الموضوع: هيونداي فيرنا ولا رينو لوجان؟؟؟

يا جماعة من فضلكم اللي سمع حاجة عن العربية يقلها بكل حيادية و بدون اي هجوم
اللوجان زيها زي اي عربية جديدة لازم تتواجه بهجوم لا لشئ الا انها عربية جديدة و خلاص
بالنسبة للاستاذ اللي بيقول انها لا تمت بصلة لرينو مع احترامي الشديد لحضرتك فهي رينو بنسبة 100% و هسئلك سؤال لما bmw بتيجي تقفل عربياتها هنا في مصر هل ده معناه انها مش bmw ؟ اكيد لأ لان bmw مش هتخاطر بسمعتها علشان توفر تكلفة التقفيل في عربية معروفة اصلا بالرفاهية لكن ليه متوفرش طالما مش هتأثر عليها
طيب ازاي مش هتأثر عليها لان بكل بساطة هي اللي عاملة المصنع بنفس التكنولوجيا و نفس الكفائة بنفس التدريب بنفس المكونات بس في بلد تانية
نفس القصة بالنسبة لرينو شارية نسبة 80% تقريبا من اسهم داتشيا يعني هي المالك الاصلي للشركة و بتصنع اللوجان هناك و بتصدرها لدول اوروبية لو الدول دول مش مقتنع بالتقفيل المغربي مكانوش هيدخلوها بلدهم من الاساس و بعدين ما الميجان السيدان متقفلة في تركيا هل معنى كدة ان الميجان لا تمت بصلة لرينو؟!
بالنسبة لقصة التصميم فدي مسألة اذواق مش هقدر اتكلم فيها لكن اللي هتكلم عليه هو الايروديناميكس بتاعة العربية دي و اللي هي معمول حسابها بشكل مش طبيعي فيها علشان يخليها ثابتة على السرعات العالية بالرغم من علوها على الارض و اللي بيقلل ثبات اي عربية + استهلاكها للبنزين الاكثر من رائع بالنسبة لعربية 1600 كامة واحدة و عربيتي لسة في التليين مكملتش 850 كيلو و بتستهلك تقريبا جوة البلد مع التكييف حوالي 9 او 9.5 لتر\100 كيلو و على الطوالي مع التكييف 7ز5 كيلو سرعة من 100 الى 120
التكييف لا يؤثر تماما على اداء العربية لان موتور العربية محترم جدا و متناسب مع البودي بتاع العربية و معمول حساب تحميل التكييف
بالنسبة لاماكن الزراير فدي متكررة في الرينو بوجه عام يعني نفس اماكن الزراير موجودة في الرينو رينبو في ما عدا زراير الازاز في مكانها الطبيعي قدام اما بالنسبة للازاز اللي ورا فهو موجود في نفس المكان في الهيونداي اكسيل ليه بقى دي مكنتش وحشة و اماكن غريبة
و الكلاكس و الزراير مع التعود من اول مرة بتاخد عليها
انا و الله مش متحيز للوجان لكن الكلام اللي بيتقال عليها ده مش صح و مضلل لمتخذ القرار و علشان الحيادية نيجي للفرنا
مميزاتها في انها عربية معروفة و ميكانيكتها سهلة لان الميكانيكية حافظينها
قطع غيارها اسعارها معقولة بشكل كبير جدا
اما بالنسبة للوجان فميكانيكتها بردو مش معقدة عادية
قطع غيارها غالية نسبيا لكن معمرة و بترخص يعني الفانوس اللي قدام كان ب500 جنيه في التوكيل نزل منو دلوقتي تركي و تايواني اسعار 425 و 250 عند واحد اصلا سعره غالي يعني ثمنهم في ال 300يات ده سعر معقول بالنسبة لعربية لسة جديدة في السوق
لو حضرتك عاوز تستفسر عن اي حاجة في اللوجان انا تحت امر حضرتك و كل وحوش رينو كمان