الموضوع: مثال للموظف المصري الاصيل (اصيل اصيل يعني )

البيروقراطية المصرية الأصيلة !!!!!!!!!!!! ربنا معاك، اقرا كتاب نبيل فاروق عشان تشوف مذكراته في فتر التكليف ... تحفة
الكتاب اسمه "رجل المستحيل .. أوراق لم تنشر"
إدارياً المفروض بعد 5 أيام انقطاع عن العمل يتم توجيه إنذار .. لو انت على قوة المديرية يبقى لازم تروح يومياً .. روح واضرب لك شهادة مرضي وللا حاجة وسيب أبو المعاطي البيروقراطي يولع.
وبالمناسبة ماتحاولش تتحدى غيلان البيروقراطية احنا ولاد ناس ومانعرفش في ملاعيب شيحة الإدارية المصرية .. ده من جبروتهم حسبوا تسجيلات دبي في قضية السكري ب 750 مليون جنيه .. نفسي اعرف إبن أبالسة مين اللي فنن التفنينة بنت الحرام دي !!!!!!!!!!

ربنا معاك وتعرف تتصرف مع الذكى دة

المفروض حضرتك كده منقطع لمدة يومين اللى هما الإثنين والثلاثاء لإنك روحت تستلم عملك يوم الأربع .. وفي نفس الوقت يوم الخميس إنت كنت في المديرية ومكنتش منقطع ولا حاجة ودليلك على كده التأشيرة بتاعة مدير الإدارة المؤرخة في اليوم ده غير إن السبت والأحد إجازة (هما كانوا إجازة ليه صحيح .. ؟) ول هما فعلا إجازة رسمية يبقى إنت مش محتاج إثبات عليهم خالص

وعموما مشاكل الإنقطاع الخاصة بالأطباء بتروح النيابة الإدارية ولو ماراحتش .. ممكن تروح إنت النيابة الإدارية تعمل عريضة وترفق معاها أي إثبات على اللى عمله الموظف ده .... بس في الأغلب الواقعة نفسها بسيطة وحتى لو ثابتة ممكن تتحفظ

سواء واقعة إنقطاعك يومين أو واقعة خطأ الموظف

ياراااااااااااجل

مرحبا بك فى عالم الحكومة كومة كومة

دا كده بعدها بكام يوم حتلاقى نفسك اتعودت على الوضع دا

انا لما كنت شغال فيها ربنا لا يعدها ايام سودة

كنت عاوز اخد يوم تفرغ عشان اكمل دراسات رفضوا وقالولى مينفعش وبما انى طبعا كنت دفعت المصاريف فبقيت اغيب اليوم دا بلطجة

وسبحان الله التفتيش مكنش بيحلاله ييجى فى اى يوم غير اليوم اللى مش موجود فيه وطبعا الجزاءات كانت على ودنه

وبعدين لما جت فترة الامتحانات قلت لازم الواحد يمشى فى اجراءات اجازة بدون مرتب عشان اعرف اروح الامتحانات وابتديت الاجراءات دى من شهر قبل الامتحانات والموظفة فى الادارة تبعتنى للدور اللى فوق وبعددين انزل لتحت وبعدين فوق وحبة تحت واللى هو المفروض اصلا شغلها اللى المفروض تعمله لكن بما انها خلاص من كتر قعدتها على الكرسى لزقت فيه فكانت بتبعتنى انا

واحلا حاجة ان كان فيه ورقة كنت تعبت اوى عما خلصتها وسيبتها عندها وجيت بعد فترة لاقيتها بتقولى بكل برود انت لما اتاخرت على رميت الورقة وروح اعمل غيرها

كان هاين على باللى فى رجلى والسوعها بيه على نافوخها

المهم لقيت نفسى بعد العذاب دا كله مخدتش الاجازة ومبقاش غير 3 ايام على الامتحان قمت مقضيها بلطجة وسيبت العمل لمدة شهر والدكتور مدير الوحدة كان بيحضرنى الايام ويعملى ايام اجازات على عارضات على اعتيادات على سمك لبن تمر هندى

وبعد مخلصت الامتحانات قررت انى اسيب الحكومة لقيت ورقة الاجازة اللى المفروض اخدها قبل الامتحانات طلعت بعدها