هل هتقاطع الفيس بوك

**ENG\AHMED** · 24-10-2009 12:53 PM

المشاركة الأصلية كتبت بواسطة motorizer

طيب نفند أوراق الموضوع ..

أول حاجة الموضوع قائم علي نظرية المؤامرة بشكل صرف .. فيه جروبات مسيئة للإسلام .. و فيس بوك سايبها إذن هو موقع موالس للصهيونية و اليهودية و الإمبرالية و اللامركزية العباسية! في حين إن بالبحث هتلاقي جروبات مسيئة للأديان بشكل عام و بتتريق عاليهود و عالمسيحيين و عالدينيين و اللادينيين و كل أشكال الإعتقادات في العالم ! و فيها أعضاء كتير برضه .

المعترضين بيعملوا إيه ؟ كل واحد يعمل جروب "مطلوب مليون توقيع لغلق غرفة تسب الرسول" علي فكرة و الله الإيميل ده بيجيلي من سنة 2001 ! و كل شوية مطلوب مش عارف كام توقيع لغلق جروب يسئ للإسلام .. لو الجروب ده وصل مليون عضو هنرجع تامر حسني السجن .. لو الجروب ده وصل ألف عضو هنجيب أبو تريكة في حرس الحدود .. إلي أخره من البتنجان .. اللي بيعمله الأشخاص إن بينضموا للجروب و خلاص لما يلاقي صحابه دخلوا أو حتي إيماناَ بالقضية بس محدش بيعمل ريبورت ولا حتي يقرا وصف الجروب .. مثال .. انا كتبت مقال قبل كدة ناس نقلته و عملته جروب إنضم فيه 43 ألف عضو .. كام تعليق جه من ال 43 ألف ؟ 1000 و شوية .. منهم حوالي 600 رد إعلانات لجروبات تانية !

بالنسبة لجروبات الملحدين .. ممكن يعملوا كاريكاتير يجسد المولي عز و جل و أه ده طبعاَ كفر في الإسلام إنما مقبول في إعتقادات تانية و البعض قد يراه ظريف! و متتوقعش من فيس بوك يفكر زيك ! الفيس بوك ملوش ملة .. متتوقعش إن الموقع يحترم الإسلام علي وجه الخصوص .. لأنك هتلاقي جروبات بتسخر من الأديان كلها .. سياسيين كتير جداَ .. من أماكن و بلدان كتير .. بإختصار مفيش تابوهات .. و لو مش علي فيس يبقي عالمدونات .

البنت اللي عملت جروب ورق تواليت عليه القرأن في المانيا دي جروبها صغير جداَ و الفانز بتوعها عالمدونة معدوش 10 !! الهوجة كلها من عندنا .. يعني لو سبناها تعض في الأرض هي أساساَ محدش معبرها لأن في معظم مناطق العالم المتحضرة إهانة الأديان بشكل فج غير مقبولة .

الموضوع انا شايفه هوجة مقاطعات و خلاص .. عامة يوم المقاطعة و أهوه و كل اللي حاطين صورة المقاطعة من أصدقائي أونلاين علي فيس بوك بيتأكدوا إن الناس مقاطعة و محدش بيدخل .

انا لا أقصد الإساءة بس الحركات دي و أخذ الموضوع بأسلوب "العركة" خاصة لو شفت المشتركين في الجروب و صورهم و تعليقاتهم و طريقة تفكيرهم .. بفتكر أغنية "انا إسمي توتي و عايز أحارب ونبي .. إدوني مطوة أغز بيها المعتدي"

للأسف احنا اللى بننشر الاساءة زى ايام الرسومات المسيئة واحد رسم رسمة وحطها على النت - ايا كان الرسمة مش هتقدر تقولة اعمل ومتعملش - كل يوم تلاقى ايميلات فيها الرسومات دى وعلى المنتديات "الحق رسومات مسيئة وفيها الصور !!!!!!!" ... يبقى مين اللى نشرها فى الاخر!

الناس دى ملهمش عقيدة ولا دين وهما اتولدوا وكبروا فى البيئة دى من الاخر حافظين مش فاهمين لو حد اتكلم معاهم بالعقل وبالأدلة بيبتدى يصحى من الغيبوبة ويفكر بس حد يكلمهم للأسف مفيش !! .. اسهل واحد تقدر تسيطر علية اللى بيحارب من غير عقيدة بكلمتين حافظهم

للأسف المقاطعة والكلام دة مش حاجة ايجابية دة كلام احنا بنشتغل نفسنا بية يعنى اية مقاطعة يوم!! اية اللى هيحصل فى اليوم دة وتلاقى جروبات فيها الاف مؤيدة المقاطعة وتلات ارباعهم هيدخلوا بردة .. لو المقاطعة حاجة ايجابية يبقى مقاطعة لحد لما اللى عايزينة يتنفذ مش 24 ساعة!!!
طيب لما اليوم دة يخلص اية اللى هيحصل بعد كدة لو مفيش رد .. مقاطعة 48 ساعة!!!

لو عايزين نبقى ايجابين صح يبقى لينا كيان ووجود يبقى لينا صوت نبقى حاجة نصلح احوال بلادنا الاول علشان يبقى لينا كيان محترم الكل يعملة الف حساب قبل مايتطاول علية نبقى بلاد لينا صناعة واقتصاد عندنا اكتفاء ذاتى ساعتها بس الناس دى هتعملنا الف حساب انما نيجى نقول مقاطعة البضائع الامريكية طيب فين البديل عندنا .. فى منتجات صناعة محلية بترخيص من شركات اوروبية وامريكية تقوم الناس تقولك لأ بس دى منقاطعهاش اصلها فاتحة بيوت ناس كتير طيب من ايام المقاطعة دى فاتت سنين لحد النهاردة قدرنا نعمل بديل للبضائع دى علشان تبقى مقاطعة بجد

والناس تقولك اهى حاجة احسن من مفيش اهى حاجة ايجابية طيب مادام هنعمل حاجة لية متبقاش حاجة بجد لية منمشيش فى الطريق الصح ونخطط للمستقبل مش لدلوقتى بس لية منعملش الحاجة دى على طول مش لما نلاقى رسمة ولا جروب

معظم الحاجات اللى بتتنشر والكلام دة بيبقى المقصود منة لهى الناس علشان ميفكروش فى الاكبر دة احنا من جوانا مختلفين وبنتكلم النقاب فى الدين ولا لأ والشيوخ مختلفين وبيردوا على بعض والناس بتتفرج وبتتكلم واهم لاقوا حاجة يتلهوا فيها وتشغل دماغهم وكل حاجة ماشية تمام

**Car's Sniper** · 24-10-2009 01:50 PM

ياجماعة الفيس البوك دا بيجيب فلوسه من الاعلانات اللى بتتعمل على قفا المستخدمين وطبعا الشركات عارفة كام واحد فاتح السايت دلوقتى وكل ما العدد زاد تمن الاعلانات هاتزيد عشان كده احنا هنقاطعه النهاردة ونواريهم هنخسرهم قد ايه ولو ماستجابوش لينا ان شاء الله هقاطعهم للابد

**mohamed_mohsen** · 24-10-2009 03:53 PM

حتي لو كلنا قاطعنا الفيس بوك كلنا...إيه اللي هيحصل يعني
ما الفيس بوك مليان جروبز بتسب الأديان كلها
لو كل طائفه قالت أنا هقاطع الفيس بوك مش هتلاقي حد يدخل الفيس بوك أصلاً
اللي يتكلم يتكلم... و اللي بيشتم في رسول أو دين لا يسيء إلا لنفسه
و دليل علي إنحطاط شخصيته و أصله
حتي لو حاورته هو مقتنع بفكره و مش هيغيرها
ممكن لجهل أو لحقد منه ... الله أعلم
خلاصة الكلام أنا مش هقاطع لأنني مقتنع بديني و بإسلامي مش عشان أنا (سلبي) أو (مش عايز أعمل حاجه)
و لإني كمان مش هستفيد حاجه لما اقاطع الفيس بوك ليومين أو تلاته أو سنه

و بعدين الناس اللي هتقاطع دي هتفضل مقاطعه طول عمرها
هما يومين و تلاته و هتخلص الحكايه و هيرجعوا أكتر من الأول
شوفوا البلد الأول بعدين ابقوا قاطعوا علي الفيس بوك و العبط ده

**M.Osman** · 24-10-2009 04:06 PM

يا جماعة...

الموضوع بسيط جداً
فكرة المقاطعة كانت لتقليل الـtraffic اللي بيستخدم الفيس بوك في يوم واحد عشان الإدارة (إدارة الفيس بوك) تاخد بالها ان في جروبس موجودة لسب جميع الأديان و هذا لا يليق طبعاً

من وجهة نظري شايف انه احتمال ضعيف يحصل حاجة ..لكن في نفس الوقت مش لاقي اي علاقة بين المقاطعة لمدة يوم و إلزام الناس انهم يقاطعوا للأبد!

و بعدين الفيس بوك خدمة .. كل واحد بقى و حسب نيته و إستخدامه ليها و بصراحة الفيسبوك ليه استخدامات كويسة جداً جداً (كفاية الجروبس اللي بنعملها ايام ماكنا بندرس.. إلخ)

كل واحد على حسب استخدامه وإلا كلنها هنقاطع النت و التليفيزيون و كل حاجة

و دا لوجو الـ event : (لوجو معبر)

**2hmed_7osam** · 24-10-2009 04:27 PM

لما حصل مقاطعه للدنمارك والبضائع الدنماركية
المنتجين واصحاب الشركات هناك كانو بيشحتو وخسروا كتير اوي

لما احنا نقاطع يوم ويخسروا فلوس الدعايا والاعلانات وترتيب الموقع
وهيعرفوا ان في حاجة غلط

مليون تقرير اتبعت لأدارة الفيس بوك وبيتعتلي نموذج بلغة مهذبة فيه اعتراض على الجروبات عشان تبقا رسالة محترمة توصل للأدارة
وف الاخر محصلش حاجة

معلش في ناس بتقول بصو للبلد وبصو لمعرفش على ايه
اقرا الحديث وشوف الرسول بيقول ايه

عَنْ أَبِي سَعِيدٍ الْخُدْرِيّ رَضِيَ اللَّهُ عَنْهُ قَالَ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ: مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ

احنا بنعمل اضعف الايمان
صحيح مش حل قوي ولا حل رادع بس اسمك عملت حاجة واخدت ولو نص خطوة قدام

انا مقاطع وبثبت لنفس بأني ممكن استغنى عن الفيس يوم
واخليهم يخسرو ونا مش هخسر حاجة

مقااااااااااااااااااااااا ااااااااااااااااااااااااا اااااطع

**bmya** · 24-10-2009 06:19 PM

المشاركة الأصلية كتبت بواسطة 2hmed_7osam

لما حصل مقاطعه للدنمارك والبضائع الدنماركية
المنتجين واصحاب الشركات هناك كانو بيشحتو وخسروا كتير اوي

لما احنا نقاطع يوم ويخسروا فلوس الدعايا والاعلانات وترتيب الموقع
وهيعرفوا ان في حاجة غلط

مليون تقرير اتبعت لأدارة الفيس بوك وبيتعتلي نموذج بلغة مهذبة فيه اعتراض على الجروبات عشان تبقا رسالة محترمة توصل للأدارة
وف الاخر محصلش حاجة

معلش في ناس بتقول بصو للبلد وبصو لمعرفش على ايه
اقرا الحديث وشوف الرسول بيقول ايه

عَنْ أَبِي سَعِيدٍ الْخُدْرِيّ رَضِيَ اللَّهُ عَنْهُ قَالَ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ:

مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ

احنا بنعمل اضعف الايمان
صحيح مش حل قوي ولا حل رادع بس اسمك عملت حاجة واخدت ولو نص خطوة قدام

انا مقاطع وبثبت لنفس بأني ممكن استغنى عن الفيس يوم
واخليهم يخسرو ونا مش هخسر حاجة

مقااااااااااااااااااااااا ااااااااااااااااااااااااا اااااطع

%% :b4_388:

**تامر.محمد** · 24-10-2009 07:07 PM

المشاركة الأصلية كتبت بواسطة lancerevolution

توضيح بالنسبة للإعلان
لو أى حد حاطط إعلان على الفيس بوك مش هيجى يوم الحد و يدفع أقل هيدفع نفس القيمة بردوا و لو مش عاجبه مش هيعلن خالص و فى مليون غيره
ناس زى بى إم و مرسيدس فودافون و الشركات الكبيرة بتبقى بنها عقود مش معقول هيفسخوا العقد عشان يوم مقاطعة
يعنى من الأخر الإعلانات فلوسها زى ما هى و فى إعلانات باليوم مش بالكليك كمان يعنى فلوسه واصلة

لا يا باشا الاعلانات بالمشاهدة و بالكليك غير ما هي باليوم
ده غير ان اللي باليوم بيتعد هي اتشافت كام مرة و بيبقى بيها تقارير

ده غير بقى ان فيه اعلانات موجهة مثلا للمصريين بس , يعني لو فعلا بجد قاطعوا , باي باي , و الريبورتات بتقول الاعلانات دي اتشافت كام مرة , و بتتعمل يوميا

و طبعا اي شركة بتعلن هناك لما تلاقي ان معدل مشاهدة اعلانها بقى منخفض , اكيد اقل حاجة هاتعملها انها هاتدفع اقل , ده بيزنس و اللي بيعلن مش اهبل و اللي بيقدم خدمة الاعلان مش اهبل

رجاء
كفاية تكسير في مقاديف اللي عايزين يعملوا حاجة بقى
اللي عنده حاجة هاتجيب نتيجة و ما اتجربتش قبل كده و فشلت يطرحها و ممكن نعملها
اللي ما عندوش , لو ما انضمش للي بيحاولوا

يا ريت ما يكسرش مقاديفهم

**mando_07** · 25-10-2009 01:39 AM

عمل صغير بنية كبيرة اعظم من عمل كبير بنية صغيرة
اللي قاطع ده مخسرش حاجة ده ممكن يكون خد ثواب كمان عشان نيته كانت خير و متهيألي دي حاجة بسيطة احنا مقلناش هنحارب أنا مش عارف اللي معترضين قوي دول زعلانين ليه !؟

-

الموضوع: هل هتقاطع الفيس بوك

LinkBack

أدوات الموضوع

عرض

-

-

-

-

-

المواضيع المتشابهه

الفيس بوك؟؟؟

الفيس بوك

هتشارك ولا هتقاطع ؟؟

الموضوع زاد عن الحد-أسمع خالد يوسف و قول هتقاطع أفلامه؟ولا لأ

الكلمات الدلالية لهذا الموضوع

المفضلات

المفضلات

ضوابط المشاركة