو الرد وشكرا

:b4_388::b4_388::b4_388:
موضوع هايل - منظم - وبأسلوب علمى محترف ومشوق وعظيم الإستفادة للجميع
ربنا يباركلك ويجعله فى ميزان حسناتك وربنا يوفقك ويجازيك عنا خير الجزاء

الحمد لله على السلامه يا دكتور أسامه وحشتنا إضافاتك ومشاركاتك المميزه وأتمنى تكون الظروف الأخيره مرت على خير و معلهش هى دى ضريبة الثبات على المبدأ و أنت طول عمرك بتبعد نفسك عن الشبهات والمزايدات ، لكن أنا مش موافق على رفضك الترشح لأى منصب لأن لو الكفاءات وأصحاب المبادىء اعتذروا يبقى الساحة هتبقى فاضيه لغير المؤهلين وأنصاف الأكفاء ، هو دا إللى اتعلمناه منك ومش هأقولك برضه أنا مين ، كفايه تعرف إنى واحد بيحبك ومعجب جدا بأرائك وشخصيتك واتعلم منك ووقفت جنبه كتير.

المشاركة الأصلية كتبت بواسطة samystars

لك كل الشكر والاحترام والمذيد من المعلومات الهامة عن رينو لوجان لكن لي سؤال عند عمل اي شيء خارج الضمان ليغلى الضمان ارجو الرد وشكرا

الزميل العزيز أرجو أن تقبل اعتذارى عن التأخر فى الرد ، الحقيقه إنى كنت مشغول لظروف طارئه الفتره اللى فاتت واسمحلى أشكرك بكل الاعتزاز على كلماتك المشجعه الرقيقه ، بالنسبه لسؤال حضرتك أنا لازم أرجع للتوكيل أو لموقع الرينو علشان أديك رد دقيق و أكيد ، لكن بشكل عام تركيب الأكسسوارات زى المرايات والأكصدامات ولمبات الاضاءة وخلافه لايخرج السياره من الضمان ، إلا لو كانت تجهيزات بتعمل حمل أو تزود الجهد على توصيلات الكهربا ( الضفيره ) زى جهاز الانذار وماكينات رفع الزجاج ، فى الحاله دى ممكن يحصل ايقاف جزئى للضمان يعنى الكهربا بس تبقى خارج الضمان لأنك زودت أحمال مش معمول حسابها فى التصميم الأصلى للضفيره ، طبعا لو عطل ميكانيكى يحتاج استبدال قطعة غيار وركبتها مش أصليه بيكون من حق الوكيل يخرج العربية من الضمان بحجة إن القطعه الغير أصليه مش معتمده وبتسبب خلل فى آداء العربيه ككل ، وطبعا أعطال سوء الاستخدام مالهاش ضمان ، وكمان لو ما التزمتش بعمل الصيانات الدوريه فى التوكيل من حقهم يخرجوا العربية من الضمان ، وعموما هاحاول أرجع للتوكيل وأفيدك أكتر.

المشاركة الأصلية كتبت بواسطة خالد

:b4_388::b4_388::b4_388:
موضوع هايل - منظم - وبأسلوب علمى محترف ومشوق وعظيم الإستفادة للجميع
ربنا يباركلك ويجعله فى ميزان حسناتك وربنا يوفقك ويجازيك عنا خير الجزاء

أشكرك جدا يا أستاذ خالد ، وأعتز بشهادة حضرتك وأدعو الله أن يجازيك على دعائك بكل الخير والتوفيق والسداد فى حياتك إن شاء الله ، وشكراً مره تانيه.

المشكله رقم (9) : اصلاح الخدوش بطريقة سهله و مبتكرة

الموضوع دا استجابه لطلبات أعضاء كتير سألوا عن طريقه سهله واقتصاديه لاصلاح الخدوش فى طلاء السيارت ، طبعا ما فيش واحد فينا مش بيعانى من المشكله دى ، علشان كده أنا بحثت عن أبسط طريقة ممكنه وينفع ننفذها بنفسنا بالخامات المتاحه ولقيت مقطع فيديو عن اصلاح الخدوش باستخدام اللاصق ( سوبر جلو) ودا متوافر فى المكتبات والبوتيكات ومحلات الحدايد وغيرها ، وهنحتاج كمان ورق صنفره نمره 220 ، وجزء من ورق الألومنيوم ( الفويل ) وشمع أخضر ودا شمع بيستخدم فى تلميع الدهانات ومن مميزاته إنه طبيعى يعنى مش منتج من البرافين اللى بيشتق من البترول ومع النار يخرج أكسيد الكربون اللى بيسبب الاسوداد المعروف بالهباب واللى ممكن يغير درجة اللون ، دا رابط الفيديو وهافرغه لحضراتكم فى نقط متتاليه بسيطه :

How to remove car scratches with super glue - YouTube

الخطوات :

1- ندور على مكان مستخبى ممكن ناخد منه شويه من طلاء العربيه باستخدام ورق الصنفره من غير ما نشوه الدهان ، ممكن من اكصدام العربيه أو من داخل غطاء الكبوت أو جوه الشنطه ، نستخدم الصنفره ونجمع البراده البسيطه اللى بتنزل نتيجة احتكاك الصنفره مع طلاء السياره ولو فى طبق أو حتى على ورقه ، زى الفتافيت الصغيره اللى بنسميها برادة الحديد ، وكدا أصبح عندنا شويه من نفس لون العربيه بنفس الدرجه .

2 - ننضف مكن الخدش من أى أتربه أو أوساخ ، وبعدين نستخدم السوبرجلو ونملأ الخدش باللاصق .

3 - باستخدام فرشه صغيره أو حتى قلم ننزل اللون البراده اللى جمعناه فوق اللاصق ونحاول نفرده ونوزعه لحد ما يغطى كل أجزاء الخدش الموجود فى هيكل الصاج.

4 - نعمل تنضيف لأى لصق أو فتافيت لون انتشرت فى غير مكان الخدش علشان ما تتيبسش وتشوه الأجزاء السليمه المحيطه بالخدش.

5 - نغطى كل منطقة الخدش بالشمع الأخضر السائل ( نسيله بالحراره زى الشمع العادى ) ، وبعدين نغطى الشمع بقطعه من ورق الألومنيوم ( الفويل ) .

6 - نشغل مجفف الشعر ( السيشوار ) على أسخن درجه فوق الفويل حوالى دقيقه ونصف أو أكتر علشان نحفز التفاعل الكيميائى مابين المكونات اللى ضفناها.

7 - نسيب الفويل لمدة عشر دقايق ، وبعدين نشيله ونلمع بقطن أو قماش ناعم باستخدام الشمع الأخضر السايل وبعدين ننضف مكان الشمع ، وحسب الفيديو - والعهده عليهم لأنى فعلا لسه ما جربتش الطريقه دى - هنلاقى الخدش اختفى و أصبح غير ملحوظ .

* الحقيقه دى أول مره أقرأ عن الشمع الأخضر وما أعرفش من فين ممكن نشتريه ومعلوماتى عنه بسيطه وعلشان كده دى بعض الروابط لموضوعات عن الشمع الأخضر ومواقع بيعه أونلاين ، وياريت الأعضاء يفيدونا من فين فى مصر ممكن نشتريه ،

GREEN STUFF WAX POLISH

Green Wax - BuyGreen.com

Sign in to read: Green wax - 12 November 2005 - New Scientist