الموضوع: اتنصب عليا ودي حكايتي عشان الناس تستفيد

المشاركة الأصلية كتبت بواسطة amr_lamor

السلامو عليكم
انا كنت بدور على عربيه من فتره كبيره وكنت مش لاقي..طبعا كنت متابع النت و السوق والحاجات دي وكانت كلها حاجات مضروبه... وعلى فكره نصيحتي لأي حد ميحاولش يشتري من السوق..المهم كنت زهقت من كتر التدوير...و في يوم لقيت اعلان على كونتكت بتاع سبكترا كلمت الراجل قاللي العربيه رشه جنبين واستعمال اطباء و هو دكتور والكلام ده....رحت شفت العربيه وكانت الفلوس في جيبي المهم لما رحت هو قعد يتكلم و يرغي وانا مبصتش عدل عالعربيه المهم قولت اخدها على بنزينه في اول شارع بتاع رابعه العدويه عاليمين...رحت رفعتها قالولي علي فيها وكلها حاجات غير مؤثره...المهم الراجل قاعد يحلفلي بالله و بحياه ابنه ان العربيه مفهاش حاجه و ان هو قاللي على كل اللي فيها والكلام ده وانا استنضفتو دكتور بقى و عمال يحلف وبتاع و اشتريتها في نفس الوقت...حتى وانا بشتريها كنت عارف اني مبصتش كويس..بس قولت الراجل محترم ...المهم خدت العربيه وبعدها بيومين رايح اعمل حاجه في الميكانيكا لقيت الميكانيكي بيقولي فيها ستاره مرشوشه!!!!!!!!!!! طبعا خدتها و جريت عالمعارض قالولي فيها ستاره و فرده يمين و قوايم يمين مرشوشه كلمت الكلب اللي باعلي العربيه قاللي انا معرفش,ايه الكلام اللي بسمعه ده,ازاي ....قولتلو انا عايز ارجع العربيه ..قاللي الفلوس اتصرفت و بعدين قاللي انت مش شفت العربيه دي مشكلتك مع البنزينه...كل واحد عايز يحلل فلوسه يقول شويه كلام اهبل هو متأكد من جواه انه غلط..بس النصاحه بقى..المهم قعدت اسبوعين اتفاوض معاه وهو يماطل .. ومن بروده يقولي بيع العربيه..اقولو نتشارك في الخساره لما ابيعها يقولي ربنا يسهل..اقوله دي فلوس ورثي وانا في بدايه حياتي يعض يحكيلي عن مشاكله وان ابوه ميت...المهم قاللي خلاص انا هشتري منك العربيه ب 35 مع العلم اني كنت مشتريها منه ب 42 من اسبوع!!!!!!!!!!!!! قاللي اصلي هستلف الفلوس من صاحب المركز اللي شغال فيه عشانك واحنا مسلمين وانت اخويا كلام النصابين بقى ومنتهى الأستفزاز في طريقته....المهم هيا مكانتش جايبالي غير 33 قولتلو ماشي...بس عملت استخاره قولت مبيعاش للكلب حتى لو هخسر قابلتو عشان يشتري قولتلو انا عايز 2000 جنيه قاللي انت كده بتبخسلي بيعتي قولتلو امال انت بتعمل ايه؟؟؟؟؟؟؟؟؟؟؟ قاللي انا هروح شويه و هاجي طبعا ولا جه ولا اي حاجه..المهم انا حقي عند ربنا لأني بعتها ب 33 وكل طلبي ان الناس اللي تقرا الحكايه تدعي عليه لأني مش مسامحو و ان شاء الله تتردلو فيه مش عايز اقول ابنه بس يارب تترد فيه وربنا ينتقم منه
طبعا انا بحكي باختصار شديد لو حكيت بالتفصيل انا اصلان هيجيلي شلل من حرقه الدم.
شكرا و الحمدلله على كل شئ :)

الحقيقه لو عايز رأيى انت اللى غلطان لأنك عاينت ورفعت وواخدها زى ماشفتها وليه انت مش حاطط احتمال انه هو كمان مايكونش عارف اللى فيها سواء اذا كان شارى من واحد قبله او تاجر هاوى انا شوفت عربيات كتير جدا فيها مشاكل وصحابها مايعرفوش اللى فيها هما جبوها كده وماكتشفوش اللى فيها

على العموم هو درس تتعلم منه وربنا يعوض عليك ويرزقك بأحسن منها

ربنا يعوض عليك بأحسن منها إن شاء الله ويعوض خسارتك آمين .
ياجماعه يعنى إيه راشه ستــــــــــاره ؟
وفين الستـــاره دى فى العربية ؟

انا وكمان في ناس غيرى عوزين نعرف اية الستارة دى الى مرشوشه على شان نستفيد

لله ما اعطي ولله ماخذ فلا تحزن ان الله سيعوضك لا محاله في الدنيا اوفي الاخره واعلم ان دعوه المظلوم لا ترد

ربنا يهدينا يا رب و يعوض عليك و يجعلوا في ميزان حسناتك انا برضه بيحصل معايا مواقف شبه دي بس نخلي بالنا في ناس بيفهوا انك تحترموا و تديلوا ثقه انها شطاره منه و يخدعنا
ربنا يعافينا