الموضوع: يا ريت حد يفيدني .... ضروري

النيفا صفقة خاسرة في رأيي، تقفيل مصري مش مضمون، محرك 1800 ولا 1700 سي سي مش فاكر بالظبط و هيبقى بلاعة بنزين، ضيقة من جوه، توكيل سيء...إلخ إلخ

الخلاصة هيا مش هتفيد غير اللى بيشتغل فى الصحرا فعلا ومحتاج عربية من النوعية دي زي مقاول أو مهندس، لكن مش هتريح حضرتك لو كنت عايزها كعربية مدينة أو عربية عائلية

معظم الناس اللي اشترت اللادا 2107 المصري بتشتكي منها وتقفيلها مش زي الروسي
انا شخصيا لو عايز اشتري نيفا حاشتري نيفا موديل تسعينات روسي احسن مليون مرة من المصري 2009

شوف يا أخي عشان اجيبلك الخلاصه انا معايا نيفا 1993 روسي و جربت ال 2008 المصري و النتيجه كلاتي:
المصري الجديده فيها كماليات اكتر الصراحه باور و انجكشن و تكييف (مع العلم انه مش قد كده يعني لا تقارنه بالياباني) بالنسبه للإستهلاك انا عربيتي ال1993 كربراتير 1600 بتعمل في الصفيحه داخل البلد 180 كيلو او اكتر بدون تكييف...
الموديل الجديد 1700 و بتعمل داخل البلد بدون تكيف 190 كيلو مع العلم ان موتورها انعم و احسن من 1600 من ناحيه الصوت و الاقتصاديه في البنزين.....
قطع الغيار موجوده و رخيصه و مفيهاش مشاكل (عدا الحساسات دي غاليه و متوافره) بس المشكله ان الانجكشن صيانته في التوكيل فقط عشان الكومبيوتر مش موجود بره ...
عامه في عيب في النيفا موجود منذ القدم هو الدسك و الاسطوانه و موضوع الكرونه اللي بتون بعد 190.000 كيلو...
و للعلم نظام الدفع الرباعي بتاعها في نفس المشكله القديمه لما بيبوظ بيتلغي (دا برده بعد عمر طويل)....
انا عربيتي 1993 من ساعه ما جبتها زيرو الى يومنا هذا ماجيتش ناحيه العفشه اللي غيرته بس جوز مساعدين امامي....
التوكيل بصراحه مش عارف اقولك ايه (متوفي اكلينيكياً بالذات في التعامل مع السيارات الادا عكس ال byd) بس خليك معاه لحد ما الضمان يخلص عشان لو لا قدر الله حصل حاجه (هو الضمان عامه 10,000 كيلو او سنه و دا من واقع تجربتي مع الادا 7012 موديل 2008)....
عامه نصيحه من اخ لو ناوي عليها هي مش عربيه مدينه ولا هي عربيه عائليه و لو استخدامك لا يتطلب سياره خدمه شاقه يبقي دور على حاجه تانيه اريح و ارخص (انا اخر سعر سمعته كان 73,000 و دا من فتره)...
يارب اكون افدت

بالمبلغ اللى حضرتك كنت ناوي تجيب بيه النيفا هات رينو لوجان، صحيح هيا مش النوع اللى حضرتك عايزه بس أحسن من العربيات السيدان التانية اللى في فئتها،
عالية عن الأرض وصاجها كويس وملاكها بيشكروا في العفشة

لو مصمم على حاجة من ريحة اللادا هات 2107 روسي وخلاص، ووفر باقي المبلغ!

المشاركة الأصلية كتبت بواسطة speed demon666

انا بصراحة مش عارف أقول لحضرتك ايه على الشرح الوافي و الكامل ده , بس انا مشكلتي اني كنت عايز عربيه عالية عن الارض و طبعا حضرتك عارف الطرق عندنا عاملة ازاي فا قولت ان ممكن أضحي بموضوع الشكل و الفخامة في سبيل الحصول على قوة الصاج و العفشة و في نفس الوقت بنزين معقول و الاهم من ده كلو السعر و توافر قطع الغيار لأن المتوافر في حدود يدي الصيني و النيفا يعني حتى الاسبرانزا التيجو ال1600 للاسف مش هقدر عليها .
انا بالنسبة ليا مش بشتغل في أماكن محتاجة 4x4 انا كل اللي فكرت فيه الطرق بتاعتنا لأن انا بصراحة اتعقدت من المطبات و النقر اللي علطول في الطريق اللي مرة تكسر مساعد و اللتعوج ركبة و كده يعني
حضرتك ممكن تقولي رأيك في وجهة النظر دي ؟

شوف انا عشان ابقى صريح معاك ولا اظلم العربيه.. العربيه دي من 1993 الى يومنا هذا ( هي مركونه حالياً بسبب حادث) عمرى ما ندمت اني راكبها....
لكن انك تركبها عشان تفادي مطب او الصاج يبقي انت بتظلم نفسك و بتحرم نفسك من متعه الراحه في حين ان في عربيات كتير موجوده في نفس السعر دا و اريح وبكتير (عشان تبقي متخيل الموقف انا لبست نقره على سرعه 90 كيلو كانت النتيجه ان العفشه ولا فيها الهوا لكن رأسي اخد فيه 3 غرز)....
في زميل اقترح اللوجان وانا شايف انها بديل جدير بالنظر ما دام مفيش استخدام لعربيه دفع رباعي (مش عايز عربيه تمشي في مدقات او فحت و ردم) و انا برضه معاه في الاقتراح دا . و عندك الانوس اريح و قطع غيارها رخيصه و عمليه جداً....
كل اللي فات لا يقلل او يمس النيفا في شئ و انا شايفها شخصياً من السيارات الدفع الرباعي التي اثبتت شخصيتها على مدي السنين....
يا رباكون افدت

المشاركة الأصلية كتبت بواسطة speed demon666

طب معليش سؤال ... حضرتك بتقول ان العربية دي فيها مشكلة الاسطوانة ... هي تقريبا كل اد ايه بتبوظ ؟
و هل في أي اختلاف لو حضرتك تعرفو عن الموديل عربيتك .. ولو مفيش هل لما الدفع الرباعي بيتشال بيفرق في حاجة في العربية ... هو انا مش محتاجة عموما انا قصدي بيأثر بالسلب في أي حاجة في العربية ؟
معلش انا أسألتي كتير بس سامحني انا محتاج اني أخد قرار

شوف لو رجلك خفيفه على الدبرياج و مش بتحرق على النقلات ممكن تقعد 60,000 و السبب في المشكله دي وزن السياره بسبب الات الدفع الرباعي و انهم لم يراعوا النقطه دي في تصميم الدسك و الاسطوانه (كل اطقم الدبرياج اللي في السوق الخاصه بالنيفا هي نفس لطقم الخاص بالموديل 2107).....
موضوع انك تلغي الدفع الرباعي مفهوش مشاكل (الموضوع معروف بس اهم حاجه اللي يعملهولك يكون بيفهم و الا بجد هتكره العربيه و هتبيعها و انا انصحك بعدم التعديل في الات الجر الامامي الا في حاله وجود مشاكل لا قدر الله) بس اهم حاجه متشيلش الكرونه الامامي منها لان في الحاله دي العربيه بتكون خفيفه من الامام و تسبب في بعض الاحيان انك تفقد السيطره بالذات في الملفات الحاده جداً و ممكن تجنط ساعتها بجنوط اتقل او اعرض (هو اللي بيتم بيرمي فتيس الغرز و بيتفصل كردان عموله من فتيس السرعه الى الكرونه الخلفيه., و الكرونه الاماميه بيتشال منها الاكسين المتصلين بالعجل و بتفضل في مكانها)....
يا ريت اكون وضحت الصوره بالنسبه لنظام الدفع اما بخصوص الاختلاف انا الصراحه معرفش هما عدلوا الحكايه دي في الموديل الجديد ولا لا عشان اكون صريح معاك....
انا شخصياً افضل انك ما دام انت مش محتاج سياره دفع رباعي او سياره استخدام شاق (و اقصد بكلمه شاق جبل و مدقات و طرق غير معبده) فلا انصحك بيها لانها غير عائليه تماماً و غير مريحه بالنسبه للإستخدام داخل المدينه....
دا ليس تقليل من شأن النيفا من شئ و لو رجع بيا الزمان هشتريها تاني ....
نصيحه من اخ شوف احتياجاتك الفعليه بالظبط و على اساسها حدد وانا معاك في اي استفسار و يا ريت لا تجعل مخاوفك من المطبات و الحوادث تسيطر على تفكيرك لانك هتدفع مبلغ محترم حوالي 70,000 جنيه.
يا رب اكون افدتك و اي استفسار انا تحت امرك