جزاك الله خيرا سيدى الفاضل
جزاك الله خيرا سيدى الفاضل
الف شكر يا استاذ حسين ممكن اقترح عليك نفهرس المواضيع زى اللى فى الينك ده
http://www.nilemotors.net/Nile/124842-a.html
يعنى مثلا ازاى اخد ملف يبق اللينك بتاعه كذا
ازاى اطلع على الكوبرى يبقى اللينك كذا
ازاى ابص و اظبط المرايات يبقى اللينك كذا
واشكرك لرحابه صدرك و دعمك الدائم لينا
يا باشا العفو ده انت استاذنا يمكن الاستاذ كريم منير يساعدنا و المشرفين فى الموضوع ده:Oc_sun1[1]:
شكرا استفدت كتير
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايامكيف تختار الحارة المناسبة عند الدخول فى ملف
- فى الصورة يظهر اهمية الالتزام بالحارة التى تسير فيها خصوصا اثناء الملفات واليوتيرن
- فى الصورة يظهر ان السيارة الحمراء سوف تلزم المسار باللون الاحمر
- والسيارة الزرقاء تلزم المسار باللون الازرق
- طبعا اخطر حاجة انك اثناء الملف تنقل نفسك من حارة الى حارة اخرى .. النتيجة انك هاتخبط السيارة المجاورة على طول
- كمان من الحاجات اللى موش ظريفة خالص
ان السيارة الحمراء تنقل نفسها من اقصى اليمين الى اقصى الشمال عشان داخل شمال
الصح انه كان يسير مكان السيارة الزرقاء ما دام داخل شمال
لو كانت السيارة الزرقاء مستمرة فى السير الى الامام... يبقى لازم يعدى التقاطع بحرص شديد .... لانه ممكن يظهر له سيارة مثل السيارة الحمراء وتدخل امامه وتقطع عليه الطريق .... والموقف ده بيحصل كثير قوى .. انك تجد سيارة تدخل امامك من اقصى اليمين وتكون داخل شمال مثل الحادث اللى انا تعرضت له
- الموقف السابق يظهر فيه السيارة الزرقاء قادمة من طريق فرعى الى الطريق الرئيسي
- فى الحالة دى لازم على السيارة الزرقاء الدخول بسرعة مناسبة
- يعنى لازم يستغل مساحة الحارة المخصصة لزيادة السرعة التدريجية حتى ينضم الى الطريق الرئيسى بشكل مناسب
- يعنى موش معقولة يطلع من طريق فرعى الى طريق رئيسى بسرعة بطيئة ويعرض نفس للخطر
- وفى نفس الوقت لازم ينظر فى المرايات كويس ... ويراعى المنطقة العمياء اثناء الدخول على الطريق الرئيسى ... لأنه فى الحالة دى موش هايشوف السيارات المجاورة بشكل جيد "مثل السيارة الحمراء"
احيانا فى اللحظة اللى هاتدخل فيها على الطريق الرئيسى يظهر لك سيارة ماشية خلفك وتريد ان تتخطاك وتدخل قبلك على الطريق الرئيسى ... فى الحالة دى اوعى توسع له الطريق وتنزل الطريق الرئيسى بسرعة بطيئة ... خليك ملتزم الحارة التى بجوار الرصيف واستمر فى زيادة السرعة بشكل تدريجى حتى تنضم الى الطريق السريع بشكل مناسب
- وطبعا لازم تحترس من السيارات التى تركن بجوار الرصيف فى اماكن كلها ذكاء هههههههههههههه
يعنى فى الوقت اللى حضرتك بتنظر فيه على السيارات المسرعة فى الطريق الرئيسى ... تفاجىء بسيارة راكنة بجوار الرصيف فى الحارة المخصص لزيادة السرعة ههههههههههههههه
الموضوع ده بيحصل فى ثوانى
ممكن تلاقيه فى اماكن عديدة
مثلا: وانت خارج من سوق العبور وشارى "سمك" وخضار وفاكهة ومبسوط ومية مية ههههههههههه ... هاتلاقى طريق فرعى مخصص لزيادة السرعة التدريجية قبل ما تنضم الى طريق الإسماعيلية السريع
ممكن تلاقى سيارة فاكهة راكنة وبيبيع عادى خالص وموش فى دماغه ان المكان ده خطأ
وممكن تلاقى سيارة راكنة صف تانى "بتشترى" ههههههههه
مافيش مشاكل عندنا
هو ربنا الستار فى الاول والآخر
لكن احنا لازم ناخد بالنا كويس قوى
- احترس من الجدعنه الزيادة هههههههههههههههههههه
انا قصدى هنا ايه ؟
احيانا تلاقى احد المشاة مثل السيدة التى فى الصورة ترغب فى المرور
وطبعا عشان هى "جنس ناعم" تظهر الجدعنة الزيادة
وسعادتك تتوقف عشان الآنسة تعدى
ههههههههه
والنتيجة ان السيارة القادمة خلفك تخبط المارة
ليه ؟
لانك قبل ما تقوم بدور الجدع ... كان لازم تنظر فى المراية كويس قبل التوقف التام وقبل ما تسمح للمشاة بالمرور
ولو وجدت ان الطريق آمن
ممكن تشاور بإيديك للسماح للمشاة بالمرور امامك
وممكن تشاور للسيارات القادمة من الخلف بالتهدئة والحرص
- طبعا لازم تراعى الناس الكبيرة فى السن اثناء المرور امام سيارتك
لأن الناس الكبيرة موش هاتقدر تعدى امامك مثل الشباب
لازم يكون عندك صبر كفاية
الاسبوع الماضى حدث معايا موضوع خطير جدا .... بمناسبة "الناس الكبيرة"
ايه اللى حصل ؟
بتعدى تقاطع مترو ... بعد توقف فى الإشارة
المهم فى الوقت اللى بتكون العربيات بتستعد فيه للإنظلاق بعد المرور فى التقاطع بسلام
المفاجأة ... ظهور راجل كبير فى السن بيعدى الشارع ... لكن بيعدى فى اسوء مكان فى الشارع وفى صميم الزحام ... وفى احسن توقيت لإنطلاق السيارات
يعنى بيعدى فى مكان لا يتوقعه اى انسان عاقل خالص
المهم ان الراجل عشان كبير فى السن "الله يكون فى عونه"
طبعا حركة السير بطيئة
يعنى لا تتوقع انه يمشى بسرعة
وكمان الخوف الشديد
لأنه بمجرد ما شاهد السيارات قادمه فى اتجاهه ... الرجل توقف تماما فى منتصف الشارع وامام سيارتى مباشرة
طبعا كل ده فى ثوانى
انت ماشى عادى وهاتبدأ تزيد سرعتك
وماشى بالليل يعنى الرؤية موش كويسه زى ما تمشى بالنهار
ومره واحد يظهر لك انسان كبير ويتوقف امام سيارتك
يعنى على ما تتوقف بسيارتك تكون خابط الراجل ... لا قدر الله
طبعا "حدفت" بالعربية شمال على القادم من الناحية الشمال
واللى ماشى خلفك هو ايضا لا ينظر إلا امامه .... يعنى لو كان شاف الراجل الكبير متوقف امامى ... كان لازم يتوقع انى سوف اتجنب الراجل بأنى اتحرك يمين او شمال
لكن طبعا لو كانت المسافة كبيرة وتسمح بالتوقف ... اعتقد انى كنت توقف افضل والله اعلم
- اذا كان المشاة بيعدوا امامك من اليمين الى الشمال مثل الصورة ... يبقى فى الحالة دى ممكن تنتظر حتى يمر المشاة امام سيارتك فقط ... وتستمر انت فى السير على طول
- لكن لو المشاة بيعدوا امامك من اليسار الى اليمين ... يبقى لازم فى الحالة دى تنتظر حتى يطلعوا فوق الرصيف بشكل آمن ثم تستمر فى السير ... لان اللى بيعدى امامك لو كان راجل كبير او طفل ولا قدر الله "اتكعبل او وقع امام الرصيف" النتيجة هاتكون موش كويسة
طبعا من الحاجات السخيفة ... انك تسخن الموتور وتضغط بنزين شوية زيادة ... او تضرب لك كلاكس عشان تستعجل الناس وهى بتعدى امامك ... الافضل والذوق انك تصبر ثانية اوثانيتين حتى ينتهى المشاة من المرور.
معلهش هو كلام تقليدى شوية
لكن مهم من وجهة نظرى
مع اطيب التمنيات
اخوكم حسين غزالة
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايام
التعامل مع التقاطعات
الموضوع ده يا جماعة فى منتهى الاهمية والخطورة ... ندخل فى الموضوع على طول
اختيار انسب مكان لعبور التقاطع
اترك الحارة اليمنى للسيارات التى ترغب فى الدخول يمين
طبعا من الغباء الشديد جدا انك تتوقف فى التقاطع فى الحارة اليمنى الملاصقة للرصيف وتغلق الشارع المتجه الى اليمين .... ومن اشهر المتشردين فى الحركة دى سائقى الميكروباس طبعا موش كلهم ... لكن نسبة كبيرة منهم عشان يمشى متر الى الامام ... عنده استعداد يغلق الاتجاه اليمين
انظر الى الصورة
المهم من الافضل ان تستخدم الحارة الوسطى مادام عندك رغبة فى الاستمرار فى السير الى الامام ... حتى تنتهى من التقاطع
طبعا لو كان الشارع ماشى والسيارات ماشية بسلام ... مافيش مشاكل لو مشيت فى الحارة اليمنى ... المهم انك لا تغلق الاتجاه اليمين بالتوقف اثناء الإشارة
انظر الى الصورة السابقة
الموقف ده "بايخ" قوى ... وخطر جدا
وبيقابلنى كتير جدا خصوصا لما انزل "السيدة زينب" وامشى فى شوارعها الضيقة
واحسن حل هههههههههههههه للمشكلة دى ... انك تستخدم "لغة العيون" ههههههههههههه يعنى موش لازم تستخدم لغة العيون مع خطيبتك فقط
لا
لازم تستخدمها فى الموقف ده كمان
بالنسبة مثلا للسيارة الزرقاء ... قبل ما ادخل ... انظر جيدا الى سائق السيارة الحمراء ... ولما بيشوفنى ... بشاور له بإيدى كمان ... بشاور له على انى داخل فى الاتجاه ده ... وموش هامشى على طول ... لو الراجل بيفهم .. وعاقل ومهذب ... على طول بيشاور لى انه واخد باله ... وانه سوف يهدىء من سرعته قليلا علشان ادخل على طول بدون تردد
طبعا من مصلحته هو كمان انى اشاور له وافهمه انى هادخل فى الاتجاه ده
المهم لغة العيون فى الموقف ده مهمة جدا
ومهمة فى اى موقف مشابه
لدرجة انك بمجرد النظر فى عيون السائق الآخر ... هاتعرف هو ناوى يمشى فى اى اتجاه ... هايلف مع باقى العربيات ولا هايمشى على طول ... بتبص على وجهه بتعرف هو ناوى على إيه ... وما تكتفيش بالنظر الى إشارات السيارات الأخرى
موش معقول افضل انظر على كبوت العربية ههههههههههه وموش شايف اى حاجة بتحصل حواليه
بالتدريب ... تحاول تتعامل مع المواقف البايخة دى بشىء من العلم والحكمة وربك هو الستار
التعامل مع الميادين
انظر الى الصورة السابقة
يا سبحان الله
الموقف ده قابلنى وانا متجه الى العباسية ... كنت بوصل واحد صاحبى بعد العمل
المهم قلت له ايه ؟
قلت له: المرة اللى فاتت انا دخلت على الميدان ده غلط
ومشيت على مسار السيارة الحمراء
على الرغم انى كنت عايز استمر فى السير على طول ... وده كان خطأ كبير جدا ... والسبب انى موش من المنطقة ... وكانت اول مرة امشى فيها ... وصديقى طبعا غصب عنه كان يقول لى مثلا : احنا هانستمر على طول ... فكان لازم يحصل اخطاء غصب عن الواحد
المهم
قال لى: عندك حق
المرة الجاية إن شاء الله ناخد الميدان من بره ما دام احنا ماشيين على طول
وفعلا دخلت الميدان من ناحية السيارة الخضراء وعلى نفس مسارها
ودخلت الميدان فى منتهى الهدوء والامان
واستمريت فى السير عشرة على عشرة والحمد لله
طبعا لو انت ماشى على طول .. ودخلت على مسار السيارات الحمراء ... النتيجة هههههههه ان ستة آلاف عربية "هاتحدف عليك" وهاتسمع احلى كلاكسات ههههههههههههه وهاتشوف الذى منه ههههههههه
المهم
مرة تانية للتذكير
لو هاتستمر فى السير على طول اتبع السيارة الخضراء
لو هاتلف مع الميدان اتبع السيارة الحمراء
مهم جدا جدا جدا الموضوع ده
ارجو ان اكون وفقت
مع اطيب التمنيات
اخوكم حسين غزالة
السلام عليكم يا أستاذ حسين
أنا بتعلم السواقة جديد فى مدرسة و كنت متخيلة إنى بعد حصتين ثلاثة أسوق كويس لكن مش بمهارة و طبعاً جالى إحباط و خصوصاً إن أول مدربة فى المدرسة إستمرت معى حصتين فقط و كانت عصبية جداً و مش بتشرح أثناء التدريب و لكن لحسن الحظ أخدت أجازة و كملت مع مدربة أخرى كانت هادئة و متزنة و فاهمة و بفضلها و بفضل موضوعك بدأت أشعر بتحسن فى الأداء تدريجى و بعد دخولى موضوعك إكتشفت إنى كنت مستعجلة جداً و الموضوع محتاج صبر و الأكثر فهم حقيقى و لما عرفت القواعد الصحيحة و التصرف الصح فى المواقف المختلفة أعطانى الثقة بنفسى فأكثر شىء يفقد الإنسان ثقته بنفسه ويجعله يهاب شىء جديد مثل السواقة هو عدم المعرفة الصحيحة .
أشكرك شكراً جزيلاً على ما بذلته من مجهود فى هذا الموضوع و يجعله الله فى ميزان حسناتك و أدعوا الله سبحانه و تعالى أن يحفظ طريقك دائماً و أشكر أيضاً كل من ساهم فى هذا الموضوع بإضافة مفيدة
و السلام عليكم و رحمة الله و بركاته
بسم الله الرحمن الرحيم
اللهم صل على محمد وعلى آله وصحبه أجمعين
تعلم القيادة فى 10 ايام
ركز على الطريق
اليوم هانتكلم على بعض مشاكل الطريق اليومية
انظر الى الصورة السابقة
السيارة الحمراء متجهة الى اليسار ... عشان كده لازم يلتزم بالحارة الشمال
والسيارة الصفراء متجهة الى اليمين ... عشان كده لازم يلتزم بالحارة اليمين
والسيارة الزرقاء ماشية الى الامام ... عشان كده لازم يلتزم بالحارة الوسطى
الخلاصة
ما ينفعش ان الواحد يمشى فى آخر لحظة ويتحرك مثلا من اقصى اليمن الى الشمال عشان داخل شمال
او انه يتحرك من اقصى الشمال الى اليمين عشان داخل يمين
ده يبقى اسمه فوضى
وده اللى احنا كل يوم وكل ساعة بنشوفه فى شوارعنا
وده اللى بنحذر من خصوصا الاخوة المبتدئين اللى زى حالاتى
والاخطر من كده
انه حتى ولو انت ماشى سليم وفى الحارة المضبوطة بتاعتك وكل شىء تمام التمام
لازم تحترس وتتوقع انه يظهر لك "الغبى" او "المتهور" ... اللى موش عاجبه طريقة مشيك ... ويظهر لك مرة واحدة زى العمل الردى ... ويحدف عليك من اقصى الشمال او اليمين ... وعايز يدخل من امامك ... ولا يوجد عنده صبر انه ينتظر ويدخل من خلف سيارتك
الموضوع ده خطير جدا جدا
وكل يوم لازم المبتدأين والمحترفين وكل الناس تواجهه
طبعا هو عندنا زيادة شوية
بسبب قائدى الميكروباص
وقائدى التاكسيات البيضاء اللى عايزين يمشوا بالعربية "وردية" واثنين عليه قسط وعايز يلف البلد كلها فى ثوانى
وسائقى السيارات الخضراء "الميكروباص"
وسائقى السيارات "النص نقل"
دول اخطر شىء .. تقدروا تقولوا عليهم "وباء" واعوذ بالله منهم
نصيحة
اذا شوفت حد من الاشكال دى فى مرايتك
هدى سرعتك شوية
ووسع له عشان يدخل
من اسبوع تقريبا
كان ماشى خلفى سيارة ميكروباص خضراء
على طول وسعت له وقررت انى اتأخر انا شويه ... المهم يبعد عنى
والله العظيم والله العظيم
لم يمر اكثر من دقيقة واحدة
بمجرد انه مرة من جنبى
راح خابط سيارة فى الفانوس بتاعها والرفرف
ههههههههه ربنا هو الستار
لكن احنا نعتبر ماشيين فى سيرك
ولا يكفى انك بتمشى صح
لازم كمان تتوقع اخطاء الغير ... ودى موجوده فى شوارعنا بشكل كبير جدا
طبعا فى مشاكل تانية بطريق غير مباشر
وخطيرة جدا جدا جدا
مثلا
الناس اللى بتستعمل الكاسيت اثناء السيرة بالسيارة
الموضوع ده خطير جدا
فى لحظة واحدة وانت بتضبط الراديو او عايز تركب فلاشة او سى دى او شريط او اى حاجة
فى لحظة واحدة وانت بتنظر الى الكاسيت
فى ثوانى تلاقى نفسك اقتربت بشكل خطير جدا من السيارة التى امامك
والأخطر من كده لو السيارة التى امامك توقفت بشكل مفاجىء
والأخطر من كده لو انت ماشى فى شارع مزدحم ... يعنى الفرق بينك وبين السيارة التى امامك متر او اقل
يعنى مافيش فرصة للتوقف
عايز تسمع الكاسيت ... قبل ما تمشى ضبط كل حاجة
بعد ظهور تكنولوجيا الخرائط الالكترونية
وفيه ناس كثير وشباب روش ... يركب اجهز الجى بى اس
وطول ما هو ماشى عايز يضبط اختيارات الجهاز
طبعا الكلام ده غلط جامد جدا
عايز تضبط اختيارات الجهاز ... ياريت عملية التضبيط تكون قبل التحرك بالسيارة
اما الموبايل ده ... فهو كارثة حقيقية
يعنى تشوف واحد ماسك الدركسيون بيد واحدة
وباليد الثانية ماسك الموبايل
وماشى وموش فى دماغه اى حاجة ومعطل الدنيا
ده انا مرة كلمت السيارة اللى بجوارى بخصوص حاجة
فى ثانية لمست اكصدام السيارة اللى امامى
يعنى بمجرد ما بصيت يمين وبكلم السيارة اللى جنبى ... فى تانية لمست الراجل اللى امامى
ما بالك لو كنت بجرى والشارع سريع ... ومع السرعة تزيد المخاطر جدا
ضبط مرياتك كويس قوى قبل ما تمشى
يعنى مافيش داعى تفضل تضبط المرايات اثناء سير السيارة ... الكلام ده عيب وخطر
تانى حاجة لو كانت مرايات عربيتك موش كويسة او موش سليمة ... يا ريت تغيرها
وممكن تستعين بمراية "وايد" ... حجمها متوسط وبيظهر فيها كل اللى خلفك ... ومريحة جدا للمبتدأين فى القيادة ... المراية دى تقريبا فى حدود عشرين جنيه .... ومهمه جدا جدا جدا خصوصا للمبتدأين ومريحة قوى
آخر حاجة احب اقولها
ان السرعة داخل المدينة المفروض لا تزيد عن 60 كيلوا
ومعنى ان السرعة 60 كيلوا ... ان موش المقصود انك تمشى 60 كيلوا ... لأ
يعنى لو انت شايف ان الطريق مزدحم ... خلاص انزل بسرعة العربية الى 40 او اى سرعة انت شايف انها مناسبة للموقف اللى انت فيه
اخيرا
اذا كان اللى ماشى وراك "متهور"
او انت حاسس انه لازق لعربيتك
وعمال يضرب لك كلاكسات
وشايف ان امامك متر او مترين فاضيين .. وهو هايتجنن وعايز يدخل امامك
مافيش مشاكل
اول ما تظهر لك فرصة ... وسع له ... وخليه "يغور" فى داهية بعيد عنك
لكن اوعى توسع له وتعرض نفسك للخطر ... و "تزنق" نفسك فى مكان موش تمام
فيه مكان واسع هاتدخل فيه وتوسع له ... خلاص وسع له
ما فيش مكان توسع له ... ولا تعبره
واوعى تتأثر به
والموضوع ده محتاج تدريب جامد
انا عن نفسى ما زلت بنفعل
لكن بالتدريج "بكبر دماغى"
ليه ؟؟؟
لأنى اكتشفت انى لما "بتنرفز" ... واعصابى تشد بسبب اللى عمال يعمل حركات ورايا بدون داعى
كل ده بيأثر على طريقة قيادتك
ولو كنت تارك مسافة بينك وبين السيارة التى امامك
بعد النرفزة ... هاتلاقى نفسك لازق للسيارة اللى امامك ... وده غلط كبير جدا جدا
الخلاصة: حاول ما "تنرفزش" نفسك بسبب السيارات التى تسير خلفك ... خصوصا لو كنت ماشى بالسرعة القانونية وبشكل سليم ومحافظ على المسافة بينك وبين السيارة التى امامك ....لا تهتم ... وكن هادىء ...
ارجوا ان اكون وفقت
مع اطيب التمنيات
اخوكم حسين غزالة