الموضوع: مركز خدمة عملاء هيونداي ترحب باى شكوى من مالكي هيونداي

[overline]من فضلكم انا عندى مشكلة مزعجة وهى ان فى صوت طقطقة بلاستيك فى النصف اليمين فى جسم العربية من الداخل وانا سايق ممكن يكون البلاستيك اللى على القايم لاقيته مربوط تمام الصوت دة بيجي طول ما انا ماشى بالعربية انا هاتجنن من فضلكم الافادة فى الرد
[/overline]

المشاركة الأصلية كتبت بواسطة abaza2107

ممكن يكون حزام الأمان بيخبط في القايم
وممكن يكون حاجه في درج الباب وانت مش واخد بالك

لا عملت كل دة وبردة فى صوت طقطقة بلاستيك بس الصوت دة كان من فترة فى الجنب الشمال واختفى فى مدة قصيرة انا رايح اعمل صيانة ال 10000 قريب هاعدى على السمكرة وشكرا لردودكم

على فكرة يا باشا كان عندي نفس الصوت وجنني وفي الآخر طلع من مسند الكنبة الخلفية طالما صوت بلاستيك متقلقش لأن ده غالباً بيبقى في حاجة فيبر او بلاستيك مش متقفلة كويس متقلقش

المشاركة الأصلية كتبت بواسطة hussin

على فكرة يا باشا كان عندي نفس الصوت وجنني وفي الآخر طلع من مسند الكنبة الخلفية طالما صوت بلاستيك متقلقش لأن ده غالباً بيبقى في حاجة فيبر او بلاستيك مش متقفلة كويس متقلقش

10000000000 شكر ياباشا على الرد هاشوف مسند الكنبة فعلا ممكن يكون هو السبب

السلام عليكم
تحية طيبة للأستاذ عاطف وشكرا جزيلا له علي كل المساعده المقدمة للاخوة الاعضاء
اتصلت اليوم بهيونداي ابو رواش للسؤال عن الخطوات المطلوبة لرفع سياراتي النترا 2008 حتي لا تحدث مشاكل اثناء فترة الرفع لأني ناوي رفعها لفترة طويله وللاسف لم اصل لأي شخص فني يفيدني في هذا الموضع لأني لا املك الخبرة الكافية في هذا الموضوع و تم تركي علي الانتظار فترات طويله و اخيرا تم اغلاق الخط من قبلهم فرجاءا كل استفساري هو ماتحتاجه السيارة من تشحيم او فك البطاريه... الي اخره حتي تظل علي حالتها .

و لكم جزيل الشكر
اخوكم محمد فاروق

يبدو أن الأستاذ/عاطف قد أقلع عن زيارة هذا الموضوع و لكني سأطرح مشكلتي لعلها تجد طريقها إليه ثم تجد طريقها إلى الحل

من فترة كدة فكرت أشتري عربية و بعد المشاورات والمداولات رسى الاختيار على ماتريكس 2010 أوتوماتيك كاش لون سماوي

و هنا بدأت المعاناه
رحت حجزتها من معرض في اسكندرية ( أنا اسكندراني)
قاللي هاتستلمها خلال 3 أيام بعد 3 أيام قاللي العربية اللي كنت هاتستلمها طلع فيها مشكلة وفراملها تقيلة واحنا مش عاوزين نديك عربية أي كلام فاستنى اسبوع كدة
قلت ماشي الصبر حلو

بعديها كلمتهم قالولي بصراحة احنا مستنيين نشوف لك عربية كويسة لأن بيبقى فيه عربيات زيرو ومركوبة وعاملة بتاع 200 كيلو واللي بيركبها بيشيل فيشة عداد السرعة قبل ما يطلع و بالتالي بتلاقيها مش عاملة أكتر من 60 كيلو ....
فاصبر شوية عشان تاخد حاجة كويسة

قلت مفيش مشكلة أصبر شوية واهو في الآخر هآخد حاجة كويسة

بعد الموضوع ده بحوالي عشر أيام قلتلهم خيييييير العربية مش موجودة ولا إيه ؟؟
قالولي على فكرة العربية موجودة أساساً بس بتبقى موديل 2009 و بيضربولها ورق إنها 2010 بس احنا بنعرفها من حاجة اسمها الــ VIN Plate

حسيت انهم بيلعبوا بيا بالرغم من اني سألت على الكلام اللي قالوه ده الناس قالولي إن فيه قدر من الصحة ....

فسحبت مقدم الحجز من عندهم و رحت أحجز عند المصرية لكن لقيتهم عاملين عرض كدة غريب مش عارف وديعة و قسط تاني (بالرغم من اني هشتري كاش )
حاولت افهمه اني عايز اخد كاش وامشي لقيته بيقولي لو مش هتاخد العرض يبقى هتاخد عربيتك في آخر شهر واحد و محدش هيروح معاك يرخصها لك ....

قلت أنا اللي غلطان من الأول أنا أروح لغبور و هو اللي يحل المشكلة (ماحدش يضحك) رحت لقيتهم ناس في منتهى الذوق الصراحة قلت لهم العربية هاتيجي امتى قاللي خلال يومين قلت له أكيد ؟؟؟؟ قاللي طبعاً
قلت يا فرج الله تاني يوم لقيته بيكلمني بيقول لي هو حضرتك عايز لون إيه ؟؟
قلت له سماوي قاللي الحقيقة هو الموجود الأزرق و النبيتي لكن السماوي كمان عشر أيام و طبعاً عشان أنا ساذج قلت مايضرش آخر حاجة بقى باكلمه لقيته بيقول لي ان شاء الله تجيب الفلوس بكرة والعربية تستلمها يوم 25 ديسمبر حسيت إن التاريخ بيعيد نفسه .......


يا ترى فيه حل للمشكلة دي ولا الأحسن أسحب فلوسي وأجيب لانسر 1300 واستلمها خلال يومين (زي ما ابن عمي عمل) ؟؟؟

يا جماعة هو ماحدش معبرني خالص ليه ؟؟؟
و م/ عاطف شكله ساب المنتدى ولا إيه ؟؟؟