الف شكر يا ماجد على الموقع الجميل ده
اللهم صل على محمد وعلى آله وصحبه أجمعين
18 نصيحة ذكيةللسائقين المبتدأين
إذا كنت تعرضت لا قدر الله لحادث سخيف بسيارتك ... او كنت من السائقين المبتدأين ولم يمر عليك اكثر من سنتين فى قيادة السيارة هههههههه انا بقالى حوالى 5 شهور تقريبا ... المهم اقرأ النصائح التالية يمكن تكون مفيدة إن شاء الله:
1- بعد الحصول على الرخصة مباشرة... تشعر بالغربة فى السيارة ههههههه وتشعر بالخوف عندما ترى الكرسى الذى بجوارك لاول مرة خالى من الركاب ههههههههههه ... حاول تشوف حد يركب معاك عشان يشجعك ... الجميل فى الخارج يتم لصق ورقة على السيارة من الخلف تحمل حرف p والمقصود بها ان قائد السيارة "مبتدأ" ولسه جديد فى عملية القيادة .... عشان اللى العربيات اللى وراه تعمل حسابها وماتحاولش تربكه .... موش عارف الموضوع ده قانونى عندنا ولا لأ .... ههههههههههههه احنا البديل بتاعنا انك تلصق ورقة على العربية من الخلف وتكتب عليها "عفوا السيارة فى التليين" ههههههههههههه.
2- عندما تقرر انك تركب العربية لوحدك خلاص.... بعد ما تاخد حبوب الشجاعة ... حاول تمشى فى طريق انت عارفه ... طريق يكون سهل وانت عارف هاترجع البيت تانى ازاى .... يعنى ما تعملش فيها عشر رجالة وتدخل منطقة ما تخرجش منها بسهولة ... وبعدين فى البيت يعملوا اعلان "خرج ولم يعد" هههههههههههه
انا عن نفسى بجد والله العظيم اى مكان افكر اروحه ... والله ادخل على جوجل ايرث واشوف الشوارع فى المنطقة دى عاملة ايه ... وهادخل منين وهارجع منين ... بالعكس الايام دى وانا راكب مع اخويا فى اى مشوار ... بحفظ المطبات المنيلة وكمان ازاى هانروح المكان ده وهانرجع ازاى ... يمكن فى المستقبل انزل نفس المكان الله اعلم.... حتى وانا ماشى على رجلى ونازل اتمشى ... طول ما انا ماشى عمال اشوف انسب مكان لركن السيارة فين ... كده يعنى العملية اختلفت دلوقتى .
3- لما ثقتك فى نفسك تزيد ... يجب قيادة السيارة كأنك "تملك السيارة" وليس كأنك "تملك الطريق" .... يعنى موش عشان حضرتك بقيت شجاع وجرىء شوية ... خلاص انزل الشارع واعمل فيها "عشر رجالة" وانسى كل قواعد القيادة اللى تعبنا واتكلمنا فيها مع بعض .... واحاول انى اقلد الناس الكبيرة او قصدى الناس القديمة والخبرة فى موضوع القيادة .
4- يجب الالتزام بقواعد المرور ... وتاخد بالك من الآخرين ... خصوصا المشاة ... عشان ترجع البيت بالسلامة إن شاء الله
5- رد الفعل السريع لن يمنع المشاكل.... طيب ايه اللى هايمنع المشاكل ... انك زى ماقلنا قبل كده انك توفر وقت كافى لرد الفعل ... يعنى لو انت لازق للعربية اللى امامك .. بالطريقة دى مافيش وقت لرد الفعل ... ولو تارك مسافة كافية وكويسة بينك وبين العربية اللى امامك ... كده هاتوفر وقت عشان رد الفعل.
5- حاول تقود سيارتك بطريقة بسيطة وسليمة ... لن نشعر بالإعجاب عندما نراك تقود سيارتك بسرعة وفى مكان خاطىء مما يعرضك للمشاكل ... طبعا فيه شباب كثير يحب يعمل حركات ويجرى ويحاول يثبت انه سائق كفاءة ... عشان اللى راكبين معاه يقولوا عليه ده واد مية مية ... كل ده موش مهم المهم انك تسوق عربيتك بالعقل وزى ما اتعلمنا .
7- نام كويس..... خصوصا لو كنت هاتسافر بالعربية .... وحاول تأخذ فكرة عن الطريق هل فيه مشاكل ؟ ... وتأكد ان عربيتك مليانة بنزين ... قبل السفر .... والله الكلام ده انا كنت اقرأه عادى ... لكن فيه يوم خرجت فيه بدرى ولم انام جيدا خالص ... وفعلا كنت سايق العربية موش تمام ... والتركيز ضعيف جدا جدا ... يعنى عايز تغمض وتفتح تلاقى نفسك وصلت البيت .. والكلام ده موش كويس لان كثيير من المبتدأين "بيصحوا بدرى" عشان يتعلموا خصوصا يوم الجمعة ... وطبعا يوم الجمعة بيكون آخر الأسبوع ... يعنى بعد انتها اسبوع كامل من العمل ... بدل ما ينام ويرتاح فى البيت ويصحوا براحته ويروح يصلى الجمعة ... يصحوا فى الساعة السابعة صباحا وينزل وهو نايم على نفسه .... معلهش حاول تنام كويس قبل ما تسوق العربية.
فى انتظار التواصل
تابـــــع
مع اطيب التمنيات
اخوكم حسين غزالة
انا بقالي 3 سنين بس بسوق.. بصراحه اول كام مرة كنت مش مقتنع بموضوع المرايات خالص, و كانت دي المشكلة الاساسيه بالنسبالي , بس بالنسبة للسواقه نفسها بحاول ابقي هادي خالص عشان مفيش حاجه مضمونه , و ربنا يستر طريقنا جميعا
اولا متشكره جدا يا استاذ حسين على الشرح الوافي بخصوص موضوع المرايات
الصور المرفقه في الموضوع فادتني جدا
وموضوع التغلب على الخوف من السواقه مش عارفه ليييييه كنت حسه كأنه موجه لي ههههههههه وضحكني جدا موضوع البودي جارد ده
بس انا عايزه بودي جارد ييجي معايا من البيت للشغل ويرجع هو العربيه لوحده
شفت كارثه اكتر من كده :11:
انا كنت عايزه اسأل اللي لسه بيتعلموا زيي كده في موضوع الطرق الجديده ده
انا بفضل امشي في طريق محدد وثابت يعني مشيت فيه قبل كده عدة مرات كأني بحفظ الطريق حاجه ملل مش كده
يعني ساعات والدي يختار ندخل من طريق تاني على غير المعتاد وبقلق من ان انا مش عارفه الملفات واليوترن في الطريق ده فين ولسه هأكتشفها
وبفضل لو هجرب طريق جديد يكون الصبح بدري الأول وبعد كده امشي فيه في اي وقت
هو ده عادي ولا الموضوع ده زياده عندي
بسم الله الرحمن الرحيم
اللهم صل على محمد وعلى آله وصحبه أجمعين
18 نصيحة ذكية
للسائقين المبتدأين
9- الاستماع الى الكاسيت ممكن "يشتت" تفكيرك .... خصوصا لو كان عندك كاسيت فى العربية "شديد" ... وطبعا عايز تعيش معاه ... لكن لازم تحذر لأن الصوت العالى يمنعك من الاستماع الى العربيات المحيطة ... يعنى فيه ناس قديمة فى القيادة زى صاحبى كان يقول لى: انا اسمع صوت موتور العربية اللى ماشية واريا اعرف هو ماشى ازاى ... من غير ما يضرب لى كلاكس ... آخد بالى على طول.
10- احترس من الاصدقاء اللى معاك فى العربية .... انت قائد السيارة وانت المسئول ... ماتخليش حد منهم يعمل لك ربكة بدون داعى ... واحيانا فى منهم يشجعك على انك تمشى بالعربية بطريقة انت موش بتحبها ... لو كان فيها اى حد من اصحابك هايعمل لك ربكة فى العربية ... نزلوا علطول ياخد له اوتوبيس ههههههه
11- حرك عينيك على طول ... حاول تنظر على كل السيارات التى حواليك ... تنظر فى المراية الوسطى والجانبية وامامك وفوق كتفك ... لكن اوعى تحاول ترعب اللى راكبين معاك هههههههههههه يعنى موش عشان تكلمهم فى موضوع مهم ... تبطل تنظر الى الامام وبدلا من ذلك تنظر للراكبين معاك عشان تحسسهم انك واد مية مية .... ركز على الطريق حتى ولو كنت بتتكلم مع اللى جانبك ... احيانا فعلا الواحد فى الوقت اللى بيتكلم مع اللى جنبه ... مرة واحد يلاقى مشاكل امامه وهو موش مركز ...
12- لا تضع اشياء ثمينة داخل سيارتك .... هاتشجع اى حد مالوش لازمة يكسر العربية عشان يسرقها ... طبعا الواحد بيكون فرحان بالعربية وعايز يركب فيها كل حاجة جميلة ... اصبر شوية
13- حافظ على مسافة كافية ........... بينك وبين العربيات التى حولك وخصوصا لو كان امامك عربية وصاحبها مصنف "بالقائد المتهور" او "السائق الجرىء" ........ الجرىء زيادة عن اللزوم ده ممكن يعملك مشاكل جامدة جدا ... حاول تبعد عنه بقدر الإمكان ... بالنسبة لنا ... احنا كفاية علينا الميكروباص هههههههه والمينى باص
14- إذا كنت بتسوق عربيتك فى منطقة فيها مثلا على الارض مياه امطار او زيت او بنزين او ما شابه ... حاول تخف البنزين وترفع رجلك عن الدواسة ... ولا تحاول ان تضغط الفرامل ... على ما تعدى المنطقة الخطر دى. لانك لو عملت اى حركة مثلا فى شارع بجوار محطة بنزين او بجوار احدى ورش الزيت او حتى فى ملف ضيق وصعب مثلا على احدى الكبارى او الطرق السريعة ... ممكن العربية تعمل معاك حركات موش كويسة ... فى الحالة دى لازم رجلك على البنزين والفرامل تكون حساسة جدا جدا .
فى انتظار التواصل
تابــــع
مع اطيب التمنيات
اخوكم حسين غزالة
اللهم صل على محمد وعلى آله وصحبه أجمعين
18 نصيحة ذكية
للسائقين المبتدأين
15- لو كنت بتاخد دواء مهدىء ... يبقى مافيش داعى تركب عربيتك فى اليوم ده .... طبعا فيه شباب بياخدوا مهدئات من نوع تانى هههههههههههه ربنا يحفظنا ... لكن احيانا مثلا دكتور العظام او الاسنان يكتب لك مسكن قوى او مهدىء عشان استرخاء العضلات ... تضرب الدواء من هنا هههههههههههههههه هاتبقى عال خالص وانت سايق .... ربنا يسترها مع الجميع
16- احتفظ ببعض الادوات الاساسية داخل سيارتك .... انا اول يوم اشتريت العربية فيه كنت شارى شنطة بلاستيك على شكل صندوق ... واشتريت مفكات ومفاتيح بلدى ومفتاح بوجيهات و فيوزات وعلبة صغيرة فيها شوية شحم عشان كابل البطارية واسبراى منظف للكربراتير وعلبة منظف wd40 واتأكد من سلامة الكوريك ... ممكن علبة جلانس لتنظيف زجاج السيارة ... علبة ورنيش لتشميع جسم السيارة ... علبة شامبو اطفال ... الخ
17- اذا كنت هاتخرج بالعربية لوحدك ... خصوصا لو كنت "سيدة" طبعا لازم اى بنت هاتخرج بالعربية لوحدها تعمل حسابها فى:
- ان اللى فى البيت يعرفوا هى هاتخرج فين يعنى خط سيرها بالعربية هايكون ازاى
- لازم يكون معاها موبايل والشحن تمام التمام
- لازم تتأكد ان العربية مية مية ... وصيانتها لو كانت جديدة فى التوكيل
- مافيش داعى تمشى بالعربية لوحدها فى مناطق خطر او معزولة تماما
وربنا يحفظ الجميع
18- إذا حصل للعربية اى حاجة ... لا تقلق كل شىء هايكون تمام التمام ... وسوف تجد كثير من الناس الجدعان اللى هايسعدوك فى الطريق ... يعنى انا مثلا لما العجلة نامت ههههههههههههه طلعت روحى على ما غيرتها ... صاحبى قال لى ببساطة: ولا تتعب نفسك ... وقف اى تاكسى وخليه يغير لك العجلة واعطى له اللى فيه النصيب ... مافيش اى مشاكل بإذن الله. لو ركنت عربيتك على ما تشوف مساعدة ... اتأكد ان العربية متقفلة كويس ... والدركسيون معملول له "لوك" ... ويفضل انك تكلم اى صديق بالموبايل قبل ما تترك عربيتك على الطريق وربنا يحفظ الجميع
فى انتظار التواصل
مع اطيب التمنيات
اخوكم حسين غزالة
اقتباس:
13- حافظ على مسافة كافية ........... بينك وبين العربيات التى حولك وخصوصا لو كان امامك عربية وصاحبها مصنف "بالقائد المتهور" او "السائق الجرىء" ........ الجرىء زيادة عن اللزوم ده ممكن يعملك مشاكل جامدة جدا ... حاول تبعد عنه بقدر الإمكان ... بالنسبة لنا ... احنا كفاية علينا الميكروباص هههههههه والمينى باص
النقطة دي فعلا مهمة لكن الواحد ممكن يقدر يحافظ على المسافة دي من الامام لكن ازاي يحافظ من الخلف؟
ههههههههههههه
اكيد طبعا هو موش هايقدر يتحكم فى المسافة بينه وبين العربيات التى فى الخلف
لكن على الأقل مثلا: لو فيه امامه تجمع لسيارات او هايظهر امامه مجموعة من السيارات المتزاحمة
فى الحالة دى هو يهدى شوية
ومافيش داعى يحشر نفسه معاهم
يتركهم يتجمعوا مع بعض ويمشى هو فى الآخر وباقى العربيات امامه
اما لو عمل فيها عشر رجالة ههههههههههههه وراح حاشر نفسه بين مجموعة عربيات تسير امامه
يبقى هو كده بيصعبها على نفسه
لانه هايكون محاصر بالعربيات من كل ناحية
ولو ظهر له اى مشكلة لا قدر الله
وحب يتخلص منها
وخصوصا انه مبتدأ
اى حركة فى تغيير الحارات هاتعمل له مشاكل على طول
النصيحة: مافيش داعى تحشر نفسك بين مجموعة عربيات بتتسابق على الطريق
لكن لو انت ماشى عادى والعربيات وقفت فى إشارة ... انت فى الحالة دى مسير موش مخير
يعنى غصب عنك العربيات هاتكون حواليك .... عادى مافيش مشاكل
ما دام الجميع يسير ببطء فى الإشارة ... خلاص ... التزم بحارتك ... وامشى فى منتهى الهدوء وحافظ على المسافة بينك وبين اللى امامك ... وماتغيرش حارتك بدون داعى ... ولو مشيت فى الحارة الوسطى يكون احسن لك ... و اللى عايز يجرى خليه يجرى ... واللى عايز يعدى من اليمين براحته ... عايز يعدى من الشمال برده براحته
انت امشى فى الحارة الوسطى وريح دماغك من المناورات
ودى احسن حاجة انا عملتها الاسبوعين دول
لو مشيت شمال سوف اجد يوتيرن كل شوية
لو مشيت يمين سوف اجد عربيات راكنه ومتوقفة وتاكسيات وخلافه
احسن حاجة تمشى فى الحارة الوسطى بشرط عدم تغيير الحارة بدون داعى وبمنتهى الحرص
مع اطيب التمنيات
اخوكم حسين غزالة
الله عليك يأستاذ حسين وعلى كلامك الجميل اللى مفروض يتعمل موسوعة