الموضوع: كفايه نصب يابشر !!!

الطماع
هو اسهل حد تجيب منه فلوس
تعصره عصر

في الأونه الاخيره اتغيرت ثقافة الشعب من اعمل اكتر = تكسب اكتر

إلى اقعد اكتر = ممكن تكسب

الصنايعي مش عايز يوسخ ايده
يحوشله مبلغ ويجيب توكتوك يأجره

نخسر ايد شغاله
عشان هو تجيله الفلوس لحد عنده

وعشان دي بقت ثقافة شعب
ظهر عندنا نصب لذيذ قوي
Q net
واخيرا
global ad mart
هأو

تقعد مع الواحد من دول يفرشلك البحر طحينه
(الحمد لله مادفعتش مليم)

بس ييجي الواحد من دول
هتعمل وتسوي بس عشان تبقى وكيل او تبدأ
ادفع (من 500- 700) دولار !!!
هاهاهاهاهاها
والله لولا الحرمانيه كان زمان الواحد مطلع ملايين من الشعب اللي مش عايز يفكر ده !!!
تقوله انا لقيت ديناصور يصدق
تكلمه بالعقل والمنطق يقوللك انت كداب

المقاله دي منقوله من الفيس بوك مش انا اللي كاتبها
بس ياريت نحذر معارفنا منها
اولا لأنها نصب
ثانيا لأنها بتطلع العمله الصعبه بره البلد
والعمليه مش ناقصه

المقال اهه


نصيحة! و كل واحد براحته بعدين ..
عشان بس نغلس شوية على الناس اللى بتستهبل فى الحوارات دى كل يوم بشركة اسم مختلف و عاملينها تسول شبكي ... !
و عشان حرام يضحك عليك، او حتى تورط غيرك فى نصبايه و تبقى بتهرب من الناس فى الشارع بسبب انك ورتطهم فى الشركة ..

معظم حوارات الربح من على النت نصب، و خاصة بتاعة الاعلانات .. صحيح فى ناس بتكسب من شغل بتعمله على النت، بس هى بتقدم حاجة و شغل حقيقى، مش مناديب شركة "كراتين فاضية تربى فيها كتكوت" !

مفيش حاجة اسمها اكسب 50 دولار عشان تشوف اعلان .. لان مفيش اعلان على النت يوصل تمنه لـ 50 دولار عشان طالب مصري فى 3 اعدادى من طنطا يشوف اعلان عربية هوندا!
الملايين اللى بتتوزع دى و ملهاش صاحب "نصب" ..
و اقرى كلامى كويس و هتفهم انك اتنصب عليك ..


الايام دى شغالة اوى شركة GlobadAdMart و بتدفع فيها 500 دولار عشان تفتح حساب و بتكسب شهريا 200 دولار على الاقل و ما فوق..

كذا واحد قالى عليها و واضح مصر كلها شغال فى النصباية دى، و واضح ان فى ناس كتير اضحك عليها و للاسف بعد ما بيتورط و يشترك بيحاول يقنعك، عشان تشترك و يعوض خسارته و فى الغالب هيعرض عليك هات الفلوس و انا افتحلك الحساب برصيد النقط اللى عندى ..
و الناس تقولك "انا قبضت" ، "انا شوفت واحد قبض" ، و غيرها من القصص و هو قبضش حاجة من الشركة و لا يعرف حد قبض "
.. و الفلوس اللى بتشوفها، بياخدها منك و يحطها فى جيبه و يقولك انا الشركة حقيقية .. انا بكسب اهو !! بياخد فلوسك يحطها فى جيبه و يعتبرها مكسب من الشركة و يجيب واحد تانى و يبعت فلوسه للشركة .. واحد ياخد منه الفلوس يحطها فى جيبه و اللى بعده يبعته للشركة و هكذا .. لكن هل الشركة دفعتله !!؟ .. ... دى فلوسك و فلوس الناس اللى بيتنصب عليها .. لكن الشركة مش بتدفعله .. بالعكس هو بيبتعلها ناس جديدة كل شوية ..

.................................................. ..................
طيب و ايه الدليل على الكلام ده انها نصب !!؟
.................................................. ..................

اقري كلامى ده كويس، كذا مرة و اديله درجة مصداقية 0% و ارجع دور فى النت و اتاكد منه ..

شوية ملاحظات سريعة:-
1- مفيش شركة بأى حال ممكن تدفع لحضرتك 10 و 15 دولار عشان تشوف اعلانها !

2- الشركة محدش يعرف عنها حاجة اصلا عشان محدش يكلمك بثقة عنها و من الاخر الدومين بتاعها اتسجل يوم 17 ديسمبر 2012، يعنى من اقل من شهرين
المعلومة دى تقدر تتاكد منها من هنا - البيانات دى محدش يقدر يلعب فيها اصلا و مصدرها ICANN اللى بيتسجل الدومينات
GlobalAdMart.com - GlobalAdMart

3- مفيش حد استلم جنيه من الشركة لحد انهاردة، لان حسب شروطهم اول 4 اسابيع مش ينفع تسحب فلوسك و لازم رصيدك يوصل لـ 500 دولار عشان تطلب تحويل المبلغ .. يعنى لازم يمر 4 شهور على الاقل عشان اى حد يقولك "انا استلمت" !!
و بناءا على ان الدومين اتسجل يوم 17/12/2012 و بفرض ان الموقع انطلق بعدها بـ 5 دقايق !! يبقى لازم اول واحد يستلم يكون فى شهر مايو ..

فى ناس هتقولك : طيب ايه رأيك انا مشترك فى شهر 11
الناس دى كانت على موقع اسمه LocalAdClick .. نصب على الناس و اخر مجموعة اشتركت حولها على GlobalAdMart و ظهر بالاسم الجديد ..

اى حد يقولك اصل الشركة كانت فى الاول Local و دلوقت Global ... قوله "حمرا" .. سوري يعنى .. قوله و انت كنت مشترك فيها ازاى لما كانت "لوكال" ... ؟؟ و عموما لا حد قبض من لوكال و لا جلوبال و لا حد هيقبض

4- الناس بيكون عندها فى رصيدها ارباح وهمية و مش حقيقية و مفيش حد استلم "ربع جنيه" من الشركة ..
و اتحدى اى حد يقول "ده تحويل بنكي" او حتى تحويل بالبريد !

5- اهم نقطة .. ............
الناس اللى بتقول انا قبضت، ازااااااااااى !؟
هو بيكون معاه نقط على الاكاونت و معاه 10 "زباين" جايبهم تحته ، الشركة بتقوله لو عندك 1000 دولار مثلا فى رصيدك انت ممكن تطلع اكاونتات من عندك و تاخد فلوسها كاش لـشخصين × 500 = 1000 دولار
و يستلمها كاش منك و يضربها فى جيبه و تتخصم من رصيده ..
يعني يفتح بيها اكاونت ليهم و ياخد الفلوس كاش منك و باقى الـ 8 اشخاص يحول فلوسها للشركة 500×8 = 4000 دولار كسبتها الشركة ... و 1000 دولار ضربها فى جيبه و معانا دلوقت 10 زباين اتورطوا مع الشكة ...
يعنى هو كسب من فلووووسك انت .. و فلوس غيرك
و باقى الناس دفعت للشركة ..
الفلوس اللى قبضها منك و حطها فى جيبه .. يطلعها و يقولك "انا بكسب" ...
ايوة بيكسب من النصب عليك .. هو بيعتبر الفلوس دى كسبها من الشركة .. لكن فى الاصل هو شغال "مندوب نصب" بياخد مبلغ فى جيبه و الباقى للشركة و يقولك انا بكسب ..

هو كسب ... ايوة،، ملاليم
الشركة كسبت ... ايوة،، ملايين
انت ... اتنصب عليك لان مفيش اصلا اعلانات بالارقام دى

ايه الحل !؟
اشتغل انا كمان نصاب و اجيب فلوسي عن طريق اجيب ناس تحتى عشان اخد عمولات و برصيد النقط اللى عندى اطلع اكاونتات و تعمل زى اللى قبلك ..

انت كسبت ... ايوة،، ملاليم
الشركة كسبت .. ايوة،، ملايين
الناس اللى بعدك ... ضحايا جداد ، مطلوب منهم يعملوا زيكم
لكن فجاة .... هتلاقى الشركة قفلت و فكت بالفلوس كلها ..

مين اللى اتنصب عليه ... كلكم !!
بس منكم اللى قرر يشتغل لحساب الشركة عشان يعوض خسارته و منكم اللى الشركة قفلت و فلوسه راحت و ما اخدتش حاجة ...

6- الشركة نفسها ظهرت من سنة باسم مختلف، و نصبت على الناس باسم LocalAdClick و ناس كتير اتنصب عليها و محدش قبض حاجة

7- المفاجأة بقى اللى اكتشفتها، ان الساذج صاحب الشركة لسه محتفظ بالموقع القديم على الموقع الجديد، شوف من هنا LocalAdClick.net

8- موقع الشركة مفيهوش اى معلومات حقيقية عن الشركة، مثلا لو دخلت هنا http://www.globaladmart.com/.......us.html
هتلاقى ان التصميم ركيك جدااا، مفيش تليفون او فاكس .. فى عنوان و الشاطر يسافر و يتأكد بقى !!
واضح اللى صمم الموقع واحد فى 3 اعدادى! و اسال فى النقطة دى اى واحد خبير لان سهل يلاحظها من حاجات كتير ..


9- هتلاقى ناس بتقولك الشركة مسجلة فى الهند .. و رقم التسجيل U74999KA2011PTC060116 و الموقع اهو و اتاأكد !!

انا قررت اتأكد فعلا .. و مفيش شركة بقى بالاسم ده و لا برقم التسجيل ده ... لكن بيعتد على انك مش هتدور .. طمعك فى الفلوس و عماك و مش مخليك عايز تفكر كتييير فى التفاصيل ..

10- عنوان الشركة على الموقع اكيد طبعا وهمى (بس مفيش دليل)، و هما عاملين نفسهم جزء من شركة ViSim Advertising Limited اللى هى اصلا متسجل الدومين بتاعها يوم 26 يناير 2013 .. يعنى من 3 اسابيع !
و اتاكد بنفسك من هنا
TheVisImGroup.com - The Visim Group.... thevisimgroup.com

10- الاعلانات اللى عندهم و يقولك براندات .. اعلانات وهمية .. الشركات دى مش بتعلن عندهم و لا حاجة ..
لكن النصاب لازم يقنعك ان اكبر الشركات عنده !!
النقطة دى صعب تفهما اوى لو مش ليك فى الويب ماركتنج .. بس الشركات دى اسلوب فى الاعلان و سعر الاعلان بيختلف من دولة لدولة المفروض .. و غالبا بيكون 10 سنت و المصري ممكن يوصل لـ 1 سنت عشان يشوف اعلان !!


11- فكرة الاعلان الى بـ 10 دولار .. هى بداية النصباية
هيقولك: لانهم اكتشفوا انها افضل من اعلانات الفضائيات ... الخ
كلام ساذج جدا .. اعلانات الويب مش اختراع اول امبارح ...
الشركات بتدفع على الزيارة حوالى 10 سنت فى معظم شركات الاعلانات و اقل من كده بكتير كمان ....
السعر متغير و بيعتمد على حاجات كتير ..

ده الويب ماركتنج اللى فى العالم كله .. بس فى مصر الناس متخيلة ان فى ملايين تايهة مع الشركات و عايزة توزعها على الناس !!

دى مثلا صورة لحساب فى جوجل ادسنس
"قديمة و مش بتاعتى بس مجرد مثال"
http://www.fadycoder.com/Sample_AdSense.png

الاعلان ظهر: 19339
الزيارات للموقع او الخدمة اللى اعلن عنها: 520 شخص
المكسب على الـ 520 = 100 دولار و 62 سنت
يعنى كل شخص: 19 سنت تقريبا

هو ده سعر الاعلان .. و لازم كمان ما تشجعش حد يضغط على الاعلان .. لان الشركة مش هتدفع 10 سنت الا لما يكون اللى شاف الاعلان شافه بارادته لان كده ممكن يشتري المنتج ..

نفس الكلام على فيس بوك و جرب بنفسك لان قدامك ..


اخر دليل فى كلمتين ...
................................
اللى يقولك "انا قبضت"
- قوله ورينى صورة التحويل ..انا عايز صورة تحويل بنكى من الشركة ..
* يقولك اصلهم بيخصموا 30% عمولة تحويل و 50% ضرايب .. فانا باخد فلوسي كاش
- لو فهمت كلامى هتتأكد ان فلوسه اللى بيكسبها واخدها من ناس اضحك عليها .. و الشركة ما دفعتش حاجة ..


لو انت من بتوع "التجارة مخاطرة" .. مفيش بيزنس زيرو ريسك ..
فاقولك مبروك ..انت مصري صميم، انت الشخص اللى بيدوروا عليه و 3500 جنيه بتوعك حلال على الشركة طالما انت فكرت كده ..


الخلاصة:-
الخلاصة ان ده تسول شبكي، مش تسويق شبكى ..
و انا مش شغال فى كيو نت و لا اى شركة عشان ما تتعبش نفسك و تحاول تحلل ايه اللى مضايقنى ..

ده نصب واضح 100% لاحد حد شغال فى المجال ده .. انا بحاول على اد ما اقدر اقولك اللى يقنعك انت .. مش منظم اوى فى كلامى و مش واد اشتغل مندوب اصلا قبل كده عشان اتعلم ازاى اقنع حد بحاجة اى كلام ..

لو انت مشترك معاهم او مع غيرهم .. فبما انك ما قبضتش حاجة من الشركة (تحويل مباشر - تحويل بنكى يعنى مش فلوس كاش خدتها من الناس و ورطتهم و اعتبرت ان الشركة حولتلك .. كلامى واضح عشان اللى صدعونى و يقولى انا قبضت) اسكت شوية و انتظر لحد ما تتاكد انهم نصابين بنفسك او تقبض منهم (ابقى قابلنى!) ... لان بكلامك عن الشركة انت كده شغال مندب لشركة نصب للشركة ببلاش و بتستغل اسم الشركة عشان تلم فلوسك من الناس من النقط اللى عندك و تطلع اكاونتات لانك مش عارف تاخد فلوسك ..

لو انت لسه مش مشترك، اعتقد الكلام اللى فوق يفيدك، و لو انت حابب تجرب و من بتوع "التجارة مخاطرة" فانت حر .. بس المشكلة انك هتحاول تورط اللى حواليك معاك !


الكلام ده على الشركة دى و غيرها
goldline.pro
globaladmart.com
myrightad.com
و غيرها ..
و انت حرررررررررررر و اشرب يا مصري