الموضوع: العربية لسة بتنخع - ابيزا 99 محرك 1.4 mpi

بسم الله الرحمن الرحيم

السلام عليكم ورحمة الله وبركاته

أخواني الأعزاء في قسم سيات نايل موتورز
تحية طيبة،

من حوالي سنتين غيرت طرمبة البنزين اللي تقريباً المنتدي كله كان عارف انها بايظة عندي
http://www.nilemotors.net/Nile/28601...post3874276305

ومن يوم ما ركبتها وانا لاحظت حركة كدة ماكنتش بتحصل غير في اواخر ايام الطرمبة القديمة
وهي اني ابقي دايس بنزين وبتسارع بالعربية وفجأة احس ان العربية نخعت مني وكأني بنفخ في قربة مخرومة
للأمانة النخعة كانت خفيفة اوي ومش بتطول (يعني مجرد ثانية ونص او ثانيتين) وبعدها العربية ترجع تاني تفوق وتكمل تسارع وممكن ماتعملهاش غير بعدها ب3 ايام او 4 ايام
كلمت المهندس ايهاب يومها في التليفون (يوم ماغيرتها - لأنه كان معايا وانا بشتريها ووانا بغيرها) قالي ماتحطش في بالك وكمل بيها وان شاء الله تبقي كويسة

للأمانة هي كويسة والعربية مش بتعمل معايا اي حركات قلة من الحركات بتاعة أعراض طرمبة البنزين

بس النخعة زادت اوي بقالها حوالي شهرين ومدتها بقت اطول يعني بقت حوالي 3 ثواني وبتحصل تقريباً كل لما احاول اتسارع علي الثالث والرابع
وكنت اتكلمت عنها في موضوع شكوتي من طقم الدبرياج
http://www.nilemotors.net/Nile/41791...post3875539953

قولت اكيد هتظبط بعد الأسطوانة ان شاء الله (رغم شكوكي التي تدور حول الطرمبة - ماهو مش معقولة الأسطوانة بتفوت مني بقالها سنتين)

لكن للأسف الشديد النخعة مارحتش بعد الأسطوانة

قولت اكيد الزيت اللي بستخدمه وحش
لأني بقالي يمكن 6 شهور عايز اغير زيت بس لظروف ما كدة كنت مصهين علي الزيت وبكتفي اني ازوده بأي زيت يقابلني حتي لو زيت ذرة

قولت هتظبط بعد الزيت - بس للأسف الشديد بردو ما ظبطتش

قابلت المهندس ايهاب منصور من حوالي اسبوع
واتكلمنا وجه في الكلام الموضوع دة
وقولتله اني شاكك في الطرمبة
بس هو نبهني لنقطة تانية خالص كنت مش حاططها في الحسبان
الا وهي فالف الراجع بتاع مسطرة الرشاشات
انا طبعاً زي مانتو كلكم عارفين اني بهتم جداً بقياس استهلاك البنزين ومهتم ايضاً بالأضافات والمحسنات وكل فترات قريبة بستخدم منظفات البنزين وبغير فلاتر كتير (بنزين وهوا) وبنظف بوابة كتير وبعمل كل الصيانات السريعة دي بصفة دورية تقريباً كل من شهرين ل3 شهور
وبالتالي قصة ان الفلتر مكتوم او البوابة او الرشاشات نفسها - كل دي قضية محسومة ومنتهين منها

امبارح كان في موضوع في قسم الدايو وصاحب الموضوع كان بيتكلم في نفس الموضوع
اوعى الرجلاتور راجع البنزين ياعم الحاج هتخسر طرمبة البنزين
ولفت انتباهي لنقطة تانية في غاية الأهمية
وهي ان لو عندك مشكلة في الجزئية دي - استهلاك البنزين هيرتفع معاك
ودي نقطة انا بشتكي منها جداً اليومين اللي فاتو ودة طبعا كان واضح في الموضوع بتاع الزيت الأخير بتاعي
تجربة تغيير زيت المحرك وولفر 10W/40 - ابيزا 1.4 mpi

كلامي مع المهندس ايهاب كان علي ان محتمل كبير ان فالف الراجع دة يكون بيهرب كبس وضغط البنزين داخل المسطرة وبالتالي الرشاشات هتقفل ومش هتفتح للبنزين لأن عشان الرشاش يفتح ويضخ بنزين لازم يتوفرله ضغط معين (اولا ضغط الطرمبة نفسها - وبيساعد ضغط الطرمبة فالف الراجع اللي بيفضل قافل عشان يحافظ علي الضغط جوة المسطرة ولما الكنترولر بيقفل الرشاشات المفروض الفالف دة بيفتح ويضغط البنزين عشان يرجعه تاني للطرمبة او للتانك بمعني ادق)

وعليه

كان سؤالي بقي بعد المقدمة الطويلة جداً دي
هل اغير المسطرة كلها بما فيها الفالف (صمام الراجع)
ولا اكتفي بتنظيف الدورة (باستخدام STP Complete Fuel System Cleaner)
ولا انظفها يدوي
ولا الحل ايه ؟؟؟؟

تفكيري بيقولي
طب ما لو العملية نظافة - انا من ساعة لما ركبت الطرمبة تقريباً نظفت الدورة 3 مرات ومغير رشاشات (لأن عندي طقم رشاشات كنت شاريه احتياطي)
يعني لو هي واقفة علي نظافة ما انا منظفها قبل كدة ليه المشكلة مازالت قائمة ؟؟؟؟

طب حد يعرف حد أقيس عنده كبس الدورة ؟
ودة بردو كان موضوع نقاش بيني وبين المهندس ايهاب
أقيس الكبس قبل الفالف (عشان اقيس ضغط الطرمبة نفسها اللي المفروض يكون 1.2 بار)
وأقيس بعد الفالف والمفترض تكون محافظة علي نفس الضغط او اقل قليلاً

حقيقي مش عارف

ياريت افكاركم ومشاركتم معايا لأن المشكلة دي بجد قارفاني جداً وحاسس انها هتقضي علي الطرمبة لأن اكيد ضعف الضغط دة هيأثر بالسلب علي الطرمبة لأنها بتبذل مجهود اكبر في الضخ عشان تحافظ علي تسارع العربية

ولكم مني كل التحية

والله المستعان
،
،