الموضوع: مركز خدمة عملاء هيونداي ترحب باى شكوى من مالكي هيونداي

الأستاذ المحترم عاطف عبدالسميع ... أنا مواطن عادى وناوى بأذن الله أشترى عربيه بالقسط وقبل هذا الخطاب اليك أستقريت على هيونداى النترا .. وشيىء طبيعى أخذت الآراء والأستطلاع على كل مايتعلق بهيونداى خاصة عن طريق النت ...فبصراحة خفت وتراجعت عن شراء أى عربية ماركة هيونداى حيث وجدت السلبيات الآتية بأستثناء سيادتك من هذه السلبيات وليس مجاملة لك ولكن من خلال مدح الناس فى قيامك بحل مشاكلهم من خلال الموقع وواضح أن مراكز خدمة غبور بتعتمد عليك وحدك وهذا أكبر عيب فى قيادة وأسلوب أدارة غبور وطبعاً كلامهم صادق والسلبيات هى :
1/ غبور أسوأ مراكز صيانة فى مصر .
2/ أهمال المهندسين والعمال فى أبورواش ومراكز أخرى بالرد بأى كلام على العملاء أثناء صيانة سياراتهم .
3/ ماذا فعلتم فى موضوع السيدة/ عبير عبدالجواد التى ضيعوا عربيتها وتاهت وأنتهى بها المطاف لورشة خاصة حجزها صاحب الورشة لأن مندوب غبور لم يحضر له قطع الغيار... بالذمة ده كلام وده أسلوب عمل؟؟؟؟؟؟؟؟؟؟
4/ الناس تدفع فلوسها وكاش فى شراء سيارات هيونداى ويماطلوهم فى التسليم وفى خطابات المرور.
5/ أصبح لدى مراكز غبورمبدأ أدفع أولاً وبعدين أسأل على عربيتك عشان مفيش سيولة ماليه بالشركة والأزمة الماليه أثرت عليها ... فى أى منطق هذا .
6/ معنى كده أنا لو نويت أشترى عربية هيونداى النترا حيتعمل معايا كده وممكن أوحش من كده.
7/ على صفحات النت يقال أن معظم العاملين فى هيونداى مش هاممهم حاجه عشان الدكتور رؤؤف غبور صديق شخصى وشريك السيد/ جمال مبارك وعشان كده بيهملوا فى مصالح الناس وفلوسهم.
عموماً هذا قليل من الدروس المستفادة التى خرجت بها عن غبور ومساوىء غبور.
وفى داخلى أتمنى أن ترد عليا فى كل نقطة على حدة لأن صعبان عليا هذا الصرح العظيم يهوى ومؤكد سيؤثر على سمعة هيونداى خاصة لو الشركة الأم فى كوريا الجنوبية وصلتهم هذه السلبيات وأكثر منها.

المشاركة الأصلية كتبت بواسطة lion_heart

م عاطف بالنسبة للعرض الخاص بنايل موتورز ليه مش متفعل فى مركز قليوب ؟؟!!!
و هذا ما حدث بالمركز
http://www.nilemotors.net/nile/80394-a-7.html

ياراجل!! دانا فاكر اني كنت هاخد 10% خصم في مركز الهياكل لاني متوقع مبلغ محترم هيتدفع!

الله يطمنك :d هروح انتحر شكلي :d

صدقني أنا عملت نفس المقارنة زيك لما جيت أشتري عربية ولكن بالسؤال أكتشفت أن هناك مشاكل كثير جداً في مراكز الخدمة والصيانة لمختلف أنواع وتوكيلات السيارات في مصر ولو سيادتك ألقيت نظرة في المنتدى على باقي أنواع السيارات هتلاقي مشاكل كثير جداً أنا أشتريت هيونداي ولكن بصراحة عمري ما فكرت أروح ابو رواش علشان سمعت عن الضغط والزحمة الشديدة هناك مما يؤدي الى حدوث الكثير من الأخطاء وهذا طبعاً ليس بمبرر ولكن هناك الكثير من مراكز الخدمة المعتمدة وهي بالفعل جيدة جداً وهناك التزام ومسئولية على سبيل المثال مركز أبو غالي بالعبور . وشكراً

رحت النهارده صيانة أبو رواش .. الأربعين ألف .. كان فيه الصيانه + المشاكل الاتيه :

1- تغيير الزيت بزيت هيلكس الترا - شيل
2- تغيير فلتر زيت
3- تغيير فلتر بنزين
4- تغيير فلتر الهوا
5- تغيير تيل الفرامل
6- تغيير بوجيهات
7- كان فيه مشكله في وصله الشكمان كان عامله صوت عالي .. (تغيير وصله الشكمان)
8- كان عندي مشكله في الحدف + الطاره كانت دايما معووجه يمين مهما زبطت زوايا .


المشكله مهندس الاستقبال بيقولي طالما انك مش بتعمل صيانات الخمسات - اصلي كمن بعمل صيانات العشرات فقط - يبقي انت كده طلعت من الضمان . وقالي انت كده لو هنغيرلك وصله الشكمان تبع الضمان يبقي هتدفع تمن الصيانات الخمسات اللي عدت همه كانو تلاته بس هنخليك تدفع اتنين بس 260 جنيه اضافيه .. المهم كام يعم كله علي بعض قالي تدخل في 1200 جنيه . " مهندس / محمد مسلمه "

هل الكلام ده مظبوط ولو مش مزبوط اعمل ايه اصل العربيه لسه عندهم مبيته النهارده في ابورواش عشاان رحت متأخر


برجاء النصيحه لوجه الله .

0111917808

السلام عليكم

ازيك يا باش مهندس عاطف

انا عندي نيو اكسنت ماشيه 145 الف كيلو موديل 2006

حصل عندي ان الباور بطل يشتغل احيانا ولما بيشتغل بيطلع صوت خرخشه وبيتحرك لوحده

راجل معرفه كلم حد مين هيونداي امريكا قالي تروح التوكيل المفروض يكشفوا على الباور بجهاز معين وممكن يتعمل له برمجه

انا روحت التوكيل المهندسه استقبلتني هناك وجابت عامل وبصوا على العربيه قالتلي القطمه بايزها وعايزه تتغير وحضرتك سعرها 7 الف جنيه


ورفضت المهندسه الكريمه ان العربيه تدخل يتكشف عليها واجزمت ان هيا قطمه

واساسا انا القطمه عندي بايزه من ساعه ما خرجت العربيه من الضمان يعني من اول ما عملت 70 الف تقريبا وهي بايزه وهي عمرها ما كانت مشكله الموضوع بدا عندي كنت بغير بليه وقاعدتين موتور عند ميكانيكي عشان البليه كانت فركت ومقدرش استنى كتير طلعت من عند الميكانيكي عندي المشكله دي

يعني حتى لو القطمه بايزه او مبوشه ممكن تبقى مش هي المشكله الي مخليه الباور بايز

وبرضو صديق ليا معاه i30 فصل الباور معاه تماما راح التوكيل وبجهاز اتبرمج ومشي زي الفل

وعايز اعرف ايه مدى استجابه التوكيل لو جبت القطمه دي مثلا من خارج مصر اوريجينال او استيراد هل يقبلوا يركبوها في التوكيل

والي اعرفه انه التوكيل بيقبل تريكب قطع الغيار لو العميل جايبها وبيتكتب قطع الغيار بمعرفه العميل

هوه بصراحه رقم 7 الف على القطمه خصوصا اني ببيع العربيه مينفعش يتدفع فيها رقم زي ده وفي نفس الوقت مينفعش تتباع بباور بايز

حضرتك انا مش عارف اعمل ايه ياريت مشوره حضرتك