الفلوانس مزعلاني من يوم ما جبتها

**MinaMonir** · 18-06-2014 05:10 PM

الحمد لله ربنا كرمني و جبت فيس لفت كسر زيرو عاملة 19000 كيلو و كشفت عليها في التوكيل و ادوني تقرير بيع وشراء (ميكانيكا و سمكرة)
والتقرير طالع كلة تمام و صاحبها عامل كل الصيانات في التوكيل بالفواتير و قالولي تيل الفرامل الامامي محتاج يتغير و غيرته
بس انا مش عارف من ساعة ماجبت العربية و بتحصل حاجات غريبة

عندي رجة في الموتور علي السرعات البطيئة اول ما اشيل رجلي من علي البنزين من سرعة 40 الي 43 بالظبط عامل
زي العربية المانيوال لما تسيب بنزين ودبرياج و تهدي سرعتها قوي تلاقيها بترجرج.

حاجة تاني وانا ماشي واجي اهدي مثلا علي اي مطب بعديه اجي ادوس بنزين تاني بحس بحاجة غريبة في الفتيس زي عضة او خبطة بسيطة.

والار بي ام بعد اي مشوار يثبت علي 1000 او اعلي شوية و بعدين ينزل ل 750 و بعدين يعلي تاني و هكذا لحد ما اطفي العربية خالص و اشغلها تاني يثبت علي 750 الطبيعي بتاعه.

وكنت في اسكندرية و رحت التوكيل في سموحة وبلغتهم بالمشاكل اللي شايفها

و بعد 7 ساعات انتظار من 9 صباحا ل 4 عصرا

اخيرا قالولي العربية خلصت وكله تمام بقولهم ايه اللي اتعمل فيها قالولي ظبط علي الكمبيوتر (سبحان الله ياخد 7 ساعات شغل)
فقولت للمهندس نطلع مع بعض نجرب قالي متقلقش كله تمام جرب انت و لو في حاجة بلغنا.
وزي ما توقعت
لا جديد ولا حياة لمن تنادي وكل المشاكل زي ما هي بالظبط بس بجد كنت زهقت لدرجة مستفزة
و من الزهق مشيت علطول و تاني يوم سافرت عشان انا مش من اسكندرية.

و انهاردة و انا ماشي بالعربية فجأة العربية كتبتلي Check Anti Pollution System
و لمبة ckeck نورت و علامة المفتاح بتاع الصيانة.

والله انا مش فاهم حاجة

نفسي في حل قاطع لاني بجد ابتديت ازهق من العربية وهبتدي افكر جديا ابيع العربية رغم اني عشقتها من كتر اللي اتقال عليها علي منتداكم المحترم.
مش عارف دا عشان جبت مستعمل ولا مليش حظ مع الفلوانس ولا ايه
بس هو كدا غالبا مش هننسجم انا و هي مع بعض.
و شكرا مقدما علي اهتمامكم

للمعلومة انا مشتري العربية يوم 2-6-2014 يعني من 16 يوم فقط

**Adnfalcon** · 18-06-2014 05:47 PM

حضرتك رقم 6 هنا فالمنتدي يشتكي من نفس العيوب
ولما قلت العيب دا منتشر الناس زعلت مني وقالوا انت بتعمم
اطلع ع التوكيل قولهم العربيه دي متلزمنيش عايز واحده جديده وأنا هشتيكيكوا ف كل حته ف حمايه المستهلك و ابعت ل فرنسا .. علي صوتك يعني عشان يهتموا ب كلامك

**Land_Cruiser** · 18-06-2014 06:03 PM

هو حضرتك عملت صيانه ال ٢٠ الف كيلومتر؟لو ما عملتهاش انصحك تعملها لان فيها شويه حاجات ممكن تكون علاج للاعراض اللي حضرتك بتقولها دي يعني مثلا زيت الموتور هيفوق العربيه هو و تنظيف فلتر الهواء و البوجيهات ممكن تكون بتخللي العربيه تأخر كهرباء و تعمل الرجرجه البسيطه اللي حضرتك بتقولها و الصيانه كمان فيها تربيط عفشه فممكن بعدها تحس ان العربيه بقت كويسه و بالمره تراجع ضغط الهواء في الاطارات . نقطه مهمه في موضوع الكشف في التوكيل هو بيقي مركز علي الكشف علي حاله العربيه و التأكد ان مفيش فيها لحامات او دهان و بيقدر كمان لو في قطعه غيار فيها مشكله يقول لحضرتك عليها زي تيل الفرامل او مشكله في مساعد انما قطع الغيار المستهلكة زي البوجيهات، الزيوت ، فلتر الزيت فدي بتبقي حسب عداد الكيلومتر

**eng.m7md.ali** · 18-06-2014 06:12 PM

Check Anti Pollution System

يعني المشكلة في علبة البيئة او الشكمان او الحساس .. طب ازاي؟!! ده العربية لسة زيرو

**hossam adel** · 18-06-2014 06:46 PM

نفس المشاكل اللى عندى و تقريبا نفس الكيلو متر 18000 كيلو

**hossam adel** · 18-06-2014 06:47 PM

ممكن نضبط معاد و نطلع مع بعض للتوكيل يكون افضل

**MinaMonir** · 18-06-2014 07:29 PM

المشاركة الأصلية كتبت بواسطة land_cruiser

هو حضرتك عملت صيانه ال ٢٠ الف كيلومتر؟لو ما عملتهاش انصحك تعملها لان فيها شويه حاجات ممكن تكون علاج للاعراض اللي حضرتك بتقولها دي يعني مثلا زيت الموتور هيفوق العربيه هو و تنظيف فلتر الهواء و البوجيهات ممكن تكون بتخللي العربيه تأخر كهرباء و تعمل الرجرجه البسيطه اللي حضرتك بتقولها و الصيانه كمان فيها تربيط عفشه فممكن بعدها تحس ان العربيه بقت كويسه و بالمره تراجع ضغط الهواء في الاطارات . نقطه مهمه في موضوع الكشف في التوكيل هو بيقي مركز علي الكشف علي حاله العربيه و التأكد ان مفيش فيها لحامات او دهان و بيقدر كمان لو في قطعه غيار فيها مشكله يقول لحضرتك عليها زي تيل الفرامل او مشكله في مساعد انما قطع الغيار المستهلكة زي البوجيهات، الزيوت ، فلتر الزيت فدي بتبقي حسب عداد الكيلومتر

العربية معمولها صيانة ال10000 و ال20000 قبل ما اشتريها و معايا الفواتير بالظبط صيانة ال20000 معمولة علي 19350 كيلومتر

**MinaMonir** · 18-06-2014 07:33 PM

المشاركة الأصلية كتبت بواسطة hossam adel

ممكن نضبط معاد و نطلع مع بعض للتوكيل يكون افضل

انا موافق نظبط مع بعض بس ياريت اعرف الميعاد قبلها بكام يوم عشان انا من اسيوط فاظبط شغلي و مواعيدي
وشكرا للاهتمام

**yasser100** · 18-06-2014 08:17 PM

يا جماعه ارجو تجربة بنزين 95 علشان موضوع الرجه دى . تجربه سهله و بسيطه و غير مكلفه كتير لانه بنزين هاتستعمله بارضه . ﻻنه نفس المشكله بالظبط ظهرت فى الاسترا و على السرعه القليله اللى تقريبا على نقلة التانى و ظهرت بارضه على كيلومتر عالى نسبيا و التوكيل اعترف انه لازم 95 برغم انه كان بيأكد من اول ما نزلت انها 92 اسألوا فى قسم الاوبل لانه نفس الموضوع فى الاسترا الرجه و ال ار بى ام اللى بيلعب . ارجو التجربه و الافاده

شكرا

**MinaMonir** · 19-06-2014 12:37 PM

المشاركة الأصلية كتبت بواسطة eng f3lix

check anti pollution system

يعني المشكلة في علبة البيئة او الشكمان او الحساس .. طب ازاي؟!! ده العربية لسة زيرو

لسا راجع من التوكيل في اسيوط
الجميل بقا ان المشكلة لا في علبة البيئة ولا الشكمان ولا الحساس
تسألني و تقولي المشكلة فين اقولك سبحان الله في التوكيل قالو مش عارفين
و حجزولي ميعاد تاني يوم الاثنين اللي جاي عشان محتاجين يراجعوا علي كهرباء العربية بالكامل

الجديد بقولهم العفشة ورا ناشفة شوية و كنت قولتلهم في توكيل سموحة يوم الاحد اللي فات و قالولي ربطناها و تمام مفيهاش مشكلة
هنا بقا قالولي المساعد الورا يمين ضارب و عايز يتغير و ميعرفوش تمنه هيسألوا و يردو عليا

و كفي الله المؤمنين شر القتال

وشكرا فلوانس

تجربة و هتعدي انشاءالله