لراغبي الشراء بالتقسيط الشرعي ... فقط

**amir** · 03-05-2010 05:16 PM

المشاركة الأصلية كتبت بواسطة mo7amedgomaa

أشكر لكل من شارك برده علي موضوعي وجزاكم الله خيراً علي الإهتمام ولكن لي عدة ردود :
- يا إخوتي هناك فرق جوهري بين البيع المباشر والبيع عن طريق البنك فالأول هو الحلال بعينه والآخر هو الربا بعينه ، فمن الشروط الأساسية للشراء الحلال أن يكون بين طرفين فقط لا ثالث لهما أما البنك فأنت تذهب للشراء من المعرض ثم يحول لك القسط علي البنك فأصبحتم 3 اشخاص وهو ما لا يرضي عنه الله ، إلي جانب فروق أخري لا مجال لذكرها
- الشركة اللي أشترييت منها هي ( الشركة العالمية للتجارة - عبد اللطيف جميل ) وهي توكيل دايهاتسو في مصر وموزع رئيسي لإسبيرانزا و نيسان وممكن تشتري لك عربيات تانية زي الشيفروليه و بعض أنواع الهيونداي وبعض أنواع الكيا والبي أم ، وليهم 3 فروع في المعادي والمهندسين ومصر الجديدة وأقل مقدم 25 % لحد 75 %

ممكن لتعميم الفايده تعمل سكان للعقد و تورينا؟؟

**ALshahba** · 03-05-2010 06:33 PM

جزاك الله خيرا عما تفعل

**mo7amedgomaa** · 04-05-2010 11:20 AM

المشاركة الأصلية كتبت بواسطة mazagangee

ممكن العناوين بتاعتهم
همه عندهم معرض و لا مكتب بس ؟

يا جماعه أنا قلت لكم أنها شركة عبد اللطيف جميل واللي ميعرفوش يدخل علي النت يعرف مين هو الشيخ عبد اللطيف جميل ( ملياردير يا جماعه ) والعربيات دي حاجه من 100 حاجه بيشتغل فيها ،،، المعارض كبيرة مش مجرد مكتب وموظفين في منتهي الادب والإحترام وبتعاقد معاهم همه وبدفع المقدم ليهم همه وبستلم من عندهم همه وهمه ملاك العربية وبدفع القسط كل شهر عندهم همه .... مفيش طرف تالت في الموضوع
يعني كأنك رايح تشتري تلاجه أو غساله بالتقسيط نفس الفكرة

**hamdy** · 04-05-2010 12:18 PM

طب ممكن نعرف طريقة التقسيط؟؟

**teha** · 04-05-2010 12:32 PM

اهم شرط في غرامة تاخير و لا لأ
عشان لو فيه كدة يبقى العقد فيه شرط من شروط الربا و هوه لما تتاخر ولو يوم واحد يزود عليك القسط و اعتقد دولقتي في ظل التحايل على موضوع التقسيط الاسلامي فالشرط ده لو مع بنك مش هيقدر يلغيه مهما كان البنك ده اسلامي و لا لأ .

**mo7amedgomaa** · 04-05-2010 12:54 PM

المشاركة الأصلية كتبت بواسطة hamdy

طب ممكن نعرف طريقة التقسيط؟؟

طريقة التقسيط :
1 - بتدفع 100 جم إستعلام وبتكتب في الفايل بياناتك وبيانات شغلك ونوع العربية اللي عاوزها .
2 - تاني أو تالت يوم بييجي واحد من عندهم الشغل بتاعك وبيسأل عليك ويقعد معاك
3 - بعدها بيومين أو تلاته بيتصلوا بيك عشان تروح تتعاقد وتدفع المقدم اللي هو 25 % من ثمن السيارة أو 40 % أو 60 % أو 75 % زي ما أنت تحب وبتشوف العربية بتاعتك وهي واقفه في حاله أن العربية موجوده عنده في الأستوكات ( والعربيات الموجوجه عنده بإستمرار هي الإسبيرانزا - النيسان - الديهاتسو - الشيفرولية ) ولو أنت عاوز عربية نوع تاني بيحدد لك موعد الإستلام اللي بيختبف حسب نوع العربية ( وخللي بالك أنه ما بيتعاملش في كل أنواع العربيات ) وطبعا بيكون معاك دفتر شيكات من حسابك الخاص اللي في أي بنك عشان القسط الشهري
4 - تاني يوم علطول بتستلم العربية وبتاخد محضر إستلام وجواب المرور عشان الترخيص
5 - بعدها بحوالي 21 يوم بتستلم العقد موقع عليه من الإدارة ومختوم وبتستلم كتاب الضمان
6 - بالنسبة للورق المطلوب :
- لو أنت موظف ( جواب مفردات راتب موجه بإسمهم - صورة البطاقة لو مكتوب فيها وظيفتك الحالية لو مش مكتوب بتجيب صورة من إستمارة 1 تأمينات - وصل نور أو صورة عقد الشقة )
- لو صاحب عمل ( بدل مفردات الراتب بتجيب صورة من السجل التجاري و البطاقة الضريبية ونفس الورق الباقي )
7 - بالنسبة للدفعات المقدمة :
- 25 % و40 % لازم ضامن معاه نفس الورق اللي أنا قلته ولازم تأمين علي السيارة
- 60 % لازم ضامن بس بصورة البطاقة بس ومش لازم تأمين
- 75 % لا ضامن ولا تأمين
أتمني أكون وفيت في الرد

**mo7amedgomaa** · 04-05-2010 12:59 PM

المشاركة الأصلية كتبت بواسطة hamdy

طب ممكن نعرف طريقة التقسيط؟؟

المشاركة الأصلية كتبت بواسطة teha

اهم شرط في غرامة تاخير و لا لأ
عشان لو فيه كدة يبقى العقد فيه شرط من شروط الربا و هوه لما تتاخر ولو يوم واحد يزود عليك القسط و اعتقد دولقتي في ظل التحايل على موضوع التقسيط الاسلامي فالشرط ده لو مع بنك مش هيقدر يلغيه مهما كان البنك ده اسلامي و لا لأ .

يا أخ teha أنا قلت أن مفيش بنك أصلاً في الموضوع كله لا من قريب ولا من بعيد

**teha** · 04-05-2010 02:56 PM

ايوة انا افهم بس ده ادامك
يعني من وراك في بنك و بيطلب غرامة تاخير
لو مفيش غرامة تاخير يبقى في الناس ديه بتعمل ده عشان تبعد عن الحرام فعلا .
و على فكرة انا شاري عربيتي تقسيط اسلامي برده .
1. بشتري العربية من الشركة و مفيش طرف ثالث تو بمعنى اصح هوه بيشتري العربية الاول و بعد كدة بيبعهالي .
2. مفيش غرامة تاخير
3. مفيش تامين عشان شبهة الحرام .
4. بدفع القسط مباشر مع الشركة.
5.مفيش مصاريف ادارية .
6.لو حبيت تخصم و تقلقل الفايدة مينفعش عشان ديه سلعة مش فلوس يعني لها قيمة واحدة كاش و قيمة واحدة قسط (بيع آجل)

**mo7amedgomaa** · 04-05-2010 03:42 PM

المشاركة الأصلية كتبت بواسطة teha

ايوة انا افهم بس ده ادامك
يعني من وراك في بنك و بيطلب غرامة تاخير
لو مفيش غرامة تاخير يبقى في الناس ديه بتعمل ده عشان تبعد عن الحرام فعلا .
و على فكرة انا شاري عربيتي تقسيط اسلامي برده .
1. بشتري العربية من الشركة و مفيش طرف ثالث تو بمعنى اصح هوه بيشتري العربية الاول و بعد كدة بيبعهالي .
2. مفيش غرامة تاخير
3. مفيش تامين عشان شبهة الحرام .
4. بدفع القسط مباشر مع الشركة.
5.مفيش مصاريف ادارية .
6.لو حبيت تخصم و تقلقل الفايدة مينفعش عشان ديه سلعة مش فلوس يعني لها قيمة واحدة كاش و قيمة واحدة قسط (بيع آجل)

الحمد لله يا أخ teha أن ربنا وفقك للشراء الإسلامي كما تقول وهو ده والله يا جماعه اللي أنا نفسي أقوله لكم أن الواحد قبل ما يعمل أي حاجه يتحري الحلال وميبقاش طريقي للحصول علي الحاجه هو الحرام لمجرد أن أنا عاوز أقتنيها ، وللأسف أنا أشعر دلوقتي أن كل الناس حتتجنن علي شراء العربيات الجديدة وطبعا الشركات كلها دلوقتي فتحت باب الشراء عن طريق البنوك يعني الربا بعينه ، وللأسف برده لأن مفيش وعي ديني عند المصريين بصورة كافية فكل الناس بتروح تشتري من الشركات دي ، وأنا دايما لما بيسألني حد يقول لي أن البلد كتر فيها الأغنياء أوي عشان العربيات الجديدة اللي في السوق أرد عليه وأقول له اللي كتر مش الأغنياء اللي كتر هو الربا وتساهل الناس في أكل الربا
أنا نفسي يا أخ teha في حاجتين :
- اولاً أعرف أسمك
- ثانياً تنشر أنت كمان عنوان وتليفونات الشركة اللي اشتريت منها عشان نكون عون للناس علي أد ما نقدر علي الحلال
وربنا يجعلنا مفاتيح للخير ومغاليق للشر ............... آمين