الموضوع: تجربتي مع اللوجان

المشاركة الأصلية كتبت بواسطة me_medoo

هههههههههه ... هو الهدف من موضوع الشعار ... أن أبينلكم حاجه وحده ، أن لو كل واحد بصلوو هيشوفوا فيه حاجه واحد يقلك ده مثلث كده ومثلث مقلوب واحد يقلك اتحاد بين اربع شركات وواحد وواحد وواحد ... القصد أن كل واحد بيشوف العربية بطريقتو ، وانا كنت كاتب العنوان تجربتي مع اللوجن ... مش تجربت كل النااااااااااااس مع اللوجن ، معنى العنوان يالي بعض الاعضاء مفهمهووش تجربتي انا الشخصية مع عربية وحده فقط مع اللوجن وشفت فيها كذا وكذا وكذا ...

والحجات الي شفتها في ناس وفقتني عليها لأنهم شافوها وحسوها ... اما الي مشفش الحجات دي يحمد ربو ويبوس ايدو وش وضهر عربيتو كويسة ، مش يخش يكدبني والي يقلي انتا جديد ومش جديد وانتا عندك العربية شكلك معندكش والي ساب كل العيوب العربية والموضوع كلو ومسك في جل الشعر (لما أرجع عيل صغير إن شاء الله أبئه أحطلي شوية جل زيوو كده وأسبسب شعري ) السن بيحكم بس الهدف أني بقول فتحت الشباك وأبعاد العربية الغير أنسيابي بيدخل الهوى في صرصور طبلة الودن وبطلع من العربية وانا ودني بتوجعني وشكلي بيبأه كأني لسه قايم من النوم ... مش راجل محترم نازل من عربتيو ... قوم تسيبوكل العيوب ومنها عيوب لسة مزكرتهاش زي مافي أخ وزميل فاضل ذكر موضوع الكلكس والمنفاخ الغبي بتاع الكرسي ... تحسو من العصر الحجري ... ولا الاوكرة بتاعت تعديل ميل ظهر الكرسي ... ولا تنك البنزين الي لازم كل مره اروح امون اشيل المفتاح من الكونتك خالص واديلو المفتاح ... فتحت وقفلت البيبان زات نفسها تحس الباب ورقة كده بتقفلها مش باب عربية محترمة أوكر الببان من جوا تحسها بلاستيك من النوع الرخيص ... كل الحجات دي ديقتني من العربية لدرجة مكملتش معايه العربية 7 شهور وقمت قلبها وقلت مش مشكله اخسر فيها 10000 جنيه في دهية كنت شاريها ب 70 وبعتها 61 بس يالله في ستين دهيه بس بجد مشكلة الحرارة في الصيف دي خنقتني .

وأكتشفت بعدين من بعض الاخوة الافاضل انهم كان عندهم نفس المشكله وشافولها علاج بس أبتدت الحرارة تطلع من فوق التبلوة ...بدل من تحت ... المهم تحت ولا فوق انا بعتها وخسرة فيها ومش ندمان الواحد مبيتعلمش ببلاش المهم ان الموضوع هو تجربتي انا الشخصية عن اللوجن وليس تجربت كل الناس ... في ناس جربوها وبيشكرو فيها ، وفي ناس أمكانيتهم متسعدهمش انهم يجيبو اكتر من كده وهيا ممتازة لأي أسرة مصرية ... وفي الي كان راكب عربية تعبانه وعلى قد الحال وربنا كرمو وجابها ففرحان بيها وطاير من الفرحة وحاسس انو ملك الكون ربنا يهنيه بيها ويسعدو يارب ويرزوقوا بأحسن منها كمان وكمان
وفي الاول والاخير دي حتت عربية لا طلعت ولا نزلت لوجن مش هنزعل نفسينا عليها ولا نحرق في دمنا ولا نغلط في بعض وتقولي جل ومش جل ... ومن الاخر كده انا كاتب الموضوع ده للناس الي بعرفها كل عرفين اني بغير عربيات كتير ... وكل عربية أبيعها يجوو يسئلوني عن عيوبها ووميزتها ولأنهم بيهموني بقلهم ، والموقع هنا بيريحني في حاجه وحده أي حد يسئلني اقولو خش على موقع النيل هتلقيني كاتبلك كل حاجه وفي ناس كمان كاتبه تجاربهم ورأيهم عنها وأشتري دماغي ... فهدو أعصابكم كده ياشباب ... والموضع لا يعبر عن شيء غير وجهة نظري الشخصية فقط ... وتجربتي الشخصية ..

ونصيحه ياشباب متفرحوش اوي باي عربية لأن ممكن يغمى عليكم ولا حاجه لو حصلها اي حاجه ويجلكو سكر وضغط وممكن توصل لشلل في الاول والاخير العربية حتت حديدة غاليه مرمية في الشارع موجوده للأستخدام عارف يعني ايه مرمية في الشارع يعني ملطش معرضة لأي حاجة تتسرق تتخبط تتحرق تتجرح تنكسر وتتسرق يقع عليها اي حاجه من أي بلوكنة تكون واقف تحتيها حضرتك قصريت زرع مثلاً ... فهتزعل نفسك على ايه ولا ايه ولا ايه ... المهم أن العربية تمتعك وتقضي طلباتك وتبقى سايق كده وانتا مرتاح ، وأعرف أن العربية موجوده علشان تخدمك مش انتا الي تبقى خدمها وتدافع عنها وعن سمعتها وشرفها كأنك أنتا الي مخترعها ومصنعها ... يالله اللهم قد بلغت اللهم فشهد .

بص يا افندم انا الى حضرتك بتقول عليه ساب الموضع كله ومسك فى موضوع الجل
وانا فعلا مختلف مع حضرتك تماما فى 90 % من الى قلته وحاسس ان وصفك للعربية غير حيادى ومتجنى
رغم انى والله باحاول اكون حيادى جدا فى تقييم العربية وبعترف باى عيب حقيقى حد يقوله
ونا ورديت عليك فى نقطه التوكيل ونقطه استهلاك البنزين ونقطه الرماد الى بيخش العربية ودول اكتر النقط الى استفزتنى
يعنى ما مسكتش فى موضوع الشعر الى بتنكش بس

لكن حكاية الجل ديه بقولها فى سياق التقليل من اهمية العيب الى حضرتك ذكرته ولم اقصد ابد - واقسم على ده - انى اوجه اى اهانه او انتقاص من قدر حضرتك وانا معرفش سنك اد ايه وحزين جدا انك فهمت الموضوع كده وارجوا قبول اعتذارى

حضرتك ذكرت ان معاك عربيات تانيه غير اللوجان زي الكابريس والياريس وقارنت بين اللوجان والياريس فى البنزين " وفعلا الياريس يادوب بتشم البنزين دي حقيقه ميختلفش عليها حد " بس ليه مقارنتش بينهم فى الثبات على السرعات ؟

معقول حد معاه ياريس وشايف ان اللوجان سيئه جدا وخطر انها تتجاوز 120 ؟
ومعقوله حد معاه كابريس ويقول على اللوجان سفاحة بنزين ؟


تحياتى

المشاركة الأصلية كتبت بواسطة hugan

انما اصلها اوروبي
اصلها اعتماديه
وكل الكلمات الغريبه اللتي اسمعها في المنتدي ومحاوله الالتصاق بشيء ليس له اصل
والكل يعرف انها لاتمت لرينو فرنسا بصله الا عن طريق وكيلها
هي عربيه بسيطه بتكنولوجيا قديمه نسبيا موجههه للدول الناميه المنخفضه الدخل
ومش عيب في العربيه بل ميزه
لكن الوكيل بيعاملها في مصر معامله السيارت الفارهه
رائيي وبدون هجوم

مع احترامى لكلام حضرتك العربيه فعلا عربيه اوروبيه و عربيه اعتماديه فعلا الكلام ده من ناس فى منتديات اوروبيه
و عربيه ليها اصل معروف من مجموعه رينو (سواء داتشيا لوجان او رينو لوجان او نيسان بريما او ماهندرا))كلها مسميات بتباع بيها العربيه فى دول العالم كله
يمكن حضرتك بتحاول تقنع نفسك بعكس الكلام ده علشان تقنع نفسك بحسن اختيارك و دى حاجه انا شايفها فى الشعب المصرى كله احسن حاجه الى جبها بس
و فعلا الوكيل بيعامل العربيه معامله السيارات الفارهه لأن الحمد لله العربيه عمرها مطلعت من التوكيل و فيها مشكله او رجعت لمشكله تانى
التوكيل غير حاجات فى الضمان للعربيه بدون اى مناقشه او تحايل او واسطه علشان اعمل حاجه للعربيه
طيب حعوز ايه من التوكيل ضمان 3 سنوات او 100000 الف (ضمان بجد مش ضحك على الناس)
واسعار الصيانات زى اسعار اى و كيل لعربيه فى نفس الفئه السعريه

المشاركة الأصلية كتبت بواسطة hugan

احييييك بشده
بدون الدخول في تفاصيل ا كثر شيء ملحوظ من الاخوه ملاك اللوجان هو المبالغه في العربيه
اي عربيه في الدنيا لها مميزاتها وعيوبها
وكل شيء بثمنه
انما المحاوله لتصنيف اللوجان علي انها عربيه خارقه هو الشيء الغريب
اللوجان عربيه جيده جدا ومناسبه لسعرها لا شيء اكثر ولا اقل
انما اصلها اوروبي
اصلها اعتماديه
وكل الكلمات الغريبه اللتي اسمعها في المنتدي ومحاوله الالتصاق بشيء ليس له اصل
والكل يعرف انها لاتمت لرينو فرنسا بصله الا عن طريق وكيلها
هي عربيه بسيطه بتكنولوجيا قديمه نسبيا موجههه للدول الناميه المنخفضه الدخل
ومش عيب في العربيه بل ميزه
لكن الوكيل بيعاملها في مصر معامله السيارت الفارهه
رائيي وبدون هجوم

جبت المفيد ..... بس التوكيل بيعامل العربية عادي على فكرة

هو الموضوع بقى على ملاك اللوجان والتحليل النفسى لسلوكهم ودوافعهم
طيب ما ننقل الموضوع للاجتماعى احسن