الموضوع: الموتور بينقص زيت

لو العربيه معاديه 120000 كيلو يبقى انت محتاج تعمل طقم شنبر اول علامه ليه انه ينقص الزيت حوالى كيلو لكل 2000 الى 3000 كيلو و بعد كده المعدل بيزيد دى اول مرحله و بدون خروج دخان من الشكمان تانى مرحله زياده نقصان الزيت بصوره اكبر و خروج دخان بس بسيط من الشكمان و الرحله التالته خروج الدخان بصوره واضحه و مستمره

لو سمحتقولى عربيتك عامله كام كيلو بالظبط و نوعها ايه لكن عامه التكلفه بتكون طقم الشنبر يكون يابانى مهما كان نوع عربيتك لان تحمله شديد و ده بيعمل فى رنج 130 ج الى 200 حسب التاجر اللى حتلاقيها عنده و بعد كده جوانتان (وش سلندر \و غطاء تكيهات )
و اولسيلات ( الكامه اللى فوق \ و اى اولسيل يقبلكعلى السكه) و كاوتش صمام دول سعرهم على حسب نوع العربيه يعنى المتوسط 200ج
و تعمل روديه للصمامات علشان النظافه و البنزين تقريبا 60 الى 80 ج
و تقفل الموتور بسيلكون عظم على الجوانات ابرو امريكى 35ج الى 50 ج
بس اهم شىء النظافه انا عملت كل هذا لعربيتى و كله تمام
و يتم وضع البستم و هو غرقان فى زيت خروع علشان بيتمتع بلزوجه و زفلطه عاليه و مش بيجرح الشوميزو بركز على النظافه و غسيل كل شىء كويس قبل تركيبه لان ممكن تخلص الحكايه على خير و تنساها تماما و ممكن تفضل فى مشاكل لا حصر لها من سخونيه موتور و تسريب زيت و زياده فى استهلاك البنزين بصوره كبيره
الحكايه بتأخد وقت كبيره يومين بس فى خلال اليومين تفضل امام العربيه متتنقلش الا لما يقفل و تكون قاعد على ايده فى كل قطعه يركبها علشان ماتندمشى مع وجود ثقه بينك و بين الميكانيكى
و تبقى اعمل نظافه للى بيقبلك فى السكه ايدل
و حساسات و كارتيره زيت الموتور
و يفضل تغير زيت الفتيس بالمره
و تشحم الكوبلن بالمره و تضغط على بيض المقصات بالمره و تظبط زوايا و تشحم و تغسل صليبه الدريكسيون و تغير جميع الفلاتر و تغير زيت الفرامل و ترجليشها امامى و خلفى و تفرغ الهوا من الدايره

انا مش بكبر الموضوع لكن ده والله اللى انا عملته بايدى و بمعاونه صنايعى معى
بس هو ده الصح علشان متفكرش تانى فيها و بكدا تقدر تأخد العربيه الى اى مشوار بدون قلق و خوف من اى عطل بمعنى اصح اكنك راكب عربيه جديده المنطق و العقل بيقول مدام حتفك يبقى كله بالمره يتم الكشف عليه و يتنظف
اسف ليسه قارء نوع عربيتك على ما ظن نوبيرا 2003 نفس نوع عربيتى و نفس الموديل كده

حقيقى فعلا خطة ممتازة ..هاعملها عندى ان شاء الله ..وكنت عايز اعرف أكثر عند موضوع الروديه ده...المهم بقى أداء العربية بعد الخطوات دى -زى ما حضرتك وصفت- عامل ايه ...؟ زى قبل كده ولا أحسن ولا اقل؟؟؟ من حيث صوت الموتور ..؟ السحب ..نقص الزيت على السرعات العالية بعد ال 120 مثلا..؟ وايه افضل زيت بعد طقم الشنبر ..خفيف 40 مثلا ولا درجتين 20-40 او 20-50 ولا احادى 50 او 40 .. ؟؟؟ وحاجة مهمة جدا جدا ..وهى التليين ..خدت مشوار طوالى ولا مشيت فى البلد عادى ..؟؟ ولينت كام كيلو..؟ وعلى سرعة كام...وجبت الخامس ولا آخرها الرابع..؟ واقصى سرعة فى التليين كام ؟...ولو اى ملاحظات للإفادة ...معلش الأسئلة كثييير بس انا فعلا قلقان من القصة دى وعايز اعملها بمنتهى الدقة ..علشان ماتصدمش لا قدر الله بعد طقم الشنبر ..جزاك الله خيرا مقدما وجزاك الله خيرا على المعلومات الجميلة المفيدة ...بالمناسبة السيارة رينو 9 موديل 86

ابو عبد الله