الموضوع: اختبارات الامان ؟

بس أنا هقولك من الأخر أولا المقدم دة قليل وكمان قسط 7 سنيين دة كتير قوى لية يعنى هو انا مفيشى غير العربية فى حياتى - الواحد بيكبر حبة حبة أنا اول ما ركيبت كانت فلوريدا ثم شيرى ولسة أن شاء اللة الأيام جاية لحد ما أوصل للمرسيدس أن شاء اللة كل دة خطوة خطوة وإللى بالى معايا من غير قسط ووجع دماغ والعربية معايا وبتاعتى
أنا من رإى حاجة باللى معاك أو حاجة خفيفة بقسط خفيف وقصير أبرك من كل دة - مش اللادا إللى تجاب قسط وكمان 2110 أنا كنت بفكر فيها وشوفتها فى الأمل وكانت إلى كلام خالص واللة المستعان

طيب يعنى ايه الحل يااخوانى انا بصراحه مش عارف حاسس انى زى التايه اللى بيسأل على عنوان وكل واحد يوصف له عنوان يطلع غلط

ايه افضل عربيه تنفع لاسره وماتزيدش عن 45 الف ؟

د. إبراهيم ... أعتقد الموضوع مش مستاهل حيرة أكتر من كده

أنا شايف إن حضرتك ميال للادا يبقى استخير ربنا وتوكل على الله وهاتها

لو حضرتك هتفاضل بينها وبين العربيات الصيني في نفس رنج الأسعار (والأمان :) )؛ أعتقد كفتها هترجح لأنها حتى لو ليها مشاكل - فهي معروفة وأعتقد غير مكلفة بالدرجة (أنا مركبتهاش بس بأكلم حضرتك في ضوء اللي قريته عنها في المنتدى ومشاهدتي ليها في الشارع).

العربيات الصيني - بالمناسبة كنت هشتري واحدة منها في يوم من الأيام - الجديد منها لا يستحق المغامرة حاليا - على الأقل لأن مشاكلها مش معروفة وتوكيلات معظمها قدراته محدودة وحتى اللي شغال جامد منها أعتقد بيعاملها في قطع الغيار معاملة الكوري - فهتبقى تكلفة التشغيل بتاعتها مش قليلة - على الأقل أعلى من اللادا.

أنا بأؤيد أ. أحمد أنور من ناحية موضوع المخاطرة - ولكن متكونش في ظل قرض ولسلعة غير مضمونة.

أنا بأقول رأيي لحضرتك بحيادية قدر ما استطعت - وفي ضوء معلوماتي المتواضعة

وربنا يوفقك للخير ونقولك مبروك قريب

اخى العزيز هشام

اخى العزيز احمد انور

اخوانى جميعا اللى ساعدونى بالتفكير معى

انا شكر ليكم جميعا وحاسس انكم زى اخوانى واكثر وده اللى شجعنى اتعبكم فى التفكير معى

وانا فعلا عقلى بيقول لى ان اجيب اللادا 2107 لانها اقل سعرا وعربيه معروفه وتتحمل لان هذا الوقت تحديدا ليس وقت المغامره فى الصينى حيث الاقساط والديون

صحيح اللادا تفتقر للمتعه ولكن ربنا خلق الناس درجات ناس تركب المرسيدس وناس تركب اللادا ودى حكمه ربنا اهم شئ ان الواحد يرضى بقضاء الله ويحمده على نعمته لان فيه ناس تانيه مش لاقيه حاجه خالص يبقى احنا احسن من غيرنا ان ربنا هيرزقنا بسياره

وانا خلاص مش هااغير رأى تانى الا ان يقضى الله امرا اخر

الله يبارك فيك اخى ممدوح وشكرا ليك كثير على تعبك معايا

واطمئن خلاص انا استشرت بما فيه الكفايه واللى فاضل فقط هو توفيق الله للشراء اما ان يوفقنى الله او يصرفنى عنها ايهما يقضى الله انا راض لان اختيار الله هو الاصلح لى

لكن يا اخى مش عارف ليه الشيطان بيسرح بيه وبيوسوس لى وحاسس انى لو ركبت اى عربيه هااعمل حادثه وهذا الشعور مقلقنى شويه صحيح ان الاعمالر بيد الله ولاتعلم نفس ماذا تكسب غدا وماتدرى نفس باى ارض تموت ولكن هذا الشعور بيراودنى كثير

مش عارف بقى هل هو احساس المؤمن ولا ده شعور عادى لانى عمرى ماركبت عربيه فى حياتى وكمان فى شئ قلقنى انى بانام لما اركب اى مواصله فهل مع القياده ده بيحصل ولا القياده بتخلى الواحد ماينامش

معلش انا عارف انى دوشتكم شويه لكن شعورى انى مع اخواتى شجعنى انى اتكلم معاكم بصراحه شويه

والله أعلم يا د. إبراهيم دي ممكن تكون بس رهبة التجربة عشان حضرتك أول مرة تسوق عربية

أكيد أي حد بيتخيل نفسه وسط معمعة المرور اليومي ... هيحس برهبة لحد ما يكسر الحاجز بالتجربة وينزل يسوق هيلاقي نفسه ماشي وكل حاجة تمام إن شاء الله

حضرتك حاول تأجر عربية أو تاخد كورس تاني سواقة قبل إستلام العربية مباشرة عشان تكون الممارسة حاضرة (في بعض المدارس بتدرب على السيارة الخاصة ودي ممكن تكون حاجة مفيدة في أول أيام الإستلام).

والإنسان بيكيف نفسه دايما مع الوسط المحيط ليه ... فلو حضرتك بتنام وإنت مش سايق؛ أكيد حواسك هتتنبه وإنت سايق - بس حاول متسوقش وإنت مجهد أوي أو مش نايم كويس

وشغل قرآن في العربية وطلع حاجة لله أول ما تستلمها - ولو البنك مش هيأمن عليها أمن عليها حضرتك.

والواحد بياخد بالأسباب وكل قضاء الله خير