السلام عليكم
بخصوص موضوع الصيانه فاللى انت قولته مظبوط
لو معملتش الصيانه هاتخرج برا الضمان
عشان مش من المنطقى ان التوكيل يسيبك تعمل اللى انت عايزه فى العربيه برا
وبعد كدا ترجع تقول له ان فى حاجه فيها باظت
وكل التوكيلات كدا طبعا
الصيانه هى شرط الضمان
فللاسف اعتقد ان حضرتك حاليا خارج الضمان
ـــــــــــــــــــــــــ ـــــــــــ
بالنسبه للنقط اللى حضرتك ذكرتها بخصوص التوكيل
فأى توكيل بيبقى مبالغ فى اسعار المصنعيات
مع العلم ان منصور يعتبر أرخصهم أو يعتبر عادى لان فى أغلى منه بكتير
وطبعا فى الاول وفى الأخر دا شئ يرجع لتقدير حضرتك
وبيتهيألى فى ناس كتير بتعمل زى حضرتك كدا
بتجيب قطع الغيار والزيت والفلتر من برا وتركبهم برا عشان أرخص
ومعتقدش التوكيل هايقول أى حاجه
يعنى مثلا لو انت رحت الصيانه والمفروض تغير زيت وفلتر مثلا
قول له انا عايز صيانه بدون زيت وفلتر
يبقى هما هايعملو Check على العربيه بس وتدفع المصنعيه وخلاص
ونفس الموضوع مثلا لو انت بتعمل الصيانه وقاللك العربيه محتاجه تيل
تقول اوك انا هاغيره برا
يبقى انت كدا عملت الصيانه وتبقى مازلت فى الضمان
وفى نفس الوقت جبت حاجتك من برا رخيصه وعملتها بنفسك
عموما الكلام دا خلاص فات اوانه عشان حضرتك ماروحتش خالص
ـــــــــــــــــــــــــ ـــــــــــ
بالنسبه للعيوب اللى حضرتك ذكرتها
1 - علبة الدركسيون : دا مش عيب فى علبة الدركسيون دا بيبقى صوت تزييق وبيروح بعد 5 دقايق وملوش اى تأثير على العربيه
وممكن حضرتك تشوف الموضوع دا واقرا المشاركه ال 8 وال 14
http://www.nilemotors.net/Nile/89763-a.html
2 - موضوع الانذار محصلش معايا انا شخصيا
بس فى بعض الزملاء حصلهم ولقو له حل
شوف الموضوع دا
http://www.nilemotors.net/Nile/91278-a.html
3 - موضوع الكبوت برضه محصليش
بس برضه الزملاء اتناقشوا فى الموضوع دا
http://www.nilemotors.net/Nile/94599-a.html
4 - موضوع تيل الفرامل
انا شخصيا مانصحكش غير بالأصلى
وهو فعلا غالى وتمنه فى التوكيل تقريبا 220 جنيه
فلو عايز تجيب من برا أوك بس ماتجيبش حاجه رخيصه وحاول تجيب الأصلى وأكيد هايبقى أرخص من التوكيل
بس ماتجيبش حاجه رخيصه لان التيل دا حاجه مهمه جدا والفرامل هى اللى بتنقذك فى المواقف عشان كدا هى أهم حاجه
ـــــــــــــــــــــــــ ـــــــــــ
واهلا بيك فى اى وقت وتحت أمرك فى اى استفسارات
المفضلات