ما هو أفضل بنك في مصر ؟

**أبو صلاح** · 14-12-2009 05:55 PM

المشاركة الأصلية كتبت بواسطة egyptawy2010

معلش حضرتك متاكد من الكلام ده ييعنى هو امن فعلا

ده كلام لا يقبل اي شك
وبعدين يعني انت شايف البنوك عندنا بتهرب او بتفلس ولا ايه؟
ملوش اي لازمة التشكيك ده

**ahmedbasto** · 14-12-2009 06:47 PM

بنك عوده وhsbc من البنوك المحترمة عن تجربة

**أحمد كمال** · 14-12-2009 10:26 PM

المشاركة الأصلية كتبت بواسطة egyptawy2010

معلش حضرتك متاكد من الكلام ده ييعنى هو امن فعلا

باشا ..... متاكد و سبعتلاف متاكد

والدي كان مدير في الادارة العامة في بنك مصر وقت تفليسة بنك الاعتماد و التجارة الدولي و اما حصل اللي حصل البنك المركزي حول كل املاك و ودائع البنك المفلس لبنك مصر و والدي انتدبوه 6 شهور مدير فرع من الفروع اللي اتحولت من الاعتماد و التجارة لبنك مصر (اللي هو دلوقتي فرع شارع مراد في الدقي) و كل الناس صرفت فلوسها عادي

ده قانون و نظام البلد

فيه حتى موقف حصل

كان ابويا واقف ورا الصرافين بيتابع الشغل

واحد دخل عالصراف:

العميل (بتشكك): ممكن اسحب 3 الاف جنيه؟
الصراف: تحت امرك يا افندم (و خد رقم الحساب و ابتدى الاجراءات و بيعد الفلوس و بتاع)
العميل (بتردد): طب معلش ينفع يبقوا 5؟
الصراف: زي ما حضرتك تحب (بيجيب باكوين كمان)
العميل (ابتدى قلقه يروح) : طب ممكن 20؟

ابويا اتدخل

ابويا: تحت امر حضرتك ...... خير؟
العميل: هي الخزنة فيها فلوس؟ ينفع اسخب؟
ابويا: أيوة طبعا زي ما تحب
العميل: يعني ينفع اسحب 30 الف؟
ابويا: ينفع الرصيد كله زي ما تحب
العميل (و انفرجت اساريره): يعني بجد الخزنة مليانة؟
ابويا (صبور بس ابتدى يزهق): ايوة و الله ..... حضرتك دلوقتي بقيت عميل في بنك مصر و فلوسك يضمنها بنك مصر و البنك المركزي كمان
العميل: طيب انا عايز أودع خمسين الف

اتاريه كان اصلا غمال يلف من اول النهار على كل الفروع يسحب 3 في 5 في 2 بيحاول يلم فلوسه و خايف حد يقول له لا انت بتسحب كتير ...... و اما اتطمن رجع حط الفلوس كلها تاني

**أبو صلاح** · 15-12-2009 11:35 AM

المشاركة الأصلية كتبت بواسطة ahmed4000

معلش الكلام ده مش صحيح على الاطلاق الا اذا كان قصدك بنك الاستثمار العربى
اذا كان البنك نفسه مملوك 49% للبنك المركزى المصرى
البنوك كلها بتخضع للبنك المركزى ومحدش يقدر يشتغل لوحده كده
ومفيش علاقة بين البنك المركزى وعرض تقسيط كويس او وحش

لا طبعا البنك المركزي هو اللي بيحط خطط وشروط الائتمان
وده بالذات خارج عن المألوف في الائتمان حتى النقدي بيوصل عنده لفائدة 7.8%

**ahmed4000** · 15-12-2009 12:37 PM

المشاركة الأصلية كتبت بواسطة أبو صلاح

لا طبعا البنك المركزي هو اللي بيحط خطط وشروط الائتمان
وده بالذات خارج عن المألوف في الائتمان حتى النقدي بيوصل عنده لفائدة 7.8%

هى القضية الاهم انه خاضع للبنك المركزى
اما بيدى عروض ايه لمين فدى بتبقى عادة عروض معينة لجهات محددة
الشروط اللى بيحطها البنك المركزى متعلقة بالضمانات حدود القرض الموقع المالى للشركة وللبنك لكن الفايدة دى حاجة تانية ولو البنك المركزى بيتدخل فيها بيتدخل بطريقة تانية غير مباشرة

على العموم يابو صلاح هو مش موضعنا بس انا مش بنقدك ولا حاجة انا بس كنت عايز اوضح نقطة صغيرة خوفا ان حد يدخل يقرا الكلمة ويفتكر ان فلوسه حتضيع وممكن البنك يهرب بيها

**Hany.ElBaathy** · 15-12-2009 01:48 PM

[QUOTE=ahmed4000;3872195640]هى القضية الاهم انه خاضع للبنك المركزى
اما بيدى عروض ايه لمين فدى بتبقى عادة عروض معينة لجهات محددة
الشروط اللى بيحطها البنك المركزى متعلقة بالضمانات حدود القرض الموقع المالى للشركة وللبنك لكن الفايدة دى حاجة تانية ولو البنك المركزى بيتدخل فيها بيتدخل بطريقة تانية غير مباشرة

على العموم يابو صلاح هو مش موضعنا بس انا مش بنقدك ولا حاجة انا بس كنت عايز اوضح نقطة صغيرة خوفا ان حد يدخل يقرا الكلمة ويفتكر ان فلوسه حتضيع وممكن البنك يهرب بيها[/QUOT

كلام مظبوط جميع بنوك مصر خاضعة لرقابة البنك المركزي المصري
البنك المركزي دوره رقابي و تخطيط السياسة المالية لكن أسعار الفوائد دي بتاعة البنوك كل واحد و ظروفه في بنك محتاج سيولة فيدي فايدة عالية على الودايع و الشهادات و بنك عنده سيولة زايدة فيدي اسعار فايدة صغيرة على القروض

البنك الوحيد الغير خاضع لرقابة البنك المركزي هو البنك العربي المحدود و هو يتعامل بالعملاتت فقط و لا يتعامل بالجنيه المصري و مع ذلك فهو يطبق اغلب قرارات البنك المركزي

أما بخصوص أفضل بنك فانا شايف حاليا HSBC مميز جدا جدا و إنتظروا البنك الأهلي المصري فى ثوبه الجديد أنا متوقع في خلال سنة هيكون حاجة تانية خالص خدمة و كول سنتر و انترنت بنكينج و تليفون بانكنج في ثورة بتحصل في البنك بس عايزله سنة علشان الناس تحس بالتغير اول لما الحاجات دي تخلص و فعلا هيكون حاجة تشرف ان يكون بنك مصري جامد كده

**korkor** · 15-12-2009 08:40 PM

المشاركة الأصلية كتبت بواسطة أحمد كمال

NSGB ده انا قبضت عن طريقه 8 شهور

بنك زبالة زبالة زبالة بما تحمله الكلمة من معاني

1- مصاريف عالية جدا

2- فونابانك (التعامل على حساباتك عن طريق الكول سنتر) و نيتابانك (عن طريق النت) بفلوس !!!!!!

3- الكول سنتر مالوش اي لزمة و مش بيفيدك بأي حاجة و لازم تروح الفرع

4- ما ينفعش تعمل اي حاجة - ما عدا سحب و ايداع الفلوس - في فرع غير فرعك ..... ما ينفعش تلغي كارت و لا تطلب بدل فاقد و لا تعمل اي حاجة و لا تطلب كشف حساب مختوم من فرع تاني

5- نيتا بانك بتاعهم ابو فلوس ده اساسا مالوش 30 لازمة و تعبان ملة ....... مقارنة ببنوك تانية خدمتها ببلاش و ممتازة

6- تعامل بعض الموظفين مع الناس يشوبه الكثير من قلة الأدب

7- مالهمش كبير يعني الشكاوى و لا ليها اي لازمة

8- تنكين جدا و فاهمين انهم يعني ياما هنا ياما هناك

9- ال ATMs بتاعتهم بتعطل كتير ملة ..... و اول الشهر ما بتتمليش بالمعدل الكافي لكمية الناس اللي بتقبض

10- مفيش تسهيلات ائتمانية من غير تحويل مرتب ..... و لو سبت الشركة في بعض الحالات لازم تسوي التسهيل الائتماني !!!

+1

**Ahmed Sharaf** · 15-12-2009 09:10 PM

المشاركة الأصلية كتبت بواسطة أبو حمزة

3 سنين مع كريدي أجريكول مشفتش منهم حاجة وحشة
بالرغم من إن ناس كتيرة لها تجارب سيئة معاهم
بس انا ملاحظ إن التجارب دي قديمة شوية يمكن أكتر من 3 سنين
مش شايف فيه أي حاجة ناقصة عن HSBC
بس مقدرش أحكم على مصروفات خدماته لأن حسابي payroll هناك وده بيبقى له مميزات غير الحسابات العادية

كلام حضرتك مضبوط , إذا حضرتك احتجت اي حاجة من البنك او الاستفسار عن اي حاجة تخص حسابك أو عندك مشكلة مع أي فرع ممكن تبعتلي على الخاص.

المشاركة الأصلية كتبت بواسطة zakiali

أشكرك .. وشكلي فعلا هنقل تعاملي الي بنك hsbc لو حد جرب يتعامل مع بنك كريدي أجريكول يقولنا التجربه من فضلكم .

لازم حضرتك تحدد تجربتة من حيث اية ( فتح حساب ولا الحصول على قرض ولا المشاكل الدائمة معاة .

المشاركة الأصلية كتبت بواسطة ahmed4000

HSbC طبعا
وانا ملاحظ ان الناس بتشتكى من بنوك معينة ان الاى اتى ام قليلية او واقعة
وعايز اقول انك ممكن تسحب من اى مكنة تقابلك مكتوب عليها 123

وكل اللى حيتخصم منك 4 جنيه

كلام حضرتك مضبوط نوعا ما لان فى بعض حسابات الـ Payroll اول سحب مجانا وبعد كدة 2 جنية .

المشاركة الأصلية كتبت بواسطة mina_ramsis

انا بتعامل مع كريدى اجريكول و بى ان بى و عاوز اقول حاجة
بالنسبة لكريدى اجريكول انا الصراحة مبسوط منهم جدا عالم محترمة المكن بتاعه فى كل حتة لما فتحت الحساب روحت قعدت على كرسى و هما خلصوا كل حاجة الحساب على النت بيتجدد فى ساعتها يعنى لو بتحول مرتبك عليه بعدها بعشرة دقايق يقولك انت متحولك كام و خدمة ديه ببلاش
اما بالنسبة لبى ان بى اقل حاجة اقولها عليه انه بنك سئ جدا المكن بتاعه قليل جدا كل شويه الاقى فلوس مسحوبه كمصاريف ادارية اما بخصوص متابعة الحصاب على النت فالتجديد بتاع الحساب تظهرلك تانى يوم مش فى نفس اليوم يعنى مثلا لو مرتبك اتحول يوم الخميس تستنى ليوم الاحد لغاية لما تعرف من النت انت اتحولك كام

لو حضرتك محتاج اي استفسار بخصوص حسابك او واجهتك مشكلة في أي فرع ممكن تبعتلى على الخاص

**Egyzizo** · 15-12-2009 09:47 PM

أنا قريت مرة فى البنك الأهلى يافطة متعلقة بتقول : سعر الفائدة على الشهادات البلاتينية 9% طبقاً لتعليمات البنك المركزى المصرى ..

وده معناه ان البنك المركزى بيتحكم فى سعر الفايدة