سلام عليكم ورحمة الله

كل سنة وانتم جميعا طيبين و عيد سعيد علينا جميعا يارب .... كلوا كحك وبسكويت على اد ماتقدروا ... اصل العيد فرحة

انا كنت عاوزة اسأل كده كام سؤال صغنتوتين:
اولا: انا امبارح مشيت بالعربية شوية قلت اوصل امى شغلها -لأ استنوا علشان ماتظنوش فيه انى بقيت تمام فى السواقة ... اعووذ بالله- انا قلت بس ازقها حبة لأدام وهى تكمل طريقها مع نفسها واهو منه امشى العربية بدل مابسخنها وهى مركونة فى الجراج واهو برده اخد دعوتين من ست الحبايب .
المهم انا كنت ماشية فى شارع وطبعا على اليمين لكن فى اخره فى منزل كوبرى ع اليمين برده وبيصب على الشارع وفجأة لقيت نفسى فى النص والعربيات من ع الجنبين عمالة بتكسر عليا ماعلينا انا فضلت مؤدبة وملتزمة بحارتى واللى بيكسر عليا بسيبه يعدى وخلاص ... المشكلة اللى اكشفتها انى لما بوقف العربية وبدوس دبرياج وفرامل بلاقى العربية وقفت وبتريح على ورا .. اول مرة مااخدتش بالى وبعدين لقيتها بتتكرر بالرغم انى المفروض ماشية فى شارع مش مطلع ولا منزل خالص ... فمش عارفة تفتكروا ده تيل فرامل ولا ايه؟؟

بس فضلت ع الحال ده العربيات من اليمين والشمال بيكسروا عليا - ناس محترمين والله وذوووووووق- بالرغم ان الشارع كان واقف يعنى اللى هو بنتحرك سنة ونقف ونتحرك ونقف وهكذا ...يعنى انا ماكنتش معطلاهم فى حاجة ولما كنت بقف والعربية بتريح كان ورايا اتوبيس هيئة عامة وهو يكلكس والعربيات تزنق عليا لغاية اما صرخت وقلت انا كده لازم هكسر حاجة فى العربية مبقتش عارفة احافظ على فوانيسى اللى قدام ولا اللى ورا ؟؟....يالله اهو يوم وعدى

ثانيا: انا بصراحة مااعرفش ميكانيكى كويس لأنى لسه جديدة فى السواقة زى ماانتم عارفين رأيكم اروح لاى ميكانيكى واجرب وانا وحظى وطبعا انتوا عارفين انى ماافهمش اى حاجة فى العربية من جوا يعنى اللى هيقول عليه هقول امين .... ولا اروح التوكيل بتاعها -مع العلم انى عربيتى على اد الحال "فيات اونو 1998" - يعنى تفتكروا مستاهلة اروح التوكيل ولا ايه؟؟

اه بالمناسبة انا طبعا قلتلكم انى دكتوراة فى كسر فوانيس العربية فالمهم اما جيت اخد العربية من الجراج لقيت باغة الفانوس اللى قدام متشدشة طبعا صرخت وهللت والسايس يقولى مش انا اللى كنت فى الوردية اصل انا جديد و اللى يقولى انا ماشفتش ... والله بجد من كترالخنقة لقيت نفسى فى عز غضبى بضحك وبقولهم هو ابويا جايبلى العربية ده علشان انا اكسر النص وانتوا تكسروا النص... وطبعا حتى لو عرفت ايه اللى حصل مش هقبل على نفسى العوض وده يعتبر افضل جراج عندنا من ناحية انه على الشارع على طول يعنى كمبتدأة زيى مش هقدر ارجع لجراج فى شارع داخلى ....

قدر الله وماشاء فعل ...