الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة aboharf

بسم الله الرحمن الرحيم

السلام عليكم ورحمه الله وبركاته
انا اسف اتاخرت على حضراتكم شويه سامحوني ، بس انا اليوم مش حابب اتكلم في التعليم بقدر ما انا حابب اتكلم في شويه مواضيع كده تهمنا وتهم كل الناس..
اولا: احب ارحب ب Sara2001 واهلا بيكي معانا وشرفتينا
ثانيا :الى الاستاذ حسين احب اقول لحضرتك، كلامك ممتاز جدا ومعقول جدا وموزون جدا ، واحييك على تشجيعك للناس اللي عايزه تتعلم وان حضرتك بتحيي فيهم الامل من جديد وانا بشكرك على الكلام الطيب اللي حضرتك قلته.....
النهارده كما وعدت الاستاذه lobna_yaseen اني هاتكلم في موضوع قياده السيدات ...
الموضوع يا اساتذه وما فيه(وده من وجهه نظري) ان احنا عايشين في مجتمع ذكوري والمجتمع ده معظمه بينكر اي حق من حقوق المرأه واللي اعتقد من ابسطها ان المرأه تكون الى جانب الرجل في بعض المجالات والتي تتناسب مع دور المرأه في المجتمع، ،،
لايجب ان ننسى ان المرأه هي نصف المجتمع ، واذا نظرنا الى دور المرأه سنجد ان لها دورا كبيرا لايقدر بثمن ، بدايه من تكوين الاسره والتي هي نواه المجتمع بجانب الرجل بالاضافه الى توفير كل سبل الحياه الكريمه لافراد اسرتها والتي تتضمن الزوج الاولاد، وبالتالي سنجد على المرأه العبء الاكبر في الحفاظ على كيان الاسره(ايه الكلام الكبير اللي انا بقوله ده ههههههههههه)
المهم اللي انا عايز اوصله ان مافيش سيده بتفكر انها تسوق عربيه او انها يكون عندها رخصه قياده الا لحاجه واحده بس ، الا وهي توفير وسيله مواصلات ادميه ومحترمه تضمن لها سلامتها وسلامه اطفالها ان وجد و تجنيبها المضايقات الفظيعه التي تتعرض لها يوميا في حياتها ،،،، وذلك زي ما احنا شايفين الانحدار الخلاقي الرهيب الذي حدث في الشارع المصري، يعني بالعربي كده مافيش واحده ست هاتطلع رخصه او تسوق عربيه عشان تروح تاخد العربيه وتخمس بيها او تعمل بيها سباقات او تعاكس بيها خلق ربنا ، او انها زهقانه من البيت وعايزه تتمشى على الكورنيش ، تضايق في الناس ....كل اللي تريده المراه وخاصه اذا كانت امراه عامله انها تروح الشغل باحترامها وترجع باحترامها ، انها تودي الاولاد المدرسه بدون ماتكون قلقانه عليهم من تهور سواق باص المدرسه او تهور بقيه السائقين ،انها تروح السوق تشتري مايلزم البيت من اغراض وتحطهم في شنطه العربيه بدون ماتقف ساعات تحت الشمس شايله كل اغراض البيت في انتظار تاكسي ، ده لو جاء التاكسي_والمفروض ان الزوج هوا اللي يقوم بهذه الاعمال الا ان المراه تقوم بما هو فوق طاقتها بدون كلل او ملل_ انها تصون كرامتها من غير ما سواق تاكسي يعملها استجواب وهيا راكبه التاكسي (انتي منين ؟ ورايحه فين؟ واسمك؟ طب رايحه تقابلي مين .....الخ) ، انها تصون نفسها من المعاكسات الفجه من الشباب وهيا واقفه تنظر التاكسي ،وهيا راكبه الميكروباص، ان اخواتنا وبناتنا يروحوا الجامعه في وقتهم بدون تاخير وبدون مضايقات ..الخ
طيب هيا فين المشكله؟؟؟؟
وليه الناس بتبقى عارفه ان اللي سايقه دي واحد ست؟؟؟؟
وليه الستات اساسا بيسوقوا على قدهم؟؟؟
انا سبق وقلت ان السيدات مش بتوع حركات في السواقه ( ولو ان فيه القليل منهم محترف سواقه) بس الموضوع كله ان المراه دائما حريصه ، تتأنى في اتخاذ القرار،وبتفكر اكتر من مره في اللي مفروض انها تعمله،، عشان، وما بتحبش المشاكل .
يعني المراه وهيا بتسوق دايما بتمشي في المضمون وخاصا لو معاها اطفالها، ولما بتحاول تتجاوز بتدور الفكره في دماغها الاول ويمكن كمان لما تقرر التجاوز تتراجع في اخر لحظه،
الموضوع ياجماعه مش خوف او تردد الموضوع وما فيه انها
اولا: حريصه،و متأنيه
ثانيا : المراه عارفه نفسها انها الطرف الاضعف في الطريق
يعني ايه؟
لو لا قدر الله حصل معاها حادث وكان الطرف الاخر رجل وبالرغم انها ممكن تكون مش غلطانه ... تعرفوا ايه اللي هايحصل؟؟؟
طبعا عشان الاخ الراجل يبين انه مش غلطان هايدخل فيها شمال وباسلوب الصوت المرتفع (خدوهم بالصوت...)هايسب ويلعن كل
واحد كان له دخل في حصول هذه السيده على رخصه القياده وسوف يلعن اليوم اللي الستات اللي قرروا فيه ياخدوا رخصه قياده وطبعا هايعمل عليها راجل ويهلل ويفرد عضلاته ( بالرغم ان ممكن تكون المدام في البيت ممشياه على العجين....).وده غير طبعا ان كل الناس اللي معديه في الشارع هايلوموا السيده صاحبه السياره ومافيش حد هايقف في صفها، وكل واحد بكلمه ،
(ايوه ياعم طبعا مش ست يبقى لازم تعمل حادثه.....ايه اللي منزلك من البيت......مالك ومال السواقه.....مايجيش من وراكوا غير المصايب.... الخ) وطبعا كل واحد بيعوض اللي بيحصله في البيت هههههه...داغير طبعا البهدله في اقسام الشرطه اذا قرر المدعي اللجوء الى المحاضر وغيرها، وشوفوا انتوا بقى لما توصل لاقسام الشرطه!!!!!!!
فطبعا المراه بتحب دايما انها تنأى بنفسها عن كل هذه المهاترات فبتمشي على قدها وبتحسبها كويس..
الكلام ده شوفته بعيني ، واضطريت اتدخل انا واصحابي لصالح السيده لانها كانت مش غلطانه....ماعلينا
المهم واللي انا عايز اوصله ان مهما كانت السيده على درجه احترافيه في القياده فهي حريصه متانيه واعيه .. ولو راجعنا الاحصائيات هنلاقي ان المراه اقل بمراحل كثيره من الرجل في ارتكاب الحوادث واذا كانت هناك حوادث فهيا حوادث تكون خارجه عن الاراده....غير حوادث الرجل ، سرعه ، تهور، مخدرات،سباقات، .......الخ.
دي اهم الاسباب اللي بتخلي الناس تفتكر ان الستات مابيعرفوش يسوقوا،
عرفين لو فيه قوانين بجد بتنظم المرور عندنا وان كل واحد يلتزم باللي ليه واللي عليه وبقوانين المرور ،،، والله والله والله محدش فينا هايعرف ان اللي قدامه ده ست ولا راجل ....
في النهايه كل اللي بطلبه من حضراتكم سواء سيدات اورجال وخاصه الرجال (رفقا بالقوارير...)واذا اي حد شاف واحده بتسوق سيبها براحتها انت متعرفش ظروفها ايه ، واظن ان المحترف واللي واثق من نفسه والمحترم وابن الناس ،دايما متسامح وبيحترم الناس وبيقدر الظروف وده طبعا المفروض اللي يكون عليه كل الناس،
نسيب فرصه لبعض ، ونفسح الطريق لبعض ونساعد بعض ومانجيش على بعض ، واظن ان اي واحد هايعمل موقف مش كويس مع اي سيده لازم يتذكر امه واخته وبنته وزوجته وان ممكن يترد له نفس الموقف سواء بالخير او بالشر في اقرب الناس ليه....
الى الاستاذ الفاضل حسين
للاسف حضرتك الصوره مش ظاهره عندي بتاتا فبالتالي اعذرني حضرتك مش هاقدر اعلق عليها...
كمان حضرتك كنت سالت عن مسافه الامان وان حضرتك متخوف ان ممكن حد يدخل قدامك وياخد دورك ..
هاقولك على شئ ظريف ولكل اعضاء المنتدى ، بلاش مسافه الامان اللي انا قلت عليها في الزحمه وهيا الخمسه متر واللي اعرفها من خلال اني اشوف العجل الخلفي للسياره اللي قدامي..
طيب نعمل ايه؟؟؟؟؟
شوف حضرتك خلي مسافه الامان اللي بينك وبين اللي قدامك مسافه مناسبه بحيث انها تديلك الفرصه انك تتجاوز اللي قدامك لو حصل اي ظرف ،،،،
يعني حافظ على مسافه مناسبه بينك وبين اللي قدامك في حاله مثلا ان السياره اللي قدامك عطلت، تخيل بقى لو انت لازق في السياره اللي اقدامك وفجاه عطلت هتعمل ايه ؟؟؟ هاتقولي ارجع لورا وبعدين اتجاوزها.
طيب افرض ان السياره اللي وراك برضه لازقه في سيارتك .. هاتتصرف ازاي...؟؟؟
افرض ان اللي قدامك تاكسي وحضرتك مستعجل والتاكسي كل شويه يقف ينزل زباين وياخد زباين...هاتتصرف ازاي؟؟؟
فعشان كده بقول لحضرتك مش لازم مسافه امان كبيره ،
خليها مسافه امان صغيره بس في نفس الوقت تديك الفرصه انك تتجاوز السياره اللي قدامك (العطلانه )من غير ماتخبطها ومن غير ما مقدمه سيارتك تلمس مؤخره السياره اللي قدامك ،،، وطبعا الكلام ده لما نكون في الزحمه ....
يعين خليك دايما حر ودايما مخلص نفسك وماتخليش حد يزنقك عشان تعرف تتصرف وتبعد عن المشاكل وبالتالي لازم تدي لسيارتك المسافات المناسبه عشان تعرف تتحرك وتتجاوز براحتك....
كمان حضرتك ذكرت في مره انك مره في مطلع وانت بتتحرك بالعربيه في اتجاه الصعود ان العربيه بتاعه حضرتك ريحت على العربيه اللي وراك ،،، احب اطمن حضرتك ان دي مش غلطتك دي غلطه اللي وراك واللي المفروض انه مايلزقش فيك وخاصه اذا كنتوا على مطلع كوبري مثلا وان القانون بيفرض ان المسافه بين العربيات لازم تكون خمسه متر على الاقل ... وان لازم اللي ورا يفهم ان مافيش عربيه على مطلع كوبري مش هاتريح لورا والكل لازم ياخد باله من النقطه دي....
ولك سيدي ارق تحياتي
الى الاختSara2001
مش عايزك تقلقي واظن ان كلام الاستاذ حسين ربنا يباركله يارب ليكي كان له اكبر الاثر في زرع الهدوء في نفسك وكل اللي عايز اقلهولك ان لسه في البدايه وعشان كده اصبري على نفسك شويه وان المدرب اللي معاكي .. واضح انه ( بعد اذنك) مش فاهم حاجه وزي ما قلك الاستاذ حسين غيريه
الفروض يعرف انك مبتدئه ومش في مستواه يعني المفروض وهو بيعلمك انه يبدا معاكي من الصفر وانه يخلي مستواه لدرجه مستواكي ثم يبتدي يعلوا بالمستوى تدريجيا وانا عايز اقولك ان في بعض الدول لازم راغب الحصول على رخصه قياده انه يقوم بعمل 33 حصه على الاقل للوصول الى درجه التمكن من القياده ثم بعد ذلك يدخل الاختبار واذا فشل بياخد حصص بمقدار مايقرره الفاحص يعني لو عمل خمس غلطات يفرض عليه انه ياخد خمس حصص وهكذا..
المهم انتي مشكلتك بسيطه وان شاء الله بوجود الاستاذ حسين والاستاذ سعد جزاهم الله كل خير كل مشاكلك هاتتحل .
هابتدي معاكي من بكرا وهاعلمك كل حاجه خاصه بالاوتوماتيك
سامحيني لاني خلصت بنزين ومش شايف قدامي لان المساحات بايظه ههههههههه
اشوفكم بكرا على خير

اهلا بحضرتك والشرف لي بوجودي في هذا المنتدى
امنية حياتي ان الناس تفهم وجهة نظر حضرتك في أسباب سواقة السيدات لأن حضرتك شرحتها بالتفصيل ومفيش واحده اعرفها على الإطلاق سواء من الأصدقاء او الأقارب بتسوق الا لسبب جذري عندها
وبخصوص مسافة الأمان انا حاولت اعمل كده في الزحمه محدش اداني فرصه كلهم بيدوا كلاكساااااااات علشان اقرب من اللي قدامي وكمان وانا طالعه على الكوبري كانت اللي ورايا لازقه في عربيتي انا مش بعرف اتصرف ازاي لما يعملوا كده
متشكره جدا لكلام حضرتك وانا فعلا مش مستريحه للسواق وبدور على واحد تاني بس عايزه اقول لحضرتك ان كل السواقين بيفرضوا عليك السير في الزحمه بدون اي خبره وبدون سير على قواعد وكله ييجي بالممارسه يعني انا مش عارفه اذا كنت حلاقي سواق يوافق بانه يعلمني في اماكن هاديه الأول ولا لأ
وكويس والله ان في دول الدارس فيها بياخد 33 حصه لأني كل ما اطلب من المدرب التأني يفهمني ان المفوض بعد 6 حصص ابقى محترفه مش عارفه ازاي
متشكره جدا لردك وفي انتظار الدرس مع حضرتك