الحمد لله عربيتى من السهل عمل حاجات كتيرة فيها و عمرى ما باسيبها لحد نهائى و لا حتى يسوقها و عندى الجراج فى البيت الحمد لله فباشتغل براحتى حتى لما جيت رشيتها و عملتلها سمكرة ما سبتهاش يوم رحت للسمكرى و جبت الواد بتاع الدوكو عندى فى البيت جهز العربية و فكيت كل حاجة فيها بايدى و بعدها طلعنا على الكابينة خميس جمعة سبت خلص الموضوع
و الصيانات باعملها بنفسى باغير الزيت و الفلتر و فلتر الهوا و البوجيهات و فلتر البنزين كله تقليدى و سهل
حتى زيت الفرامل و الدبرياج باسحبهم بحقنة دوريا و بازودهم و الردياتير بافك خراطيمه و انزل ميته و اضرب فيه الخرطوم فى البيت بردك و البطارية جافة فمابازورش بتوع البطاريات
حتى الكوتش جبت منفاخ و عداد ضغط و باراجع عليه بنفسى
بس باروح للميكانيكى فى شغل العفشة لانه محتاج تعتيل و بابقا جايب كرسى و مرابط جمب العربية و اشوف ايه اللى بيحصل و باكون جايب القطع كاملة و جاهزة عشان ما اسيبهاش و اروح و ارجع
و بردك لما غيرت طقم الدبرياج و كوتش الكوبلن كنت لازق جمبه
و اى حاجة شاكك فيها اقوم داخل قسم الطوارىء بتاع المنتدى اخد الروشتة اروح اصرفها من بتوع قطع الغيار و اطلع على الجراح (الميكانيكى) طبعا بعد توجيهات الاستشارى الكبير البشمهندس سمير ربنا يباركلنا فيه
ربنا يستر الحاجة الوحيدة اللى هاتضطرنى اسيبها لو حصل حاجة فى الموتور و ده هايبقا النجوم فى عز الضهر كأن واحد سايب مراته فى مكان غريب و مع ناس غريبه فى نص الليل شوفوا انتوا بقا هايبقا ظروفه ايه