اقتباس المشاركة الأصلية كتبت بواسطة damasry مشاهدة المشاركة
الحمدلله علي كل شئ يا باشا وكويس انها جت لحد كده.
بتوع مباحث السيدة وبتوع المحضر بيطولو اووووي في عمل المحاضر، مجربهم وعارفهم بس للأمانة ما خادوش فلوس خالص.

من كلامك كده افهم انك كنت راكن في شارع حلوان ولا شارع منصور؟
احنا باين علينا جيران واحنا ما نعرفشي ولا ايه ؟؟؟

والله انا نزلوني علي الخبر من البيت الساعة 5.45 صباحا استلمت عربيتي من القسم بعد تحقيقات النيابة الساعة 5 مساءا بالتمام

انا بالفعل كنت راكن في شارع حلوان امام باب مستشفي ابو الريش وامام محطة مترو السيدة زينب لاني ساكن هناك اوعي تركن هناك

لكن ساعات باركن في شارع منصور عند محطة سعد زغلول لما باكون عند والدتي

انت عارف انا من شهر ونص تقريبا ركنت في ش حلوان بس بعد محطة المترو في اتجاه ش منصور وطلعت البيت غيرت هدومي وكنت نازل تاني علي طول المهم بعد ما طلعت لقيت حد من المباحث بيرن عليا الانتركم وبيقولي عاوزينك تحت شوية علشان كان في عربية راكنة مكان حضرتك اتسرقت واتشالت من مكانها
نزلت لقيت صاحب العربية وشة ضارب الوان ومش عارف يتلم علي اعصابة وقال انه كان راكن العربية (هوندا سيفيك 94) الساعة 8 صباحا وراح شغله رجع الساعة 5 ما لقاش العربية وكانوا بيسالوني لو كنت شفتها وانا باركن قولتلهم انا ما شوفتش غير العربيات اللي انا ركنت بينهم قدامي وورايا وانا ركنت الساعة 6.10 بالضبط يعني انا ماشوفتهاش اصلا

شكروني ومشيوا يدوروا عليها في مكان تاني ويوم حادثة سرقة عربيتي قابلت راجل المباحث ده في القسم وفكرته بالموقف وسألته انتوا لقيتوا العربية الهوندا دي والا لأ
قالي ايوة لقيناها مرمية في ترب البساتين وكانت شبه عربية (الاربع جنوط اتغيروا علي كاوتش علي الارض والمساعدين مش موجودين والتابلوه بالكامل مش موجود اساسا)