الاستاذ/ حسين
تقبل الله منا ومنكء
اسئلة اليوم12/9/2010 الساعة3 عصرا
1-لما يبقى الواحد سايق العربية على التانى مثلا وبسرعة 20ك ويشوف امامه الطريق حيقف طفل معدى الشارع او بيلعب او دراجة او تكتوك او اى سبب حيخليه يقف وبعدين يمشى على طول والسؤال؟
هل الافضل ادوس دبرياج على الاخر وفرامل وافضل دايس والعربية واقفة تماما علشان حمشى على طول ولا زى ماباعمل اول مالاقى انى حاقف لاى سبب امور على طول وبعدين اديها الاول واطلع وعلى طول بقى كل شوية امور وادى الاول واطلع مع ملاحظة ان دايما الوقوف متكرر ارجوا التفضل بالتعقيب وتقبل خالص تحياتى وتحياتى للاعضاء الافاضل والعضوات الفضليات وكل عام وجميع حضراتكم بخير والف سلامة وربنا سبحانه وتعالى يبارك لكم فى صحتكم وصحة اولادكم ويعطيكم خيرها ويكفيكم شرها قولو آمييييين
السلام عليكم ورحمة الله وبركاته
أفتقدتكم جدا الفترة اللى فاتت بس الظروف الحمد لله،أنا عملت حادثة بالعربية الحمد لله انا وبنتى بخير بس الفانوس الأمامى اتكسر والرفرف اتطبق والكبوت اتأثر...انا كنت من المتابعين جيدا للموضوع ده والفترة اللى فاتت انشغلت وقل دخولى على النت و الحادثة دى ليها حوالى اسبوع ، طبعا الحالة النفسية كانت صعبة جدا بس دلوقتى ابتديت اتحسن ولله الحمد
القصة بقى انى رجعت لنقطة الصفر تانى يعنى بعد ما اخدت الثقة بنفسى وبقيت بطلع بالعربية كتير لوحدى ومش بتحصل اى حاجة فجأة يحصل كده، اللى مضايقنى اوى ان انا الغلطانة هتتصدموا لما تعرفوا عملت ايه دوست بنزين فجأة بدل فرامل (والعربية اوتوماتيك) وفى عز الزحمة وقت خروج الموظفين!!! مش عارفة ازاى ، انا بسوق ليا 7 شهور عمرى ما عملت كده..طبعا مش قادرة اسوق تانى ، هو ممكن الواحد يلخبط فجأة وهو سايق وينسى هى رجله على اى دواسة؟ ادعو ا لى يا جماعة أنا بجد محتاجة دعواتكم...
أولا شكرا ليك يا أستاذ حسين على اهتمامك وردك، الموقف بالظبط انى كنت سايقة وبنتى 3 سنين قاعدة فى الكنبة الخلفية والشارع واقف وقدامى تاكسى وانا كمان واقفة وشمالى فاضى ،لسة بلف الدريكسيون شمال علشان انقل نفسى شمال واكمل لقيت نفسى بجرى قدامى وطبعا المسافة كانت بينننا صغيرة جدا مع دوسة البنزين فجأة حصلت الحادثة.. طبعا الشارع وقف وسحب رخص والبنت اتسرعت ..الحمد لله الحمد لله
((لو كنت ماشى فى الزحام بهدوء جدا ... فى الحالة دى ممكن تفضل ضاغط على الدبرياج خفيف لانك فى اى لحظة سوف تتوقف وعشان العربية ما تترجش منك ))
أرجو الشرح بالتفصيل لأن دى مشكلتى الأزلية
مع جزيل الشكر وكل عام وأنتم بخير
عشان اول ما تتوقف تكون جاهز انك تضغط على الدبرياج بالكامل وتمور العربية مرة تانية
لكن لو توقفت ورجلك ضاغطة على الفرامل فقط ولم تمور العربية ... اكيد العربية هاتبطل منك
الخلاصة: الموتور بيلف ومحتاج عزم وقوة عشان يحرك العربية ومحتاج انك تضغط بنزين ... وفى نفس الوقت العربية ثقيلة وشبه متوقفة وانت موش قادر تضغط بنزين عشان الدنيا زحمة جامد ... والعربية هاتتوقف وهاتبطل او هاتفضل تترج منك
محتاج انك تضغط بنزين عشان العربية تمشى بشكل طبيعى لكن انت موش قادر عشان الدنيا زحمة
يبقى الحل ايه ؟
انك تقلل شوية من "نقل الحركة" بين عجل العربية ومتور العربية
يبقى لازم تفصل الحركة او تقلل من الحركة شوية بأنك تضغط الدبرياج نص ضغطة او تمور العربية لو كنت متأكد انك هاتتوقف تماما
ولو هاتستمر فى السير العادى
هاتزود بنزين وترفع رجلك بالتدريج عن الدبرياج وتستمر فى السير بشكل طبيعى بدون مشاكل
انظر الى الفيديو
YouTube - ClutchDemo
لما بتضغط على الدبرياج ... فى الحالة دى بتفصل الحركة ... واستحالة العربية تترج منك او تبطل منك
ولما بترفع رجلك عن الدبرياج ... فى الحالة دى بتوصل الحركة بين العجل وموتور العربية يبقى فى الحالة دى لازم اضغط بنزين عشان الموتور محتاج عزم وقوة
آخر حاجة انه من الممكن ان اسطوانة الدبرياج نفسها يكون فيها مشكلة وهى اللى بتعمل الرجة فى العربية ... وده احتمال ممكن يكون موجود واللى يتأكد منه لو ركب العربية سائق قديم ... لو عملت معاه نفس الحركة وان العربية بتترج منه لا قدر الله ... يبقى اسطوانة الدبرياج فيها مشكلة بسيطة ان شاء الله وتحتاج حل .... اما لو ركبها سائق قديم وماعملتش الحركة دى وماترجتش منه يبقى العيب فى طريقة القيادة ودى حلها بسيط هو التمرين الجيد
والله اعلم
ارجوا ان اكون وفقت
مع اطيب التمنيات
اخوكم حسين غزالة
شكرا على الشرح
والحقيقية على ما يبدو إن العيب منى أنا لأن العربية باطلع بيها مع سواق قديم وعمرها ما عملت منه كده
إن شاء الله هاحاول نشرح اساسيات القيادة مرة تانية للمبتدأين ... لكن معلهش بشكل مبسط جدا للغاية ... والله المستعانبسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايام
يالله يارجالة مع بعض كده وواحدة واحدة ... نساعد بعض ونبدأ صح وبدون استعجال
انا هاتكلم عن السيارة المانيوال ههههههههههه عشان انا لا املك سيارة اوتوماتيك هههههههه ربنا يرزق .. قولوا يا رب
كيف تدير سيارتك
المهم ضع مفتاح داخل الكونتاكت .... وتأكد اولا ان الفتيس ليس معشق ... يعنى حرك الفتيس بإيديك ... سوف تجد انه يتحرك معاك بخفة ... افتح الكونتاكت على اول "تكة" ... سوف تشاهد امامك فى التابلوه بعض العلامات الضوئية ... اهمها طبعا "لمبة" الزيت ... ولمبة البطارية وتمام الشحن .... دور العربية ... واول ما تسمع ان الموتور تم ادارته .... اترك المفتاح على طول .... وبعد ثوانى لازم لمبة الزيت تطفى هى ولمبة الشحن ... لو اى واحدة منهم لم تنطفىء ... على طول بطل العربية بدون تردد ...وعالج العطل عند الكهربائى او الميكانيكى
اذا العربية لم تدور معاك من اول مرة ... بطل العربية ... واضغط بنزين خفيف ... واعد المحاولة بعد وقت قليل ....
تجنب ضغط البنزين بشكل جامد عشان العربية ما "تشرقش" ... يعنى الكاربوراتير يمتلىء بالبنزين بشكل جامد وزيادة عن اللزوم مما يصعب إدارة العربية
البحث عن نقطة التحرك
ارفع "الهاند بريك" فرامل اليد
واضغط برجلك اليمين على البنزين خفيف قوى ... يعنى يا دوب اضغط مسافة لا تزيد عن نص سم هههههههه وثبت رجلك على كده ... بحيث انك يا دوب بتسمع صوت الموتور
واضغط على الدبرياج برجلك الشمال على الآخر
انقل الفتيس على الغيار الأول
ارفع رجلك عن الدبرياج ... براحة قوى ... وخفيف قوى .. واول ما تشعر ان العربية هاتتحرك ... توقف على هذا الوضع ... هى دى نقطة التحرك ...
شوف رجلك الشمال اترفعت عن الدبرياج مسافة اد ايه ؟ ... وعند النقطة دى بالذات تبدأ العربية فى التحرك ...
لازم تتمرن كثير على الحكاية دى
ورجلك لازم تاخد وتشعر بالنقطة التى تتحرك عندها السيارة
طبعا لو رفعت رجلك عن الدبرياج اكثر من كده ... سوف تجد ان كبوت العربية او مقدمة العربية بترتفع الى اعلى والعربية عايزة تتحرك بشكل جامد ...
اضغط الدبرياج على الآخر
مور الفتيس
ارفع رجلك عن البنزين
وريح اعصابك شوية ههههههههههه
جرب التمرين ده مرة تانية
اذا شعرت ان العربية عايزة تتحرك بشكل جامد وبشدة ... يبقى انت ما زلت محتاج الى اعادة التدريب مرة تانية
حتى تصل الى النقطة التى اذا رفعت قدمك عن الدبرياج عندها فقط سوف تبدأ السيارة فى التحرك
التمرين التالى
هو انك تنزل فرامل اليد هههههههه وتستعد للتحرك
لكن قبل التمرين لازم تختار شارع هادى وفاضى عشان تتمرن فيه براحتك
اضغط بنزين خفيف قوى وثبت رجلك على البنزين
اضغط الدبرياج على الآخر
انقل الغيار الاول
ارفع رجلك عن الدبرياج خفيف قوى حتى تصل الى نقطة التحرك التى سبق التدريب عليها
واول ما العربية تتحرك معاك متر او مترين .. على طول اضغط على الدبرياج مرة تانية على الآخر عشان العربية تتوقف بدون الحاجة الى الضغط على الفرامل
التدريب ده الغرض منه التحكم فى الدبرياج ... ويساعدك على التحرك بشكل بطىء فى البداية
الكثير من المبتدأين ... العربية بتقفز منه ويتسبب فى حوادث ربنا يحفظ الجميع
وبرغم بساطة التمرين السابق ... لكن يا ريت نتمرن عليه كويس جدا جدا ... قبل الإنتقال الى التمرين التالى
تابــــع
فى انتظار التواصل
مع اطيب التمنيات
اخوكم حسين غزالة
متابع ومنتظر وموضوع رائع ككل يفيد كثيرا
الاخ الفاضل / حسين
كل سنة وانت طيب
وجزاك الله كل خير على هذا المجهود الرائع
والله ان الحمد لله بسوق كويس
بس لازم يوميا اخش على الموضوع بتاعك واتابعه
جعل الله هذا العمل فى ميزان حسناتك
وتقبل تحياتى
ولو هاتستمر فى السير العادى
هاتزود بنزين وترفع رجلك بالتدريج عن الدبرياج وتستمر فى السير بشكل طبيعى بدون مشاكل
طيب أنا إمبارح كنت ماشى على الغيار الثانى ورجلى على الدبرياش للآخر ومجهز فرامل ومهدى لأن كان فيه ملف صغير كده بس زحمة وقهوة قاعدين عليها ناس فاضطريت إنى أهدى أهدى لغاية ما العربية بطلت منى .
السؤال بقى : - إيه إللى كان لازم أعمله علشان العربية ماتبطلش ؟
(وبالتفكير فى هذا الخطأ توصلت إلى أنى كان لازم لما العربية هدت خالص إنى أنزل بالغيار يعنى آخد الغيار الأول علشان العربية تفضل دايرة ) صح ولا غلط الكلام ده ؟
مع الشكر الوفير لجميع من يساهم فى تعليم الغلابة اللى زينا
ميرسى جدا عالمجهود دة
انا لسة بتعلم وان شاء الله استفيد من موضوعك
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايامكيف تدير سيارتك
السير والتوقف بالسيارة
الآن المفروض انك تدربت على تحريك السيارة.
الخطوة التالية هى أن تتعلم تحريك السيارة بشكل آمن وايضا التوقف بشكل آمن و فى مكان آمن ... بدون أن تسبب أى مخاطر أو ازعاج للآخرين ... فى الأول سوف تتحرك على الغيار الأول وتسير مسافة صغيرة ثم تتوقف بجوار الرصيف.
كيفية استخدام الدبرياج لعمل مناورة على سرعة بطيئة
قبل التدريب على التحرك بالسيارة .. اسوأ حاجة هى انك تتعلم تحريك السيارة بشكل بطىء جدا ثم التوقف مرة ثانية باستخدام الدبرياج فقط
اختر شارع فاضى وهادى ومناسب للتدريب وجهز العربية للتحرك بأنك تختار الغيار الأول ثم اضغط على البنزين خفيف وارفع رجلك عن الدبرياج للبحث عن "نقطة التحرك" ... ثبت رجلك على الوضع ده ... ثم خفض فرامل اليد "الهاند بريك"
إذا كنت وصلت الى "نقطة التحرك" الصحيحة ... المفروض ان العربية لا تتحرك ... اذا شعرت ان العربية بتتحرك بطىء جدا جدا إلى الأمام ... فأنت فى هذه الحالة تحتاج الى الضغط على الدبرياج خفيف قوى حتى تتوقف السيارة مرة ثانية .
تدرب على تحريك السيارة بعض الأمتار القليلة بأنك ترفع رجلك عن الدبرياج خفيف قوى ... ثم تضغط مرة ثانية على الدبرياج على خفيف حتى تتوقف السيارة مرة تانية .. لازم تضغط على الدبرياج حتى تصل الى "نقطة التحرك" ... التدريب ده الغرض منه هو التحكم فى الدبرياج وهايعلمك تتحرك بالعربية بشكل هادىء وممتاز
تحريك السيارة
الأول انظر امامك نظرة خاطفة وسريعة وكمان انظر فى المرايات على السيارات التى حولك وكمان انظر جيدا على "المشاة" الناس اللى ماشية بجوار السيارة .. وكن مستعدا للتحركتذكر انك تنظر امامك وعلى الأجنابانظر جيدا للسيارات والمشاة والدراجات التى تسير بجوارك فى المنطقة العمياءانظر اين تتجه هذه السيارات او الدراجات او المشاه "عايزين يعملوا ايه؟"يمكن تلاقى احد المشاة يريد ان يعدى الشارع امامكهل من الضرورى ان اعطى إشارة قبل التحرك بالسيارة ؟ ....الطبيعى انك تنقل الغيار الأول وبعد فحص المرايات واعطاء الإشارة المناسبة والتأكد انه لا يوجد احد فى المنطقة العمياء للسيارة ...
طبعا اكيد مهم انك تحذر جميع مستخدمى الطريق وتعرفهم انت ناوى تعمل ايه
توقيت الإشارة مهم جدا .. يعنى من الخطأ انك تعطى إشارة بدرى قوى او متأخر قوى أو لمدة طويلة ... هانتكلم عن الإشارات مرة تانية إذا سمح الوقت
المهم استخدم الإشارة إذا احتجت لإستخدامها
انظر نظرة خاطفة ونهائية فوق كتفك لكى تتأكد انه لا يوجد احد فى المنطقة العمياء
اذا كان الوضع آمن ... نزل فرامل اليد "الهاند بريك"
واضغط البنزين زيادة خفيف وزيادة شوية عن الأول
المفروض العربية هاتتحرك الآن
بهدوء ارفع رجلك بالكامل عن الدبرياج وفى نفس الوقت اضغط بنزين زيادة
المفروض انك تبتعد عن الرصيف مسافة متر واحد عن الرصيف
وبعد ذلك "تعدل عجلة القيادة" الى الأمام
وبعد ذلك تتجه مرة تانية بجوار الرصيف زى ما كنت الأول وانت متوقف
فى الاول صعب انك تحدد مكانك بجوار الرصيف او على الطريق
لا تنظر على الرصيف او الطريق
فقط انظر امامك "امام الكبوت"
تجنب التدريب فى اى منطقة يكون فيها رصيف امامك ... يعنى اختر طريق يصلح للسير بشكل طوالى بدون مشاكل
انظر جيدا الى المكان المطلوب التوجه اليه
اعتمد على جانب الطريق لتحديد اتجاهك .. وانظر على المسافة الموجودة على جانب السيارة امامك ... الموضوع ده هايساعدك لكى تسير على خط مستقيم
التوقف على اليمين
نفترض ان فيه حالة طارئة ... وتحتاج الى التوقف على اليمين
اختر مكان آمن للتوقف
انظر الى المرايات مرة تانية جيدا
استخدم الإشارة للإتجاه الى اليمين اذا احتجت ذلك
حرك عجلة القيادة "الدركسيون" خفيف قوى ناحية الرصيف
تذكر انك تعدل "الدركسيون" بمجرد الأقتراب من الرصيف حتى لا تصطدم به
انقل رجلك من على البنزين وضعها فوق الفرامل
اتبع التعليمات التالية:
اضغط على الفرامل خفيف فى البداية
بالتدريج يتم زيادة الضغط على الفرامل
قبل ما السيارة تتوقف تحتاج الى الضغط على الدبرياج على الآخر برجلك الشمال حتى لا تتوقف السيارة وتبطل منك
لكى تتوقف بشكل هادىء يجب ان تضغط على الفرامل بشكل هادىء ... ومع التدريب سوف تتعلم التوقف بشكل هادىء بجوار الرصيف وفى المكان المحدد وطبعا عجلة القيادة "الدركسيون" لازم يكون الإتجاه الى الامام
رجع زراع الإشارة الى وضعه الطبيعى ... اذا كنت سبق واستخدم زراع الإشارة عند الحاجة
ارفع فرامل اليد "الهاند بريك"
ثم "مور" الفتيس ... يعنى اجعل الفتيس بدون تعشيق على اى غيار
ثم ارفع رجلك عن الدبرياج والبنزين وعن كل حاجة هههههههههههه
ارجوا أن اكون وفقت
تابـــــــع
فى انتظار التواصل
فى رعاية الله
اخوكم حسين غزالة
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايامكيف تدير سيارتك
اختيار الغيار "الفتيس"
تغير الفتيس لغيار اعلى
لتغيير الفتيس من الغيار الاول الى الغيار الثانى
- امسك عجلة القيادة بإحاكم بيدك اليسرى
- انظر امامك على الطريق ههههههههه يعنى اوعى تنظر على الفتيس وتنسى الطريق
- ضع يدك اليمين فوق الفتيس وكن مستعدا
- اضغط على الدبرياج بسرعة وفى نفس الوقت ارفع رجلك من على البنزين
- حرك الفتيس "بهدوء" براحة من الغيار الاول الى الغيار الثانى ههههههههه البعض للاسف يستعمل القوة نتيجة القلق وطبعا احيانا بيختار غيار خطأ ويسبب مشاكل فى السيارة
- ارفع قدمك من فوق الدبرياج بهدوء ثم اضغط البنزين بهدوء ايضا لزيادة سرعة الموتور
- ضع يدك اليمنى مرة ثانية على عجلة القيادة ههههههههه يعنى امسك الدركسيون مرة تانية بإيديدك الأثنين ومافيش داعى انك تعمل فيها ههههههههههههه معلم وتمسك الدركسيون بيد واحدة.
الغيار الثانى سوف يسمح لك بزيادة سرعة السيارة اكثر قليلا حتى تجد الفرصة للتحرك الى الامام واختيار الغيار الثالث وهكذا ... تذكر انك يجب ان تستخدم "كف اليد" لتغيير الفتيس
نقل الغيارات الى اسفلنقل الفتيس الى غيار منخفض وفى نفس الوقت سرعة منخفضة
الاجراء المناسب لنقل الفتيس الى غيار منخفض يتوقف على "هل السيارة تم تهدئة سرعتها بواسطة الفرامل ؟" اما لا ؟
قاعدة عامة
- يجب الضغط اولا على الفرامل قبل نقل الفتيس على غيار منخفض ... او تترك السيارة تخفض سرعتها لوحدها بأن ترفع رجلك من على البنزين
- للتمرين يجب ان تزيد سرعتك حتى تصل الى سرعة 45 كيلوا فى الساعة او 60 كيلوا على الاقل وتكون ماشى على الغيار الثالث اوالرابع هههههههههه حسب حالة العربية ثم تبدأ التدريب على نقل الفتيس من الرابع الى الثالث ... ومن الثالث الى الثانى وهكذا ...
تذكر يجب ان تمسك عجلة القيادة بجدية وبيد واحدة "ايدك الشمال"
- ابدأ اولا برفع رجلك من على البنزين
- وبهدوء اضغط على الفرامل حتى تصل سرعة العربية الى حوالى 30 كيلوا فى الساعة
- انظر امامك جيدا
- ضع يدك اليمنى على الفتيس وكن مستعدا
- اضغط على الدبرياج الى اسفل بسرعة فى نفس الوقت حرك الفتيس من الغيار الرابع الى الثالث
- ارفع رجلك من على الدبرياج بهدوء
- ورجع رجلك مرة تانية على البنزين او اتركها كما هى فوق الفرامل على استعداد للتوقف ... حسب الموقف اللى انت فيه
- رجع يدك اليمنى فوق الدركسيون مرة تانية
- افحص المرايات وتأكد ان الطريق آمان لإعادة التدريب مرة تانية
- خفض سرعتك الى حوالى 15 كيلوا فى الساعة ثم انقل الفتيس من الغيار الثالث الى الثانى
ملحوظة: موش لازم انقل الفتيس بالترتيب
يعنى المفروض بعد خفض سرعة السيارة .. يتم اختيار الغيار المناسب للسرعة التى تسير عليها العربية
وللتدريب على ذلك
- افحص المرايات
- تأكد ان الطريق آمان
- ثم خفض سرعتك حتى تصل الى 15 كيلوا فى الساعة
- ارفع رجلك من على الفرامل
- ثم انقل الفتيس مثلا من الغيار الرابع الى الغيار الثانى
اعد التمرين مرة تانية
زود سرعتك حتى تصل الى 60 كيلوا ثم خفض سرعتك وانقل الفتيس الى اسفل وهكذا ...
نقل الفتيس من الغيار الثالث الى الاول
- خفض سرعتك حتى تصل الى 30 كيلوا فى الساعة
- اذا كان الطريق آمان
- اضغط الفرامل بهدوء حتى تنخفض سرعتك تقريبا "العربية بتكون بتتحرك"
- اضغط على الدبرياج
- ارفع رجلك من على الفرامل واتركها تسير بهدوء جدا
- وقبل العربية ما تتوقف تماما
- انقل الفتيس من الثالث الى الاول
- عندما يكون الطريق آمان .. زود سرعتك حتى تصل الى 30 كيلوا فى الساعة تقريبا ثم انقل الغيار الثالث واستمر فى التدريب حتى تشعر بالثقة الكاملة
نقل الفتيس الى اسفل وانت تسير بالسيارة بسرعة
احيانا تحتاج الى اختيار غيار منخفض "لان العربية محتاجة الى قوة اعلى" لكى تستمر فى السير
مثلا: بجوارك سيارة تسير بنفس سرعتك ... وتحتاج الى سرعة اعلى لكى تتخطاها
- ضع يدك على الفتيس وكن مستعدا
- اضغط على البرياج على الآخر وفى نفس الوقت اضغط على البنزين خفيف
- اختر الغيار المناسب
- ارفع رجلك من على الدبرياج بهدوء
- ثم زود بنزين واستمر فى السير
اهم حاجة فى موضوع الفتيس ده انك تعرف
- كيف يمكن نقل الغيارات
- الاستماع الى الموتور جيدا سوف يساعدك على نقل الغيار فى التوقيت المناسب
- مع التمرين الجيد سوف تتوقع الاحداث على الطريق وسوف تستطيع اختيار الغيار المناسب تلقائيا
ارجوا ان اكون وفقت
فى انتظار التواصل
تابــــــــع
مع اطيب التمنيات
اخوكم حسين غزالة
السلام عليكم . موضوع اكثر من رائع. انا عضوة جديدة من المغرب و سائقة مبتدئة كل يوم اعمل اخطاء لكن الحمد لله ربنا ستر. كل يوم ادخل الموضوع لكي استفيد. شكرا للجميع. سيارتي كيا بيكانتو 2010
شكرا لحضرتك. انا اخدت رخصة السياقة في 2002 او الأصح اشترتها. و عمري ما سقت لأني زوجي عنده سيارة و عملي قريب جدا من البيت و مدرسة الاولاد جنبنا يعني المشوار كله 10 دقائق مشيا. السنة اللي فاتت نقلت اولادي مدرسة ثانية و بدات المعاناة مع النقل المدرسي قررت اشتر ي سيارة و اوصلهم. بدا ت مع سائق من مدرسة تعليم السياقة لكن لما سقت سيارتي كانت الطامة الكبرى. خوف شديد و لا زال لحد الان. الاخطاء الخطرة للي عملتها مع العلم اني ملصلقة علامة تدل على اني مبتدئة. مرة كنت انتظر للي لهم حق الاسبقية لما حبيت امشي شفت سيارة بتحدف عليا من الشمال فكان رد الفعل اني ادور الدريكسيون على الشمال و ما شفتش اني في سيارة على شمالي ضرب كلاكس خلا نيارتبكت وفرملت.الخطا الثاني و الثالث كان في يوتورن مرة كنت جايا بسرعة هادئة و معايا ولادي شفت شمال الطريق فارغ حطيت رجلي على البنزين معرفتش واحد بعجل خرج منين و عوض ما ادوس فرامل دست بنزين لاني رجلي كانت عليه لقيت السيارة بتهرب بينا بسرعة ارعبتني لكن الحمد لله ربنا لطف و مرة حبيت اتفدى واحد بيكنس الشارع و غير مهتم بالسيارات لقيت نفسي و انا بلف فوق الرصيف. الحمد لله ربنا ستر مرة ثانية.للي تعلمته من هده الاخطاء عمري ما الف الدريكسيون لتفادي اي حاجة عوض دلك اهدي السرعة و اشوف في المرايا و افرمل وانقل على الغيار الاول و اكمل طريقي. ادا افتكرت اخطاء اخرى ساكتبها ههههههههه
السلام عليكم ورحمة الله وبركاته
كنت عايزة اسأل عن معلومة سمعتها بس مش متأكدة من صحتها ,هل فعلا المشى البطئ بالعربية يعنى أقل من 60 لفترة طويلة ده خطر على الموتور وتفرق لو كانت العربية حديثة او قديمة ولا لأ ؟
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايامكيف تدير سيارتك
التوقف بهدوء فى مكان محدد
لكى تتدرب على هذا الموضوع لازم تكون ماشى فى شارع مستقيم وطوالى ويكون فى الشارع بعض العلامات المميزة مثلا "شجرة .. كشك ... الخ"
الهدف انك تتوقف بحيث يكون الاكصدام الامامى قبل الهدف المطلوب التوقف عنده
الموضوع ظاهره سهل ولكنك تحتاج للمزيد من التدريب لكى تنجح فيه
- عندما تجد ان الطريق آمن
- زود سرعة السيارة لتصل الى حوالى 45 كيلوا فى الساعة
- تقريبا هاتكون ماشى على الغيار الثالث او الرابع حسب حالة العربية
- الشخص الذى يجلس بجوارك "المدرب" يطلب منك التوقف عند اى مكان يختاره ... مثلا توقف عند "الكشك" ده
- تفحص المرايات جيدا .. وتأكد أن الطريق آمن
- ضع قدمك فوق الفرامل
- اضغط على الفرامل بهدوء جدا
- وبالتدريج اضغط على الفرامل بقوة اكبر حتى تشعر بأن السيارة سوف تتوقف فعلا فى المنطقة المحددة
- بالتدريج خفف الضغط على الفرامل ثم اضغط على الدبرياج
- اترك السيارة تسير وحدها حتى تصل الى النقطة المطلوبة
- اختر الغيار الاول وكن جاهز للتحرك مرة تانية
- اضغط على البنزين خفيف قوى ... وارفع قدمك من على الدبرياج لتصل الى "نقطة التحرك" .. وكن جاهز للتحرك فى اى وقت
اختيار مكان آمن للتوقف
- عندما تختر التوقف بجوار "الرصيف" يجب ان تختار مكان آمن .. ليس قريبا من التقاطعات او الملفات او بجوار منخفضات مثل الكبارى
- يجب ان تختار مكان لا يسبب ازعاج للآخرين
- مثلا: لا تتوقف قريبا جدا من مكان مخصص لتوقف السيارات ... يعنى مثلا لا تتوقف فى مدخل او مخرج باركينج او جراج
- يجب ان تنظر ايضا الى الجهة المقابلة للطريق ... بحيث تختار مكان بعيد عن التقاطعات فى الطريق المقابل ... يعنى مثلا لا اركن السيارة فى مكان امامه "يو تيرن" او محطة اتوبيس
- اختر مكان مستقيم وخالى من المشاكل ... وتابع المرايات .. واستخدم الإشارة المناسبة وفى الوقت المناسب توقف فى المكان المحدد ... ثم توقف بالقرب من الرصيف على قدر الإمكان بدون ان تلمس السيارة الرصيف
- بالطبع لازم تكون متابع جيدا للعلامات المرورية الموجودة على الطريق ... مثلا علامة "ممنوع الإنتظار" ... عدم التوقف بجوار منشآت عسكرية ...
التوقف فى اماكن غير آمنة يعرضك ويعرض غيرك لخطر شديد ... خصوصا فى الاماكن التى لا يستطيع الآخرين رؤيتك جيدا اثناء السير انظر الى الصورة كامثال:
طبعا الموقف ده انا شخصيا بشوفه كثير لكن فى الشوارع المزدحمة ... يعنى مثلا تكون داخل يمين وتفاجأ بسيارة متوقفة على ناصية الشارع واحيان كمان تكون متوقفة صف ثانى ... يعنى حاجة مافيهاش اى عقل ربنا يسترها مع الجميع
الغرض من استخدام الإشارات
- الإشارة تستخدم لكى يعرف الآخرين انت ناوى تعمل ايه ههههههههههههه او لكى تعطى لك فرصة لعمل مناورة على الطريق ...
تذكر ان الإشارات لا تعتبر تعليمات اجبارية لمستخدمى الطريق الآخرين ولا تعطيك الحق او الاولوية لعمل المناورة المطلوبة هههههههههههه يعنى مثلا موش عشان حضرتك استخدمت الإشارة اليمين ... بعدها على طول تدخل بالسيارة يمين هههههههه وتعمل مشكلة كبيرة.
متى تستخدم الإشارة
- توقيت استخدام الإشارة مهم جدا
- لازم تستخدم الإشارة فى توقيت جيد قبل ما تعمل اى مناورة بالسيارة وقبلها بوقت كافى .. لكى يكون واضح تماما لكل مستخدمى الطريق حولك انت ناوى تعمل ايه.
- لا يجب ان تستخدم الإشارة فى وقت مبكر جدا ... لانك بالطريقة دى ممكن السيارات التى حولك لا تهتم بك وممكن مثلا يعتقدوا انك نسيت زراع الإشارات شغال ...
- او مثلا انت ترغب فى الدخول ناحية اليمين ... وتستخدم الإشارة مبكرا قبل الشارع المطلوب بمسافة كبيرة ... وكان هناك شارع آخر قبل الشارع الذى ترغب الدخول فيه ... يبقى فى الحالة دى انت بتلخبط دماغ السائق الذى يسير خلفك ههههههههههههه هل انت سوف تدخل الشارع الاول ام الشارع الثانى ؟ ....
كيف تستخدم الإشارات
- يتم استخدام الإشارات عن طريق زراع الإشارات او عن طريق الضغط على الفرامل "عند الضغط على الفرامل يتم اضاءة نور خلف السيارة"
- نور الإشارة لازم يكون واضح جدا للسيارات الأخرى
انظر الى الصور السابقة واستخدم هذه الاساليب الموضحة على الطريق السريع والطرق الداخلية
ولكن قبل ان استخدم الإشارة يجب أن اسأل نفسى سؤال ... هل من الضرورى ان استخدم الإشارة ؟ .. متى يجب ان استخدم الإشارة ؟ ... وما هو الوقت المناسب والآمن للتحرك وعمل المناورة ؟ ..... للإجابة على هذه الأسئلة يجب ان تستخدم المرايات بشكل مناسب
وتذكر روتين عمل اى مناورة هو " المرايات ثم الإشارات ثم التحرك"يعنى انظر جيدا فى المرايات ثم اعطى الإشارة المناسبة ثم اتحرك فى الإتجاه المطلوب
استخدام الإشارات اليدوية
- الإشارات اليدوية تستخدم قبل الدخول فى الإتجاه اليمين او الشمال او تغير الحارة الى حارة اخرى.
- او المرور من سيارة اخرى
- او التوقف على جانب الطريق ... فيتم اعطاء تحذير للسيارات التى فى الخلف والسيارات القادمة من الامام ايضا.
http://www.nilemotors.net/Nile/attac...1&d=1285180710
http://www.nilemotors.net/Nile/attac...1&d=1285180746
http://www.nilemotors.net/Nile/attac...1&d=1285180777
تستخدم الإشارات اليدوية فى حالة
- تعطل إشارات السيارة الكهربية
- وطبعا احيانا تستخدم الأثنين اعتقد فى حالة انك تكون المرشد لباقى السيارات يعنى تكون سيارتك هى التى فى المقدمة عن باقى السيارات وطبعا لازم تستخدم الإشارات اليدوية فى وقت مبكر بعض الشىء مثلا خارج رحلة وترغب فى ارشاد باقى السيارات التى تسير خلفك الى الطريق الصحيح
الحالات التى لا تحتاج فيها الى استخدام الإشارات
يوجد اسباب قوية لعدم استخدام الاشارات ... لأنها لن تساعدك فى شىء او تساعد اصحاب السيارات الاخرى ... خصوصا لو كان استخدام الإشارة سوف يسبب حالة من اللبس وتلخبط السائقين الآخرين
عندما تقرر انه من الضرورى استخدام الإشارة ...
فكر اولا ...
- ما هى المسافة التى تبعدك عن التقاطع او الملف ؟
- عند ظهور سيارة اخرى مثلا فى الحارة التى ترغب الإنتقال اليها
- اثناء التوقف او السير مسافة طويلة فى الزحام وبشكل بطىء .. هل من الضرورى ان اترك نور الإشارة يظل يطفى وينور مدة طويلة "يعمل فلاش"
- تذكر اغلاق زراع الإشارات بعد الإنتهاء من المناورة المطلوبة ... فى الغالب الزراع يعود اتوماتيكيا لوضعه الطبيعى بعد الإنتهاء من المناورة ... لكن ذلك لا يمنع من التأكد
- لا يجب استخدام الإشارات عمال على بطال ... يعنى بداعى وبدون داعى ... فقط المطلوب استخدامها عند الضرورة وفى الوقت المناسب
احترس من استخدام الإشاراة الخاطئة هههههههههه يعنى مثلا تكون داخل يمين وتعطى اشارة شمال هههههههههههههه
ولكى اوضح خطورة موضوع الإشارة الخاطئة
يوم السبت الماضى كنت ذاهب الى التجمع الخامس عشان تجديد رخصة القيادة الخاصة بأخى الكبير
ولكى نوفر فى الوقت اثناء العودة قررنا الإتجاه الى طريق السويس والعودة الى مصر الجديدة تجنبا للطرق الغير ممهدة فى مدينة نصر
المهم انا ماشى فى طريق سريع والطريق فيها اكثر من حارة يعنى على الاقل 4 حارات والسيارات كلها بتجرى جامد واقل سرعة حوالى 90 كيلوا او 100
المهم اخويا قال لى: ادخل فى الفتحة الجاية يمين
قلت له ماشى: اعطيت اشارة يمين
وبعدها بثانية واحدة
قال لى: لأ خليك ماشى على طول
ههههههههههههههههههه
طبعا اللى ماشى ورايا خلاص مقرر انى داخل يمين
ومرة واحدة وجدنى ماشى على طول
وطبعا انا غلطان جامد
وتسمع احلى كلاكسات
وانا ارفع ايدى بالإعتذار
واقول لأخويا: ينفع كده
عايز تفكر ندخل من اى شارع ... نمشى على اليمين خالص ونسأل او نفكر على مهلنا ... لكن نبقى بنجرى بالعربية بسرعة جامدة ونعطى اشارة ونلخبط الناس اللى ماشية ورانا ونرجع نغير رأينا طبعا ده كلام خطر جدا جدا جدا وربنا يسترها مع الجميع
معلهش هو موضوع روتينى شوية لكن مهم جدا
تابـــــــــــــــــــع
ارجوا ان اكون وفقت
مع طيب التمنيات
اخوكم حسين غزالة
وطبعا من الخطأ انى انقل غيار فى توقيت غير مناسب
يعنى مثلا انقل غيار الرابع وانا على سرعة 60 كيلوا
او انى انقل الغيار الثالث وانا على سرعة 30 كيلوا
أرجو التوضيح للعبارة
يعنى هل سرعة 60 دى معناها إنى كان لازم أنقل الغيار إلى الرابع قبل الوصول إلى 60
ومعنى إنى أنقل الغيار الثالث وأنا على سرعة 30 كيلو معناها إن كده غلط ولا إيه بس
عاوزين نفهم الحتة دى شوية
و الله انتي بتتكلم كأنك حاسس بيا انا برضه لسة جديد في السواقة و بخاف اركب العربية بس الموضوع عاوز تدريب كده واحدة واحدة و ربنا يسهل الحال ان شاء الله المشكلة اني جبت عربية زيرو فبقي الخوف مضاعف خوف علي العربية و خوف من السواقة بس كله عاوز تدريب و ربنا يكون معانا
بسم الله الرحمن الرحيم
اللهم صل على محمد وعلى آله وصحبه أجمعين
مراجعـــــة
هههههههههههههههه ما تخافوش موش مراجعة قبل الإمتحان هههههههههههه لكن مراجعة مهم جدا جدا جدا
من كتر الواحد ما بيشوف فى شوارع المحروسة قررت اننا نراجع مع بعض مرة تانية بعض المواقف السخيفة والرخمة واللى تقدر تقول عليها كل حاجة ههههههههههههههه
المهم
ندخل فى الموضوع على طول
انظر الى الصورة التالية
من يومين شاهدت المنظر ده بجوار المنزل
سيارة تركبها احدى السيدات وطالعة على الرصيف
الحكاية ببساطة انها لم تبتعد عن الرصيف بالقدر المناسب
فى نفس الوقت السيارة بتلف بجوار الرصيف
والنتيجة ان العربية طلعت فوق الرصيف من المنتصف بالضبط
واتعلق على كده
طبعا اللى زعلنى جدا جدا
ان العربية جديدة
حتى ولو قديمة المنظر كان وحش قوى
تانى حاجة زعلت قوى لان اللى كان راكبها سيدة
ويا عينى كانت ضربة لخمة والعربية فوق الرصيف زى اللى ناشر غسيله على الحبل
وطبعا اليومين دول عبقرية الطرق اشتغلت
ويعملوا الرصيف عالى جدا
لدرجة ان لو فيه راجل كبير شوية مايقدرش يطلع فوق الرصيف او ينزل من عليه
ههههههههههههههه
المهم يا جماعة
الخلاصة : يا ريت واحنا بنلف بجوار الرصيف نبعد عنه شوية يعنى حوالى متر على الاقل عشان تلف براحتك
وكمان تلتزم بحارتك وانت بتلف اوعى تروح لحارة تانية
واوعى تتأثر بأى "متخلف" ماشى وراك مهما ضرب لك كلاكسات
اوعى تلف بسرعة عشان سعادته عمال يضرب لك كلاكسات
لف على مهلك ورجلك فوق الفرامل مستعدة
وابتعد عن الرصيف متر
والتزم بحارتك
واعطى اشارة قبل الملف بحوالى 30 متر
وهدى السرعة تدريجى بلاش المفاجآت
وتوقع ان اللى ماشى امامك سوف يتوقف هو ايضا مرة واحدة
الموقف التانى
انظر الى الصورة
الموقف ده مشكلة كبيرة جدا جدا جدا
ويتكرر يوميا
السيارة الحمراء بتلف وماشية فى حارتها ههههههههه "ده انا اللى راكبها"
ويظهر من الخلف السيارة الزرقاء واللى راكبها عامل فيها مفتح وموش عاجبه سواقتى
وعايز يعمل فيها عشر رجالة ويلف قبلى
النتيجة ايه ؟
ان السيارة الزرقاء بعد ما تدخل الدخلة الغبية دى
يظهر امامها عربية متوقفة
وبالتالى هو ايضا يتوقف غصب عنه
لكن يتوقف امامى بالضبط
يعنى سعادته عمل بلوك بعربيته امامى ... العربية واقفة الباين والقايم وكل حاجة امامى
لولا ستر ربنا قبل اى حاجة
وانى داخل بعقل
وانى رجلى فوق الفرامل جاهزة عشان المواقف المتخلفة اللى زى دى
الحمد لله رب العالمين
وقفت فى منتهى الهدوء
هههههههههههههههه
نظرت على عربية صاحبنا
وجدت انها متخبطة فى كل مكان
عرفت هو بيسوق ازاى
والغربية انه راجل كبير موش صغير
يعنى المفروض سواق قديم
الخلاصة: التزم بحارتك وانت بتلف للمرة العاشرة بقول الكلام ده ههههههههههههه ابوس ايديكم التزم بحارتك وانت بتلف اكتبها فى اغنية ههههههههههههه
دائما تلف على ضيق
بجوار الرصيف
ابتعد عن الرصيف حوالى متر
رجلك جاهزة فوق الفرامل عشان الناس اللى حواليك العباقرة
توقع انك تتوقف فى اى وقت
عينك على اللى ماشى امامك واللى ماشى امامه ... هههههه يعنى بص على بعيد وتوقع انك تتوقف فى اى وقت
توقع اى عبقرى يتحرك من خلفك ويحاول يلف قبلك ويدخل نفس الدخلة اللى فى الصورة ... الحكاية دى بتتكرر يوميا
واحد موش تعبان فى عربيته ... وبابا هايصلح له العربية لو حصل حاجة ... وفرحان بها وشايف نفسه كويس وموش عاجبه الناس اللى ماشية حواليه ... مرة واحدة يلف قبلك ويقف بالعرض امامك
او يكون الملف ضيق لا يسمح بمرور غير سيارة واحدة
ويدخل صاحبنا معاك فى نفس الحارة
وطبعا لا تعير اى انتباه للى بيضرب لك كلاكس من الخلف حتى ولو كان "صدام حسين" ههههههههههههه
الموقف التالى
انظر الى الصورة التالية
الموقف ده حصل اليوم
حاجة لا يمكن تتخيلها ابدا
شارع عمومى متكون من اربع حارات
والناس كلها بتجرى بسرعة
وتلاقى امامك السيارة الحمراء متوقفة وعايز يرجع بظهره عشان الفتحة اليمين عدت عليه
الباشا كان عايز يدخل يمين
فتوقف وعايز يرجع بظهره فى شارع عمومى والعربيات بتجرى بسرعة
انا شيفه كويس وهديت سرعتى كويس
وقررت انى لا اغير من الحارة اللى انا ماشى فيها ... لان فيه عربيات قادمة من الخلف بسرعة .. وخطر جدا انى اغير من الحارة اللى انا ماشى فيها
الخطأ فين
يظهر لك "المتخلف" اللى ماشى فى الخلف ويضرب لك كلاكسات
وطبعا هو اكثر حاجة بيشوفها امامه هى العربية التى تسير امامه فقط
يعنى "البعيد" هههههههههههه أنا آسف جدا ... لا يرى اى عربية اخرى ... وموش شايف العربية المتوقفة امامى
طبعا لما هو يضرب لك كلاكس
انت تلقائى تنظر فى المراية
وتتوقع فى نفس الوقت ان السيارة الحمراء تتحرك
وتفاجأ ان السيارة الحمراء لا تتحرك ... اقصى حاجة عملها انه شغل نور الإنتظار
طبعا تسمع احلى فرامل
وتضرب للاخ كلاكس جامد
ههههههههههههه "يا عم اتحرك" حرام عليك
غلط التوقف على الشمال وفى شارع عمومى بالشكل ده
الخلاصة: اوعى مهما كان تتوقف فى شارع عمومى سريع خصوصا فى الناحية الشمال حتى ولو الشارع اللى انت كنت عايز تدخله عدى منك
امشى 10 كيلوا وارجع تانى
احسن لك من الوقفة الغلط دى
اوعى
تفكر ترجع بظهرك او تهدى سرعتك بدون داعى عشان الشارع بتاعك عدى منك
غلط غلط غلط غلط غلط كبييييييييير جدا جدا جد
وطبعا لو انت ماشى لازم تنظر الى الامام بشكل كافى وتتوقع كل شىء
والأخ اللى ماشى وراك تعمل له حساب
ولو ضرب لك كلاكسات من هنا لبكرة اوعى تعمل حاجة خطر عشان خاطر عيونه
هو عايز يعدى منك الشارع امامه يمشى زى ما هو عايز
لكن انت اوعى تمر من اللى امامك لدرجة انك تعرض نفسك للخطر
ممنوع تغيير الحارة الى حارة اخرى ... إلا إذا كنت متأكد تماما ان الطريق آمن ... خلاف كده لو حكمت تتوقف بالسيارة مافيش مشاكل توقف وامرك لله
الموقف التالى
الموقف ده بيحصل على طول كل يوم وكل لحظة
وموش شرط يكون فى الميادين
ممكن يحصل فى اى مكان
كل المطلوب انك تشوف عربية "ميكروباص" عشان تتأكد ان اللى راكبها فى الغالب "عربجى" ومعاه رخصة ... طبعا أنا بكرر اعتذارى مرة تانية غصب عنى والله أنا آسف جدا جدا جدا
هههههههههههههههههههه
المهم
فى الصورة العربية الصفراء توقفت لأن ظهر له فى التقاطع عربيات تانية
والطبيعى ان السيارة الصفراء تمر بهدوء وعقل
يعنى الراجل ماشى صح وتمام
لكن الميكروباس موش عاجبه الحكاية دى
عايز يمر منه باى شكل
فى الوقت اللى انا هاعدى من على شمال الميكروباس والطريق سالك امامى
الحمد لله ربنا ستر
انا راكب السيارة الزرقاء
وماشى بهدوء لانى داخل على تقاطعات وميدان ... حتى ولو كان الطريق سالك كما هو ظاهر فى الصورة ... انا داخل بهدوء ورجلى جاهزة على الفرامل
واللى حصل توقعته
اول ما صاحبنا طلع "ببوز" الميكروباص امامى ... كنت ضاغط على الفرامل لانى رجلى كانت عليها اساسا وبتحكم فى سرعة العربية الحمد لله رب العالمين
طبعا صاحبنا شاف انه غلطان وقف فى مكانه بدون اى حركة
مريت منه فى سلام واستمريت فى السير بشكل طبيعى
لكن لو كانت رجلى على البنزين كان حصل ايه ؟
ابسط حاجة لو ضربت لخمة كنت ضغط بنزين ودخلت فى نص عربيته لا قدر الله
مرة تانية
الخلاصة: لازم تدخل على الميادين والتقاطعات بسرعة هادئة
ورجلك فوق الفرامل تتحكم فى سرعة العربية
وجاهز فى اى وقت للتوقف
وعينك كاشفة للامام بشكل كافى
ولو كان التقاطع فاضى ومافيش اى مشاكل ... ادخل برده بهدوء ورجلك فوق الفرامل وجاهز للتوقف فى اى وقت
اوعى تتشجع وتجرى فى التقاطعات والميادين حتى ولو كان الطريق خالى ... لازم تكون حريص وربنا يسترها مع الجميع
الموقف التالى
حصل الموقف ده الاسبوع اللى فات
وكان البطل فيه هههههههههههههه اخويه الكبير
برغم ان الراجل سواق قديم
يعنى موش اقل من 25 سنة قيادة بدون اى مشاكل والحمد لله
المهم
هو كان ماشى الساعة 1 بعد منتصف الليل هههههههههههههه زى الافلام
وبيعدى تقاطع من شارعين
عدى من الشارع الاول
وبيعدى من الشارع التانى
خرج له عربية "طايرة" وعايزة تعدى قبله
العربية اللى خرجت له ... وجد امامه رصيف وان الطريق اصبح ضيق ...
راح الزبون لف بعربيته عشان يتجنب الرصيف ... لف ناحية عربية اخويه والنتيجة اصطدام عنيف ...
عربية اخويا فيها تصليح جامد
وعربية الاخ المغامر ... طلع شغال عليها ... وكل جانب العربية من اوله الى آخره تخبيط جامد
الخلاصة: برغم ان الطريق فاضى تماما
وبرغم ان اخويا راجل خبرة قديم قوى فى السواقة
لكن كان لازم يتوقع كل شىء
على الاقل كان لازم ينور نور العربية ويطفيه عشان العربيات اللى خارجة من اى تقاطع تشوفه كويس
او يضرب كلاكس مرة او مرتين
انا عن نفسى اضرب كلاكس فى اى تقاطع مرة او مرتين قبل ما اقترب من التقاطع ...
اللى يضحك هههههههههههههههههه
انه كان راكب معايا بعد الحادث
وفى احد التقاطعات القريبة من المنزل
يقول لى: حاسب وانت داخل ههههههههههههههه هدى جامد .... اضرب كلاكس ههههههههههههههههه
يعنى كان الاول يقول لى: انت مشيك بصراحة موش عجبنى
ههههههههههههههههه
وانا اقول له: موش مهم انى امشى بسرعة او اللى ورايا يضايق منى ... المهم انى موش معطل حد واللى عايز يجرى انا تارك له الشارع يجرى فيه براحته وربنا يسترها مع الجميع
طولت عليكم معلهش
فى انتظار التواصل
عشان عايز اسمع منكم رأيكم ايه فى المغامرات دى
مع اطيب التمنيات
اخوكم حسين غزالة
متابع
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايام
تحذير وتنبيه الآخرين بوجودك
استخدام الفلاش "يعنى تنور نور السيارة وتطفيه"
او استخدام الكلاكس لتحذير الآخرين وتوضح لهم انت ناوى تعمل ايه ؟
لو حصل ورأيت السيارة القادمة بتنور لك انوار مقدمة السيارة "فلاش" .. ليس معنى ذلك ان السيارة الآخرى تسمح لك بالمرور
اذا رأيت السيارة القادمة تنور "فلاش" فى الحالة دى لازم تتأكد ان الطريق آمن للاستمرار وتتأكد تماما من اللى السيارات الاخرى ناوية
تعمله
بالنسبة لكلاكس العربية ... طبعا يفضل عدم استخدامه إلا فى الضرورة القصوى لعدم الإزعاج .. استخدم الكلاكس فقط عند الشعور بالخطر من السيارات الاخرى التى تسير بالقرب من سيارتك او لتنبيه المشاه او الدرجات البخارية او الحيوانات
ملحوظة: طبعا للاسف يوجد سائقين كثير قوى ... يستخدم الكلاكس اكثر من رأسه ... يعنى مافيش تفكير ... كل اللى بيعمله ينرفز اللى ماشى امامه ... ويفضل يضرب كلاكس زى الآلة ... عايز اللى ماشى امامه يتحرك حتى ولو هايعرض نفسه للخطر ... المهم هو يستمر فى السير ولا يتحمل اى مخاطر
عشان كده نصيحة موش جديدة ... لو صدام حسين ضرب لك كلاكس خلف سيارتك ما تعبروش ... واعتبره موش موجود ... يعنى على الاقل لا تعرض نفسك للخطر عشان هو بيضرب لك كلاكس
التحذيرات الضوئية عند الخطر
المفروض انك لا تستخدم نور الإنتظار إلا فى الضرورة القصوى
مثلا انت ماشى فى طريق سريع وحصل لك لا قدر الله اى خطر او مشاكل ولازم تتوقف فى الحال والسيارات القادمة من الخلف سريعة .. فى الحالة دى استخدم نور الإنتظار
والصح طبعا انك لا تستخدمه إلا بعد التوقف التام
لكن فى حالة الخطر ودى حالة استثنائية مسموح لك باستخدام نور الإنتظار لتنبه الآخرين .... مثلا العربية سخنت بشكل فجائى او سمعت صوت غريب او العجلة بتنام او رأيت امامك حادث فى الطريق ... فى الحالة دى مسموح لك تستخدم نور الإنتظار وانت ماشى وتهدى وتركن على جنب ثم تتوقف تماما
طبعا غير مسموح باستخدام نور الإنتظار لكى تقوم بعمل غير قانونى ويعرضك للخطر
مثلا : تتوقف فى الطريق السريع وتريد ان ترجع بالسيارة للخلف لأن فيه شارع كنت تريد الدخول فيه
يعنى تعمل مصيبة على الطريق ... وتقول ما انا منور لك نور الإنتظار اهه ........ عايز ايه تانى ؟
طبعا الكلام ده عبيط ههههههههههه
اوعى تفتكر انك عشان نورت نور الإنتظار يبقى انت فى السليم وتصرفك قانونى
تابــــــــع
فى انتظار التواصل
مع اطيب التمنيات
اخوكم حسين غزالة
السلام عليكم. الف شكر. انا حاسة اني لما اسوق كاني بحارب.خاصة اني ساكنة في شارع رئيسي. يعني يمر منه كل المواصلات للي في مدينتي. انا صورت كدا صورة. دا الب الرئيسي للاقامة للي انا ساكنة فيها. يعني بطلع و ادخل بخروج الروح 4 مرات في اليوم. هنا الشارع فاضي. بيكون اسوء في وقت خروج الموظوفين و المدارس و الكليات....
http://files03.arb-up.com/i/00277/yr5n6enc7k1k_t.jpg
http://files03.arb-up.com/i/00277/gmma0lfro4bl_t.jpg
http://files03.arb-up.com/i/00277/rbenthhfvrfk_t.jpg
تعلم القيادة فى 10 ايامكيف تدير سيارتك
تعلم التخطيط للمستقبل
واكتساب المزيد من التحكم
تحمل المسئولية
اى موقف يقابلك فى الطريق وتكون النتيجة انك تهدىء سرعتك او تغير مكانك من حارة الى حارة اخرى .. تقدر تقول على الموقف ده "خطر او مخاطر فى الطريق". ... يعنى اى موقف يعرضك او يعرض الآخرين للخطر.
على سبيل المثال:
الطريق : المنحنيات على الطريق .. التقاطعات ... الكبارى والانفاق
الطوارىء : ركن السيارة ... العاملين على الطريق
المخاطر المتحركة : المشاه و الدراجات البخارية والسائقين الآخرين
حالة الطريق : حالة الطريق والجو التى لهم تأثير على ثبات السيارة
روتين مواجهة الخطر
ههههههههههه هو العنوان غريب شوية ... والمقصود به ايه اللى لازم تعمله عند مواجهة اى مشكلة او خطر على الطريق ... الخطوات التالية لازم تحفظها زى اسمك ههههههههه وتتبعها بشكل روتينى عند مواجهة اى مشكلة على الطريق .. نفتكر مع بعض:
المرايات: افحص مكانك والسرعة للسيارات التى تسير بجوارك ... لا تنظر فقط فى المرايات ... يعنى النظر فقط موش كفاية .. لازم تنظر فى المرايات وتشعر بحاسة من عندك .. تحاول تحس وتحدد هل يوجد سيارة بجوارى او خلفى هى اللى ممكن تسبب لى مشاكل.
الإشارة: هل لو استخدمت الإشارة .. السيارات التانية هاتستفيد من الحكاية دى ؟ .... لو انت محتاج ضرورى لإستخدام الإشارة .. استخدمها فى توقيت جيد.
الموقع: اختار مكان مناسب للسير .. حارة مناسبة للسير فيها ... لو اخترت مكان مناسب للسير ... فى الحالة دى انت بتعطى فرصة للآخرين يتوقعوا انت ناوى تعمل ايه ؟
يعنى مثلا: واحد ماشى على الخط الفاصل بين حارتين ... هههههههههه طيب كيف نعرف اين يتجه صاحبنا ... هو ماشى على الخط الفاصل واحنا موش عارفين هو هايمشى على الحارة اليمين ولا الحارة الشمال ومانع باقى السيارات انها تمر منه "خوفا طبعا" من اى تصرف احمق يعرض سيارتهم للخطر.
السرعة: تهدئة السرعة وزيادة السرعة او استخدام الفرامل بدون داعى ... لو انت محتاج تزيد من سرعتك .. زود سرعتك تدريجى وبهدوء ... او انقل غيار اعلى اذا كان ذلك ضرورى.
النظر: انظر امامك جيدا ... وقيم الموقف .. وقرر انت ناوى تعمل ايه ... هل تستمر فى السير او تنتظر قليلا .
لازم تقرر ماذا انت ناوى عمله مع الإشارات او تغير المكان من حارة الى حارة او تغيير سرعتك حسب كل مشكلة تقابلك
عند النظر فى المرايات حاول تحدد سرعة ومكان السيارات التى تسير خلفك ...
فى البداية لازم المدرب يساعدك ويقرر هل الوقت مناسب مثلا لتغيير المكان من حارة الى حارة او الدخول فى احد الشوارع الجانبية او التوقف .. لو المدرب سمح لك بعمل المناورة ... هاتنفذ المطلوب منك على طول ... عشان كده لازم "اذنك" تكون مع المدرب ههههههههههههههه الكثير من المبتدئين من كثرة الخوف "مابيسمعش" اى حاجة ... المدرب بيصرخ "قف" دوس على الفرامل ... والمتعلم فى وادى تانى ههههههههههههه
اختيار المكان المناسب فى وقت مبكر .. هايساعدك فى تحذير الآخرين .. وكمان يساعدك فى الرؤية الجيدة بالنسبة لك وبالنسبة للسيارات الأخرى ...
حاول انك تنقل سيارتك فى مكان جيد قبل ما توصل للمكان اللى فيها "مخاطر".
يعنى ايه الكلام ده
تحاول انك تهدى سرعتك تدريجى قبل الوصول الى التقاطع مثلا اللى فيه مشاكل
وانك تختار الغيار المناسب للسرعة سواء كنت ناوى تهدى عربيتك والسير بطىء او زيادة السرعة والإنطلاق
وتذكر ان الفرامل تستخدم للتوقف والفتيس للسير ههههههههههههههه وانك لازم تهدى السيارة اولا ثم تنقل الفتيس الى السرعة المنخفضة بعد ذلك
وإذا كنت محتاج تغير الفتيس ... غير الفتيس بعد الإنتهاء من الفرملة او بعد ما ترفع رجلك من على الفرامل مباشرة
ملحوظة: الضغط على الفرامل والسيارة متعشقة افضل من الضغط على الفرامل وهى فى وضع المور ... فى الحالة الأولى سوف تتوقف العربية بشكل قوى وتقدر تتحكم فى سرعتك.
الدخول على التقاطعات بسرعة يعرضك للخطر ولا يتيح لك وقت كافى للرؤية وفحص الطريق جيدا
انظر على التقاطع فى وقت مبكر
لازم تكون شايف امامك بشكل كافى قبل ما تقرر الاستمرار فى السير
امنح نفسك مزيد من الوقت
الكثير من المبتدأين من كثرة الخوف فى الزحام والتقاطعات ... اكثر حاجة ينظروا اليها كبوت السيارة ههههههههه او بالكثير السيارة التى امامهم ... ولا ينظر الى اى شىء آخر ... ومرة واحدة يفاجأ بسيارة خارجة من تقاطع او تمر من جواره او اى شىء يسبب له ربكة ... كل ده بسبب ان رؤيته محدودة جدا ... مجال الرؤية عنده صغير جدا ... خايف ينظر فى المراية .. خايف ينظر امامه بشكل كافى ... خايف ينظر فوق كتفه يمين او شمال ... خايف ينظر على التقاطعات ... خايف خايف خايف ههههههههههه شغلانة ... طول ما انت لا تنظر بشكل واسع وكافى لن تكتشف المخاطر التى حولك ... وتصرفاتك كلها هاتكون رد فعل للمخاطر التى تظهر لك .... يعنى يبقى فيه عربية خارجة من التقاطع وانت مستمر فى السير ... لانك لا تراها ... كل اللى انت شايفه السيارة التى امامك فقط ... ههههههههههه
القيادة الدفاعية بشكل حاسميعنى ايه الكلام ده
- الآمان اولا وآخيرا
- لاحظ المخاطر بفعالية "يعنى خليك مصحصح" ههههههههه
- لا تتوقع من الآخرين انهم هايتصرفوا بطريقة صحيحة
- القيادة لازم تكون بحرص كبير جدا
- القيادة اخلاق يعنى لازم تحترم الآخرين ... انت موش ماشى فى الشارع لوحدك
القيادة الدفاعية تحتاج الى اكثر من موضوع التحكم فى السيارة ... يعنى الحكاية موش مسألة فين الفرامل وكيف استخدم الفتيس وهو ده الدبرياج ... هههههههههههه لأ طبعا ....
القيادة الدفاعية تحتاج الى التحكم فى مشاعرك وان تكون صبور مع الآخرين .. لازم طريقة قيادة السيارة لا تعرض الآخرين للخطر ... او انك تعمل حاجة تسبب استفزار للآخرين ... او تعمل حاجة يكون نتيجيتها رد فعل عدائى من الآخرين ... فكر جيدا فى المخاطر التى سوف تعرض نفسك فها لو فقدت السيطر والتحكم فى نفسك.
مثلا: موضوع ضرب الكلاكسات من الخلف ... الكثير من المبتدأين بيخاف كثير جدا من الحكاية دى وانا واحد منكم مازلت بخاف من ضرب الكلاكسات من الخلف
من الممكن ان يظهر اوتوبيس نقل عام خلفك ويضرب لك كلاكس عايزك تعدى تقاطع المترو بسرعة وموش فارقة معاه ارتفاع قضيب المترو ... هو راكب اوتوبيس قوى وكمان موش هايدفع اى صيانة من جيبه ههههههههه وانت غلبان تعبان فى عربيتك وعايز تعدى المطبات بهدوء عشان تحافظ على عربيتك ... هو يضرب لك كلاكس وانت يا تجرى عشان تهرب منه يا تنزل تتخانق معاه هههههههه
او يظهر لك اللى بيضرب كلاكس عمال على بطال حتى ولو الشارع زحمة
انت تنظر فى المراية عشان تشوف مين اللى بيضرب الكلاكس
وتحاول تجرى فى مكان لا يسمح لك بالجرى
ومرة واحدة تفاجأ بأن الشارع اصلا متوقف
وتسمع احلى فرامل عشان انت خايف من اللى بيضرب لك كلاكس
تابــــــــــــــــــع
مع اطيب التمنيات
اخوكم حسين غزالة
موضوع رائع
انا النهارده كان او ل درس سواقه ليا
بصراحه كان صعب جدا اكتر ما كنت متخيله بفكر ابيع العربيه هههههه
تحياتى للاستاذ حسين والسادة الاعضاء
1-باركولى علشان الحمد لله رخصت العربية خلاص وادونى ورقة بميعاد الفحص القادم ان شاءالله وسؤالى هى الورقة دى ليها لازمة يعنى لازم الصقها على زجاج العربية من الامام وهل هى فيها مخالفة مرور ولا ايه وازاى الصقها علشان مش لاقى استيكر ليها يتم لصقه وهل بتلصق من الداخل ولا الخارج وتقبلوا خالص تحياتى
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايام
ايقاف السيارة بشكل آمن يتوقف على عاملين مهمين وهما " التفكير ثم ضغط الفرامل".
المسافة الآمنة للتوقف
فأنت تحتاج الى وقت كافى للتفكير وإتخاذ القرار بمجرد ظهور اى مخاطر امامك
ثم تحتاج الى وقت كافى لكى تضغط على الفرامل لكى تتوقف السيارة فى الوقت المناسب
بدون إطالة انظر الى هذا الجدول:
فى هذا الجدول يظهر السرعة التى تسير عليها
فمثلا لو كانت السيارة تسير بسرعة حوالى 30 كيلوا
فأنت تحتاج الى الى مسافة 6 متر للتفكير
وتحتاج الى مسافة 6 متر اخرى لكى تتوقف بشكل آمن
معنى ذلك انك تحتاج الى مسافة 12 متر بينك وبين السيارة التى امامك فى حالة انك تسير بسرعة 30 كيلوا
ملحوظة: ههههههههه طبعا احنا للاسف لا نعترف بهذا الكلام ........ وبمجرد ان نرى ولو متر واحد فراغ امامك تسمع احلى كلاكسات والكل عايز يلصق للسيارة التى امامه مهما كانت سرعتك كبيرة صغيرة موش مهم.
طبعا المسافة التى تحتاجها للتوقف تتأثر بالتالى:
صحتك وقدرتك على التركيز
كنت ذاهب الى فرح يوم الجمعة وركبت مع احد السائقين واخبرنى ان سيارته اتمسكت فى الكمين من اسبوعين مع احد الاصدقاء اللى كان شارب وكان كمين الشرطة معاهم اجهزة لكشف آثار المخدارات للسائقين ههههههههههه المهم ان السائق اللى كنت راكب معاه هو كمان موش طبيعى خالص ... موش هاقول لكم انه الفرامل عنده موش موجودة اصلا هههههههههههه يعنى الإستنثاء هو انه يتوقف هههههههههه المهم ربنا ستر ووصلت المشوار على خير
حالة السيارة "الفرامل ... وقدرة السيارة على التوقف"
الكاوتش "نوع العجل وحالة الكاوتش وضغط الهواء داخل العجل"
ملحوظة: من اسبوع قررت الكشف على ضغط الهواء ... وافتكرت العجلة الاحتياطى "الاستبن" وطبعا كنت محتاج انى افضى شنطة العربية عشان ارفع الفرش واكشف على الاستبن والمفاجأة انه وجدته الاستبن مريح على الآخر ومحتاج يتنفخ كويس .... عشان كده نصيحة هامة اوعى تكسل انك تكشف على ضغط الهواء خصوصا الاستبن "العجلة الاحتياطى" ...
بالنسبة لنوع الإطارات ... طبعا يوجد انواع ممتازة .... والناس تقول بالبلدى كده كاوتش مخلى العربية واقفة على حيلها ... يعنى لما تنظر الى السيارة تجد ان الكاوتش واقف موش مريح .. وطبعا ده بيفرق فى سرعة السيارة ... الخ
بالنسبة لضغط الهواء فى الغالب بيكون ما بين رقم 28 و 30 ... يعنى فى الشتاء يتم نفخ الإطارات على 30 لأن الجو بيكون ساقع ... وفى الصيف يتم نفخ الإطارات على 28 لأن الجو اساسا بيكون حر والهواء بيتمدد داخل الإطار.
والأفضل مراجعة ضغط الهواء كل شهر او شهرين بالكثير قوى.
نوع السيارة ووزن السيارة وحمولة السيارة
يعنى العربية الملاكى غير النصف نقل غير السيارة النقل
حالة الطريق
واخيرا حالة الجو "هل الجو صافى او ممطر ... طبعا لو كان ممطر هاتحتاج وقت اكبر للتوقف"
مسافة الـ 2 ثانية للأمانخلاصة الكلام انت تحتاج الى مسافة بينك وبين السيارة التى امامك ولتوضيح المثال انظر الى الصورة التالية
اذا وصلت بعد مرور ثانيتين الى الإعلان الأزرق .. معنى ذلك انك تسير على سرعة مناسبة جدا بينك وبين السيارة التى امامك
اما اذا مر 2 ثانية وسيارتك عدت ومرت بسرعة على الاعلان الازرق بمسافة فمعنى هذا انك تسير على سرعة عالية وغير مناسبة ... يعنى المسافة التى بينك وبين السيارة التى امامك غير آمنة ولازم فى الحالة دى تخفض سرعتك شوية
انظر الى الصورة التالية
فى الصورة الاولى يظهر انه لا يفضل السير خلف السيارات النقل على مسافة قريبة
فى الصورة التالية يظهر ان المسافة كافية ومناسبة للرؤية الجيدة وكشف مخاطر الطريق والتوقف الهادىء
انظر الى الصورة التالية
فى الصورة يظهر انك يجب ان تترك مسافة كافية بينك وبين السيارات المتوقفة وتحترس خصوصا لو كان فيه سيارة صاحبها قرر انه يفتح الباب او سيارة قرر صاحبها انه يتحرك بها
طبعا اذا كان الشارع ضيق فأنت لازم تسير بسرعة اقل
والمسافة الآمنة على الاقل تكون 1 متر بينك وبين السيارة المتوقفة بجوارك
انظر الى الصورة التالية
لو كان فيه سيارة تريد المرور منك ... بدون تردد افسح لها الطريق لكى تمر فى سلام ... وتحاول تبتعد عنه على قدر الإمكان
لكن لو كان الشارع ضيق والسيارة التى خلفك تريد المرور ... فى هذه الحالة لازم بتطىء من سرعتك وتوسع للسيارة التى فى الخلف على قدر الإمكان
يعنى لا يمكن ان تتم عملية المرور فى شارع ضيق بسلام وحضرتك مصمم انك تسير بالعربية بسرعة انت كمان
ملحوظة هامة: اوعى توسع لاى عربية قادمة من الخلف إذا كان عملية المرور دى هاتعرضك للخطر ... طبعا الكلام ده لجميع الاخوة المبتدأين اللى زى حالاتى ...
يعنى مثلا الطريق بالكاد يمر فيه سيارة واحدة ... والسيارة التى تسير خلفك "صاحبها" متخلف ههههههه معلهش عايز يمر منك بأى شكل برغم ان الطريق متوقف او الطريق ضيق ... فى الحالة لا تهتم به ابدا واستمر فى السير حتى تحين الفرصة المناسبة لكى تتركه يمر بعيد عنك بسلام
طبعا لو حبيت وعملت فيها عشر رجالة .. ممكن عربيتك "تحك" فى عربية متوقفة بدون داعى .... او عربيتك لا قدر الله تحك فى عربية صاحبنا اللى عايز يمر منك ... او عربيتك تحك فى اى عربية اخرى وانت بتلف فى اى شارع جانبى ...
الخلاصة: لو الشارع ضيق استمر فى السير ولا تسمح بمرور اى سيارة منك
واخيرا افتكرت حاجة ... بالامس خرجت بالسيارة الساعة 4 وكان ميدان الحجاز فى مصر الجديدة شبه متوقف تماما وحركة السيارة "مشلولة" فى الزحام
وافتكرت التدريب الخاص بتحريك السيارة دون الحاجة الى الضغط على البنزين "فاكرين التدريب ده"
وطبعا عشان تحافظ على حركة السير البطيئة جدا جدا جدا خلف السيارة التى امامك وبدون الاحتكاك بأى سيارة بجوارك او امامك
كان لازم انى اتحرك بالطريقة دى
انك ترفع فقط رجلك من على الدبرياج خفيف قوى حتى تتحرك السيارة بشكل بطىء جدا ...
وفى حالة الرغبة فى التوقف
فأنت كل ما تحتاجه هو الضغط على الدبرياج مرة اخرى
وطبعا حفاظا على السيارة لو كان فيه فرصة انك تمور الفتيس "يعنى تضع السيارة فى وضع المور بحيث ان العربية لا تكون فى اى وضع تعشيق على اى سرعة" يكون افضل من انك تفضل ضاغط على الدبرياج والفرامل مع بعض
لو انت شايف ان السيارات متوقفة والموضوع هاياخد بعض الوقت
مور السيارة واضغط فرامل
واذا وجدت ان السيارة متوقفة فى شارع مستوى ولا تتحرك
ريح رجلك وارفعها عن الفرامل
واذا وجدت ان السيارة بتتحرك الى الخلف او الى الامام مثلا ارفع الهاند بريك ومور السيارة وريح رجلك
واذا وجدت ان السيارات التى امام "السيارة التى امامك" بدأت فى الحركة
انقل الغيار الاول وكن مستعد للحركة
يعنى لا تنتظر حتى تتحرك السيارة التى امامك
ثم تبدأ فى نقل الغيار المناسب
ثم التحرك
طبعا الكلام ده كله محتاج انك تنظر الى الامام قوى بشكل كافى لكى تكون مستعد لنقل الغيار الاول
تابـــــــــــــــــــع
مع اطيب التمنيات
اخوكم حسين غزالة