نفسك تدوق طعم جديد... إتفضل معانا

**Mohamed.Ramah** · 10-12-2009 03:35 PM

شكرا على الموضوع الجميل وعلى الافكار الجديدة

**Sameh** · 10-12-2009 04:24 PM

هقولكم على حاجة كنت بعملها وانا سهران فى الشتا أيام المذاكرة ، إزاى تعمل شوربة سخنة ولذيذة من لا شئ ! :)
بتجيب بصلة كبيرة تقطعها حلقات أو شرايح متوسطة فى الحجم ـ وتحمرها فى حتة زبدة أو سمنة لحد ما تبقا دهبى ، وتظبطها طبعاً بشوية ملح وفلفل وبعدين تحط مياه حوالى كوباية كبيرة مش كتير وتسيبها تاخد غلوة وبعدين بالهنا والشفا هتلاقى عندك شوربة بصل سخنة وجميلة تاكلها مع عيش محمص أو زى ما تحب ، بتتعمل فى 5 دقايق بدون أى مكونات ولا تعقيدات ولو ماعجبتكش أو باظت منك ممكن ترميها ومش هتصعب عليك لأنها بصلاية مش أكتر :)

**KiNgMaX** · 10-12-2009 05:04 PM

متشكر على الردود الجميلة بس عايزين مشاركات اكتر واكتر
وفى انتظار طريقة الفايش المجهول ولو ان شكلها صعب وفيعا عجن وشغل بس يلا مش مهم ابقى اخلى والدتى تقوم بالواجب وربنا يستر
وشوربة البصل فكرة جامدة لما يكون الواحد فى البيت ومزنوق فى اى حاجة ولو انى بصراحة مش متخيل طعمها
وبالنسبة للهوت شوكلت جربو اللى هقولكم عليه
اعملوه بشيكولاته جالاكسى مع لبن وبس
وتبقو ادعولى

**pro_samir** · 10-12-2009 06:42 PM

كان بيعجبنى الهوت شوكوليت بتاع سلينترو ، جالهم فترة كدة معندهمش غير اللى بالبندق وكنت بستغرب لية

لحد ما كنت مرة فى السوبر ماركت واكتشفت انة بيتباع جاهز اصلا ولما جربتة طلع هو فعلا ، مستورد مش فاكر اسمة اية وفى منة سادة وبالبندق وكذا نكهة

يعنى تضرب الكيس فى كوباية لبن وخلصت

**abogogo** · 11-12-2009 09:44 PM

في الجنزبيل باللبن تغلي اللبن وتحط معلقة جنزبيل والسكر فعلا انتي بايوتك طبيعي ويسخن الجسم
بالنسبة للفايش بيجلنا وصايا من الصعيد بصراحة مع الشاي بللبن روعة

**asbeats** · 12-12-2009 12:25 AM

انا احيانا بعمل جبنة رومي في الفرن

-عيش شامي
-جبنه رومي(تركي للاسكندرانية) حسب الطلب
-طمام جامدة مقطعة
-فلفل اخضر مقطع
-زيتون حلقات

توضع الجبنة وعليها الخضار داخل العيش الشامي...وتوضع مباشرة داخل الفرن على الصاج السفلي

على فكرة بتستوي بسرعة جدا فخلوا بالكو عشان متتحرقش

وطعمها تحفة

**eng.octooo** · 12-12-2009 12:53 AM

هيييييييييييييييييييييييي ية اخيرا اتلكمتوا فى حاجة بافهم فيها ههههههه انا بروفيسير فى الاكل والطبخ (اسلق بيضة اعمل اومليت محروق وهكذا )(بس ممكن اكل خروف ميهمكوش يعنى )

بس جربوا المشروب دة هوة هوت تشوكليت مع اضافات اوكتو ههههههه

المقادير لشخص واحد

كوب لبن
سكر حسب الرغبة خلوها معلقة واحدة بس لاننا لسة هانحط ايس كريم وشيكولاتة

معلقة صغيرة مليانة نسكويك او كاكاو او قهوة امريكى بيور
قطعة شوكولاتة صغيرة مبشورة او معلقة كريمة شيكولاتة (نوتيلا) او شيكولاتة كادبرى سايحة (شيكسو )
معلقتين ايس كريم شيكولاتة او فانيليا

طبعا هانحط اللبن لحد مايغلى
وندوب فية السكر والكاكاو
ونحطة فى المج وفوقية الايس كريم (الايس كريم المتجمد مع اللبن السخن بيسيح ويعمل وش تحفة )
ونرش الشيكولاتة على الوش

ونشربهم بس كدة

تعالو بقا لمعشوقتى وحبيبتى وصديقتى القهوة التركى

المقادير ل 3 فنجان (حوالى مج 300 ملل )

3 ملاعق صغيرة قهوة
3 ملاعق سكر
2 مج ماء (احنا مش هانحتاج غير مج واحد بس علشان الماء هايتبخر ويقل )
عود قرفة سيجار (قرفة بتكون خشب )

اول حاجة نغلى الماء مع القرفة لمدة دقيقة وبعدين نشيل القرفة
وناخد مج ماء بالقرفة ونحطة فى كنكة القهوة وندوب فية القهوة والسكر وبعدين نحطة على النار ونستنى قريب منة اول ما القهوة تفور وقبل ما تغلى نشيلها على طول (خلى بالكوا ان الماء مغلى وسخن يعنى هاتغلى بسرعة جداا) ونصبة فى المج ونشربة برضة

طيب اسيبكم دلوقتى واروح اعمل قهوة