الموضوع: الوزه بقت ضره فى كل بيت مصرى -غيره النساء من الوزه

يا جماعه الخير انا لازم اقولكم الحقيقه وبالتفصيل الممل
الحقيقه انى راجل بقالى 25 سنه سواقه مع ان عمرى ما عداش ال 43 و من نصر 125 ل مازدا 323 لشاهين و بعدين دوجان و بيجو 505 و بيجو 405 و فى الاخر اتسحرت بنيسان صنى لانى شوفتها فى اليابان اثناء اقامتى هناك لمده طويله و لما رجعت مالقيتش عربيه فى مصر نفس الموديل و الشكل بتجرى فى طرق مصر و فى طرق اليابان فى نفس الوقت الا النيسان صنى و الهوندا السيفيك و بالفعل نشات علاقه خاصه بينى و بين النيسان صنى علاقه استمرت 100 شهر بالضبط المهم جت المدام فى يوم و قالتلى سمعت عن العربيه الاسبيرانزا قلتلها لا و لكن حشوفها المهم نزلت لوحدى اشوف ايه العربيه الصينى دى اللى عاجبه مراتى و رحت شوفتها بصراحه المنظر العام بتاعها كان رائع و لكنى قلت لنفسى لبس البوصه تبقى عروسه دى تلاقيها زواق من بره فيها اوبشنز ظريفه بس مش جديده موجوده فى عربيات تانيه اينعم هى كلاس تانى بس.........
اهى بس هى دى المشكله
بصراحه روحت و بالى مشغول مش عارف ليه الكلام ده كان فى اخر شهر يوليو 2006
المهم روحت و لما المدام قابلتنى قلتلها دى عربيه صينى عاديه....و كانى قلت كفر.....قالتلى على العموم انا حجزت واحده انا و ماما
عدى اللى حصل بعد كده
المهم استلمت العربيه فى ديسمبر 2006
و فضلت راكناها مش عايزه تستعملها......و فجاه طلبت منى انى استعملها بدلها فى فترة التليين..... و اركن النيسان
قلتلها ماشى و انا متافف و متضايق على الاخر
العربيه بينى و بينكوا رائعه اينعم انا بسمع صوت تخبيط فى المطبات بس على الطريق الطوالى مافيش اى صوت و ناعمه
يبقى العيب فى المطبات و لا فى العربيه و لا فى الدماغ
بصراحه و بصراحه متناهيه انا غيرت و غيرت غيره شديده و قررت قرار و كان صعب عليا انى انفذه
طلقتها طلقتها طلقتها
النيسان صنى طبعا............انا ما اقدرش استغنى عن مراتى
قابلت واحد صاحبى قلتله انا بفكر ابيع العربيه قالى و انا عندى المشترى ..... انا عربيتى موديل 98 بس ما فيهاش خدشه لانى بحافظ على عربيتى جدا جدا جدا و بصراحه انا بعتها و انا غير نادم و كل اللى حواليا مستغربين لانى ما كنتش بسيب اى بنى ادم يسوقها خالص و بنضفها بنفسى و كنت معتز بيها
و روحت البيت اخدت مفتاح الاسبيرانزا من مراتى و رحت فورا حجزت A620
طبعا المدام ذهلت بس بصراحه الاسبيرانزا لا تقاوم و لو كانت صينى ايه المشكله
المشكله فى دماغنا احنا اللى مش قادره تكون زى الدماغ الصينى و مش قادره تحصل او تواكب التطور الصينى
يا ساده غيرة الاسبيرانزا مش غيره حريمى بس..........دى حتى خلت الرجاله يغيروا