الموضوع: أفكار ذكية تخلى صيانة اللوجان إقتصادية

السلام عليكم ، وحشتونى لأنى كنت بعيد عن مصر لفتره ، هأدخل فى الموضوع علشان ما أطولش على حضراتكم ، لكن من فضلكوا إقرأوا الموضوع للآخر علشان أخد رأيكم فى إقتراحى بعد ما أعرض تجربتى.

المشكله رقم (1) : إصلاح فلانشة الشكمان - تكلفة تغييرها فى التوكيل 6000 جنيه .

حجزت علشان أعمل صيانة ال60.000 كم ، وكانت العربيه صوتها عالى عشان فيه تسريب فى العادم من الشكمان ، وبعد الكشف على العربية فى المقطم كانت المفاجأه إن إصلاح الشكمان تكلفته 6000 جنيه ، لأن الفلانشه ( مأخذ توزع و سحب وتفريغ العادم من الماكينه ) كانت متآكله ولازم تتغير ، طبعا حضراتكم عارفين إن صيانة ال 60000 هى صيانه كبرى يعنى أصلا مكلفه ( حوالى 2500 ) لأنك بتغير كاتينه كامله وطلمبة الميه وجميع الوصلات والسيور والفلاتر و شمعات الاحتراق و كوع الميه وغالبا الترموستات ، غير الضريبه + أنا كمان غيرت موتور مروحة الرادياتير ، من الآخر كان مستحيل أدفع كمان 6000 جنيه ( الفلانشة جديده بس أكتر من 4300 بدون الضريبه والمصنعيات ) ، لكن أكتر حاجه كانت مستفزه إن العيب ده بدأ يظهر فى لوجان تانيه مع واحد صاحبى وكنا عاوزين نشوف حل لأنه بيأثر على سحب العربيه + الناس كلها بتتفرج عليك وأنت ماشى طبعا رد فعل لا إرادى للصوت المزعج إللى العربيه بتعمله .

* طبعاً كنت مضطر إنى أسأل أكتر من واحد و أشغل عقلى رغم إنى ما بأحبش ، وكانت الاختيارات انحصرت معايا فى واحده من إتنين ، ده طبعا بعد ما مريت على أهم ناس أعرفهم شغالين فى قطع غيار وصيانة اللوجان:

1 - تفصيل الجزء المطلوب ( شغل مخرطه ) عن طريق صنايعى شكمان يكون معلم ، الاختيار ده كانت صعوبته إن محدش كتير إشتغل الموضوع لأن العربية لسه جديده فى السوق المصرى و ده يعنى عربيتى هتكون أول تجربه وعلشان كده لازم أشدد على إن الصنايعى يكون شكمانجى محترم ومفتح .

2 - الحل البديل التانى هو إنى أشترى الجزء المطلوب استيراد أو متقطع من أى عربيه عملت حادثه ، وده مشكلته إن الجزء اللى هيتركب حتى لو عرفت ألاقيه عند حد ، هيكون مستعمل يعنى كفائته مشكوك فيها وممكن يكون فيه نفس العيب حتى لو نسبته أقل + سعره مش هيكون رخيص لأن التاجر هيسأل على سعر الجديد قبل ما يبعلى وبعدين ممكن يدينى المستعمل ب 50:60 % من سعر الجديد ، طبعاً كانت مخاطره كبيره .

أستخرت ربنا وقررت أروح لمعلم الشكمان ، بس الجزء الأهم هو الجوان اللى بيركب ما بين الفلانشه والفرن ( مابين جزء تفريغ العادم و منطقة خروجه من الماكينه ) وهو ده الدرس التانى اللى إتعلمته ، الفلانشه ممكن تعيش 100 سنه لو الجوان ( الأولسيه ) اللى راكب مظبوط وقافل أى فراغ يعنى ما فيش تسريب للعادم لأن تسرب العادم هو اللى سبب تآكل الفلانشه ، تعرفوا الجوان اللى بأتكلم عليه تمنه كام ؟؟؟؟ ( فقط عشرة جنيهات مصرية لاغير ) وصناعنه تركى ، تخيلوا 10 جنيه سببت خسائر كانت ممكن توصل إلى 6000 جنيه + التعطيل والازعاج وفرجة الناس.

* اشتريت الجوان ( الولسيه ) وفصلت الفلانشه مخرطه وركبتها شغاله زى الفل ليها أكتر من 25 يوم من غير صوت ولا نفس وكمان وفرت تمن الأفيس بتاع الشكمان لأن التوكيل بيغيره كل ما يفك الشكمان وتمنه 180 جنيه من غير الضريبه ومصنعيات التركيب ، وكانت التكلفة الاجماليه شامله المصنعية ( 280 ) جنيه لاغير .

.... دلوقتى هأعرض على حضراتكم فكره إننا نعمل مع بعض موضوع عباره عن مرجع صيانه شامل لكل مشاكل اللوجان النادره وإللى بتحتاج تكالف مرتفعه لإصلاحها ، طبعاً أقترح إن المرجع ده يكون متخصص فى الأفكار الجديده اللى بتظهر نتيجة تجارب واقعيه + يشمل عناوين ومصادر الأماكن والورش والمحلات والناس المتميزه اللى ساعدت صاحب أى مشكله نادره فى حل مشكلته ، وطبعا بدأت بنفسى وعرضت حل مشكلتى وادتها رقم واحد ، وهأضيف مع تجربتى عنوان وتليفون أشهر مصدر لبيع قطع غيار اللوجان الجديده بالتوفيقيه و هو جمال البدرى ( 7 ش زكى التوفيقيه - الدور الثانى ت: 25752633 ، محل رقم 18 ، موبايل 0182099061 - 0110451620 ) + ورشه متخصصه فى إصلاح وبيع قطع غيار اللوجان المتقطعه ( استيراد ) + جديد ودا اسمه رينو المعادى - خالد ويحي ‘ ومحله فى صقر قريش ( المعادى 85 مساكن صقر قريش الأوتوستراد - الحرفيين ش تبارك أمام بلوك 6 - موبايل 0101718206 ، 0124746102 ) .

أتمنى أسمع تعديلاتكم واقتراحاتكم فى أقرب وقت .


تم دمج جميع اجزاء السلسله
وتثبيت الموضوع لاهميته
مشرف عام 4