يمام عضه فى الاول و التانى..ربنا يسهل و اعرف اجيبها الاسبوع ده
منتظرك في الصيانة القادمة
من فضلكم حد يعرف ضمان الفيرنا قد إيه؟ وليه غبور مش بيدى الضمان مع العربيه ؟ومثلا لو حد إشترى عربيه موديل 2006 يكون ضمانها خلص وإلا لسه ؟؟؟؟؟؟؟
ضمان الفيرنا :
3 سنوات أو 50.000 كلم أيهما أقرب
كتيب الضمان يتم تسليمه أثناء أستلام السيارة من معارض غبور و مع صيانة الألف أذا تم الشراء خارج معارض غبور.
و تقبلوا وافر تحياتي
من كام يوم رحت صيانه الألف كم (انا معايا فرنا ) وفيه بعض الملاحظات البسيطه بس بتضايق يعني مثلا اول ما استلمت العربيه وجيت اركب النمر قالولي روح لسمكري يخرملك الشنطه علشان تركب النمر.. معقوله يا جماعه اجيب العربيه زيرو واطلع بيها علي السمكري يخرملي الشنطه ؟؟
هو موضوع بسيط صحيح بس يضايق .. ليه متعملش حساب لتعليق اللوح الخلفيه اثناء التصنيع؟؟
وانا رايح اعمل الصيانه وصلت ابو رواش يوم السبت الساعه 9 صباحا واول ملحوظه ان مفيش اداره خدمه عملاء ؟؟
وكان عندي شكوي بسمع صوت تزييق في القائم ..طلبت اصلاحه فرد عليا مهندس الإستقبال ان الموضوع ده مش اختصاصه ده قسم الهياكل ؟؟ واني بعد ما اخلص اروحلهم .. وقالي انه هايسلمني العربيه الساعه 1 الظهر
ودار بينا الحوار التالي :
انا : انا ملاحظ ان المتور بيسقف كتير
المهندس : هو هيستمر معاك كده فتره وبعدين هيختفي موضوع التسقيف ده
انا : ليه ؟؟
المهندس : اصل العربيه جديده والمعارض بتحط اردأ انواع البنزين وده اللي بيخلي العربيه تسقف وبيستمر تأثيره فتره طويله
انا : بس دا انا مش شاريها من معرض .. انا شاريها من غبور نفسه ..
المهندس : ما هو نفس الكلام عندنا برضه !!!! ..... لا تعليق
مركز صيانه ابو رواش لا يوجد به ختم غبور :
الصيانه خلصت الساعه 2 .. طلبت يختمولي كتيب الضمان .. قالولي لا يوجد لدينا ختم !!
ازاي يا جماعه انا عاوز اثبات اني عملت صيانه الألف .. وبعدين انا كنت شايف كتيب الضمان بتاع واحد جارنا مختوم بختم غبور .. قالولي الختم ده في مراكز الصيانه التانيه انما احنا مركز رئيسي لا يوجد لدينا ختم !!!!.... لا تعليق
انتهي هنا تعاملي مع الصيانه الميكانيكيه ورايح لقسم الهياكل ...
ألف شكر يا باشمهندس ونفسى فى الحقيقه أقابل حضرتك وإن شاء الله قريب
رحت قسم الهياكل .. وبالعافيه رضيوا يدخلوني كانوا عاوزيني اجاي يوم تاني علشان انا جاي متأخر ...
المهم بعد ما دخلت قلت للموظف علي مشكلتي ..قالي اركن العربيه بالخلف وسيب فيها المفتاح وانتظر في غرفه الإنتظار .. طلبت منه ايصال استلام السياره رفض وقالي احنا النظام عندنا لا نعطي ايصال استلام .. ينفع كده يا جماعه هو ده نظام ؟؟ يعني لو حد ضيعلي المفتاح او العربيه اتخبطت نحدد المسؤليه ازاي ؟؟
ده غير المنظر العام للسيارات اللي واقفه في الشمس وعليها اكوام تراب .. تحس انها مقبره سيارات ..انا خايف حد يصور المناظر دي بالموبايل وينشرها ..
المهم استلمت العربيه الساعه 5 مساء .. يعني قعدت في المركز 8 ساعات علشان اعمل صيانه الألف وصوت التزييق بتاع القائم !!!!!!
ولذلك اقترح التالي :
1- تصنيع الشنطه وبها ثقوب لتعليق النمر .. :( فكره حلوه مش كده :(
2- انشاء اداره لخدمه العملاء بمركز صيانه ابو رواش يتعامل العميل معهم فقط ويكون موظف خدمه العملاء مسؤل عن جميع الملاحظات في السياره ..
3- عمل ختم للصيانه (ابسط حقوق المواطن )
4- تشغيل المركز بكامل طاقته ايام الجمعه والسبت اظن اكبر ضغط للعملاء في اليومين دول
5- استلام العربيه بموجب ايصال استلام موضح به حاله العربيه (خبطات - تجريح - ..) اظن ده طلب عادي .. ولا انا كده مزودها شويه ؟؟
نسيت اقول اني لما استلمت العربيه كان عليها تراب جامد وحتي علي الكراسي .. ولما قلت لمسؤل المبيعات رد عليا ان الجو تراب اليومين دول ..وابقي وديها المغسله ..(يعني اطلع بيها من المعرض علي المغسله ؟؟!!! .. وبعدين اروح لسمكري يخرملي الشنطه !!!!)
ده غير اني بعد ما استلمتها ومروح بيها من المعرض وجدت صوت التزييق في القائم .. هيا العربيه ما عدتش علي قسم الجوده ولا ايه ؟؟
الحاجات دي كلها بسيطه بس بتضايق والإنطباع الأول هام جدا
لو سمحتم يا جماعة عاوز اعرف عناوين و تليفونات جميع مراكز الصيانة اللى اعمل فيها 1000 كم للسيارة اتوس برايم .. و هل لازم احجز قبلها و احجز ازاى و هل هناك اجراءات او اوراق معينة مطلوبة .. و كم تتكلف صيانة الالف للاتوس ؟ و شكرا
لازم تحجز وبالتليفون بس و اذا كان معاك كتيب الضمان تاخده معاك ماكانش يبقى تستلمه من مركز الصيانه
للحجز اتصل 16101
بالنسبه لكام ممكن تسال بى التليفون بس على العموم هيا الصيانه مجانيه لكن حتشترى الزيت و ده على حسب حاتحط كل 10000 ولا 5000 ال10000 ب 220 جنيه
و مبروك ياباشا على العربيه