الموضوع: التصادق السليم مع محرك السياره

المشاركة الأصلية كتبت بواسطة mohamed_mohsen

طب اللي أفهمه كده إن زيت فيسكو أحسن من شيل و إلا مالهاش علاقه

أنا بأكدلك برضه إن زيت شيل بيأخد وقت كبير علي ما عداد الحراره يبتدي يطلع بس يعني ممكن 4 دقائق مثلاً

القصه مش قصة شيل ولا فيسكو ولاموبيل

القصه هى قصة فرق اللزوجه على البارد من نوع لنوع ( طالما الشركه المنتجه للزيت شركه محترمه وتتمتع بسمعه طيبه فى السوق المحلى )

وححاول أبسطلك السبب على قدر ما أستطيع أنت والزملاء الأفاضل

يعنى أيه لزوجه الأول

يعنى ملمس لزج ومحسوس بين أصبعيك لمائع معين مثل زيت التزييت

إذا كلما زادت درجة اللزوجه زاد الأحساس بتخانة أو سمك الملمس للزيت


___________________________

أذا لانستطيع النكران حاليا
بأن الزيت 10w40 ( بغض النظر عن كونه من أنتاج فيسكو أو غيره )

أقل سمكا بين يديك من الزيت 20w50 وهو بارد ( برضه بغض النظر عن نوع الشركه المنتجه لهذا الزيت )

يبقى كده أتفقنا خلاص أن 20 على البارد
أسمك وأتخن من 10 على البارد

لأن ده الوضع الملموس والمنطقى مع التجربه كمان

______________________________________

نخش بأه على الدقه شويه فى هندسة التبريد والتزييت

أولا بمجرد دوارة المكنه بالمارش بيبدأ عمود الكرنك يعوم لفوق سنه بسيطه من مكان نومه على نص السبايك التحتانى


بمجرد أنه عام ................أيه اللى بيشيله

طبقة زيت خفيفه بتنحشر جوه الخلوص ده بصفه دوريه وبتستمر فى شيل عمود الكرنك طالما المكنه دايره

______________________________________

أعتقد كده أحنا متخيلين الوضع كويس

عمود الكرنك بيدور وتحت منه زيت شايله والزيت محصور بين داير ركب الكرنك وسبايك الكرنك

______________________________________________

العمود بيدور ....فبيروح لاطش أول طبقه من الزيت معاه وبيحصل أحتكاك بين لحم الكرنك وأول رشفة زيت ملمسه معاه

وطالما حصل أحتكاك ...............حصل سخونه

__________________________________________

لحد كده كويس

لو تلاحظ أن قبل كده قولت أن الزيت بيبقى عباره عن طبقات مرصوصه فوق بعضها زى الفطيره البلدى وصينية الرقاق ( كتشبيه بلدى )

_______________________________________________

وطالما العمود لطش أول طبقه ملمسه معاه من الزيت وأحتك معاها ( لأنه بيدور )
حيسخنها بسرعه
على طول الطبقه دى بتسخن اللى بعدها وهكذا

أذا

حصل تسخين على كل طبقات الزيت المرصوصه فوق بعضها زى الرقاق

أذا فرصة تشتيت الحراره وهروبها قلت لأن الحراره كناحيه فيزيائيه تاهت فى وسط طبقات الزيت الكتيره

لأن الطبقات كتير مع الزيت الأكثر لزوجه مقارنة بقرينه الأقل لزوجه

وطالما الزيت سخن بصوره أكبر مع كونه أكثر لزوجه

يبقى المكنه حتسخن بسرعه أكبر من وجود زيت أقل لزوجه بالمكنه

ده تصور بسيط عن سيناريو الأحداث

لأن الداتا والقصه اللى بتحصل
أكثر تعقيدا من هذا

مع ملاحظة أنه من ضمن وظائف الزيت

هو تبريد المحرك أيضا وليس التزييت فقط والتزليق السلس بين الأسطح المحتكه ببعضها

_____________________________________

أتعشم أكون قدرت أبين الوضع شويه للى مستغرب

ليه المكنه بتسخن أسرع مع الزيوت الأكثر لزوجه

صباح الجمال

البشمهندس سمير

استأذن حضرتك في توضيح كام نقطه كده بعد اذن حضرتك

انا سيارتي جن 2 بستعمل زيت شل الترا 10000 كم
ولكن بغيره مع الفلتر دائما بالكتير اوي على 8500 او احيانا 7500 كم
وذلك باحساس مني بأن كتير اوي 10000 كم وكمان بشوف ده من شكل الزيت ولونه وانا عارف انه لازم يبقى لونه اسود داكن لانه كده فعلا بيقوم بوظائفه

حاليا عربيتي بقالها معايا سنتين من وقت ماشتريتها زيرو ولكن في حاجه بتحصل

اول لما بغير الزيت بيبقى الزيت فوق العلامه بحاجه بسيطه وذلك لاني دايما كل ماأغيره بغير الفلتر معاه فيقوم الفني بوضع الجالون الاربعه لتر بالكامل

ولكن بعد حوالي 2000 كم او اقل قليلا بلاقي الزيت اصبح تحت علامة الماكسيمم او عليها تماما ويثبت على هذا الوضع حتى وقت التغيير

اسألتي كالتالي

اولا هل يوجد افضل من شل الترا 10000 كم لسيارتي كنوع زيت وكعدد كيلومترات ؟ اي تخليقي او معدني اقصد وياريت تقوللي نوع بالاسم عشان اعرفه تحديدا لو شل مش كويس ؟
ثانيا ليه الزيت بيقل الشويه دول فقط ؟
ثالثا منين اعرف ان الموتور بدأت كفائته هتقل قبل انه ياكل زيت والكلام الكبير اللي بقلق منه ده ؟
رابعا هل الزيت ال 10000 فعلا تغييري ليه بدري كده صح ولا غلط ؟

اتمنى الاجابه
ولكم مني جزيل الشكر

بارك الله فيكم