الموضوع: طلب غريب

[justify]أنا عارف إن اللي هاطلبه ده غريب ويمكن سخيف كمان..
أنا بافكر في البروتون ومتردد بسبب شكاوي أصحابها من الحاجات البسيطة اللي باقراها في المنتدى من شهور طويلة.. وسألت عدد من الأعضاء وردودهم أكدت وجود العيوب البسيطة دي.. لكن كلهم اتفقوا على إن اللي بيركب العربية ويجربها بيحبها وما بيهتمش بعيوب التقفيل.. وكمان عشان خاطر عيونها بيستحمل التوكيل ومعاملته وأسعاره..
بعد المقدمة الطويلة دي.. أنا باسأل هل ممكن أقابل أي حد من الأعضاء اللي معاهم برسونا أو واجا؟ محتاج أركب العربية وأسمع صوتها وأجرب القاعدة فيها عاملة إزاي.. هل ده ممكن؟
أنا ما أعرفش هل فيه تيست درايف في التوكيل ولا لأ.. لكن حتى لو فيه هايبقى على عربية زيرو مش هايدي الانطباع بتاع العربية لما تمشي وتشتغل كتير.. ده غير إن الواحد يشوف بنفسه العيوب البسيطة اللي الناس بتحكي عنها..
الحقيقة المقابلة دي هاتفرق معايا كتير قوي.. ويمكن تكون دي الزقة الأخيرة اللي عقلي الموسوس مستنيها علشان يحسم أمره وياخد قراره..
معلش أنا فعلاً موسوس جداً لأن مش كل يوم الواحد بيشتري عربية.. ومش كل يوم يبقى معاك 90 ألف تغير بيهم العربية.. ولما يبقى توكيلها مقلق وما يحسسش الواحد بالأمان.. يبقى لازم أفكر 1000 قبل ما أجيبها.. وبصراحة شديدة أنا باحس إن أعضاء المنتدى هما التوكيل الحقيقي للعربية دي.. انتوا اللي عملتولها سمعة وشهرة وبتدافعوا عنها وانتوا اللي خلتوني فعلاً أرجع أفكر فيها حتى بعد ما رحت معرض العجوزة واتفرجت عليها والشخص اللي واقف هناك كرهني في نفسي مش في العربية وبس.. من غير ما يعمل حاجة.. بنظراته المستفزة وردوده الجافة الواقفة الناشفة.. كان ناقص يقول لي احمد ربنا إنك بتتفرج على العربية دي وتبوس إيدك لو اشتريتها مننا.. وده مش رأيي لوحدي إحنا كنا ثلاثة ووصلنا نفس الانطباع عن هذا الشخص وخرجنا مش طايقين نشوف وشه تاني.
بجد لو على التوكيل الواحد مش هايفكر فيها نهائي.. علشان كدة باقول فعلاً إن نايل موتورز هو توكيل بروتون في مصر.. وأعضاؤه هما أفضل مديري مبيعات للعربية دي.. والمفروض تاخدوا من عمو عز نسبة على كل عربية يبيعها..
أنا آسف إني بعدت شوية عن الموضوع..
أرجع تاني وأقول يا ترى ممكن حد من الأعضاء أصحاب البرسونا أو الواجا يتطوع وأتشرف بمقابلته خمس دقائق بس في أي وقت يناسبه وأي مكان قريب منه؟
أشكركم جميعاً وتحياتي
سامح[/justify]