الموضوع: لصالح من يقلل خالد أباظة في الملحق السيارات من تخفيض الجمارك

انا زى اغلب المهتمين بسوق السيارات فى مصر قرأت (مُعلقة) الاستاذ العبقرى/ خالد بك اباظة المستفزة ولكنى لم أكلف خاطرى ولم اشغل بالى بالتفكير فيه لأنه غير جدير بالاهتمام وغير منطقى للعقلاء
لحد أما قريت الموضوع وتعليقات بعض الزملاء فى المنتدى عليه ولقيت انه لازم اشارك وده رأيى الشخصى المتواضع:

1. لمصلحة مين؟؟؟
افتكر انه لمصالح شخصية بحتة سواء لشخص صاحب المعلقة وانجح صحفى سيارات فى مصر او لمصلحة الجرنال بتاع سعادته من حيث اعلانات الشركات اللى حضرته بيأكد انها لم ولن تتأثر زى الكورى واليابانى والماليزى
وأخيرا أكيد لمصلحة المستهلك المصرى المضحوك عليه من قبل شوية نصابين ومنتفعين واللى مكتوب عليه طول عمره يركب عربيات درجة تالتة او عربيات زيرو تقفيل ورش السبتية (سابقا) أو أبورواش و6 اكتوبر (حاليا) والتى يطلق عليها البعض افتراءا صناعة السيارات المحلية او تجميع او ماشابه

2. ورد فى ما سرده الصحفى المحترم أن التخفيض الذى لن يتجاوز 4% من سعر اى عربية سوف يلتهمه ارتفاع اليورو او انخفاض الجنيه
وهذا الكلام أرى فيه شبهة احتكار سوق السيارات على فئة بعينها دون غيرها بالاضافة الى تأكيد عدم استقرار سوق الاستثمار والعملة فى مصر مما لا يشجع على حاجات كتيرة جدا ابسطها الرخاء والرفاهية المقنعة اللى كتير برضه فى البلد بيأكدوا وبيضربوا المثل بعدد السيارات المباعة فى السنوات ال3 الاخيرة على أن الناس مبسوطة ومعاها فلوس ومافيش ازمة اقتصادية ولا فقر وكل تمام التمام
والسيد الفاضل بنفسه بيغير عربية كل سنة ولا اكتر من كتر الفلوس اللى مش عارف يوديها فين فاختار البى ام x3 وساب المرسيدس glk واللى سعر اقل واحدة فيهم يعمل 450 الف ج بس (اكيد جابهم من مصروفه طبعا من صاحبة الجلالة اللى المفروض مديونة هى وكل الجرايد الحكومية بالمليارات ولا ممكن يكون من نسبته فى الاعلانات اللى بيدخلها للجرنال ولا منح او هبة ... ع العموم ان بعض الظن إثم والله أعلم)

3. الكلام اللى اتنشر فى الجرنال ده انا بأعتبره استهزاء بالقراء وتشفى فيهم وحجر على آمالهم وطموحاتهم فى تملك سيارة محترمة غدا بسعر مناسب او ارخص بجزء قليل عن سعرها النهاردة هو أولى بيه ولا حتى اضعف الايمان بنفس السعر بس بامكانيات اعلى
أخخخخخ آآآآآآآآسف .............. نسيت ان الاستاذ المبجل بيعمل فى جرنال حكومى يعنى زيه زى الحكومة بالزبط اللى بتدى علاوة النهاردة وتزود الضرايب والاسعار بكرة
يعنى بالبلدى كده بتدى باليمين وتاخد تانى بالشمال

4. أخيرا وليس آخرا....
قرار تخفيض الجمارك للسيارات الاوروبية بنسبة 10% سنويا ده انا شايفه من وجهة نظرى له احتمالين لا ثالث لهما

الاحتمال الاول:
انه غير مؤثر فى السيارات حتى 1600cc ومش هايظهر مردوده غير بعد سنتين ع الاقل وساعتها كل المستورد والتجميع المحلى من غير ماركات غير اوروبية هيواجه كساد او ممكن يلجأ توكيلاته الى تخفيضات للمنافسة او تنازل فى هامش الربح المبالغ فيه اصلا من قبل الوكيل لمصلحة المستهلك والدليل على كلامى العربيات الخليجى ارخص واعلى كماليات من التوكيل مع انه المفروض اللى بيستورد 20 عربية غير اللى بيستورد 200 ولا 2000
ومن الممكن ان يحجم الناس عن شراء هذه الفئة تحديدا سنة او اكتر لحد اما ترخص اكتر عملا بمبدأ (ليه تدفع اكتر دلوقت لما ممكن تدفع اقل بعد سنة) لأنه ببساطة الخسارة فى ثمن العربية لو اتباعت مستعملة بعد سنتين او تلاتة هايكون كبير مقارنة مع الزيرو لنفس العربية

الاحتمال التانى:
أنه هايبقى مؤثر فى العربيات 2000cc او اكتر بتاعت الناس الاغنية (ربنا يجعلنا منهم) وطبعا التخفيض هايبقى فيها اعلى بكتير لأن ال4% بتاعت اخينا الجهبز هاتكون فى عربية ب500 الف حوالى 20 الف
طبعا هاتقولولى مش هاتفرق كتير مع واحد بيشترى عربية بالسعر ده اساسا
ارد عليكم واقول اكيد بس هاتفرق بعد 5 سنين حوالى 100 الف ج كانوا بيروحوا فى جيب الحكومة واللى اكيد هاتعوضهم بزيادة رسوم التراخيص والذى منه انتم اكيد عارفينها اكتر منى
بس العيب الخطير بقى هايكون بالنسبة للسيارات المجمعة محليا زى bmw ومرسيدس لأن ساعتها هاتكون العربية المستوردة انضف وارخص من المحلية لأن من غباء القانون انه مافيش تخفيض على الصناعات المغذية ولا قطع الغيار للسيارات

حد فاهم أى حاجة فى أى حاجة ...
والله احنا فى بلد العجايب..........!!!
معذرة للتطويل
وحسبى الله ونعم الوكيل