بعد صباح الخير .. يا خبراء السيارات .. وبعد السلام عليكم ورحمة الله وبركاته ..

عندى واحد صاحبي .. جايب عربيه علي الزيرو موديل 2007 .. عامله حوالي 25000 ..
فجأة العربية وقفت منه .. وبعدين دورها دارت .. وبعد شوية وقفت .. ودورها تاني دارت .. بص جوه الموتور لقي دخنة خفيفة قوى طالعة من وراء الموتور .. شاف الزيت للتأكيد أنه مش نقص زيت .. لقاه كويس قوى .. كلم المهندس بتاع التوكيل قاله وديها التوكيل ..ممكن تكون ضفيرة أو فيوز ..
راح الراجل ببساطه وهي دايره .. وداها التوكيل .. وأسمعوا الكلام ده وقولولي .. فين الصح وفين الشغل ..
قاله ( المهندس ) .. أنت ماشفت الحراره .. أصلك مشيت عليها وهي سخنة .. فكوع الرادياتير سرب الميه .. والعربية سخنت .. وبالتالي العربية عايزه وش سلندر .. وتغيير الرادياتير كمان ..
طب حد يقوللي .. مين فيكوا عنده عربيه عا الزيرو .. ولسه عاملها الصيانة اللي بتوصل أحيانا 400 جنيه في المرة الواحدة .. ولازم يخللي عينه علي مؤشر الحرارة .. طب .. العربية سخنت .. إيه السبب .. تسرب الميه علشان الرادياتير .. ده عيب صيانه وإلا عيب إيه ..
المهم مش حأطول عليكم .. رحت معاه التوكيل .. الراجل قالله .. العربية بتنفخ .. طب أزاى والعربية جايبها دايره .. قاله ما أنت مشيت عليها وهي سخنة .. طب حتعمل إيه ياباشا .. حنبعت وش السلندر للخراط علشان نشوف فيه إيه .. ولو أحتاج روديه حنعمله روديه .. وحنغير الجوانات وأحنا وحظنا .. وطبعا ما لحقناش نكلم في موضوع الرادياتير إللي عايزين يغيروه .. وهو علي فكرة غالي جدا ..
المهم السؤال ..
هل الكلام ده منطقي .. فعلا .. وإلا الناس بتشتغل صاحبي ده في التوكيل ..
ثانيا .. أمتي العربية تجيب وش سلندر أو جوانات وش السلندر
ثم يعني إيه بتنفخ .. ويعني إيه روديه .. وهل الكلام ده يؤثر علي قدرة الموتور .. ويخفض نسبة أدائه .. ويقلل قدرة العربية وسعرها ..
وهل لو حب يبيع العربية مفروض يقول للي حيشتريها أنه عمل الشغل ده فيها .. وألا الموضوع أبسط من أنه يقوله علشان ما يخوفش المشترى ..
أنا عارف أنها أسئلة كتيرة .. بس عارفين رعب العربية الزيرو .. وخصوصا لما تكون هي الأبن الوحيد لصاحبي ده ..

والسلام عليكم ورحمة الله وبركاته .. تقبلوا تحياتي ..