الموضوع: قل لا لتكهين الملاكي

أرسل أصلا بواسطة hany121
قبل ما حضرتك تتكلم علي التلوث اللي بيخرج من السيارات القديمه شوف التلوث اللي بيخرج من عوادم اتوبيسات النقل العام..

والله دى مشكلة الدولة مش مشكلت الناس لان الدولة هى اللى مصرحة للعربيات دة انها تنقل الناس واى اعتراض ليس لاى مواطن دخل فية غير انة متضرر دا دخل الدولة ومن شانها هى فقط ان تصلحه

انا معاك ان ده مشكلة الدوله والاولي انها تتحل ويعملوا احلال لوسائل المواصلات المتهالكه لانها بتسبب النسبه الاكبر من التلوث ولو اتحلت ووفروا وسائل مواصلات ادميه ناس كتير هتبطل تسوق والزحام والتلوث هيقل يبقي ايه الاولي بدخول حيز التنفيذ؟ وبعدين الدوله بتوفر المواصلات لكن المواطن هو اللي بيركبها يبقي من حقه انه يطالب الدوله بحل المشكله طالما انك بتدفع ما عليك من التزامات للدوله (الضرائب).. يعني انت لو عندك سايس بتدفعله مبلغ كل شهر علشان يغسل العربيه وهو بياخد الفلوس ومبيغسلهاش هتقول ده مشكلته وانا فقط متضررولا هتطلب منه انه يعمل بالفلوس اللي بياخدها؟

اللي راكب عربيه قديمه حالتها كرب زي ما حضرتك وصفتها مش راكبها علشان خاطر عيونها وانما عملا بالمثل القائل " ايه اللي رماك علي المر" واحتمال حضرتك تكون عارف ايه هو" اللي امر" منه ولو كانت امكانياته تسمح انه يركب عربيه زي عربية حضرتك اكيد كان رمي عربيتة اللي حضرتك وصفت منظرها بالمقرف من زمان..

طب علشان يركب ياذى الناس من حولة مش دى انانية برضو اننا افرض التلوث بتاعى وعربيتى عارف انها متهالكة ومصلحهاش ولا اهتم بصيانتها ودة حيادى انها حتسبب عطلة وضرر بمصالح الناس فى عربيات انتهت خدمتها من زمان والمفروض انها تتجدد او تتغير

حط نفسك مكانه لو انت مرتبك لا يتبقي منه اكثر من 100 او 200 جنيه اي ان امكانياتك لا تسمح بدفع قسط شهري وعندك سياره ثمنها 10000 جنيه ومش لاقي مواصلات ادميه هتركبها ولا هتركنها وتركب الاتوبيس اللي بتنزل منه هدومك خارجه وفي بعض الاحيان محفظتك مسروقه او واخد عدوي من الناس راكبه وعماله تكح وتعطس؟؟

وبعدين هيه السحابه السوداء مش بلاوي زرقا ومداخن المصانع المبنيه في وسط المناطق السكانيه مش بلاوي زرقا وتلوث الميه اللي بنشربها مش بلاوي زرقا والقمح الفاسد اللي بناكله مش بلاوي زرقا والخضار والفاكهه المزروعين بمية مجاري مش بلاوي زرقا..

منعلجش مشكلة بمشكلة احنا اللى بادينا بنعملة لاكن اللى خارج عن ارادتنا ومن شئون الدولة ليس لنا دخل بية وكمان احنا مش مبسوطين اوى بالتلوث بتاع المصانع وياما ناس كتير ساكنة بجوار هذة المصانع اشتكت ولا حياة لمن تنادى ومدام فى حاجة بمقدورنا تصليحها وافهم من كلانمك ان مدام فى تلوث تانى نسكت بقى على تلوث العربيات ما تلوث وعطلة بتلوث

انا مقلتش تلوث بتلوث وحضرتك بتقول اللي بادينا نعمله نعمله انا برده معاك اننا نبدأ بنفسنا لكن ده لا ينطبق علي موضوعنا لانه الحكومه هنا بتجبرك وبدون بدائل تراعي ظروف جميع الطبقات انما لو الموضوع اختياري مع تسهيلات منطقيه اكيد اللي يقدر يغير هيغير بدون تفكير..

علي فكره الحكومه مش هتدي الناس عربيات بدون جمارك زي محضرتك بتقول انما هتخفض الضريبه يعني حتي مش هتشيلها خالص..

الحكومة حتدفع مبلغ لاصحاب العربيات اللى حتتكهن وحيدوهم العربيات من دون مقدم واكيد هما مش حيجوا على الناس بالطريقة اللى انت متخيلها بمعنى مش حياخدو منى العربية ويقلولى اشرب من البحر مينفعش الطريقة دة واظن من حق الدولة انها تفرض قرار على العربيات المعدمة بقالها 20 سنة

لما يجبروك علي تكهين عربيتك وانت امكانياتك لا تسمح بتقسط سياره جديده يبقي بيقولولك اخبط دماغك في الحيط ممعكش تركب جديد روح اتبهدل في المواصلات وبعدين لما يعملوا مدة التكهين للتاكسي اللي بيعمل في اليوم 200 كيلو متر 20 سنه من سنه الصنع تفتكر انه منطقي ان المده تبقي هيه هيه في الملاكي اللي بيعمل متوسط 30 الي 50 كم في اليوم..

حضرتك وصفت العربيات اللي عدي عليها 20 سنه انها معدمه اكيد مش كلها معدمه وبالتالي تعميم الاحلال مش هيكون عادل يعني المرسيدس الزلمكه موديل 85 ده عربيه عدي عليها 25سنه وتمنها تقريبا 120000 جنيه تفتكر لو كهنوها هيدولك كام وهتعرف تركب ايه بدالها علما ان النظام المتبع هيكون زي التاكسي (سياره انتاج محلي) تفتكر في عربيه من دول تنفع تتركب بعد المرسيدس ده؟!
وبعدين انا مش فاهم يعني ايه معاكم حق البنزين وجت علي القسط. ايه وجه المقارنه بين مبلغ البنزين ومبلغ القسط؟؟ اللي بيحط بنزين 80 بيدفع تقريبا 100 جنيه بنزين في الشهرواوقات كتير مبيستعملش العربيه الا اذا كان معا زوجته واولاده علشان يرحمهم من بهدله المواصلات وجشع بعض سائقي التاكسي انما قسط العربيه الجديده هيبقي حوالي 1000 جنيه..

وانت عرفت منين معلومة ان القسط حيبقى 1000 هل انت سمعت كدة ومتاكد منة وهل هو ال1000 ثابت والله فى موديلات 2009 و2010 بقسط اقل من كدة بكتير اللى بيحدد اللى مواطن اللى عاوز يشترى عربية غالية او رخيصة هو اللى حيحدد وكمان اكيد حيبقى فى تسهيلات فى القسط زى ماحصل مع احلال الاجرة والقسط كلام فارغ دا غير انهم مش حيجبرو حد يشترى موديل معين زى ماحصل فى التاكسى

لأهيجبروك تاخد انتاج محلي زي التاكسي والتوكيلات اللي زي غبور هتبيع عربيات ومش هتلاحق تعملها صيانهاو توفر قطع غيار وحضرتك مثلا لو معاك هيونداي وبتشتكي من الوكيل دلوقتي بنسبة 10% الشكوي هتبقي 100% والموضوع هيدخل فيه الاحتكار وانت عارف البياع المصري لما بيعرف انه غصب عنك هتشتري منه هيعمل ايه واولها هتبقي رفع اسعار قطع الغيار والصيانه بالاضافه لسوء المعامله ومش هيفرق بين حضلرتك اللي دافي في عربيتك 120000 جنيه واللي مشتري في الاحلال..

وبالنسبه للقسط تعالي نحسبها.. هتاخد عربيه فيرنا تمنها 65000 بدون مقدم علي 5 سنين يعني 60 شهر يبقي اكتر من 1000 جنيه هتقلي انه مش هيحسب العربيه ب 65000 هأقولك انه الفايده هتوصل العربيه للمبلغ ده

اللي معاه العربيه اللي حالتها كرب لما ميبقاش معاه تمن البنزين او الاصلاح هيركنها لحد ما ظروفه تتحسن يعني الدنيا مش هتخرب انما لو ممعاهوش مبلغ القسط هيتحبس!!!

مش عارف ليه جمله " يعني معاكم حق البنزين وجت علي قسط السيارة " حسستني انك عايز تقول جاتكم القرف مليتو البلد..

ياريت بلاش الاسلوب الهجومى فى المناقشات اولا هو ولا لية اى صلة بالمشروع ولا هو اللى حيطبق القانون هو بيبدى راية فى الموضوع ياريت اسلوب الحوار يبقى موضوعى وليس انتقاد والالتزام بالموضوع الاساسى

لو نظرنا لجملة " يعني معاكم حق البنزين وجت علي قسط السيارة "هنلاقي ان فيها تهكم وهجوم علي فئه معينه وانا قلت احساسي ولم اهاجم وانما اعترضت علي الاسلوب وفي النهايه كما تفضلت حضرتك نحن جميعا اخوه ونتناقش للمصلحه العامه وليس منا من يصوغ القوانين او له مصلحه شخصيه وانا شخصيا سعدت كثيرا بهذا النقاش والتحدث مع شخصيه محترمه زي حضرتك واتمني أن لا اكون قد افسدت للود قضيه

علي فكره انا مش راكب عربيه من اللي حالتهم كرب والحمد لله علي فضله ونعمه انما حاسس بالناس...

ياجماعة ممكن تقارنوا سيارة جي بالقسط العادي وسيارة بنظام الاحلال (زي التكسي الجديد)
والله الفرق كبير جدا
عشان كدة انا معتبرها فرصة مش هتتعوض
يعني السيارات القديمة قارن انت بتروح عند الميكنيكي اد اية
علي العكس السيارة الجديدة ممكن يكون ادامك حوالي 5 سنين او اكثر عشان تبيتدي تغير فيها
يعني فرق التصليح مع انك راكب سيارة حديثة ممكن يهون عليك المبلغ الزيادة الي هتدفعة في القسط
بجانب انك مش لازم تجيب عربية عاليه في السعر عشان متدفعش قسط كبير
يعني كل واحد علي اد فلوسة
وانا والله مع الطيبقة الكادحة في البلد وانا واحد منهم بس هنستريح من التلوث الجامد جدا

علي فكرة ومع احترامي لكل الاراء - لكن مش عارف ليه كل لما حد يقول موضوع التلوث ده بفتكر عبده بيه الاليط في يوميات احمد رجب

فى انواع تلوث تانيه اهم ان الواحد يدى ليها اهميه
تلوث مياه : كام مصنع بيصب صرفة فى النيل- شبكه مياه الشرب المتهالكه
تلوث زراعى : مبيدات مش عارفين اصلها - رى بالمخلفات (مجاري)
تلوث هواء ( السحابه السوداء اللى بيقولوا انها مش حرق قش الرز وبطلوا يعملوا محاضر للي بيحرق القش علشان البلد داخله على انتخابات) - اتوبيسات هيئة النقل العام - سكك حديد مصر

فى انواع تانيه من التلوث ليه الحكومه ماسكه فى النوع ده؟
طبعاً لعيون اصحاب التوكيلات من رجال الاعمال


ثم الكلام ده مش هيحصل اصلاً
ده كان كلام ورجعوا فيه خلاص
الكلام ده من كتر ما احنا اتكلمنا فيه هنعيد الحياه ليه "احنا كده هنصحى القتيل تانى"
وفى الاخر لو القرار ده اتطبق اكيد هنلجأ للرئيس مبارك لرفع الظلم والرئيس دايماً بحب الشعب ومش هيسيب الشعب فريسة لرجال الأعمال

كلامى كله لانى من اصحاب العربيات ذات الموديل القديم ولكن العربية حالتها الفنيه ممتازة بشهاده كل من يراها
ولاننى استشعر ان عند اقرار مثل هذا القانون فإنه فيه جور على ما أملك