بيجو 308

**ahmed_aly_78** · 07-05-2010 02:14 PM

السلام عليكم
أنا عايز رايكم في بيجو 308
1. ليه مبيعاتها قليلة؟ رغم إن أنا شايف سعرها نزل كتير (158 الاوتوماتيك) وامكانياتها ممتازة.
2. إيه أخبار استهلاك البنزين للموتور الجديد (1.6 لتر , 120 حصان)
3. هل الكراسي مريحة والعفشة ناعمه؟
4. قطع الغيار متوفرة ولا لأ؟ (خصوصا إنها مش منتشرة).
5. هل فيها عيوب أو مشاكل خطيرة يعني؟

وشكرا على تعاونكم

**dr.amr** · 07-05-2010 08:40 PM

يا ريت حد يفيدنا فعلا

**amr mokhtar** · 07-05-2010 10:16 PM

المشاركة الأصلية كتبت بواسطة ahmed_aly_78

السلام عليكم
أنا عايز رايكم في بيجو 308
1. ليه مبيعاتها قليلة؟ رغم إن أنا شايف سعرها نزل كتير (158 الاوتوماتيك) وامكانياتها ممتازة.
2. إيه أخبار استهلاك البنزين للموتور الجديد (1.6 لتر , 120 حصان)
3. هل الكراسي مريحة والعفشة ناعمه؟
4. قطع الغيار متوفرة ولا لأ؟ (خصوصا إنها مش منتشرة).
5. هل فيها عيوب أو مشاكل خطيرة يعني؟

وشكرا على تعاونكم

انا فى الحقيقة أعرف واحد معاه 308 (خليجى) بس من بعيد شوية
يعنى صاحب واحد صاحبى

بس هقولك على الحاجات اللى أعرفها عن توكيل بيجو كخبرة سابقة معاه
و الأخبار اللى انا سمعتها عن العربية دى من صاحبى

1- العربية مبيعتها قليلة عشان مفيش دعاية قوية للعربية خلاف ذلك هى عربية ممتازة و لا خلاف عليها
2- معنديش فكرة عن إستهلاكها فى البنزين بس أظن إنه هيكون عادى زى اى عربية 1600
3- من كلام صاحبى اللى ركبها بيقوللى العربية رائعة من الداخل و صالون واسع و كراسيها مريحة
4-النقطة دى هى المشكلة الكبيرة
العربية مش منتشرة و لا أتوقع لها إنتشار
و التوكيل غير قادر تمامآ على توفير قطع الغيار إلا فيما ندر
لدرجة إن صاحب 308 بيجيب ليها حاجات من توكيل مينى عشان الموتور بتاع ال308 معمول بالشراكة مع مينى

5- معنديش فكرة بس البيجو عامة مشاكله قليلة

عايز أقولك على حاجة كمان
انا إتعاملت مع توكيل بيجو فى عربية 206 من الزيرو إلى ان بيعناها بعد 9 سنين
للأسف الشديد التوكيل عنده مشكلة فى توفير قطع الغيار
و لإن كمان العربية منزلتش تبع الوكيل فهما مش واخدين تدريب كافى على العربية دى

خلاف ذلك هى سيارة فوق الممتازة و عربية شييييييييييك جدآ

**ahmed_aly_78** · 07-05-2010 11:35 PM

شكرا يا أستاذ عمرو على الافادة
مشكلة طبعا عدم توفر قطع الغيار دي

**ABDULLAH AHMED** · 08-05-2010 12:14 AM

بص البيجو كعربية ما فيش زيها بس ما ينفعش تشتريها في مصر
العربية عاوزة شوارع اوروبا ومطبات اوروبا مش شوراع مصر خالص
انا حقلك على ال 307 عشان اقعدت معايا 4 سنين كعربية بجد تحفة بكل معنى الكلمة من الداخل والخارج ثبات تكييف الخامات بس عيبها مشاكلها الفنية والاعطال تخليك في الاخر تكره العربية وما تصدق امتى تبيعها
والحمدلله بعنا العربية بعد 4 سنين بس بعد ما جبت الجيتز هيا صح عربية حلوة بس فرق جامد بين الارض والسما بيت الجيتز والبيجو 307 بس الجيتز مريحاني ان كقطع غيار متوفرة اعطال الحمدلله لحد الان ما فيش ولو حصل حتبقى سهلة ان شاء الله

ونصيحة ليك لو انت سواقتك هادية وحتابع الصيانات وتتحمل الخسارة في اعادة البيع فتوكل على الله
وانت شوف خيارات تانية قصاد البيجو يعني في الرينج ال 160000 وشوف احسن حاجة وصليلك ركعتين استخارة وربنا ان شاء الله حيوفق للخير

**ahmed_aly_78** · 08-05-2010 10:54 AM

شكرا لإهتمامك يا أستاذ عبود
الحقيقة أنا اكتشفت إني عشان أجيب عربية لازم أجيب الهأي لين بتاعها عشان تبقى مريحة
يعني على سبيل المثال الجولف والاوكتفيا (base line)
الكراسي مش مريحة
وطبعا (high line) غاليين قوي بالنسبالي

الكورولا طبعا معروف مشاكلها الحالية وسعرها منزلش (أنا شايف 160 كتير عليها)

أنا كنت أتمنى ألاقي حاجة اوروبي منتشرة وسعرها معقول ومفيهاش مشاكل وتوكيلها كويس بس للاسف مش لاقي

غالبا كده هارجع أفكر في Tiida
أعتقد إنها من أفضل الحاجات في السوق حاليا

**ABDULLAH AHMED** · 08-05-2010 11:44 AM

ممكن تشوف الفيات برافو الناس بتشكر فيها والتوكيل بتاعها كويس

**amr mokhtar** · 08-05-2010 12:49 PM

او فكر فى الفلوينس
عربية اوروبى و توكيل كويس و أسعار قطع غيارها معقولة على حسب ما سألت

لولا مشاكل توكيل بيجو كنت قولتلك توكل على الله فى 308
و انا كنت بعد ال206 جبت 207
بس هنعمل إيه

**ahmed_aly_78** · 08-05-2010 01:35 PM

أستاذ عبود
بالنسبة للفية هيا عربيات محترمة بس للاسف مركز الصيانة في إسكندرية سي2 جدا
وكمان أومترا مش بتوفر قطع الغيار (حاجات مهمة زي عوامة بنزين, تيل فرامل, طنابير, مساعدين,......) ولما مايكونش عندهم حاجة يقولولك دي تمشي كده كمان 5000
وبعدين لما تمشي بالتيل المتأكل ياكل الديسكات فيبقى لازم تغيرها :)

كمان كان في عوامة بنزين من أيام الضمان من 4 سنين لحد دلوقتي بحاول اخليهم يجيبوها (أنا معايا أونو فاير 2006, 1300)
عشان كده مستحيل أشتري عربيات فيات تاني
:)

بالنسبة للفلوينس مش عارف
هي لسة جديدة ومش حاسس إنها انتشرت (مابشوفهاش كتير)
وبعدين أعتقد إنها الإمتداد الطبيعي للميجان وتقفيل تركي برده وفيها تكنولوجي عاليه فهل هيبقى فيها نفس المشاكل؟
وقطع الغيار هل غالية زي الميجان
وأداء العربية اخباره إيه؟
هي بصراحة شكلها حلو قوي (بالنسبالي على الاقل)
وابعادها بتقول إن ثباتها هيكون ممتاز (والجنوط العريضة كمان)
وكمان أعتقد عاليه كفاية عن الأرض

**amr mokhtar** · 08-05-2010 03:26 PM

طالما حضرتك من الإسكندرية يبقى إبعد عن فيات تمامآ لحد ما يبقى ليهم توكيل محترم فى الإسكندرية
انا برضه إتعاملت معاهم فى عربية سيينا بتاعة واحد صاحبى و شفت هناك قد إيه المكان ده سىء

بالنسبة للفلوينس
انا أعتقد انها هتنتشر بس محتاجة شوية وقت
و لو حضرتك هتعتبرها مغامرة فهى أقل خطورة من مغامرة 308
على الأقل فيه توكيل قادر على صيانتها

عيوب الميجان كانت فى الموديلات الأولانية 2005 و 2006 إنما بعد كده فمفيهاش مشاكل و حضرتك تقدر برضه تسأل فى قسم رينو

ربنا يوفقك للى فيه الخير