الموضوع: كفايه نصب يابشر !!!

المشاركة الأصلية كتبت بواسطة ahmed_adham

احلى حاجه في موضوع التسويق الشبكي ده انه بقاله على الاقل 10 سنين في مصر وكل مره "الدميه" اللي بتدي الشكل القانوني للموضوع وتحبك النصبايه تتغير مره سلعه زي جهاز تدليك القدم الصيني ومره سلعه تانيه زي جهاز علاج الصداع ومره اعلانات وكل مره الناس بتبقى مقتنعه جدا جدا وكل مره الناس يتنصب عليها جدا جدا وكل مره الشركة دي تختفي في يوم وليله وكل مره الناس تقتنع بنفس الموضوع تاني مع شركه تانيه لمجرد ان السلعه اتغيرت. بس اللي لاحظته ان الفجور من الشركات دي عمال يزيد اكتر وعبط الناس بيزيد أكتر وأكتر يعني زمان كانو بيتكلمو في 100 جنيه و 200 جنيه لكن دلوقتي بقى بالألافات والناس تدفع. انا بال 3500 جنيه دول أطلع عمره احسنلي ويمكن بعدها رزقي يزيد وبالحلال وبدون أي شبهه بدل ما أشتغل شريك في نصبايه وأاكل ولادي بالحرام.

اه يا بلد. لولا الحرمانيه كان زماني بستعمل الفلوس بدل الكلينكس في الحمام مادام جمعها بالسهوله دي.

لو حد من المقتنعين بمصداقيه التسويق الشبكي وعايز يناقشني فيها أنا جاهز ويلا خلي الناس تتفرج.

انا نفسي اشوف (الشركه) اللي بيقولوا عليها دي
تصور ان في ناس اشتركت في كيو نت وخسرت
قاموا داخلين موضوع الاعلانات ده !!!!
زمان كنت بستغرب من حد يقول ان القمار ادمان !!

المشاركة الأصلية كتبت بواسطة alking_2006

الذ حاجة ان واحد صاحبى حاول يقنعنى بكيو نت و انا نفضت
و واحد صاحبى تانى حاول يقنعنى بجلوبال اد مارت و قالى انا قبضت و انا نفضت
كله نصب فى نصب
بس فيه ناس بتحب تضحك على نفسها و تصدق

نفس الكلام حصل معايا
بس للاسف اعرف كذا واحد دخل الآد مارت ده
وكلله في انتظار الملايين

المشاركة الأصلية كتبت بواسطة ahmed_adham

انا فعلا رحت شركه من دول. كنا في 2005 تقريبا وكانت في حلوان كانو واخدين فيلا بجنينه ولما رحت كان فيها ييجي 200 واحد وواحد صاحبي اللي كان واخدني معاه هناك من غير ما يقولي احنا رايحين فين وكل ما أقوله احنا رايحين فين يقولي لما نروح هتعرف. المهم الحوار كان على جهاز صيني بيعمل مساج للرجل أو حاجه زي كده والفكره انك تجيب ناس تحتك يشترو الجهاز. واللي فاكره ان سعر الجهاز مبالغ فيه وأنا طبعا رفضت الموضوع وكان ردي على صاحبي قلتله لو وريتني 1000 واحد معاهم شيكات القبض ولا حتى ماسكين الفلوس كاش في ايديهم مادام بدفع في سلعه تمن أغلى بكتير من قيمتها تبقى السلعه دي مجرد "دميه" ووراها لعبه تانيه ولا انت ولا اللي فوقك عارفينها يبقى محدش منكو يحاول يقنعني. وقد كان وفعلا مشتركتش.

أنا رأيي ان الناس اللي بتدخل الموضوع ده بتعرف بعد شويه حقيقه الموضوع بس بتكمل غصب عنها عشان تجيب ناس تحتها وترجع فلوسها تاني وبالتالي بيتحول الشريف لنصاب والمشكله انه بينصب على أقرب الناس ليه من أصحابه وقرايبه يعني الموضوع فيه جانب اخلاقي سيء كمان. أنا عن نفسي لو اشتريت عربيه وطلعت مقلب وفيها مشاكل لو هبيعها هعرف اللي يشتريها كل اللي فيها وأبيعها على عيبها بأقل من ما اشتريتها. هخسر فلوس بس اللي هاخده هيكون حلال وأنا عندي قرش حلال بييجي ببركته وتلاقي نفسك وأهلك وعيالك بخير ونفسيتك مرتاحه وتنام وتشبع من نومك أبرك من 1000 حرام تلاقي ربنا مسلط عليك 100 باب يشفط منك الفلوس ومتلاقيش بركه في أي حاجه وتلاقي عيالك بيتعبو كتير وكل شويه عند دكتور وكل ما تشتري حاجه تبوظ ولا تضيع ولا تتسرق.

اه عارف الشركه دي
بس الكلام ده زمان ايام ما النصابين كانوا عندهم ذمه وبيصرفوا شويه ايجارات وبتاع
بس ده مش اسمه مقر شركه
انا قصدي مثلا زي مقر فودافون
مقر موبينيل
اسمي كده داخل شركه

بس للاسف الناس مش بتفكر زيك
في اللي عايز الفلوس تيجي وخلاص
وفي اللي عايز يضيع خسارته من الفلوس اللي هيلمها من الناس
بحجة ال 30 وال 20 %

مافيش فلوس بتيجي من الهواء

المشاركة الأصلية كتبت بواسطة amrelsha3er

اخيرا حلصت قرااايه :d
الى صاحب الموضوع مشكور بصراحه لانى كنت مقبل على الحوار ده ومش مقتنع بيه بس واحد قريبى عماااال يزن عليا ويغرينى بالمكسب الفظيع اللى بدون اى مجهود غير ضغظات الكليك كل اسبوع وحتى لو مش هجيب ناس مش فارقه برضو هكسب!!!!!
وجهه نظرى المتواضعه ايه اللى هيدفنى 500دولار طيب؟!!! وهيروحو لمين لما قولت كده قالى هيروجو للفوق منى واللى فوق منى يديهم للفوقه!!!طبعا كلام مش مقنع
ايه اللى انا بتعب فيه عشان اخد الفلوس دى!!!
طيب مدى الصلاحيه اد ايه وهتقفل امتى !!!
الفلوس بتديك نقاط وممكن تغير النقااط بفلوس!!!!
ليه دولار!! ليه مش اى عمله تانيه هى مش شركه هندى ليه مش الروبيه الهندى بقى ولا الجنيه المصرى طالما احنا فى مصر !!!!
اخيرا دى مساعده لتعطيل مخ الشباب والمساعده فى انتشار البطاله
طيب ماكلنا نعد فى البيت بقى ونرمى فلوسنا فى الشركات المبهمه دى ونكسب والدنيا حلوه!!! ولا ايه؟؟؟
راى الشخى قد يكون صواب وخطا والف شكر لصاحب الموضوع لانى كنت مش فاهم كزا نقطه ومش مقتنع اصلا بالموضوع نورتنا ياريس مشكوررر
تحياتى العطره

العفو كللنا بنحذر بعض
وزي ماقلنا حضرتك هتدفع عشان اللي سبقك يقبض
ياربي ايه اللي حصل للناس بس للدرجادي ؟؟!!