بسم الله الرحمن الرحيم
اللهم صل على محمد وعلى آله وصحبه أجمعين
من اجل سلامتك لازم تحافظ على وجود مساحة خالية حول سيارتك
اوعى تدخل نفسك فى حصار
المساحات الخالية حول سيارتك تعطى لك فرصة للتخلص من المصادمات والمشاكل
والمساحة المطلوبة حول سيارتك يجب ان تكون فى حدود السير بالسيارة لمدة 2 ثانية او اكثر إذا استطعت
وعشان تحسب المسافة المطلوبة تقدر تقول:
مطلوب مسافة "طول السيارة" لكل 10 ميل
يعنى لو كانت سرعتك 65 كيلوا تقريبا ... يبقى فى الحالة دى لازم يكون بينك وبين السيارة اللى امامك مسافة حوالى "4 عربيات" ... يعنى شوف عربيتك طولها كام واضربه فى 4 ... يعنى تقريبا لو ملاكى يبقى حوالى 12 متر تقريبا
هههههههههههههه
طبعا صعب انك تحسب الحكاية دى والعربية بتتحرك
الخلاصة: لو كنت ماشى بسرعة 90 كيلوا تقريبا
لازم يكون بينك وبين العربية اللى امامك مسافة "طول 6 سيارة" ... لازم يكون هناك مسافة عشان سرعة رد الفعل ...
اترك مسافة كافية امامك ... خصوصا لو كان الطريق "مبلل بماء المطر"
طبعا فيه ناس كثيير هاتقول لك ... ياعم ده بيكلم على مزاجه ... ههههههه هو فيه حد يقدر يترك مسافة فاضية بالحجم ده والشوارع كلها زحمة جدا
هههههههههه
وفيه ناس تانية ... هاتقول لو تركت مسافة كبيرة امامى "هاشجع العربيات التانية" انها تدخل امامى وتسبب لى ازعاج
خلاص فيه نصيحة تانية:
حاول تمشى بسرعة اقل من المحدد قانونا "بحوالى 3 او 4 كيلوا"
يعنى مثلا لو السرعة المحدد 80 كيلوا فى الساعة
امشى انت 75 كيلوا فى الساعة
والطريقة دى موش هاتأخرك عن مشوارك جامد ولا حاجة
لكن هاتقدر تحافظ على مسافة كافية بينك وبين السيارات اللى امامك
ولو حكمت انك تسير فى اليمين ... وتترك الشارع عشان اللى عايز يجرى .. يجرى براحته ... مافيش مشاكل ... وموش هاتفرق معاك فى الوقت خالص .. صدقنى
حاول تركز مع العربيات اللى ماشية بجوارك فى الحارات الأخرى
نصيحة هامة: حاول دائما تمشى لوحدك هههههههههههه
يعنى قصدى انك تحاول تمشى بحيث ما يكونش فيه عربيات بجوارك ... يعنى من الخطأ انك تسير بنفس سرعة العربية اللى بجوارك ... كده تقفل الشارع ... لو حصل كده .. يبقى احسن لك تهدى شوية وتضبط سرعتك وتتركه يسير امامك ... المهم يكون مافيش عربيات يمينك او شمالك
لو نظرت الى الشارع سوف تجد ان السيارات تسير على شكل مجموعات او موجات من السيارات
والافضل لك انك تحاول تمشى خلف مجموعة العربيات ... تحاول انه مايبقاش فيه عربيات يمينك او شمالك.. يعنى بالبلدى كده "ماتحشرش نفسك" هههههههه فى وسط الزحمة .... خلى مجموعة العربيات تمشى امامك وانت وراهم آخر واحد ... بليد يعنى هههههههههههه خصوصا لو كنت راكب موتوسيكل مالاهاش حل تانى.
طيب إذا كنت متأكد ان اغلب الخطر يأتى من السيارات القادمة من الخلف
ربنا يحفظ الجميع
يبقى الافضل لك انك تترك مسافة كافية امامك عشان لو العربية اللى امامك وقفت فجأة تقدر تطلع منها بسهولة ....
لكن
لو انت هديت سرعتك جامد وكمان غيرت اتجاهك الى حارة تانية ... وفى نفس الوقت كان فيه عربيات فى الحارة الثانية ماشية بسرعة .. بالطريقة دى تعرض نفسك للخطر الشديد من السيارات القادمة من الخلف
انت طبعا موش عايز تكون محاصر وراء اى سيارة متوقفة فى الطريق ده من اجل سلامتك
نصيحة قديمة:
على الاقل لازم تشوف عجل السيارة اللى ماشية امامك
بالطريقة دى تقدر تحافظ على المسافة الكافية بينك وبين السيارة اللى ماشية امامك وتقدر تتصرف بسرعة لو حصل اى حاجة لا قدر الله
النصيحة الاخيرة:
اوعى تحشر نفسك فى الزحمة
بالطريقة دى طريقك إن شاء الله هايكون سالك على طول ... ومشوارك سهل بإذن الله
مع اطيب التمنيات
اخوكم حسين غزالة