الموضوع: العربية اتسرقت يا رجالة نايل موتورز

المشاركة الأصلية كتبت بواسطة wisambasha

احنا باين علينا جيران واحنا ما نعرفشي ولا ايه ؟؟؟

والله انا نزلوني علي الخبر من البيت الساعة 5.45 صباحا استلمت عربيتي من القسم بعد تحقيقات النيابة الساعة 5 مساءا بالتمام

انا بالفعل كنت راكن في شارع حلوان امام باب مستشفي ابو الريش وامام محطة مترو السيدة زينب لاني ساكن هناك اوعي تركن هناك

لكن ساعات باركن في شارع منصور عند محطة سعد زغلول لما باكون عند والدتي

انت عارف انا من شهر ونص تقريبا ركنت في ش حلوان بس بعد محطة المترو في اتجاه ش منصور وطلعت البيت غيرت هدومي وكنت نازل تاني علي طول المهم بعد ما طلعت لقيت حد من المباحث بيرن عليا الانتركم وبيقولي عاوزينك تحت شوية علشان كان في عربية راكنة مكان حضرتك اتسرقت واتشالت من مكانها
نزلت لقيت صاحب العربية وشة ضارب الوان ومش عارف يتلم علي اعصابة وقال انه كان راكن العربية (هوندا سيفيك 94) الساعة 8 صباحا وراح شغله رجع الساعة 5 ما لقاش العربية وكانوا بيسالوني لو كنت شفتها وانا باركن قولتلهم انا ما شوفتش غير العربيات اللي انا ركنت بينهم قدامي وورايا وانا ركنت الساعة 6.10 بالضبط يعني انا ماشوفتهاش اصلا

شكروني ومشيوا يدوروا عليها في مكان تاني ويوم حادثة سرقة عربيتي قابلت راجل المباحث ده في القسم وفكرته بالموقف وسألته انتوا لقيتوا العربية الهوندا دي والا لأ
قالي ايوة لقيناها مرمية في ترب البساتين وكانت شبه عربية (الاربع جنوط اتغيروا علي كاوتش علي الارض والمساعدين مش موجودين والتابلوه بالكامل مش موجود اساسا)

ايوه يا باشا جيران، انا ساكن عند صيدلية علي وعلي.
بس دلوقتي هما حاطين حديد تحت محطة المترو عشان ماحدش يركن هناك عشان السمكرية اللي كانوا بيصلحوا العربيات في الحتة دي.

تعرف انا حصلي نفس الموقف بالظبط بس الفرق ان اللي اتسرقت عربيته كان جاري اللي ساكن في الشقة اللي قدامي عربيته بي ام، نزلت من بيتنا بليل لقيت عربيته راكنة عادي خلصت خروجتي ولما رجعت علي الفجر كده ركنت مكان ما هو راكن عشان مش لقيت عربيته، قلت هو طلع بيها، الصبح لقيت البواب بيصحيني يقولي بتوع المباحث عايزينك تحت، خير يا جماعة عربية الاستاذ فولان اتسرقت وكانت واقفة مكان عربيتك، قولتلهم اه فعلا انا لما نزلت كانت موجودة ولما رجعت ما كنتش موجودة، المهم العربية رجعت بعديها بحوالي شهرين بعد ما كانوا الحرامية سرقوا تلات عربيات من الشارع عندي.
الحرامية كانوا سايبين العربيات في حتة في امبابة ومغطينها وماحدش من المنطقة عارف دي عربيات مين، جيه يوم تراب وهوا جامد قام الغطا طار من علي عربية فيهم والمباحث شافت العربية واتعرفت عليها من السيارات المبلغ عنها، سابوا العربيات مكانها وعملوا كمين للحرامية كذا يوم لحد ما جم يشيلوا الغطا قاموا قبضوا عليهم ههههه