رابطة حائزى الفلوينس

**Mohamed_Ashour** · 18-04-2011 11:32 AM

المشاركة الأصلية كتبت بواسطة bukla

السلام عليكم و رحمة الله و بركاتة
التكييف ضعيف يبقى عليك و على التوكيل علشان يكشف على التوكيل و يشوفة محتاج شحن و لا فية مشكلة تانية
مياة التبريد ما تفرقش معاك طالما العربية مش بتسخن و لكن برضة قول لهم فى التوكيل على الموضوع دة مع انى مش عارف انت عرفت منين ان مية التبريد ناقصة لانك ما يجبش انك تفتح الكابوت بتاع العربية عند اى حد غير التوكيل و دى نصيحة علشان ما حدش يفتى فى العربية عن غير علم
اما موضوع النتشة بين الاول و التانى فهى للاسف معتمدة على طريقة سواقتك و خصوصآ طلعتك من الثبات لو غيرتها مش حتحس بيها
ارجوك مرة تانية ما تخليش حد يلعب فى العربية و روح التوكيل لانة الوحيد اللى حيعالج اى مشكلة بدون تخريب و الحمد الله ان التوكيل بتاعنا واحد من احسن توكيلات العربيات فى مصر ان ما كانش احسنهم جميعا
بالتوفيق ان شاء الله

شاكر ليك جدا على باشا على ردك وما تقلقش انا اللى شوفت المية بالصدفة وما باروحش لحد خالص غير التوكيل :)

**zaghou** · 21-04-2011 03:27 PM

ايه اخبار الفلوانس المنوال يا شباب ؟

**bigwarrior** · 22-04-2011 03:04 AM

ياشباب انا ان شاء الله اقتنعت تماما بالفلونس الهاي لاين وسعرها167000

1-اشتريها من توكيل المقطم على طول
2-ايه افضل لون
3-ايه عيوبها بالضبط في الهاي لاين

**amrsamy010** · 22-04-2011 04:06 AM

السلام عليكم

حد يا جماعة ركب انذار للفلوانس وموجود في التوكيل ولا اية ياريت حد يفدني

تحياتي

**ahmedsql** · 22-04-2011 04:27 AM

المشاركة الأصلية كتبت بواسطة amrsamy010

السلام عليكم

حد يا جماعة ركب انذار للفلوانس وموجود في التوكيل ولا اية ياريت حد يفدني

تحياتي

سألت في التوكيل , قالولي معندهمش و لو جبتهلهم من بره مش هيركبوه و ممنوع تركبه بره :)

**amrsabet** · 23-04-2011 12:57 AM

المشاركة الأصلية كتبت بواسطة zaghou

ايه اخبار الفلوانس المنوال يا شباب ؟

متابع باهتمام ياريت حد يفيدنا عن تجربته مع الفلوانس المانوال

**fluence** · 24-04-2011 05:07 AM

السلام عليكم جميعا
دي اول مشاركه ليا وانا ولله الحمد اشتريت الفلوانس النهارده الهاي لاين
وللاسف انا اشتريتها من قبل ما اشوف موضوع الاخ بوكلا .. لكن انا كنت عامل بحث منظم وتقريبا قرأت كل المواضيع في معظم المنتديات .. وروحت وشوفت العربيه اكثر من 10 مرات وفي الاخر اقتنعت وتوكلت علي الله
طبعا حبيت بس اساعد واقول ايه الحاجات المضمونه او اللي اوعدك بيها لو جبت العربيه
1- توكيل محترم جدا وخدمه ما بعد البيع شجعتني اني اشتري بصراحه علي الرغم اني لسه جايب العربيه وما اتعاملتش معاهم بس ايه يا جماعه الوهم ده انا من كتر ما قرأت عن حسن معامله التوكيل حسيت ان ممكن وانت منتظر الصيانه تخلص بيجبولك رز باللبن

2- فخامه داخليه ومنظر وتصميم خارجي يحكم عليه اي واحد اعمي مفيش كلام

3- وسع داخلي واحساس بالمتعه اثناء القياده

يعني لحد دلوقتي توكيل محترم وسياره شكلها وفرشها خرافي وكمان سعر معقول مع امكانياتها

انا طبعا لسه حجرب حاجات كتير وحتابع معاكم يعني لازم كل اللي يجيب العربيه يساعد زي ما الاخ بوكلا مشكووور استقطع من وقته علشان يفيدنا
انا ان شاء الله حركب فرش جلد وطبعا لسه مش عارف اجيبه منين لو في حد ينصح بشيء معين يكون مشكوور جدا

وحركب زينون ان شاء الله .. ولسه حروح بكره ان شاء الله اركب عده الصوت (صب + اتنين جي ام + سماعتين بايونير + كاسيت بايونير ) وحنجرب الاول كفاءه الكاسيت علشان اقارن بين الكاسيت الاصلي والكاسيت البايونير ونشوف نقاء الصوت

اعتقد ان العربيه فيها انذار لسه معرفش حسأل واشوف

وطبعا كل ده حركبه عند ادريان او مركز محترم لان التوكيل معتقدش حيفيدني في شيء زي ده اووي

وكل الحاجات دي عباره عن سلك بس بيتمد يعني مفيش لعب في اساسيات العربيه

وشكرا ليكم جميعا افادتونا

واتمني من الله متظهرش اي مشاكل لاني حابب العربيه جدا .. ومبسوط بيها