الموضوع: على جنب يا اسطى

هو مش موقف طريف قوي بس برضه هاحكيه

أنا قريب كنت مسافر , فخدت تاكسي العاصمة لغاية المطار , السواق كان معاه هيونداي إلنترا و كان ماشي بطريقة غريبة جدا

سرعه رهيبه رغم الزحمة و غرز في غرز طول ماهو ماشي

اقوله يهدي مفيش فايده برضه ماشي بالجنان بتاعه و أنا طول مانا ماشي اقول لنفسي هايخبط دلوقتي هايخبط دلوقتي

وابن اللذين ماشي زي الرهوان و مابيخبطش , في الاخر نزلني قدام صالة غلط و ضيعلي وقت لغاية ما وصلت للصالة الصح

ههههههه ربنا يكون فى عونك بس المفروض كنت اتصلت برقم الشكاوى وقدمت فيه شكوه محترمه
بس تلاقيه لما عرف انك مسافر حب يعمل معاك واجب ويوصلك بسرعه عشات تتوصى بيه فى البقشيش زى اغلب سواقين التاكسى الى بيعملو كده برضه

مواقف التاكسى لا تنتهى خصوصا انى بتعامل معاهم كتير جدا
من اطرفل المواقف يوم الصبح بدرى ركنت عند الشغل وقلت اخد تاكسى اعمل مشاويرى المهم شاورت لتاكسى كان ستروين والسواق شكله صغير شويه فى السن والحجم المهم ركبت شويه وبدا يتكلم وحست انه مش عارف ينطق الكلام صح المهم بدا يكلمنى عن فوائد البنجو لو اخدت على الصبح وانه بيخليه على اعلى تركيز ويستحمل المجهود طول اليوم وانا ماسك فى الباب وزابق رجلى فى الدواسه ( نسيت اقولكم انه خبط اكتر من 5 عربيات وهو ماشى ) لغايه ماحك فى عربيه راكبها شاب بيان كان كربونه من ممدوح فرج بتاع المصارعه ونزل مسكه من رقبته وفين يوجعك لغايه ماضيع البنجو كله من دماغه وانا سبت التاكسى وانا فطسان على روحى بعد ماسبت اجره المشوار
بس لما خلصت ضحك كنت نسيت انا رايح فين من كتر سيره البنجو

هههههههههههههههه ده عمل معاه الواجب واخد حق الناس قال فوائد البانجو قال اهو عرف فايده جديده من فوائد البانجو

هههههههههههههههه
موضوع حلو احيك علية

المشاركة الأصلية كتبت بواسطة baskota

اطرف موقف حصلى
ركبت تاكسى مسافة صغيرة شارع يعنى
كنت انا وواحدة صاحبتى سالسولا اللى معانا فى المنتدى
السواق يقولنا ايه بقا
وهى يعنى مستاهلة ما تمشوها احسن ولا انتوا يعنى مش قادرين تمشوا
وفضل يبرطم بعد مانزلنا

غالبا سواقين التاكسي في اسكندرية بيبقى ليهم موقف عدائي من الستات -المحترمات بس- وبالذات الطالبات ، سألت مرة سواق تاكسي ليه كده قالي: يا بيه ما بيدفعوش كويس.....السواق ده كنت باشورله من قدام كلية الطب وقفلي قلتله عزبة سعد سموحه قال اتفضل...اللي خلاني استغربت ان كان في بنتين طالعين من الكلية بيقولوله عزبة سعد فمرضيش يركبهم، شكلهم كانوا رايحين المدينة الجامعية
بس فعلا الستات في التاكسي بيدفعوا بالقطارة وبيفاصلوا حتى لو كان مستواهم الاجتماعي كويس إنما الرجالة بيحبوا يعملوا باشوات ويدفعوا بالزيادة (نظام ولا يهمني ده العادي بتاعي)