جسمى عايز عمره كامله او نص عمره

**A_H_M_A_D** · 21-10-2009 09:45 AM

موضوع جميل و حاينفع ناس كتير
و أنا أولهم !! عشان نفسي أخس

**ahmedfd** · 21-10-2009 11:05 AM

كل الكلام اللي قالوه الإخوة هنا قيم جداً فيما يخص الأكل و الرياضة و إن شاء الله هيفيدك جداً بس تعليقي على موضوع الجري، إن الجري مع الوزن الثقيل ممكن مع الوقت يعملك مشاكل في غضروف الركبة أو ديسك بالظهر لا قدر الله.
أنا بقول كدة من تجربة شخصية أنا كنت بجري لحد سنتين فاتوا 8 كيلو 3 مرات في الإسبوع يعني تخيل 8000 متر يعني وزن الجسم كله بيدب على كل ركبة حوالي 4000 مرة أو أكثر(تقريباً يعني) و ناس كتير حذرتني من كدة و نصحتني بالمشي بدل الجري بس النتيجة إني جالي غضروف في الركبة الحمد لله و الدكتور قالي ساعتها إن الجري عامة مش محبذ خصوصاً لو سنك فوق التلاتين و بيعرض لإصابات و إجهادات كتير.
عموماً أنا دلوقتي بمشي بس و على فكرة ميزة المشي السريع كمان إنه مفيد جداً للقلب ككـ Cardio Exercise بجانب تنشيط الجسم كله بدون إرهاقه بصورة تؤذيه..
فا يا ريت تاخد بالك من الحكاية دي و لو مصر على الجري ممكن تستنى لما وزنك يقل شوية و تقوي عضلاتك خصوصاً الظهر علشان الفقرات.
و ممكن تبص علىالموقع ده مفيد جداً:
http://www.thewalkingsite.com/faq.html
طبعاً يا ريت أطبارء المنتدى يدخلوا و يفيدونا أكتر في الموضوع ده.

**human** · 21-10-2009 11:23 AM

المشاركة الأصلية كتبت بواسطة محمد عز

أخى العزيز

هقولك كلمة دايما خليها فى بالك "التغيير مدى الحياة"

اول حاجة خلى عندك هدف والهدف انك تحافظ على صحتك زى ماأمر الاسلام علشان تاخد على النيه ده أجر باذن الله

تانى حاجة لو فضلت لمده سنة واحدة بتعمل مجهود رياضى زى المشى لمده 40 دقيقة لمده خمس ايام فى الاسبوع

او الجرى لمده 30 دقيقة لمده 5 ايام فى الاسبوع

الجسم بيفرز المورفين الطبيعى بعد كل نشاط بدنى علشان يخفف الام العضلات والجسم بيتعود على كده وتبدا تحس بريلاكس وصفاءالذهن

وبالتالى بعد سنه واحدة من بذل النشاط الرياضى هتلاقى نفسك اتبرمجت بقيت حياتك انك تمارس النشاط الرياضى نتجيه تعود جسمك على المورفين الطبيعى ومش هتقدر تستغنى عن النشاط الرياضى

وده بيسموه الادمان الايجابي

الفوائد اللى هتعود عليك

ضغط دم طبيعى
قلب قوى
تقليل فرص الاصابه بمرض السكر
نشاط ذهنى وبدنى

وعلشان تبدا

لازم تعمل ريجيم تنزل فيه وزنك الزايد
مع الرياضه (مشى او جرى)

صدقنى هتحس انك مختلف هتلاقى نفسك بتعمل حاجات مكنتش تتوقع انك تعملها، هتلاقى نفسك اكثر شبابا ، اكثر ثقة فى نفسك ودايما هينتابك شعور بالرضا عن مظهرك

زى ما الاجانب بيقولو تغيير نمط الحياة life style change

صدقنى هتحس بفرق كبير والكلام ده كله مبنى عن تجربه شخصية

"التغيير مدى الحياة"

اول مره اققرا كلام يمزجنى على المحافظه على الصحه
تسلم ايدك

**mohammedsaid** · 21-10-2009 03:28 PM

اولا شكرا لكل اخواتى الردوا عليا وفعلا انا روحت الجيم بس المشكله ان الكابتن بتاع الجيم قالى انتا مش محتاج تخس قالى احنا نبنى عضلات وقالى انهاردا تكسير عايز اعرف رايكو اسمع كلامه ولا لا وبيقول كمان 85 مش كتير مش فاهم ازاى

**human** · 21-10-2009 03:30 PM

المشاركة الأصلية كتبت بواسطة mohammedsaid

تولا شكرا لكل اخواتى الردوا عليا وفعلا انا روحت الجيم بس المشكله ان الكابتن بتاع الجيم قالى انتا مش محتاج تخس قالى احنا نبنى عضلات وقالى انهاردا تكسير عايز اعرف رايكو اسمع كلامه ولا لا وبيقول كمان 85 مش كتير مش فاهم ازاى

لا ماتسمعش كلامه
ده كفتجى

**mohammedsaid** · 21-10-2009 06:04 PM

المشاركة الأصلية كتبت بواسطة human12

لا ماتسمعش كلامه
ده كفتجى

يعنى انفض للجيم

**chicobon** · 21-10-2009 06:08 PM

لا مش كفتجي ولا حاجة هو يقصد انك عشان تشيل حديد محتاج انك تاكل كويس و الجسم محتاج تغذية سليمة و هو عشان كده قالك كده فابدل ما تاخد في ادويه الي هي بتتباع في الصيدلية لبناء عضلات انت مش محتاج لده هو يقصد كده و بعدين انت من نفسك قلل اكلاك و برده العب في الجيم و هتشوف الفرق . بس كان عندي لحضرتك سؤال هو الجيم ده فين و كام الاشتراك بتاعه , يارب نسمع عنك كل خير

**mohammedsaid** · 21-10-2009 06:39 PM

الجيم فى المنيل بس معرفش اشتركاه بكام الحصه ب10

**mohammedsaid** · 21-10-2009 10:35 PM

وكنت عايز اسال اطباء المنتدى ايه هوا الامينو الى عايزنى اخده دا

**msobhy** · 22-10-2009 01:39 AM

المشاركة الأصلية كتبت بواسطة mohammedsaid

وكنت عايز اسال اطباء المنتدى ايه هوا الامينو الى عايزنى اخده دا

حضرتك انا مش طبيب لكن اسمح لى اقول لحضرتك شوية حاجات يمكن تفيدك
اولا بخصوص الامينو اسيد اعمل بحث على الانترنت وهاتلاقى معلومات بالعبييييييييييييييط ونصيحتى اياك تاخده مع العلم انه مش هايأذيك

ثانيا فى معلومة نادرا ما فى شخص بيعرفها - المفروض ان حضرتك تكتشف جسمك وتعرف انت عايز تعمل ايه وهيه ديه خلاصة 4 سنين فولى بول + 4 سنين كمال اجسام + 9 سنين لياقة عامة

بخصوص الكابتن اللى عايزك تلعب كمال اجسام اغلب المدربين اللى موجودين فى اى جيم بيكونوا هواه ومهوسييييييين بالحجم والضخامة - علشان كده قال لك تاخد امينو علشان يقسم جسمك ويساعد على زيادة قدرتك على التمرين

طيب انت تعمل اية؟؟؟؟؟؟؟؟؟؟

نرجع للنقطة الاساسية لازم تعرف جسمك

بخصوص الرياضة اغلبنا اتربى بشكل خاطئ ومفاهيم غير سليمة - بالنسبة ليه الرياضة هيه صحة احسن / فقط لاغير

هاتقولى انا عايز اخس علشان المظهر العام - أو عايز العب كمال اجسام علشان حمام السباحة والشاطئ................. كل واحد له تفكيره لكن المهم تعرف ايه هيه عواقب اى حاجة هاتعملها

لو اخدت أمينو ومكملات غذائية وجسمك قابل للزيادة يبقى حضرتك بتلعب بقنبلة موقوته

هاتلاقى ناس تقولك لازم تمشى كتييير - وناس تانيه هاتقولك مفيش غير الجرى - وناس تقول الجيم - الرجيم - أدوية التخسيس - كريمات التخسيس - تقليل الوجبات.................... طيب انت فين من كل ده

انا واحد من الناس بقدر اتحكم فى وزنى زى ما انا عايز ......... طيب ازاى - صدقنى مش هاتفرق معاك لو قلت لك لأن اللى بينفع معايه مش بالضرورى ينفع معاك

لازم حضرتك تجرب بنفسك وتلغى كلمة انك تصبر على التمرينات وتعتبرها جزء عادى من حياتك

فاضى النهارده هاتمرن

نفسى أكل أكله تقيله هاكلها لأنى عارف انى هاحرقها فى التمرين

اختار لحضرتك اى طريقة تمرين سواء مشى - جرى - سباحة - اجهزة فى البيت ...... لكن مهم جدا انك تروح الجيم ولو مره واحده فى الاسبوع وتلعب على كل الاجهزة وبدون استخدام وزن ثقيل

والله حضرتك انا الناس شبه بتتريق عليه وانا فى الجيم من الاوزان اللى بلعب بيها - يا جماعة انا عايز صحة كويسة وبس - ولا بأحلم انى اكون ارنولد أو بلطجى - ولا عايز اطلع فى علانات الملابس وانا جسمى متقطع وعروقه ظاهره

العب لنفسك وصحتك - والعب الحاجة اللى بتحبها ونظم أكلك وان شاء الله هاتبهر من النتييجة

اعتذر على الاطالة