تقييم ميجان بلاي 2015 بعد 10,0000

**MazenSamyZayed** · 17-03-2015 05:22 PM

بسم الله الرحمن الرحيم

في البدايه ده تقييم شخصي و مش كله هيتفق معايا بس حبيت افيد الناس بتجربتي
استهلاك البنزين :
استهلكت 1,000 لتر في 9,750 كم بمتوسط 9,7كم \ لتر , يعني حوالي 580-600 كم لتنك البنزين
انا شايف ان ده كويس جدا خصوصا اني بحرق كتير

اداء العربيه :
التسارع مش حلو قبل 50كم\س تحسها تقيله و صوت عالي و خلاص بس بعد ال 50 العربيه فعلا بتجمع بسرعه و المانيوال فارق معايا جدا في الجري و بتطلع من عربيات محترمه جدا
الثبات معقول في الملفات بس كانت بتديني احساس انها خفيقه عشان الدركسيون بتاعها بعد كده اتعودت عليها و هي ثابته عن عربيات كتير بنفس السعر و علي الطرق السريعه العربيه بجد ممتازه
الفرامل ناس كتير خوفتني منها قبل ما اشتريها بس انا مش شايف فيها اي مشكله علطول مستجيبه كويس و بتقف بسرعه, بس بعد 5,000 كم صوت صفاره بدء يطلع و يزيد و بعد الصيانه ان شاء الله هأكد عليكما ده تيل ولا ايه بالظبط
الشكل:
الخارجي: : انا عاجبني جدا و شكلها رياضي و ملفت جدا مش محتاجه اي زياده و كمان العربيه فئه واحده فمش هتحس بفرق خالص عن اي ميجان تانيه
الداخلي: هتحس ان جوه بيكمل بره في تناسق جامد و كل حاجه موجوده في الدركسيون الا زرار ال ok للأسف
الوسع : الشنطه كويسه بالنسبه للهاتشباك و واسعه لكن من جوه العربيه ضيقه لو بيركب معاك 5 هتحس انكوا لازقين في بعض اوي و مش مرتاحين
اجمالا انا مكنتش حابب العربيه بعد ما جبتها عشان كنت هجيب امبريزا او ليون و مكنتش مقتنع بيها 100% بس دلوقتي و للأمانه انا فعلا مبسوط بيها ككل و اقتنعت تماما انها كانت انسب حاجه اشتريها وقتها

**teesho** · 17-03-2015 08:43 PM

ربنا يباركلك فيها و عقبال صيانة المليون :d
بعد اذنك عندي استفسار علي حكاية الثبات ايه تقييمك ليه بوجه عام ؟ انا بقارن بينها و ما بين السيراتو و الشارك عايز عربيه شكلها شبابي و اكثرهم ثباتا

**Hany Saad** · 17-03-2015 08:46 PM

الف مبروك العربية أولاً
تقرير ممتاز و مفيد جداً
أنا بحب جداً جداً شكل الميجان بلاى و بحسها مميزة جداً و استايل قوى و بتلفت نظرى على طول اول ما بتعدى قدامى
ربنا يباركلك فيها و عقبال ١٠٠٠٠٠٠ كم

تحياتى

**Mustafa_Farouk** · 17-03-2015 11:52 PM

ربنا يبارك لك فيها.
طيب بالنسبة للمطبات، نظامها إيه؟ بتحك فيهم ولا ارتفاعها كويس؟
جربت التكيف؟ عزل العربية؟؟ موتور وهوا؟؟

**MazenSamyZayed** · 18-03-2015 03:05 AM

المشاركة الأصلية كتبت بواسطة mustafa_farouk

ربنا يبارك لك فيها.
طيب بالنسبة للمطبات، نظامها إيه؟ بتحك فيهم ولا ارتفاعها كويس؟
جربت التكيف؟ عزل العربية؟؟ موتور وهوا؟؟

هي ارتفاعها كويس جدا محكتش ولا مره لحد دلوقتي
التكييف مقدرش احكم عليه قبل الصيف
العزل جيد الي حد كبير بس صوت الموتور عالي كده كده لو بتحرق لكن لو ماشي هادي مش هتسمعه

**yasser100** · 18-03-2015 11:04 AM

المشاركة الأصلية كتبت بواسطة teesho

ربنا يباركلك فيها و عقبال صيانة المليون :d
بعد اذنك عندي استفسار علي حكاية الثبات ايه تقييمك ليه بوجه عام ؟ انا بقارن بينها و ما بين السيراتو و الشارك عايز عربيه شكلها شبابي و اكثرهم ثباتا

خللى بالك انه بيتكلم عن الميجان 3 و دى هاتشباك , مش هاينفع تقارن الثبات مع عربيات سيدان . الهانشباك له وضع خاص فى الملفات و مختلف فى الوزن .

**yasser100** · 18-03-2015 11:08 AM

المشاركة الأصلية كتبت بواسطة MazenSamyZayed

استاذ هاني ربنا يخليك شكرا

[
امين :d
بص الشارك ممتازه بس كثبات ميجان احسن ده رأي , انما السيراتو الجديده بصراحه معرفش معلومات عنها خالص بس اعتقد فيها esp و ده يديها افضليه
عموما هي ثابته و لحد دلوقتي مخانتنيش خالص بالرغم من الي بعمله
بس فكر في الامبريزا برده من رأي هي اثبت عربيه تحت 200 الف

كل فئات السيراتو ما فيش فيها esp و اجمالا ال esp مالوش دعوه بالثبات نهائى الا فى حالات معينه زى تعويم العربيه فى غرزه مثلا هنا بس بيشتغل , لكن الثبات العام بيفرق فيه وزن العربيه و طول و عرض قاعدة العجلات و مركز الثقل و ايروديناميكية العربيه فى التصميم و العفشه .

تحياتى