اقتباس المشاركة الأصلية كتبت بواسطة ghazy12 مشاهدة المشاركة
استاذ حسام.... تقبل تحياتي و انت عارف اننا حبايب...

بس ممكن اسألك سؤال و عايز كل الناس تنسى ان انا كان معايا سيراتو و اتقلبت و الكلام ده.. انا هكلمك في صلب الموضوع بعيد عن اي شئ و على افتراض نك بتتكلم عن عربيه اسمها (x)...

هل الحل ده يتماشى مع العفشة بتاعة العربية (x)؟؟؟ (انا فاهم و عارف انه تعديل طفيف و الهدف منه الكوتش مش الجنط) بس هل التغيير ده ميأثرش على الثبات او العفشه بأي شكل نظرا لزيادة الارتفاع و لو بنسبه؟؟؟

الكلام ده استنادا (للاندكس) الجدول اللي عند باب السواق بتاع مقاسات الجنوط و الكوتش و الضغط الهواء المسموح به اللي نازل من كوريا.... هل الكلام ده منطقي و مفيش مشاكل منه؟؟؟؟

لو فعلا ينفع من غير مشاكل او تأثير سلبي, يبقى ربنا يباركلك و انت حليت مشكلة الجنط الــ17" (45 مم) اللي في اي عربية عمووووما زي الجيتا مثلا... و جزاك الله كل الخير و تقبل تحياتي و شكرا على مجهودك الايجابي في حل لمشكلة الجنط الـ 17" في اي عربية عموووووما....
بشمهندس غازى ( حجازى سابقا فاكرها دى :D )

حبيبى من ايام الجيزه :)

ربنا يطمننا عليك وتقوم بالسلامه بسرعه وليك واحشه ياراجل

تعالى نخش فى صلب الموضوع زى ما انت قلت

اول نقطه وهى تأثير تغيير الكاوتش على الثبات والعفشه

تعالى مثلا نمسك مثلا المقاس الأولانى 215/50

حسب معلوماتى المتواضعه ان لما تغير مقاس الكاوتش والقطر الكلى للعجله ( الجنط بالكاوتش ) يزيد

يترتب على ذلك ان العربيه هاتعلى حسب المقاس اللى هاتركبه

ثبات العربيه هايقل ولكن مش بنسبه كبيره لو عليت فى حدود نصف سم او 1 سم بالكتير

ال Acceleration هايقل شويه

استهلاك البنزين هايزيد حاجه بسيطه

لكن مفيش اى ضرر على العفشه بالعكس دا انت بتحميها اكتر وبتخفف عنها الصدمات شويه بتزويد ال Profile

ولو بصيت على المقاس التانى 225/45

هاتلاقيه هايدى نفس الارتفاع وكاوتش أعرض يعنى الثبات هايبقى أفضل من ال 215/45

__________________

تانى نقطه بخصوص المقاسات الموصى بها والموجوده على قايم العربيه

فطبعا المقاسات اللى انا قولتها مش موجوده

لان المقاسات الموصى بها هى اللى بتنزل فى مختلف الفئات

195/65-15 و 205/55-16 و 215/45-17

ولكن على حسب المواقع اللى بتحسب مقاسات الجنوط والكاوتش وسرعاتها

هاتلاقى ان فى فرق بين 195/65-15 وال 215/45-17

القطر الاجمالى للعجله ( الجنط بالكاوتش ) صغر من 63.44 سم الى 62.50 ( حوالى 1 سم )

العربيه وطيت نصف سم

قراية العداد هاتختلف هايبقى قارى 101 وانت سرعتك الحقيقيه 100

هى صحيح فروقات بسيطه بس أهى موجوده

يعنى فى النهايه ال Sx مختلفه عن ال Lx وأوطى منها بنصف سم

غير ان البروفايل بتاعها قل من 12.67 سم الى 9.65 ( حوالى 3 سم )

الكلام دا كله بقى ماينطبقش على الجنوط 16 205/55 فى ال Ex

لان بالحسبه على المواقع برضه هاتلاقيها زى ال 195/65-15 بالظبط فى الارتفاع وقراية العداد

لكن سمك الكاوتش قل برضه من 12.67 الى 11.25

* الخلاصه ان مقاس 215/45 اللى بتوصى بيه الشركه مش زى ال 195/65 بالظبط

ومقاس 225/45 مثلا اللى انا قولته هو اللى زى 195/65 بالظبط من حيث الارتفاع وقراية العداد

________________________________

ربنا يخليك على كلامك وذوقك

ونورت الموضوع وشرفته بمرورك ومناقشتك الجميله