حرية الدعوة الى الفضيلة و حرية الدعوة الى الرذيلة

**جندى مجند** · 16-05-2007 03:06 AM

الحقيقة الموضوع دة أنا كنت ناوى أكتبه كرد فى موضوع آخر و هو موضوع (أجمل رااااااااااااااااااااجل في مصر !!!) و لكن رأيت أنه من الأفضل كتابته فى موضوع منفصل عشان الموضوع دة بيثار كتير جداً جداً و بيلتبس على ناس كتييييير جداً ... الموضوع باختصار أثاره الرد التالى من أخى الفاضل nileheart فى الموضوع المذكور:

انا مش عارف الناس زعلانه ليه؟!!
هما اجبروا الرجاله كلها انها تشترك؟!!
اللى يروح يروح
واللى مش عاجبه لا يروح ولا يتفرج
..
واللى زعلان من وجود المسابقه من اصله فى بلدنا المسلم, بيزعل ليه لما فرنسا العلمانيه تمنع الحجاب فى المدارس؟
ماهى نفس المبدا
قمع المخالف لانه مخالف

الحقيقة ان الرد دة قد يبدو للوهلة الأولى منطقياً و عقلانياً و أنا أعذر أخى nileheart فى اقتناعه به عشان دى فعلاً قضية بتلتبس على كثير من الناس ... هل من حق كل من أراد الدعوة الى الرذيلة أن يفعل ما يحلو له طالما أن هناك من يدعو الى الفضيلة و طالما أن من يدعو الى الرذيلة لم يكره أحداً على اتباعه؟ المشكلة أن هذا القول هو لى لعنق الحقيقة ... من يدعو للرذيلة يريد ألا يجد مقاومةً من أحد فى دعوته و لذلك يقول لدعاة الفضيلة انتم أحرار و انا كمان حر و مالكوش دعوة بى و اللى مش عاجبه اللى أنا بقوله ميسمعنيش ... تعالوا نستعرض المعضلة الخطيرة وراء هذا الكلام فى عدة نقاط:

1- أصحاب الشهوات و الساعون فى الفساد سلعتهم لذيذة و مغرية و سهل جداً ان تجد أتباعاً كثيرين من عوام الناس "و إن كثيراً ليضلون بأهوائهم بغير علم" - الأنعام 119، "و ما أكثر الناس و لو حرصت بمؤمنين" - يوسف 103

2- الساعون فى الاصلاح قليلون و سلعتهم لا تجد رواجاً الا بين من رحم ربى "قَلِيلاً مَّا تَذَكَّرُون"، "قَلِيلاً مَّا تَشْكُرُون"، "وَمَا آمَنَ مَعَهُ إِلاَّ قَلِيل"، "قَالَ أَرَأَيْتَكَ هَذَا الَّذِي كَرَّمْتَ عَلَيَّ لَئِنْ أَخَّرْتَنِ إِلَى يَوْمِ الْقِيَامَةِ لأَحْتَنِكَنَّ ذُرِّيَّتَهُ إَلاَّ قَلِيلاً"، "وَقَلِيلٌ مِّنْ عِبَادِيَ الشَّكُورُ" ...

3- يبقى الحل ايه عشان ينتصر الساعون للاصلاح على الساعين الى الفساد؟ الحل هو ما جعل هذه الأمة خير الأمم "كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّه"

4- طيب ما المطلوب للأمر بالمعروف و النهى عن المنكر؟ الحديث الشهير الذى نحفظه جميعاً ... "من رأى منكم منكراً فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان" ... و تغيير المنكر باليد يكون فقط لولى الأمر - كالحاكم و من ينوب عنه فى أهل بلده، و كالأب فى بيته و المدرس فى فصله و هكذا ... و يأتى بعده التغيير باللسان و هو النصح و الارشاد بالموعظة الحسنة و يأتى بعده القلب و معناه الاستنكار و الاعراض عن المنكر حتى يشعر من يفعلونه أنهم منبوذون و مذمومون عسى أن يكون ذلك رادعاً أخيراً لهم

5- نيجى للنقطة المثارة أعلاه بخصوص اننا نستنكر هذه المسابقة و فى نفس الوقت بنزعل عشان فرنسا بتمنع الحجاب ... و هذه النقطة تثار فى قضايا كثيرة جداً مشابهة ... و لكن المتأمل لما ذكرته الآن يجد أنه لا يوجد تناقض بين الموقفين ... نحن لا نستنكر من منطلق أننا أغلبية تختلف مع أقلية ... نحن نستنكر من منطلق اعلاء صوت الحق و استنكار الباطل بغض النظر عن الأغلبية و الأقلية ... لأن المقولات اللى من النوع دة بيحاول أتباع الشهوات ترويجها بين الناس لاسكات الناصحين و المصلحين ... و بما انها مقولة تلتبس لدى الكثيرين لما فيها من التفاف و اعوجاج فنجدها يتم ترويجها دون التفكر بعمق فى مغزاها و دون تفنيدها ...

(ملحوظة جانبية ... أخى نايل هارت أقسم بالله أنى لا أقصد توجيه هذا الكلام لك شخصياً و أنا أعرف تماماً أنك لا تقصد اطلاقاً الترويج لمنطق أهل الشهوات و حاشا لله أن أظن بك ذلك و لكنى أردت تفنيد هذا الرأى لأنه فعلاً بيلتبس على الكثيرين من الناس بما فيهم المثقفين و أصحاب الفكر الراقى)

باختصار ... لما بنلاقى حاجة غلط المفروض نستنكرها و نعلن رأينا فيها دون النظر للغلط دة جاء من الأغلبية أم من الأقلية .. و فى انتظار تعليقاتكم و آرائكم

**Dr Ahmed** · 16-05-2007 03:27 AM

معاك 100%
جزاكم الله خيرا على التوضيح

**baher** · 16-05-2007 06:49 AM

انا موش معاك

**memo_hefnawy** · 16-05-2007 08:30 AM

باهر الموضوع مش معاك و عليك عندك وجهة نظر ......إستعرضها و يتم النقاش عليها حتى يتم التوصل للرأى الصواب

النقاش و التواصل هدفه الأول هو الوصول إلى الرأى السليم و الذى يتماشى مع الحق و المنطق و ليس هدف النقاش إن واحد رأيه يفوز و التانى يخسر أبداً خالص ......

الإختلاف يولد الإبتكار و يخلق الأفكار و الحلول ....يعنى لو كلنا بنفكر ذى بعض مكنش حد قدر يبتكر أى حاجة أو مكنش بقى فيه عربية فيات و عربية مرسيدس و عربية فيرارى ...كان تساوى الكل فى النهاية ....

يعنى لو إنت بتفكر ذى والدك ذى أخوك ذى صديقك ....كان كل الناس إشتغلت مهنه واحدة و لبست لبس واحد و سكنوا فى شقة واحده و ركبوا نفس العربية و و و و و

----------
أما عن رأييى فى الموضوع المطروح أرى أن أحمد كلامه سليم من حيث الأمر بالمعروف و النهى عن المنكر ...

إيه الفرق بينا و بين أى مجتمع غربى ؟؟ لو إنت فى أى دولة أوروبية و ماشى فى حالك إنت و أختك أو زوجتك و طلع عليك 3 شباب بسلاح أو من غير حتى سلاح و ثبتوك إنت و من معك فى حد هايقف و يقولهم بتعملوا إيه ؟ حتى لو جردوك من ملابسك أمام من معك .؟ متقولش إنت بتتكلم عن المجدعه .......لآ أنا بتكلم عن الأمر بالمعروف و النهى عن المنكر ....

طب إيه الرادع للناس دى الرادع إنه هايكون عارف لو عمل كده مييت واحد هايقف و إللى هايبلغ و إللى هايساعد...
ده مثال ...جايز الأمور متداخله عندنا عشان المصرى يعرف حاجة إسمها الشهامة و المجدعه لكن فى الأساس الدين أمرنا بده

طيب مثال تانى عن الحجاب و حرية المعتقد :
-----------
بما أننا دولة مسلمة و ديننا يحثنا على حرية المعتقد .....كان من باب أولى ذى ما فرنسا بتمنع الحجاب أنا أجبر الناس تلبسه عشان مش يفسدوا المجتمع حتى لو مسيحيات .........لكن أنا قولتلك فى أول الكلام إيه حرية المعتقد ......

لا ضرر ولا ضرار .....لكم دينكم و ليا دين ...... بتشرب نبيذ و إنت مسيحى أنا ماليش دعوة ...لكن مش يتباع فى المحلات فى بلد مسلم و هو محرم ..... فى فرق كبير طب ليه ما حرية و كل واحد عارف مصلحته ؟؟

لآ الشاب إللى لسه فى مدرسة أو حتى كليه لسه مراهق ميعرفش فين الصح من الغلط ...يبقى نرجع إلى الأمر بالمعروف...

جايز أكون غلط فى جزء من كلامى و جايز أكون صح ....بس على الأقل حاولت .... دلوقت دورك إنت تعرض وجهة نظرك و نشوف فيين الرأى الصح :)

**PAYOO** · 16-05-2007 09:16 AM

من وجهة نظري أرى أن الأمر لا يحتاج إلى خلاف بيننا لأننا جميعا نعيش في مجتمع محترم وصاحب دين وعقيده (سواء مسلمين أو مسيحيين) فجميعنا يعرف ما هو الحلال وماهو الحرام ونعرف ما هو الذي يليق والذي لا يليق

لذا أرى أن مسابقة مثل مسابقة (أجمل رجل وأحلى كلب وأروع موزه) ومثل هذه المسابقات السطحيه لا تعتبر دلالة على ميول الشعب المصري ولا حتى تمثيل لنسبة قليله منه ، فشعبنا شعب كادح (غلبان) يسعى إلى رزقه ولقمة عيشه ولا يعنيه مثل هذه الأمور كثيرا وكون هذه المسابقه بها عشره أو عشرين أو حتى مائة شاب فهم لا يمثلون سوى بضعة ذرات من الرمال ضمن رمال شاطئ الأسكندريه مثلا

وغذا أختلفنا على مفهوم الحريه أجد أن فرنسا وهي بلد الحريه قد أساءت أساءه بالغه لتاريخها وثورتها المسماه ثورة الحريه لأنها بعد أن منعت المسلمات من ارتداء الحجاب في المدارس و خلافه قد خالفت مبادئ ثورتها التي قامت من أجل الحريه وبهذا تعد فرنسا من وجهة نظري بلد متعصب وتصرفها حيال موقف الحجاب يعد موقف جاهل متعصب أعمى لا يصدر من دوله متقدمه بل يصدر من دوله متخلفه متعصبه يحكمها الجهل والتعصب الأعمى

وأحمد الله على أننا في ظل الأسلام لم نرى في يوم في يوم من الايام وعلى مدار التاريخ منع لراهبه أو راهب أو قس أو أي أنسان على مذهب أو عقيده تخالف الأسلام والمسلمين انه قد خلع عنه رداءه أو فرض عليه لباس ما يخالف عقيدته

**أبو عبدالله** · 16-05-2007 12:37 PM

ربنا يبارك فيك أخي جندي مجند

واللهم أرحمنا ولا تحاسبنا بما فعل السفهاء منا

وعاوزين نشوفك المقابلة الجايه ان شاء الله

**sab3aawy** · 16-05-2007 02:02 PM

لأننا جميعا نعيش في مجتمع محترم وصاحب دين وعقيده (سواء مسلمين أو مسيحيين)

فشعبنا شعب كادح (غلبان) يسعى إلى رزقه ولقمة عيشه ولا يعنيه مثل هذه الأمور كثيرا

كفيت ووفيت يا هانى وقلت كل اللى انا كنت عايز اقوله وكفيتنى عناء البحث عن كلمات مناسبة بأسلوبك البسيط المهذب ، واوفقك تماما على ان خطوة فرنسا تجاه المحجبات خطوة تفتقر بشدة الى الاسلوب الحضارى الذى انتهجته فرنسا منذ الثورة الفرنسية

**محمد المشد** · 16-05-2007 02:19 PM

الاخ جندى مجند
الاخ بايو
فعلاً اصبتم كبد الحقيقة بكلماتكم الرائعة وكان ردكم ابلغ رد محترم يدل على سعة افق وراى سديد
وفقكم الله لما فيه الخير

**Abouelela** · 16-05-2007 02:32 PM

الأصدقاء الأعزاء .. هل تسمحوا لي بعرض وجهة نظرى في مسألة منع فرنسا للحجاب ..
الموضوع هو .. صراع قوى .. وصراع مصالح ..
ومعذرة لو تكلمت بفكرة المؤامرة .. التي تحتوى العالم هذه الأيام ..
المطلوب هو خلق عدو جديد ( بعد اختفاء العدو القديم ) .. يتم توجيه اللوم إليه .. من جهة .. وخدمة الكنيسة الغربية التي تعاني في مواجهة العولمة من جهة أخرى ..
ودليلي علي ذلك محاضرة البابا بندكيت في الجامعة والتي أقامت ثورة في العالم الأسلامي .. في حين أن صلب محاضرته كان ينصب علي ترغيب الأوربيون في الكنيسة وأدعائه أن عقيدته هي التي تتحد مع العقل خلافا للأسلام ..
وإلا .. فليخبرني أيا منكم ما السبب في منع الحجاب في هذا التوقيت بالذات .. ( رغم ازدياد كثافة المسلمين في فرنسا ) ..
وما السبب في مسابقات الرسوم المسيئة للرسول عليه الصلاه والسلام ..
وما السبب في كلمات البابا التي تجدونها خارج السياق الطبيعي للمحاضرة ..
وما السبب في كم الدراسات والكتب والتي تكلمت عن صراع الحضارات ..
وتعبيرات الحروب الصليبية المتكررة .. ( والتي أظن أنها لاتأتي بالصدفة بمثل هذا الترتيب ) ..
الموضوع به جزء سياسي .. طاغي .. وسبب هذا التيار .. الجارف .. هو ضعفنا كدول وحكومات .. وأيضا الحروب الأستباقية التي تشن علينا من كل اتجاه .. ومن كل العالم .. ( لو دققتم النظر .. ) ..
أما بخصوص نشر الفضيلة .. فيكفينا الكلام الطيب الذى تفضل به الأخ الفاضل ( اللواء المجند ) .. بكل مافيه من خير ..
هدانا الله وأياكم سواء السبيل .. وشكرا ..

**Nile Heart** · 16-05-2007 04:02 PM

المشاركة الأصلية كتبت بواسطة memo_hefnawy

:
-----------

لا ضرر ولا ضرار .....لكم دينكم و ليا دين ...... بتشرب نبيذ و إنت مسيحى أنا ماليش دعوة ...لكن مش يتباع فى المحلات فى بلد مسلم و هو محرم .....

حلو الكلام

طيب يجيبه منين المسيحى؟؟؟ يعمله فى بيته؟ ولا يستورده؟
ولو استورده, هتاخد عليه ضرايب ولا حرام تأكل المسلمين من مال جاء على الخمر ؟
ولو ماختدش ضرايب, هتسمح لكل ولحد يستورد ماشاء؟ ولا هتكون فيه عدد محدد لكل مسيحى؟
ولو المسيحى باع زجاجه لمسلم, هتعاقب المسلم بس ولا الأتنين؟ ولا مافيش مشكله؟

عزيزى المنطق بتاعك ده (وهو مايؤمن به السواد الأعظم من الشعب) منطق يؤدى حتمآ الى مليون تعقيد للحياه, ولو تعرف حد ايرانى معتدل يقوللك على العذاب الى عايشين فيه بسبب الحكم القائم على التفتيش فى ضمائر الناس

الحل ياصاحبى هو ما توصل اليه العالم من عشرات السنين. حل اسمه الليبراليه, يعنى انت عايز تلبس جلابيه أو بنطلون وتقصرهم 20 سم فوق الكعب (فى منظر مقزز لى على الأقل) انت حر تماما, واذا السيده عايزه تتنقب برضه هى حره تماما, واذا انا عايز امشى مع واحده لابسه ميكروجيب انا وهى برضه احرار تماما..

هذا هو ما سيسيرى رضينا ام لم نرضى,
على فكره.. العالم كله الأن مقتنع ان الشرق ألأوسط وبالذات المسلم منه هو المنطقه الوحيده المستعصيه على التقدم!

ياويلنا وياسواد ليلنا

الموضوع: حرية الدعوة الى الفضيلة و حرية الدعوة الى الرذيلة

LinkBack

أدوات الموضوع

عرض

حرية الدعوة الى الفضيلة و حرية الدعوة الى الرذيلة - انشر الموضوع فى :

-

-

-

-

-

المواضيع المتشابهه

هو ليه كل ماشارك بموضوع يتقفل ............هى حرية ايه دى .. دايام مبارك كانت فر حرية

بيان الدعوة السلفية بخصوص مظاهرات الغدبسم الله الرحمن الرحيم تعلن ((الدعوة السلفية))

ديمقراطية و حرية اه بس مش للدرجة دي

الكلمات الدلالية لهذا الموضوع

المفضلات

المفضلات

ضوابط المشاركة