اساسيات القيادة الدفاعيةالنور الأحمر ... واشارات السيارة الحمراء ... مسئولين بنسبة كبيرة عن معظم الحوادث الخطيرة ... ربنا يحفظ الجميع12- لا تمنع الآخرين من المرور
قيادة السيارة تعتبر عادة بالنسبة للكثيرين ... يعنى فيه ناس تقود سيارتها بشكل تلقائى ... وفى نفس الوقت بيفكروا فى أشياء اخرى لا تتعلق بالقيادة ...
سهل جدا انك تمشى من خلال الزحام وبدون تفكير فى "ماذا افعل لو حصل اى شىء من اى سيارة بطريقة مفاجأة ؟"
يجب عليك عدم التوقف المفاجأ بأى حال من الأحوال
هل علمت أن اغلب الحوادث تتم بالقرب من المنزل
هذه هى الحقيقة لماذا ؟
اولا: لان اغلب مشاويرنا بالقرب من المنزل
ثانيا: لانك بمجرد ما تقرب من البيت .. تبدأ بالشعور بالإسترخاء والأمان ... يعنى بالبلدى كده "انت فى حتتك" ... يبقى حد غريب يحاول يعمل معاك اى حاجة وشوف هايحصل له ايه
وتقترب من المنزل بشكل تلقائى وفى منتهى الاسترخاء والراحة واللامبالاة .. وهنا تظهر الخطورة الشديدة
اليوم على سبيل المثال
وقت الغروب
وتقاطع فى الشوارع الداخلية بجوار البيت
سائق التاكسى ماشى فى الشارع الرئيسي
وداخل على التقاطع بهدؤ لكن بدون اى مقدمات لا إضاءة ولا كلاكس "ولا حس ولا خبر"
وخرج له عربية تويوتا من التقاطع
نفس الشىء ماشى بهدؤ وبدون اى مقدمات لا نور ولا كلاكس
الاثنين معتمدين على انهم ماشيين بهدوء
هو فى الحقيقة ربنا ستر والاثنين وقفوا امام بعض بسرعة
لكن كان ايه اللى هايحصل لو واحد فيهم نور نوره
او ضرب كلاكس خفيف يقول انا موجود "برغم هدوء الشارع"
معلهش ده افضل للجميع ... ولا إيه
فكر كام مرة كنت ماشى بسرعة ... وظهرت لك عربية ماشية بسرعة اقل منك ... واول ما شفتها .. على طول تقول لنفسك موش هاخليه يعدى منى ... ازاى يعدى منى وهو ماشى بسرعة بطيئة ... وسرعته اقل منى
وتزعل وتضايق وتكبر فى دماغك ان العربية دى موش هاخليها تعدى منى
هى دى طبيعة البشر
ممكن يكون اللى عايز يعدى منك عنده ظروف ... مثلا عايز يروح المستشفى بسرعة ... عشان كده اوعى تمنع اى حد يمر منك
اجمل واحلى نصيحة
هى انك وانت تقود سيارتك تحاول دائما ألا تكون سبب فى إزعاج الآخرين على قدر المستطاع
ده علشان سلامتك الشخصية اولا
انت لا تريد سيارة خلفك يشعر قائدها بالغيظ او بالإحباط أو الزهق منك
عدم سماحك للسيارة التى فى الخلف من المرور منك ... تشعر قائد السيارة بالغضب الشديد منك بدون داعى لذلك
http://www.nilemotors.net/Nile/attac...1&d=1273397614
وتجعل السيارة التى فى الخلف تدخل امامك بطريقة غير آمنة ... "عايز يعدى منك بأى شكل حتى ولو غلط"
وطبعا ده يعرضك للخطر الشديد جدا
فأنت بهذه الطريقة تكون مشارك بشكل او بآخر فى المشكلة
لو انت موش مسئول عن الحادث بشكل قانونى ... لكنك مسئول عن الحادث بشكل "أخلاقى"
نصيحة هامة
إذا كان السائق الآخر يريد المرور منك ... ابذل كل جهدك لكى تساعده على المرور منك ... حتى ولو لزم الأمر بالتوقف على جانب الطريق ... مافيش اى مشاكل خالص ... الموضوع موش هاياخد منك ثانية ... لكن هاتمشى بسلام وهاتوصل مشوارك بالسلامة
ملحوظة هامة:
بالنسبة لشوارعنا والزحام عندنا
اوعى تحاول تعدى عربية منك على حسابك ... يعنى عشان عربية تعدى منى وفى نفس الوقت الشارع ضيق .. يبقى موش معقول عشان اوسع له الطريق اخبط اى سيارة راكنة فى الشارع
او داخل ملف والملف ضيق
عشان اوسع له الطريق ... اطلع انا على الرصيف
احنا بنقول على قدر المستطاع لو حد عايز يعدى ... خليه يعدى وهدى عربيتك ... ووسع له الطريق كمان ... لكن بدون انك تعرض نفسك للخطر
يعنى مثلا وانا ماشى ... شايف عربية ماشية بسرعة 80 كيلوا فى الحارة اللى فى النص
وانا ماشى فى الشمال بنفس السرعة
يعنى لو حبيت اعدى منه ... تقريبا هانقفل الشارع
وكمان هامشى تقريبا 100 كيلوا عشان اعدى منه
وانا اصلا موش عايز اجرى اكثر من 80
وفى المراية ورايا مجموعة عربيات عايزة تعدى
الحل ايه
الحل ببساطة ... رفعت رجلى من على البنزين
العربية هديت
والفرق بينى وبين العربية اللى ماشية فى الحارة الوسطى "الفرق كبر بشكل كويس"
على طول العربيات اللى ورايا عدت منى بسهوله ويسر
وبدون مشاكل
نصيحة
اوعى تمشى بجوار اى سيارة على نفس السرعة ... "هاتقفل الشارع بدون داعى"
الجمعة اللى فاتت زى ما قلت لكم خرج ورايا الشاب الروش المؤدب وراكب بجواره البنت الامورة وهو عايز يعمل توت فروت امامها
انا ماشى فى الشمال والشارع واسع
وكمان داخل شمال
وهو عايز يجرى ... لكن بطريقة الامامى هو اللى يوسع لى حتى ولو خبط اى حد ... المهم انه يجرى
يعنى انت لو كان فيه حتى شوية مهارة هاتعدى لو سمحت الظروف
خصوصا ان الشارع واسع جدا جدا
ده غير الكلاكسات وقلة الادب
المهم
وانا ماشى قبل موقف العاشر ... انا عارف الحتة رخمة شوية
واول ما شفت تجمعات عربيات من بعيد قوى ... حسيت ان الشارع موش ماشى كويس
وهديت سرعتى
وفعلا لمحت حاجة موش طبيعية من بعيد قوى
لكن موش عارف ايه هى
استعملت نور الإنتظار
عشان اللى ورايا يعمل حسابه
واول ما قربت فعلا وجدت سيارة نص نقل متعطلة ناحية اليمين
وخلفها 3 عربيات "لازقين" للعربية النقل .... يعنى اول العربية ما عطلت هما كمان وقفوا لا حول لهم ولا قوة
اعطيت اشارة يمين وخرجت منه الحمد لله رب العالمين فى منتهى الهدوء ومن بعيد من غير ما اقترب منه وبدون ان اسبب مشاكل للماشى من خلفى او اعمل له اى مفاجآت
وفى نفس الوقت
ما فيش ثوانى
وافاجأ بتجمع زحام آخر
وشوفت الزحام من بعيد قوى ... وبرده ما عرفش ايه السبب
اقتربت بحرص
ونورت الإنتظار
واول ما اقتربت ... شاهدت فى نص الشارع "قفص" مرمى فى نص الشارع وموش عارف كان جواه ايه
المهم انا اهدى عشان اعدى بسلام
واللى على يمينى موش عاجبه وعايز يجرى
دخل من على يمينى بسرعة جدا من غير ما يفهم حاجة
النتيجة
بووووووووووووم
راح خابط "القفص" زى لاعيبه الكورة
والعربية اللى وراه راحت خبطاه هى كمان
واللى وراه عايز يفادى القفص ... وشغلانة
وعلى ما اقتربت من المكان كنت عديت الحمد لله فى سلام
لازم تنظر للامام بشكل كبير قوى قوى على قدر المستطاع
وانا ماشى فى النفق وداخل على العبور
ظهرت امام سيارة نص نقل "موتورها مفوت" وعمالة تدخن
فى الوقت اللى قررت فيه انى اعدى منه ظهر فى المراية سيارة ميكروباص
على طول بدون تفكير قلت لنفسى مافيش مشاكل
اهدى شوية
على ما صاحبنا يعدى بالسلامة
وفعلا انا ماشى فى اليمين
والميكروباص ماشى فى الشمال زى الصاروح وعدى بالسلامة
اللى يضحك قوى
سيارة ملاكى حديثة ماشية ورايا انا
وبيضرب لى كلاكس
انا فى اليمين
والشمال فاضى
طيب اعمل لك ايه
هههههههههههههه
المهم راح ناقل نفسه شمال
ومشى على طول
انا شاورت له ... قلت له شوف ... امامى عربية مفوتة هى اللى مانعة تقدمى بسرعة
الراجل مشى بأدب وعرف انه ماشى زى الآلة "آنا آسف جدا للتعبير ده"
لأنه يشاهد السيارة التى امامه فقط
نظره موش بيجيب اكثر من كده
طبعا ده غلط كبير جدا جدا جدا
خلال ثانيتين كانت العربية المفوتة خرجت من النفق وانا عديت منها بالسلامة
وكمان انا عارف ان بعد النفق كل العربيات هاتقف غصب عنها عشان فيه مطب صناعى
يعنى مافيش داعى من الآول ان الواحد يجرى جامد وهو عارف انه هايقف بعد ثوانى
وانا ماشى فى شيراتون ... وكنت هادخل يوتيرن على الشمال وملتزم بالحارة الشمال
شاهدت ميكروباص اخضر "حكومة" بينزل ركاب .. مافيش مشكال
لكن عارفين صاحبنا كان واقف فين ؟
كان واقف فى اليوتيرن
عارفين كان واقف فين فى اليوتيرن
كان واقف على شمال اليوتيرن
طيب يا اخى انت عايز تقف فى المكان ده .. على الاقل توقف على الرصيف اليمين "بتاع اليوتيرن"
وعشان تعدى منه تفاجأ بالناس نازلة من الاوتوبيس
طبعا عشان قلنا انك لازم تدخل على الملفات فى منتها الهدوء ورجلك فوق الفرامل بتتحكم فى سرعة العربية
الحمد لله دخل وعديت بالسلامة
كان ممكن افضل واقف وراه على الشمال لحد ما يمشى
لكن العربيات ورايا كانت هاتعطل شوية
اعتقد ده كان افضل من انى اعدى من على يمين الاوتوبيس خصوصا انه كان بينزل ركاب
اول ما دخلت على الدائرى
ظهر لى عربية 128 عايزة تجرى
قلت لنفسى سيبه يجرى ... مافيش مشاكل الشارع واسع .. وانا ماشى 70 او 80 كيلوا
اوعى يسخنك
وتقول لنفسك يعنى الـ 28 التعبانة دى هاتركها تعدى منى
ضحكت .. وكبرت دماغى
بعد دقيقة واحدة
وجدت تجمع وشبه توقف للسيارات
انا شايف المنظر من بعيد قوى
هديت
واستخدم الإنتظار
وعندما اقتربت
فوجئت بسيارة 28 مافيش فيها حاجة سليمة
كل الزجاج متكسر والابواب مخبطة ... زى ما يكون ربنا يحفظ الجميع "ان العربية اتقلبت" ... وطبعا فيه عربيات تانية مخبوطة
وزجاج مرمى فى نص الشارع
قلت يا نهار ابيض
لا حول ولا قوة إلا بالله
يعنى انت شايف ان الشارع ماشى والحمد لله
والشارع واسع
ايه المشكلة لما تمشى فيه بعقل
كل اللى انت هاتوفره فى الوقت لن يزين عن 6 دقائق ده لو كان المشوار 100 كيلوا
يعنى موش محتاج تمشى 100 او 120 كيلوا
ربنا يسترها يا رب مع الجميع
بعد ما مشيت مافيش 100 او 200 متر
اسمع لك صوت "فيسسسسسسسسسسسسسسس"
ايه الصوت ده
ده عندى انا
ام الاولاد: ايه الصوت ده
قلت لها: دى عجلة نامت .. وتقريبا العجلة اللى فى الخلف
مشيت بالعربية والعجلة نايمة 10 او 20 متر عشان اخرج لاوسع مكان فى الشارع
ووقفت على اليمين
وشغلت نور الإنتظار
وخرجت المثلث
ووضع المثلث على بعد 20 متر تقريبا من العربيه
وقلت لنفسى: اول مرة فى حياتك تغير عجلة .. ربنا يستر
قلت لنفسى: هوى الصواميل الاول قبل ما ترفع العربية
طبعا انا عشان عضلات قوى ... كنت اقف على المفتاح بجسمى عشان الصواميل تفك
والحمد لله كانت بتفك
حبيت ادخل الكوريك من تحت العربية
وجدت العربية واطية قوى
قلت لنفسى : يا نهار ابيض
قلت: خلاص ركب الكوريك من عند الشكمان
الحمد لله الكوريك دخل تحت العربية
بالنظر كده قلت احسن مكان "هو الاكس اللى ماسك العجلتين"
برفع الكوريك ... لاقيته بيرفع
قلت : طيب الحمد لله ... لانى كنت خايف ان الكوريك يكون بايظ انا عمرى ما اتسخدمته من ساعة ما اشتريت العربية
غيرت العجلة
ورجعت كل حاجة مكانها
ودماغى ضرب ... من الشمس
وموش لاقى نفسى
عرفت انى "كبرت خلاص"
ام الاولاد قالت لى ما تسوقش العربية وانت تعبان كده
جابت زجاجة مياه ... وغرقت لى دماغى
حسيت ان النور رجع تانى
واكلت حتة بسكوت بالعجوة ... صحصحت شوية
ومشيت على بركة الله ووصلت البيت
لكن فضلت تعبان موش اقل من 3 ساعات
صاحبى قال لى: ولا كنت تتعب نفسك
كنت وقفت اى سواق تاكسى ... خليه يغير لك العجلة ... واعطى له اللى فيه النصيب وخلاص
قلت له : كلامك سليم مية مية
والاهم يا جماعة
لازم تتأكد من "العجلة الاستبن" .. انها مية مية
انا من شهر كشفت عليها وجدتها نايمة تماما ونفختها مضبوط .. شوف الحظ
ولازم تتأكد من ان الكوريك يعمل بكفاءة ومناسب لعربيتك
ولازم تعرف النقاط المناسبة لرفع السيارة ... يعنى اوعى ترفع من تحت "تنك البنزين مثلا"
انا كترت عليكم الكلام ... صح
اكنكم بتتفرجوا على فيلم هههههههههههههههههههههههه
ههههههههههههههههههههههههه ههه
ربنا يسترها معاكم ومعانا
وربنا يحفظ الجميع
فى انتظار التواصل
مع اطيب التمنيات
اخوكم حسين غزالة