الموضوع: حجزت السيريون 1300 gl اتوماتيك

المشاركة الأصلية كتبت بواسطة y2y1500

ده انطباعى عن العربية السيريون

السلام عليكم جميعا ...
وشكر جامد جدا للمهندس محمود اللى سمحلى بتجربة حبيبة القلب (دايهاتسو سيريون) النهاردة بكل روح رياضية بعد كل اللى قولته عليها قبل وبعد ما اشتراها

طبع العربية من الخارج كلنا عارفينها وبنشوفها فى الشوارع كتير
حجمها صغير مدمج تصلح للقيادة داخل المدينة بجدارة وتوفر وقت كبير لصاحبها عند ركنها فى أى مكان ضيق او قيادتها فى منطقة مزدحمة
اقدر اسميها فوريييييييييييرة

من الداخل بقى مساحات ضخمة فى جميع الاتجاهات وجيوب وأماكن تخزين وحوامل أكواب وخلافه بالعبيط متوزعة بين الامام والخلف والابواب
يعنى حدث ولا حرج وبسم الله ماشاء الله تشيل أوزان أفيال مستريح وأطوال كمان عن تجربة 3 فى الخلف و2 فى الامام غير السواق
يعنى من الآخر نقدر نكتب على الشنطة عبارة: (مصرح بركوب أطوال وأوزان)
وده اللى مستغربله أن محمود زى ما هاتشوفوه فى الصورة جسمه صغير يعنى مش محتاج المساحة دى كلها
ولا يمكن بيعمل حساب للمستقبل واحنا مش واخدين بالنا

فى المجمل عربية جميلة لذيذة وكتكوتة ومكببة برضه وتحب تبصلها من برة يعنى طول ما انت ماشى بيها تلاقى المعجبين حواليك

بس أنا ليا كام ملاحظة كده ع الماشى وتفاصيل دقيقة مش عاجبانى شخصيا لأنى بصراحة بأهتم بالتفاصيل جدااااااااااااا
فأتمنى أن حضراتكم تتقبلوها بصدر رحب
أنا قصدى لو كانو موجودين يبقى تمام التمام وخير وبركة وهى كالآتى:

1. مفتاح العربية صغير وقديم شويتين غير مزود بنظام مانع السرقة ولا مشفر للحماية عندك حق فعلا
يعنى فى الميدالية زى أى مفتاح تانى أى حد يشوفه مايقولش عليه مفتاح عربية خالص غير لما يقرا كلمة دايهاتسو عليه بشكل لا يليق بالسيارة ولا حجمها (حاجة تغيظ)
وكمان من غير ريموت كونترول عندك حق فعلا

2. وضعية زرار التحكم فى ضبط المرايات الجانبية غير ملائم على الاطلاق فى الجهة اليمنى بين الكونتاكت والكونصول الوسطى
أتمنى لو كان على اليسار جهة باب السائق
فعلا مكانهم رخم شويه بس بالتعود هتلاقي نفسك اتعودت عليه بس هو مكانه بعدي شويه

3. عدم وجود Foot Rest أو سنادة للقدم اليسرى فى العربية الاوتوماتيك لراحتها خاصة على المسافات الطويلة مع ان الدواسة دى موجودة مثلا فى الاكسنت القديمة المانيوال (مش عارف ليه مش موجودة)
انا برده ياباشا استغربت في الاول لعدم وجودها مع انها عندي فيالصني وكانت عندي في اللانسر !!
لكن بعد كده فهمت العربيه كراسيها عاليه وقعدتها عاليه ولذلك حضرتك بتكون قاعد زي متكون قاعد علي كرسي سفره تمام كده فحضرتك مش محتاج ان تفرد رجلك وبالتالي لازم تلاقي حاجه تسند رجلك عليها(بغص النظر عن انها ميزه او عيب انا بشرح الموقف) اما العربيات السيدان كراسيها منخفضه ولذلك من الصعب انك تقعد من غير ما تفرد رجلك ولذلك لازم تلاق حاجه تسند عليها رجلك بس كده
انا عن نفسي مستغربها برده لاني متعود عليها في الصني واللانسر لكن انا اصلا كنت مستغرب العربيه ككل لاختلافها كلياااااا عن العربيتين

4. العدادات صغيرة وبالكاد تشغل حيز خلف المقود وأهم ما فيها (من وجهة نظرى) كومبيوتر الرحلات ومؤشر الوقود الديجيتال
بصراحة كده مش ممتع للنظر بالنسبة لى زى عربيات تانية تحب تبص كل شوية فيها على التابلوه والعدادات سواء السرعة أو RPM
انا معاك ان شكل العدادات عبيطه فعلا ومش عارف ليه التصميم العجيب ده بس محدش يقدر ينكر (بغض النظر عن الشكل) ان العدادات تؤدي الغرض علي اكمل وجه من وضوح للرؤيه والاضاءه بتاعتها مريحه جدااا وكله موجود قدامك

5. الدلايات الخلفية فعلا حاجة تحرق الدم لما تقع وتلاقى الواحدة ب200 ج على حته بلاستيكة سوداء متثبتة بكلبسات
وعلى فكرة واحنا بنشوفها عن قرب قبل اما نركب العربية لقينا كلبس منهم مفكوك عكس الدلايات الأمامية متثبتة بمسامير (مش عارف ليه)
دي بقه متفق معاك 100% لاني ضحيه ليها
وبحذر كل الناس شيلو لكليبسات وثبتوها بمسمار بورمه وصاموله

6. عزل الصوت والضوضاء الخارجى والزجاج مغلق بالكامل أديله (3 درجات من 5)
بصراحة عربيات كتير يمكن أقل منها فى الفئة والسعر وأكبر حجما عزلها أفضل من كده بمراحل لدرجة خليتنى أشك للحظة أنى راكب كيا برايد مو97 مش دايهاتسو سيريون مو2009
مش قوي كده ياباشا (مقارنه بلانسر والصني )

7. عدم وجود تصفيح أسفل المحرك ونظام التعليق الامامى
مش ضرورى أوى بس مطلوب فى حالة السير على طرقات غير ممهدة كتير أو طرق فرعية وما أكثرها فى بلدنا العزيزة
هو حاجه كويسه بس كام عربيه في مصر فيهم التصفيح ده ؟!

8. الاطار الاحتياطى مقاسه أصغر من القياسى
أكيد بسبب ضيق مساحة تحميل الصندوق الخلفى ولا توفير ولا ايه بالزبط
المهم أن الواحد لو ركبه فى حال انثقاب احد الاطارات شكله هايبقى مستفز جداااااااا وهاتضطر تغيره فى اسرع وقت ممكن
متفق معاك جدااا هو شكله عبيط اوي والادهي لونه الاصفر الجمييييل بس زي ما حضرتك قلت كده لعدم امكانيه وضع استبن بنفس المقاس(علي فكره هو نفس القطر 14 بس الكاوتش هو اللي مقاسه صغير عرضا وارتفاعا)
بالاضافه لوجوده في عربيات كتير(جين2 جولف ابيزا)

9. نظام التعليق أو العفشة ليست مريحة (من رأيى) ومحتاجة تمشى بيها على طريق سريع نضيف و حرير عشان تستمتع بيه خاصة أن العجلات قريبة من صالون السيارة عكس السيارات السيدان
فأقل حصوة او نتوءات على الطريق - وما أكثرها - تترجم إلى رجرجة ملحوظة يشعر بها من يجلس داخلها
بالنسبه للنشوفيه عربيه محمود لسه جديده العفشه بتريح بعد فتره بالنسبه للاهتزاز والرجرجه دي موجوده تقريبا في الهاتش باك معظمه اللي متعود علي السيدان هيحس بيها اللي متعود علي الهاتش اتعود عليها مش هيحس بها غير لما يركب سيدان وبعدين يرجع يركب هاتش باك تاني(زيي كده بركب الصني وبعدين اركب السرييون احس بها)

10. وأخيرا وليس آخرا ..
ينقص هذه السيارة فرامل ABS مانعة للانغلاق حتى تكتمل منظومة الامان فى السيارة مع الوسائد الهوائية
طبعا ده لا يعتبر عيب فيها لانه اوبشن موجود في الموديل الGLX (زي ما بيقولوا الغاوي ينقط) وكمان كام عربيه موجوده في مصر فيها الABS !! مش اوبشن وبالسعر ده

ملحوظة:
الحكم على قوة المحرك والفتيس الاتوماتيك وقدرة السيارة على التسارع والمراوغة واللذى منه لم يتعين بعد لأن السيارة مازالت فى التليين
دي ابصم بال10 انها تمام جدااااا بسم الله ما شاء الله

------------------------------------------------
وفى النهاية
يارب أكون ما زعلتش حد من الاخوة السيريوناوية وخاصة محمود آخر العنقود وللأسف ماغيرتش رأيى ولا هاشترى واحدة
ودى صورة الحبيبة الغالية الفضية اللى جوة القلب مستخبية
وسلاااااااااااااااااااااا اااااااااااام

مفيش زعل ولا حاجه ياباشا ورأيك يحترم جدااااااا
وهقولك نا على حاجات مديقاني فيها
عدم وجود لمبه للحزام ولا للابواب او الشنطه
عدم وجود مسند يد خلفي
مش فاكر والله غير دول كفايه

اخوك شريف