شحن البطارية في المنزل

**samirayad** · 05-04-2010 12:20 AM

المشاركة الأصلية كتبت بواسطة ttyy

يا سمير بيه
انا افتكر وانا فى اعدادى هندسة ان الشكل بتاع التيار المتردد كان نصه فوق والنص التانى تحت محور الx
مش زى ماهوه مرسوم كله فوق

كلامك تمام فعلا

ماهو لو تلاحظ
أنا قولت للأخ / على
أن ده منحنى جيبى لتيار متغير أحادى الوجه single phase( تم تقويمه )

وشيلنا شوية الجيوب السالبه وأتحطت فوق مع النص الموجب

لأن فيه دايودات هى اللى عملت الشكل اللى قدامك ( رقم 2 )

يعنى شيلنا الشويه اللى تحت وأتحطوا فوق بعد عملية التوحيد أو التقويم

___________________________________

على فكره كلمة التقويم

ليها معنى لغوى برضه

فولت كهربى منتج من مولد متغيرأحادى الوجه كان ماشى عوج
لفوق ولتحت

ظبطناه وقولناله أمشى عدل شويه بدايرة توحيد ( علشان يبقى عدل وثابت الى حد ما )

زى ما أنت شايف بالشكل رقم 2

**amrelsaqqa** · 05-04-2010 12:24 AM

بصوا يا رجالة

الحوار ده سهل وفعلا الباور سبلاى هيقوم بالواجب وهيشحن البطارية بس محتاج تعرف خرجه كام بالامبير بحيث ما تسيبوش مدة طويلة اكتر من اللازم ويبوظ البطارية

وقفلة الباور سبلاى عبارة عن الاخضر مع الاسود
والاسود ارضى والاصفر 12 فولت

انما بقى انا شغال في حوار تانى شبهه كدة وعايز اراءكوا معايا لانى لقيت ناس هنا ما شاء الله
وانا بالمناسبة في الفرقة التالتة هندسة الكترونيات قسم حاسبات
يعنى درست كهربا والكترونيات بتاع 3 سنين

انا فكرتى ببساطة انى مش هشحن البطارية

لا انا عايز الباور سبلاى يقوم العربية ويشغلها من غير بطارية خالص !!

هتقوللى ليه ؟ ؟
اقولك
لان فيه ناس كتير بيبقى عندها عربيات من غير بطاريات و مرفوعة او مركونة بالسنين وممكن بس يحب يدور المكنة كل فترة كدة وخلاص ( عشان يمشى الزيت و المية ويحافظ على الخراطيم والفلاتر والموتور يفضل مصحصح و و و )

يعنى تدويرة كل فترة بس فترة طويلة شوية بحيث انه ما ينفعش يستخدم بطارية عادية والا هتنام منه او تبوظ بسرعة

يعنى مثلا هيدورها كل شهر ويمكن اكتر شوية

دى اول فايدة
تانى حاجة
تخيل نفسك وقفت بالعربية والبطارية نامت والعربية اوتوماتك وحاجة زي الفل

تخيل نفسك كدة معاك باور سبلاى تطلع سلك وتحطه في اقرب فيشة تدور العربية بكل سلاسة !!

فأنا عايز اعمل ايه من الاخر

باور سبلاى يدى 12 فولت ويستحمل لحد 70 امبير او 60 او 50 على الاقل
عشان يقدر يدور المارش ويدور العربية بسهولة

بس الموضوع صعب لأن عملية وجود باور سبلاى يوفر تيار عالى زي ده مكلف جدا لو هتجيبه جاهز ده ان لقيته

فانا بفكر في ايه بقى
و هبدأ بمثال عشان اوضح :

زمان قالولنا لو عندك بطارية ( حجر ) 1.5 فولت
بتدى مثلا 100 مللى امبير
لو وصلنا حجرين توالى هنزود الجهد وهيبقى 3 فولت يوفروا برضه 100 مللى امبير

ولو وصلنااهم توازى هنزود اقصى قيمة تيار تقدر البطارية توفرها يعنى هيبقى 200 مللى امبير مع ثبات الجهد على 1.5

تمام ؟

دى الفكرة
طبعا مش هنشتغل بحجارة
هنطبق الكلام ده بالباور سبلاى بتاع الكمبيوتر

ازاى ؟

الباور سبلاى العادى الصينى مكتوب عليه انه ممكن يوفر تيار بتاع 15 امبير تحت جهد 12 فولت

طبعا الكلام ده مش شرط يكون صحيح بس هيبان بالتجربة

فالفكرة كلها مبدأيا ان ليه ما نجيبش 4 او 5 باور سبلاى ونوصلهم توااازززى (زي الحجارة في الحالة التانية ) بحيث نزود التيار يبقى 4 * 15 = 60 امبير مثلا ؟؟

وطبعا هنخلى بالنا من قطر السلك الناتج من تجميع الـ 4 باور مع بعض
لانه لازم يكون يتحمل الـ 60 امبير

عشان طبعا فيه علاقة بين مساحة مقطع السلك واقصى تيار يمر فيه ( فكرة الفيوزات )

فالمهم اناا كنت لقيت ع النت معادلة بتحسب قطر السلك المطلوب عشان يستحمل تيار معين، وبالنسبة للنحاس طلع لازم يكون حوالى 3 مللى لو60 امبير ( والسلك يكون سخن مولع قبل الانصهار بحاجة بسيطة )

فهنقول مثلا السلك يبقى 1 سم عشان يفضل شغال وبارد وزي الفل

فلازم نعمل حسابنا ان ممكن نغير كل الاسلاك بتاعت كل الباور سبلاى بأسلاك اتخن

بحيث يكون مجموع اقطار الاسلاك اللى جاية من كل وحدات الباور = 1 سم للطرف

يعنى 1 سم للموجب مع بعض ( الاسلاك الصفر ) و 1 سم للسالب مع بعض ( الاسلاك السودة )

الكلام اللى انا قلته ده كله

نظري
وعمال افكر فيه من فترة

ولسه ما طبقتش اي حاجة فيه
لان لسه هجيب الـ 4 باور سبلاى من سوق الجمعة بسعر رخيص عشان ابدأ التجارب

بس ياريت اشوف رأيكوا كدة ايه وهل انا كلامى كدة -عمليا- صح وهينفع ؟

ولو فيه اقتراحات برضه او افكار جديدة ؟

معلش طولت بس قلت لازم اشرح الفكرة بالراحة

**samirayad** · 05-04-2010 12:24 AM

المشاركة الأصلية كتبت بواسطة ttyy

انا شايف دخنه كثيفه فى شارع مضرب الرز

ياريت بعد أذنك

لا تلقى بالبنزين على الرماد
لعدم أشتعاله

فمهما يحدث فى الحوارات بين الزملاء

فلن أسمح للألاعيب الشيطانيه

بأحماء وطيس المعركه

وزى ماقال أخونا / محمد الشامى

وهي ان مفيش حاجه تستاهل ان اتنين يزعلو من بعض عشان شويه حديد :e_braces[1]: ولا ايه ياهندسه

**ttyy** · 05-04-2010 12:28 AM

الاخ الفاضل سمير -----ان بعض الظن --اثم
شارع مضرب الرز هو مسكن اخونا حمو
وانا بضحك معاه ---ان تجربته فشلت

كده بقه انا ليه حق عرب

**samirayad** · 05-04-2010 12:29 AM

الحوار ده سهل وفعلا الباور سبلاى هيقوم بالواجب وهيشحن البطارية بس محتاج تعرف خرجه كام بالامبير بحيث ما تسيبوش مدة طويلة اكتر من اللازم ويبوظ البطارية

الله ينور عليك

علشان كده كنت عاوز أشوف البيانات كويس اللى على الجهاز

**tompina** · 05-04-2010 12:31 AM

المشاركة الأصلية كتبت بواسطة mohammad_alshamy

طبقا للصوره دي , السلك الأرضي الأسود هو تاني واحد بعد السلك الأصفر

المشاركة الأصلية كتبت بواسطة mohammad_alshamy

وبعدين مفيش جمايل بين الأخوات يا اخي

والله مش عارف أقوللك إيه على الواجب اللي بتعمله معايا

المشاركة الأصلية كتبت بواسطة ttyy

يبقى فى تحسيس ومحدش يتصل بيه

شكلك ناوي على العضوية دي كمان يا باشا

المشاركة الأصلية كتبت بواسطة samirayad

ياريت بعد أذنك

لا تلقى بالبنزين على الرماد

المشاركة الأصلية كتبت بواسطة samirayad

لعدم أشتعاله

فمهما يحدث فى الحوارات بين الزملاء

فلن أسمح للألاعيب الشيطانيه

بأحماء وطيس المعركه

وزى ماقال أخونا / محمد الشامى

ياريت يا أخ علي حسني تبطل الأسلوب السخن ده في الكلام مع الباش مهندس لأنه أولا من سن والدك ثانيا أسلوب الحوار ممكن يدار بطريقة راقية عن كده ..
لو الكلام عاجبك ممكن تعلق ولو مش عاجبك ممكن تسكت .. وخدبالك إن في أعضاء كتيرقرأوا ومعلقوش لأنهم مابيحبوش المزايدة بالكدب .
كنت أتمنى يكون كلامك أهدى مش بطريقة اللي على راسه بطحة .. ومش من أول عبارة تطلع من راجل ليه تاريخه وثقله الأدبي وسطنا تهب فيه بالطريقة دي .. ومن فضلك ..
ياريت رأيك فيه يكون لنفسك وماتتحفناش بيه.

**yoko** · 05-04-2010 12:31 AM

حكايه ال٤ باور سبلاي هتبقى صعبة لإن عشان تشغله هتحتاج ٤ فيش ولو عملتهم وصله واحده الفيوز بتاع المكان هيضرب ده إزا متحرقش السلك الي في الحيطة
لكن لو ممكن يتجاب محول ونعمل باور سبلاي من الصفر بس هيكلف مبلغ وقدرة

**samirayad** · 05-04-2010 12:32 AM

المشاركة الأصلية كتبت بواسطة ttyy

الاخ الفاضل سمير -----ان بعض الظن --اثم
شارع مضرب الرز هو مسكن اخونا حمو
وانا بضحك معاه ---ان تجربته فشلت

كده بقه انا ليه حق عرب

مش عارف أاقولك أيه ياحسام

ما أنت دخلت والأمور مدخنه

فيجب أن تتدخل فى الوقت المناسب

وللأسف واضح أن دى خصله فيك

ماسك الرشاش وبتضرب على العصافير على الشجره بدون تركيز

بتخسر طلقات كتييييييييييييييييير

ونادر أوى لما تصطاد عصفوره

**aly_hosny** · 05-04-2010 12:34 AM

المشاركة الأصلية كتبت بواسطة samirayad

كلامك تمام فعلا

ماهو لو تلاحظ
أنا قولت للأخ / على
أن ده منحنى جيبى لتيار متغير أحادى الوجه single phase( تم تقويمه )

وشيلنا شوية الجيوب السالبه وأتحطت فوق مع النص الموجب

لأن فيه دايودات هى اللى عملت الشكل اللى قدامك ( رقم 2 )

يعنى شيلنا الشويه اللى تحت وأتحطوا فوق بعد عملية التوحيد أو التقويم

ما هو الناتج من العملية دي جضرتك اسمه تيار مستمر ودا ال حضرتك مش قادر تتقبله
ولسبب او لاخر بتحاول تشخصن الموضوع مع ان حضرتك لو كلفت نفسك بالبحث او بس حركت الماوس وكنت دوست على اللينك كنت هتفهم الفرق وتعرف يعني ايه متغير ويعني ايه مستمر
بس الواضح انك منشف دماغك على اني "بدرس حاجة مش فاهمها" او اني مبفهمش وكذلك راي الاخ Yoko والدكتور ال اداني المادة