اقتباس المشاركة الأصلية كتبت بواسطة husseinoo مشاهدة المشاركة
اللهم صل على محمد وعلى آله وصحبه أجمعين



الاخ الفاضل الاستاذ/ عصام

انا رأى الشخصى كالتالى :

1- عدم النزول فى الازدحام إلا بعد التمكن من اساسيات القيادة ... يعنى تستمر فى التدريب وبدون استعجال فى اماكن خالية وفى اوقات يكون السيارات فيها قليلة جدا
بالطريقة دى هاتاخد ثقة ممتازة

2- التدريب ثم التدريب
التدريب على الأساسيات ... نقل الغيارات .. اليوتيرن .. التقاطعات ... المطبات الصناعية ... الصعود على الكبارى .. الهبوط من على الكبارى ... التوقف على شوارع مرتفعة ثم السير مرة ثانية ... ركن السيارة ... استخدام المرايات ... الخ

لحد ما انك هاتنزل لوحدك آجلا وعاجلا
لكن النصيحة عدم الاستعجال والتدريب

مع اطيب التمنيات
اخوكم حسين غزالة
انا مع حضرتك جدا في الموضوع ده بس ده صعب يتحقق مع مدارس السواقه يعني لازم حد يكون متفرغ لك من البيت علشان يوصلك بالعربيه لمكان فاضي تتدرب فيه وده طبعاً لغاية ما تقدر تنزل لوحدك بالعربيه

انا غيرت المدرب بتاعي زي ما قلت قبل كده واول يوم كان صعب جدا واكتئاب لأني رجعت اتدرب على العربيه المانيوال بتاعة المدرسه ودوست فرامل بدل دبرياج وبطلت مني مرتين والدنيا كانت زحمه........
بس الحمدلله تاني يوم كان على عربيتي ومشيت في الزحمه المرعبه برده بس خرجت بملحوظتين من السواق الجديد
الملحوظه الاولى وارجوكم محدش يضحك انه قاللي انت (قافشه) على الدركسيون وبتلفيه بسرعه وبحده وعلشان كده العربيه بتحدف يمين او شمال بسرعه
حاولي تاخدي الموضوع بهدوء وتمسكيه بيد واحده واليد التانيه على الفتيس طبعا انا الكلام ده معجبنيش وقلتله انه في الأول صعب لأني بخاف معرفش اتحكم في الدريكسيون كويس
بس بدأت الف الدريكسيون لفه بسيطه وبهدوء يمين او شمال علشان اضبط مسار العربيه في الحاره اللي انا ماشيه فيها والحال افضل لكن مازلت مش شايفه حدود العربيه اليمين
الملحوظه التانيه
بخصوص البنزين والفرامل هو لاحظ ان انا بحرك القدم بالكامل على البنزين او على الفرامل وقاللي ان المفروض اثبت القدم او بمعنى اصح الكعب في مكان بين الدواستين واحرك بس مشط الرجل بين الدواستين وبكده ادوس خفيف بنزين وخفيف فرامل وما تطلعش فجأه زي ما كان بيحصل
مش عارفه انا حسيت ان الطريقه دي افضل وخلتني اتحكم في العربيه اكتر في الزحمه
في النهايه انا عندي شعور افضل وان فيه امل اني اتعلم هو صحيح بعد شهووووور كتير بس حالتي احسن والحمدلله
انا اسفه اذا كنت طولت عليكم بس حبيت اشاركم في الجديد وفي انتظار آرائكم وشكرا جزيلا لكم